ខណៈ​ដែល​បញ្ហា​សំរាម ​នៅ​តែ​ជា​ប្រធាន​បទ​ដែល​ប្រជាពល​រដ្ឋ​ខ្មែរ​ទូទៅ​លើក​យក​មក​ពិភាក្សា​ជា​រឿយៗ ​គេឃើញយុវជន​មួយ​ក្រុម​កំពុង​ប្តេជ្ញា​ប្រមូល​សំរាម​ពី​លូ​ទឹក​ស្អុយ​បឹង​ត្របែក ក្នុង​រាជធានី​ភ្នំពេញ ដើម្បី​ឲ្យ​តំបន់​នោះ​ក្លាយ​ជា​រមណីយដ្ឋាន។ លោក សាន ដារ៉ាវីត អ្នកផ្តើម​គំនិត​ដឹកនាំ​ក្រុម​យុវជន​ប្រមូល​សំរាម​នៅ​លូ​ទឹក​ស្អុយ​បឹង​ត្របែក​ ​ បញ្ជាក់​ក្នុង​កម្មវិធី​ Hello VOA សំឡេង​ជំនាន់​ថ្មី​ថា ការ​ចូលរួម​របស់​យុវជន​ក្នុង​ការសម្អាត​សំរាម​ចេញ​ពី​ទីក្រុង នឹង​ជំរុញ​ឲ្យ​ប្រជាពលរដ្ឋ​កាត់​បន្ថយ​ការ​ចោល​សំរាម​ផ្តេសផ្តាស និង​ថា ការ​បង្កើន​ចំនួន​អ្នករើស​សំរាម​ឲ្យ​ច្រើន​ជាង​ចំនួន​អ្នកបោះ​ នោះ​សំរាម​នឹង​លែង​មាន​នៅ​កម្ពុជា៕ (កញ្ញា កាន់ វិច្ឆិកា, ភ្នំពេញ, ១៥ មេសា ២០១៩)

ទោះ​បី​កន្លង​មក​សាធារណជន​តែង​មាន​ការ​បារម្ភ​ចំពោះ​ម្ហូប​អាហារ​និង​កសិផល​ដែល​ប្រើប្រាស់​ជាតិ​គីមី​ក្នុង​ទី​ផ្សារ​កម្ពុជា ក៏​ស្ថានភាព​នេះ​មិន​ទាន់​បាន​ជំរុញ​ឲ្យ​ទីផ្សារ​បន្លែ​សុវត្ថិភាព​មាន​ការ​លូតលាស់​លឿន​ខ្លាំង​ទេ។ លោក ម៉េង សុងហោរ និងលោក ភុន រតនា សហស្ថាបនិកពីររូបនៃហាង«ផ្សារខ្មែរបន្លែធម្មជាតិ» ដែលបង្កើតឡើងនៅពាក់កណ្តាលឆ្នាំ២០១៨ ថ្លែងក្នុងកម្មវិធី Hello VOA «សំឡេងជំនាន់ថ្មី» កាលពីថ្ងៃទី១៨ ខែកុម្ភៈ ថា កត្តារារាំងសំខាន់ៗ គឺប្រជាពលរដ្ឋទូទៅនៅមិនទាន់មានទំនុកចិត្តចំពោះសូម្បីតែអាជីវកម្មដែលអះអាងថាផលិតនិងលក់បន្លែសុវត្ថិភាព។ ម៉្យាងទៀត តម្លៃនៃការផលិតកសិផលមានគុណភាពបែបនេះ នៅតែមានតម្លៃថ្លៃខ្ពស់ជាងបន្លែគីមី។ ប៉ុន្តែយ៉ាងនេះក្តី សហគ្រិនវ័យក្មេងទាំងពីររូបអះអាងថា បញ្ហាទាំងនេះអាចត្រូវដោះស្រាយបានបន្តិចម្តងៗ តាមការធ្វើឲ្យប្រសើរវិធីសាស្ត្រវែកញែកបន្លែសុវត្ថិភាពពីបន្លែមិនសុវត្ថិភាព និងការប្រើវិធីសាស្ត្រកសិកម្មបែបទំនើបនិងច្នៃប្រឌិតថ្មី ដែលអាចបង្កើនផលិតភាពនិងបន្ថយតម្លៃ។ ទាំងនេះជាកិច្ចប្រឹងប្រែងដោះស្រាយរបស់ហាង«ផ្សារខ្មែរបន្លែធម្មជាតិ» ដែលថែមទាំងប្រើប្រាស់ការបញ្ជាទិញនិងដឹងជញ្ជូនតាមបច្ចេកវិទ្យា app ស្មាតហ្វូនដើម្បីសម្រួលដល់អតិថិជននិងជួយជំរុញការពង្រីកទីផ្សារបន្លែធម្មជាតិក្នុងប្រទេសកម្ពុជា៕ (សឹង សុផាត, Hello VOA សំឡេងជំនាន់ថ្មី, ១៨ កុម្ភៈ ២០១៩)

មនុស្ស​ម្នាក់​មិន​អាច​ជួយ​ឲ្យ​សង្គម​មួយ​រីក​ចម្រើន​ទៅ​មុខ​បាន​ទេ​ គឺ​ត្រូវ​ការ​ការរួម​ចំណែក​ពី​មនុស្ស​គ្រប់​រូប។ សហគ្រាស​សង្គម LIFE GROUP អនុញ្ញាតឲ្យ​យុវជន​ជួប​ជុំ​គ្នា ហ៊ាន​លើក​ឡើង​ពីបញ្ហា​ផ្ទាល់​ខ្លួន​ ហើយ​រួម​គ្នា​ជួយ​ដោះស្រាយ​បញ្ហា​គ្នា​ទៅ​វិញ​ទៅ​មក។​ ក្រៅ​ពី​ជួយ​ពង្រឹង​ស្មារតី​និង​សក្តានុពល​របស់​យុវជន LIFE GROUP ក៏​មាន​កម្មវិធី​ហាត់​ប្រាណ​ពង្រឹង​ផ្លូវ​កាយ​ផង​ដែរ​ ដែល​កម្មវិធី​នោះ​ហៅថា LIFE RUN។ នេះ​បើ​យោង​តាម​លោក លីម គីមឈុន និង​កញ្ញា អៀង​ លីនដា សហស្ថាបនិក​សហគ្រាស​សង្គម​ស្តីពី​ជីវិត LIFE GROUP ដែល​បាន​ថ្លែង​នៅ​ក្នុង​កម្មវិធី Hello VOA ប្រចាំ​ខែ​មករា ឆ្នាំ២០១០៩។ (ស្រេង លក្ខិណា, Hello VOAសំឡេង​ជំនាន់​ថ្មី, វ៉ាស៊ីនតោន, ២១​ មករា ២០១៩)

បច្ចេកវិទ្យា​មាន​ច្រើន​សណ្ឋាន​តាំង​ពី​ផ្នែក​ព័ត៌មាន​វិទ្យា​ដល់​ផ្នែក​ម៉ាស៊ីន​ស្វ័យ​ប្រវត្តិ។​ បច្ចេកវិទ្យា​ជួយ​បង្កើន​ផលិតភាព​ ប្រសិទ្ធភាព​ និង​ធ្វើ​ឲ្យ​ផលិតផល​មានតម្លៃ​ទាប​ជាង​មុន។​ ផ្ទុយ​ទៅ​វិញ​បច្ចេកវិទ្យា​ក៏​មាន​ផល​ប៉ះពាល់​ជា​អវិជ្ជមាន​ដល់​ទីផ្សារ សេដ្ឋកិច្ច​និង​សង្គម​ផង​ដែរ ជា​ពិសេស​បច្ចេកវិទ្យា​អាច​បង្កើត​នូវ​គ្រឿង​ម៉ាស៊ីន​ស្វ័យ​ប្រវត្តិ​ដែល​អាច​ជំនួស​កម្លាំង​ពលកម្ម​របស់​មនុស្ស ដែល​អាច​បង្កើត​បញ្ហា​ជា​ច្រើន​បន្ថែម​ទាំង​នៅ​ក្នុង​សង្គម។ ទោះ​ជា​យ៉ាង​នេះ​ក្តី លោក ហៀន ឧត្តម បេក្ខជន​ថ្នាក់​បណ្ឌិត​ខាងផ្នែក​សេដ្ឋកិច្ច​ដែល​បាន​សិក្សា​អំពី​ផលប៉ះពាល់​របស់​បច្ចេកវិទ្យា​នេះ​ ជំរុញ​ឲ្យ​ប្រជាពលរដ្ឋ​ពង្រឹងជំនាញ​និងបង្កើនសមត្ថភាព​ប្រើប្រាស់​បច្ចេកវិទ្យា​ឲ្យ​កាន់​តែ​ខ្លាំង​ជាង​មុន​ដើម្បី​ប្រកួត​ប្រជែង​ជាមួយ​ប្រទេស​ដែល​មាន​បច្ចេកវិទ្យា​ជឿន​លឿន៕ (ស្រេង លក្ខិណា，Hello VOA សំឡេង​ជំនាន់​ថ្មី, វ៉ាស៊ីនតោន, ១៧ ធ្នូ ២០១៨)

ដើម្បី​រៀប​ចំ​ព្រឹត្តិការណ៍​មួយ​ឲ្យ​បាន​ល្អ​មាន​បួន​ចំណុច។ ទីមួយ​យើង​ត្រូវ​ដឹង​ថា​យើង​ចង់​រៀប​ចំ​កម្មវិធី​អ្វី​ដែល​មាន​ប្រយោជន៍​ហើយ​ឆ្លើយ​តប​នឹង​តម្រូវ​ការ​ក្នុង​សង្គម។ ទី២ ត្រូវ​ស្វែង​រកធនធាន​ដោយ​ការ​សហការ​ជាមួយ​នឹង​ក្រុមហ៊ុន​ឯកជន​ផ្សេងៗ។ ទី៣ ត្រូវ​ធ្វើ​ការ​ផ្សព្វផ្សាយ​ឲ្យ​មាន​ការ​ទាក់ទាញ និង​ទី៤ គឺ​ការ​រៀប​ចំ​មាតិកា​កម្មវិធី​ ​ពិធីការ ឬ​ការ​គ្រប់គ្រង​គ្រោះ​អាសន្ន​នានា​នៅ​ថ្ងៃ​ព្រឹត្តិការណ៍​ជាក់ស្តែង​ប្រកប​ដោយ​ការ​ប្រុង​ប្រយ័ត្ន។ នេះ​បើ​យោង​តាម​ប្រសាសន៍​របស់​លោក សេង ពិសិដ្ឋ នាយក​ប្រតិបត្តិ​ក្រុមហ៊ុន អនុស្សា (ANUSSA Event Planner) ដែល​ជា ក្រុមហ៊ុន​ផ្តួចផ្តើម​និង​រៀប​ចំ​ព្រឹត្តិការណ៍​នានា។​ (ស្រេង លក្ខិណា, Hello VOA សំឡេង​ជំនាន់​ថ្មី, វ៉ាស៊ីនតោន, ១៩ ​វិច្ឆិកា ២០១៨)

ស្ថាបត្យកម្ម​ដើរ​តួនាទី​សំខាន់​ក្នុង​ការ​ទាក់ទាញ​ភ្ញៀវ​ទេសចរ​មក​ទស្សនា​ដើម្បី​កំសាន្ត​និង​យល់​ដឹង​ពី​វប្បធម៌​ខ្មែរ។ ស្ថាបត្យកម្ម​ក៏​ជួយ​ដល់​វិស័យ​សេដ្ឋកិច្ច​ តាម​រយៈ​ការ​បង្កើត​ការងារ​ធ្វើ​ជា​ដើម។ ស្ថាបត្យកម្ម​ដែល​មាន​គុណភាព​ ដូចជា​ការ​សាងសង់​អាគារ​ដែល​មាន​ពន្លឺ​ ឬ​ខ្យល់​ចេញ​ចូល​គ្រប់គ្រាន់​ក៏​អាច​ជួយ​ដល់​ការ​ការពារ​បរិស្ថាន​ផង​ដែរ។ នេះ​បើ​យោង​តាម​ប្រសាសន៍​របស់​អ្នក​នាង សុខ មួយហ្គេច ស្ថាបនិក​ក្រុមហ៊ុន ស្ថាបត្យកម្ម​ BMK ដែល​បាន​ថ្លែង​នៅ​ក្នុង​កម្មវិធី Hello VOA សំឡេង​ជំនាន់​ថ្មី​ក្នុង​ខែ​តុលា​នេះ។ (ស្រេង លក្ខិណា, Hello VOA សំឡេង​ជំនាន់​ថ្មី, វ៉ាស៊ីនតោន, ១៥ ​តុលា ២០១៨)

ដោយ​សារ​តែ​ចំណង់​ចំណូល​ចិត្ត​ខាង​តុបតែង​និង​ដោយ​សារ​តែ​ចង់​ចូលរួម​កាត់​បន្ថយ​ចំណាកស្រុក អ្នកនាង រី ថានី បាន​បង្កើត​សិប្បកម្ម​ នរា ដែល​ផលិត​ចង្កៀង វាំងនន សាឡុង ខ្នើយ និង​គ្រឿង​តុបតែង​លម្អ​នានា​ ដោយ​ច្នៃ​ម៉ូត​និង​ក្បាច់​តាម​បែប​ខ្មែរ។​ កត្តា​សំខាន់​បំផុត​ដើម្បី​បង្កើត​អាជីវកម្ម​ប្រកប​ដោយ​ភាព​ជោគជ័យ​នោះ​គឺ​យើង​ត្រូវ​មាន​គោលដៅ​ច្បាស់លាស់​ និង​ភាព​មោះមុត​ក្នុង​ការបោះ​ជំហាន​ទៅ​មុខ។ នេះ​បើ​យោង​តាម​ប្រសាសន៍​របស់​អ្នក​នាង រី ថានី ដែល​បាន​ថ្លែង​នៅ​ក្នុង​កម្មវិធី Hello VOA សំឡេង​ជំនាន់​ថ្មី។ (ស្រេង លក្ខិណា, Hello VOA សំឡេង​ជំនាន់​ថ្មី, វ៉ាស៊ីនតោន, ១៧ ​កញ្ញា ២០១៨)

ការ​អនុវត្ត​គោលនយោបាយ​ជាតិ​ស្តីពី​ការ​អភិវឌ្ឍ​យុវជន​មិន​មែន​ជា​តួនាទី​របស់​រដ្ឋាភិបាល​តែ​ម្នាក់​ឯង​នោះ​ទេ យុវជន​ខ្លួន​ឯង​ផ្ទាល់​ក៏​ត្រូវ​យល់​ដឹង​អំពី​គោល​នយោបាយ​ទាំង​ ១២នេះ នេះ​បើ​យោង​តាម​លោក លៀវ គឹមឡាយ និស្សិត​ទើប​បញ្ចប់​ថ្នាក់​អនុ​បណ្ឌិត​ផ្នែក​ការ​អភិវឌ្ឍ​អន្តរជាតិ​ប្រកប​ដោយ​ចីរភាព​នៅ​ឯ​សាកល​វិទ្យាល័យ Brandeis ក្នុងសហរដ្ឋអាមេរិក។ លោក​បន្ថែម​ថា ក្នុង​ចំណោម​គោលនយោបាយ​ជាតិ​ទាំង​១២នេះ​ លោក គឹមឡាយ យល់​ថា​គួរ​ផ្តល់​អាទិភាព​ទៅ​លើ​គោល​នយោបាយ​ចំនួន៥ រួម​មាន ទី១ ​លើក​កម្ពស់​ការ​អប់រំ ការ​បណ្តុះ​បណ្តាល​និង​ការ​អភិវឌ្ឍ​សមត្ថភាព​ ទី២ បង្កើន​ការ​អប់រំ ការ​ថែទាំ និង​ការ​ផ្តល់​សេវា​សុខភាព ទី៣ បណ្តុះ​ស្មារតី​សហគ្រិនភាព​និង​ទីផ្សារ​ការងារ ទី៤ បង្កើន​ការ​ចូលរួម​របស់​យុវជន និង​ទី៥ បង្កើន​ការងារ​ស្ម័គ្រចិត្ត។​ (ស្រេង លក្ខិណា, Hello VOA សំឡេង​ជំនាន់​ថ្មី, វ៉ាស៊ីនតោន, ២០ សីហា ២០១៨)

កត្តា​សេដ្ឋកិច្ច​និង​កត្តា​សាកល​ភាវូបនីយកម្ម​ ធ្វើ​ឲ្យ​ខ្សែសង្វាក់​ផលិតកម្ម​អាហារ​មាន​ការ​ប្រែ​ប្រួល​ពី​លក្ខណៈ​បុរាណ​ទៅ​ជា​លក្ខណៈ​ទំនើប។ ការ​ប្រែ​ប្រួល​នេះ​មាន​ទាំង​ផល​វិជ្ជមាន​ និង​អវិជ្ជមាន។ សម្រាប់​ផល​វិជ្ជមាន ​អ្នក​ទទួល​ទាន​នឹង​ទទួល​បាន​ម្ហូប​អាហារ​ដែល​មាន​គុណភាព​ល្អ​ជាង​មុន មាន​ភាព​ងាយ​ស្រួល​ក្នុង​ការ​ទិញ​ម្ហូប​អាហារ​និង​ចំណេញ​ពេល​វេលា។​ ផ្ទុយ​ទៅ​វិញ ក៏​មាន​ផល​អវិជ្ជមាន​ផង​ដែរ ការ​ប្រែប្រួល​ទៅ​លក្ខណៈ​ទំនើប​អាច​ធ្វើ​ឲ្យ​ប៉ះពាល់​ដល់​កសិករ​ខ្នាត​តូច ។ រដ្ឋាភិបាល​និង​ដៃ​គូ​អភិវឌ្ឍ​គួរ​ផ្តល់​សេវាកម្ម​ផ្នែក​បច្ចេកទេស ផ្នែក​ទីផ្សារ ឬ​ផ្តល់​ជា​ប្រាក់​កម្ចី ដើម្បី​ជួយ​ឲ្យ​កសិករ​អាច​ពង្រីក​កសិដ្ឋាន​របស់​ពួក​គេ ទើប​ពួក​គាត់​អាច​មាន​លទ្ធភាព​ប្រកួត​ប្រជែង​ជាមួយ​នឹង​សាជីវកម្ម​ខ្នាត​ធំ​បាន។ នេះ​បើ​តាម​ប្រសាសន៍​របស់​លោក ថៃ​ រិទ្ធី និស្សិត​ថ្នាក់អនុបណ្ឌិត​នៅ​ឯ​សាកលវិទ្យាល័យ Massey ​ក្នុង​ប្រទេស​នូវែល​សេឡង់ ដែល​បាន​ថ្លែង​ក្នុង​កម្មវិធី Hello VOA សំឡេង​ជំនាន់​ថ្មី ប្រចាំ​ខែ មិថុនា។ (ស្រេង លក្ខិណា, Hello VOA សំឡេង​ជំនាន់​ថ្មី, វ៉ាស៊ីនតោន, ១៨ មិថុនា ២០១៨)

ឥដ្ឋ​បរិស្ថាន​ធ្វើ​ឲ្យ​ការ​សាងសង់​ប្រើប្រាស់​ស៊ីម៉ង់ត៍​តិច​និង​ប្រើប្រាស់​កម្លាំង​ពលកម្ម​តិច​ជាង​មុន ដែល​នាំ​ឲ្យ​មាន​ការ​ចំណាយ​ថវិកា​តិច​ជាង​ប្រើប្រាស់​ឥដ្ឋ​ក្រហម​ធម្មតា នេះ​បើ​យោង​តាម​លោក ហាវ គង់ងី ​នាយក​សហគ្រាសសង្គម ម៉ាយ​ឌ្រីម​ហូម (My Dream Home)។ លោក​បាន​ថ្លែង​បន្ថែម​ថា សហគ្រាស​សង្គម​របស់​លោក​មាន​គោល​បំណង​ចង់​ជួយ​ដល់​ប្រជាជន​ក្រីក្រ​ដែល​ចង់​បាន​ផ្ទះ​តាម​ក្តី​ប្រាថ្នា។ លោក​ គង់ងី បាន​ចូលរួម​ក្នុង​កម្មវិធី​ Hello VOA សំឡេង​ជំនាន់​ថ្មី​នៅ​ក្នុង​បន្ទប់​ផ្សាយ​របស់​វីអូអេ​នៅ​ក្នុង​រដ្ឋធានី​វ៉ាស៊ីនតោន​នៅ​ថ្ងៃ​ទី២១ ខែ​ឧសភា ឆ្នាំ២០១៨។ (ស្រេង លក្ខិណា, Hello VOA សំឡេង​ជំនាន់​ថ្មី, វ៉ាស៊ីនតោន, ២១ ឧសភា ២០១៨)