Í kjölfar Black lives matter hreyfingarinnar hefur verið mikið rætt um rasisma í samfélaginu á Íslandi og annars staðar. En sú umræða hefur að mestu leyti beinst að kynþætti, en það má segja að á Íslandi sé einnig að finna annars konar fordóma sem beinast gegn uppruna og þjóðerni, sem er útlendingaandúð. Í þessum þætti skoðar Chanel Björk Sturludóttir hugtakið útlendingaandúð og ræðir við stjórnmálafræðingin Ólaf Þ Harðarsson um sögu þess innan stefna íslenskra stjórnvalda. Einnig er rætt við Semu Erlu Serdar um stöðu flóttamanna og hælisleitenda á Íslandi og aðkomu Útlendingastofnunar í þeim málum. Wiola Ujazdowska gefur að lokum innsýn inn í reynsluheim pólskra innflytjenda hér á landi, sem hún lýsir sem ljúfsárri upplifun.

Menningarnám er ekki nám sem er stundað við háskóla, heldur arðrán yfirráðandi hópa á þáttum úr menningu undirokaðra hópa. Hinsvegar er menning fljótandi og við tökum og fáum lánað frá öðrum menningarsvæðum og menningarkimum daglega. En vald hefur þar vægi, sem vert er að skoða. Í þættinum býður Chanel Björk Sturludóttir fjórum viðmælendum í pallborðsumræður um menningarnám. Þátttakendur í pallborðinu eru Stephen Albert Björnsson, blandaður Íslendingur, Sunna Sasha Larosiliere, blandaður Íslendingur og starfsmaður Utanríkisráðuneytisins, Þórarinn Hjartarson, umsjónarmaður hlaðvarpsins Ein Pæling, og Silja Björk Björnsdóttir, rithöfundur og umsjónarmaður hlaðvarpsins Kona er nefnd.

Er kynþáttahyggja nýtt fyrirbæri á Íslandi? Hafa þessar hugmyndir og fordómar gagnvart kynþáttunum borist til Íslands með aukinni hnattvæðingu? Eða á þetta vandamál djúpstæðar rætur í íslenskri menningu sem þjóðin hefur ekki áttað sig á? Chanel Björk Sturludóttir hittir Kristínu Loftsdóttur mannfræðing í leit sinni að svörum við þessum spurningum. Hún ræðir einnig við Dýrfinnu Benitu Basalan um hennar upplifun af kynferðislegum kynþáttafordómum vegna uppruna síns sem Íslendingur af asískum uppruna og Kjartan Páll Sveinsson segir frá kerfisbundnum rasisma hér á landi, þá sérstaklega í garð innflytjenda.

Í kjölfarið á mótmælunum undir formerkjum Black Lives Matter, sem áttu sér stað í Bandaríkjunum og víða um heiminn í vor, komu margir blandaðir, litaðir eða aðfluttir Íslendingar fram og deildu sinni upplifun af kynþáttafordómum og misrétti hér á landi. Hvað höfum við lært af þessari umræðu? Hvernig hafa mótmælin haft áhrif á skoðanir og skilning okkar á fjölmenningu hér á landi? Í þessum þætti er rætt við Birgittu Elínu Hassell um ástæður þess að hún fann sig knúna til að deila upplifun sinni af kynþáttafordómum á Íslandi. Einnig er rætt við Halldór Halldórsson, Lóu Björk Björnsdóttur og Gunnar Smára Jóhannesson um þeirra upplifun af umræðunni um kynþáttafordóma hér á landi en þau eru öll hvítir Íslendingar.

Hvaða þýðingu hefur fjölmenningarþróunin fyrir íslenskt samfélag? Hvernig sjáum við hana fyrir okkur? Í lokaþættinum veltum við fyrir okkur hvað framtíðin ber í skauti sér. Síðustu ár hefur íslenskt samfélag gengið í gegnum miklar breytingar samfara því að aldrei hafa fleiri flutt til landsins. Chanel Björk ræðir við Elizu Reid forsetafrú, sem er einmitt af erlendum uppruna, um fjölmenningarsamfélagið á Íslandi og framtíðina. Auk þess ræðir hún við viðmælendur sína úr öðrum þáttum um það hvernig þau sjá fjölmenningarþróunina á Íslandi fyrir sér. Viðmælendur eru: Sanna Magdalena Mörtudóttir, Unnsteinn Manuel Stefánsson, Aldís Amah Hamilton og Sigurður Andrean Sigurgeirsson.

Hvernig hefur tungumál áhrif á upplifun fólks á fjölbreytileika samfélagsins? Á Íslandi er fjölmenning og tölur sýna að fólki af erlendum uppruna fer fjölgandi. Er nóg að tala íslensku til að teljast Íslendingur? Hafa heitin „innflytjandi“ og „manneskja af erlendum uppruna“ áhrif á það hvort fólk er álitið Íslendingar?

Viðmælendur eru Anton Örn Karlsson, deildarstjóri hjá Hagstofu Íslands, Ari Páll Kristinsson, rannsóknarprófessor hjá Árnastofnun, Miriam Petra Ómarsdóttir Awad og María Thelma Smáradóttir.

Í þættinum fáum við að kynnast því hvernig er að vera af blönduðum uppruna á Íslandi hvað hárgerð varðar, aðallega hár fólks af afrískum, suðuramerískum eða karabískum uppruna, afróhár. Chanel Björk tók tali þrjár stelpur af blönduðum uppruna sem hafa allar afróhár. Þær spjölluðu saman um þemalag þáttarins, Don't touch my hair með Solange, um hárið á sér og fegurðarstaðalímyndir samfélagsins. Viðmælendur eru: Sunna Sasha Larosiliere, Indy Alda Saouda Yansane og Kanema Erna Mashinkila.

Í þættinum spyr Chanel Björk: Hverjir eru Íslendingar og hvernig líta þeir út? Hver er tengingin milli þjóðernis og útlits? Hún ræðir við Kára Stefánsson forstjóra Íslenskrar erfðagreiningar, Kristínu Loftsdóttur mannfræðing og Sönnu Magdalenu Mörtudóttur borgarfulltrúa Sósíalistaflokksins um uppruna Íslendinga og kynþáttahyggju á Íslandi.

Í þessum þætti heldur Chanel Björk áfram að skoða hugtök

eins og þjóðerni og uppruna með viðtölum við blandaða Íslendinga og einnig fræðimenn á ýmsum sviðum, en nú frá sálfræðilegu sjónarhorni. Hefur þjóðerni áhrif á sköpun sjálfsímyndar - bæði hvað varðar eigið álit á sjálfið og einnig stöðu innan samfélags. Hvaða

áhrif hefur það á sköpun sjálfsímyndar að tilheyra fleiri en einum menningarheimum? Er fólk sem tilheyrir tveimur ólíkum menningarheimum með sterkari sjálfsímynd? Eða leiðir togstreita milli menningarheima til skekkju í sjálfsímyndinni? Í þessum þætti leitar

Chanel Björk að svara við þessum spurningum með viðtölum við blandaða Íslendinga auk viðtala við sálfræðingana Rannveigu Sigurvinsdóttur og Fanny Gyberg. Viðmælendur eru: Sigurður Andrean Sigurgeirsson, Unnsteinn Manuel Stefánsson og Diana Rós Breckmann Jónatansdóttir.

Í þessum fyrsta þætti af sex veltum við fyrir okkur spurningunni „Hvaðan ertu?“ og því hvernig fólk af blönduðum uppruna svarar henni. Hvernig svörum við ef fjölskyldusaga okkar er ekki einföld og teygir jafnvel anga sína víðs vegar um heiminn? Er það fæðingarstaður okkar sem segir til um hvaðan við erum? Eða vegabréfið okkar? Í þessum þætti leitar Chanel Björk svara við þessum spurningum með viðtölum við blandaða Íslendinga og Guðmund Hálfdánarson, sagnfræðing. Viðmælendur eru: Aldís Amah Hamilton, Davíð Katrínarson og Ragnhildur Melot.