Pentsionistak astero, feministak martxoaren zortziko mobilizazio erraldoietan, greba irakaskuntzan, Altsasuko gazteekiko elkartasun ekimenak nonahi…; gure kaleak betetzen ari dira eta iruditzen zait ez dela kasualitatea, pizten ari den haserrearen adierazpena baizik. Mobilizazio ezberdinez ari gara, jakina, eta honek azterketa zorroztea eskatzen digu, sinplismoan ez erortzeko, baina protesta guzietan edo gehienetan, bederen, sakontzen ari den egoneza atzematen ahal da.

PuntuEUS Fundazioak euskarak Interneten duen presentzia aztertu du eta egoera «osasuntsua» dela nabarmendu du Josu Waliño zuzendariak. Hala ere, azken hiru urteetan erabilera «egonkor» mantendu dela azaldu du eta estrategiak behar direla «indartzeko». Une honetan, 8.200 webgunek dute .eus domeinua eta urte bukaeran 10.000 izatera iristea da helburua.

Ostegunero bezala, Iñaki Sotok biharko GARAren portada laburbildu digu. Argazki nagusia, EAEko irakaskuntza grebari eskainiko diotela aurreratu digu eta albiste nagusiak berriz, Kalegorrian saioko Amaia Zurutuza kazetariak egindako elkarrizketa bat izango du oinarri. Zurutuzak Puerto III espetxea ezagutu duten Arantza Zulueta eta Txema Matanzas preso ohiak elkarrizketatuko ditu, Xabier Rey nafarraren heriotzetik astebetera.

Bi egun baino ez dira falta larunbat honetarako pentsionistek deitu dituzten manifestazioetarako eta ikusitakoak ikusita, ziurrenik hego Euskal Herriko pentsionistek sekula egin duten mobilizaziorik jendetsuena izango da asteburukoa. Izan ere, pentsionista elkarteek egindako deialdiak sekulako atxikimendua lortu du. Besteak beste, sindikatu guztiek pentsio duinen alde larunbatean ospatuko diren mobilizazioetan parte hartzeko deia luzatu dute.

Ez dakit konturatu zareten, baina oso txarrak gara informazioarekin lanean.  Orokorrean txarrak eta espezifikoki txarrak garela uste dut informazioa jasotzen, baliatzen, gordetzen, helarazten. Informazioarekin lotutako fase, ekintza, jardun guztiekin nahiko eskasak garela esango nuke.

Jarraipen zabala izan du gaurko grebak Araba, Bizkaia eta Gipuzkoako unibertsitatez kanpoko hezkuntzan. LABk emandako datuen arabera, irakasleen kolektiboan jarraipena %70ekoa izan da. Eta Steilasekin batera sektore guztietan greba deitu duen ELAren arabera, “jarraipen oso zabala” izan du deialdiak: %70ekoa irakasleetan, %65ekoa sukalde eta garbiketan, %60koa heziketa berezian eta %30ekoa Haurreskoletan.

Gakoa saioa bukatzeko, gure harreta bereganatu duen albistea aipatu nahi izan dugu gaurkoan. Bergarako Gaztetxeko Dynamo Zineklubaren ekimenez, “Euskal Herriko zinemarik txikiena” eraikiko dute Kartzela Zaharreko ziega izandako batean. 2005an itxi zuten Bergarako Novedades areto zaharreko besaulkiak erabiliko dituzte zinema espazioa egokitzeko.

Pasa den asteko greba feministaren testuinguruan Leioko EHUko Kanpusean gertatu zen erasoa ezagutzeko, unibertsitateko mugimendu feministako kide bat elkarrizketatu dugu gaur, Gakoa saioan.

Iñigo Gogoan plataformak Ertzaintza “beste Cabacas baten bila” dabilela salatu du. Azken asteetan gertatu direnak hausnartzeko oharrean dio hori plataformak.  Gogoratu, Athletic eta Spartaken partidaren atariko istiluetan ertzain bat zendu eta gero, poliziak gomazko piloten erabilera berreskuratzeko eskaria egin duela.

Arabako Batzar Nagusien egoitza parean dozenaka lagunek elkarretaratzea egin dute gaur goizean, Abiadura Handiko Trenak Arabako lautadan eragingo lukeen kalteaz ohartarazi eta proiektua gelditu dezatela exijitzeko.  Elkarretaratzean, bestak beste, Asparrenako, Dulantziko eta Donemillagako alkateek parte hartu dute eta proiektuaren kontrako 7000 alegazio aurkeztu dituztela gogorarazi dute, sekulako kopurua kontutan hartuta Lautadako hautesle errolda 9000 lagunekoa dela.