Берасцейскі блогер Аляксандр Кабанаў, які нядаўна выйшаў на волю, цалкам адбыўшы свой тэрмін, стаяў ля самых вытокаў пратэстаў-2020. Але паколькі затрымалі яго ўжо 15 чэрвеня 2020-га, задоўга да жнівеньскіх падзей, толькі цяпер удалося даведацца важныя дэталі прэзідэнцкай кампаніі, якая змяніла лёс сотняў тысяч беларусаў.

У вялікай гутарцы мы гаворым пра тое, калі Ціханоўскі вырашыў удзельнічаць у выбарах і ці мог ён быць праектам Масквы, як Кабанаў вылічыў агента ў атачэнні Святланы Ціханоўскай, каторы расказваў, што рыхтуюцца правакацыі і выбухі. Чаму Кабанаў пайшоў супраць сістэмы, калі ў свой час ён будаваў рэзідэнцыю Лукашэнкі ў Белавежскай пушчы, і як выглядае гэты самы «Прычал».

Кабанаў прайшоў праз самую жорсткую калонію Беларусі — наваполацкую. У інтэрв’ю ён распавядае пра суворыя парадкі гэтага месца, жахлівую экалогію, мясцовых дактароў, якіх Кабанаў называе садыстамі. Апісвае розных сукамернікаў: забойцу-стукача і майстра спорту па шахматах. Згадвае, як яго камеры ўдалося абараніць Віктара Куўшынава, якога хацелі кінуць гніць у карцары. І сустрэчу з Віктарам Бабарыкам, якога Кабанаў параўноўвае з ледаколам.