ഈ വർഷത്തെ ശിശുദിനവും ഒപ്പം പോക്സോ നിയമത്തിന്റെ പതിനൊന്നാം വാർഷികവും ശ്രദ്ധേയമായത് ആലുവയിൽ നടന്ന പീഡന കൊലപാതക കേസിന്റെ വിധിയിലൂടെയാണ്. പോക്സോ കേസുകൾ തീരാൻ കാലതാമസം വരുന്നു എന്ന ആക്ഷേപം നിലനിൽക്കെയാണ് ഈ അതിവേ​ഗ വിധി. സംസ്ഥാനത്തെ പോക്സോ കേസുകളുടെ വിചാരണ പൊതുവെ വേ​ഗത്തിൽ പൂർത്തിയാകാറുണ്ടോ? നീതി എത്രത്തോളം നടപ്പാക്കപ്പെടുന്നുണ്ട്? മോണിം​ഗ് വോയ്സിൽ സംസാരിക്കുന്നു പബ്ലിക് പ്രോസിക്യൂട്ടർ അഡ്വ. ലിജി മധു.

കേരളത്തിന്റെ നെല്ലറയായ കുട്ടനാട്ടിൽ ഒരു കർഷക ആത്മഹത്യ കൂടി സംഭവിച്ചിരിക്കുന്നു. സപ്ലൈക്കോ നെല്ല് സംഭരിച്ചതിന്റെ വില ബാങ്ക് വായ്പയായി നൽകുന്നതുമായി ബന്ധപ്പെട്ട പ്രശ്നങ്ങളാണ് കെ.ജി പ്രസാദ് എന്ന കർഷകനെ ആത്മഹത്യയിലേക്ക് നയിച്ചത്. കുറച്ച് മാസങ്ങൾക്ക് മുമ്പും ഈ പ്രശ്നം കേരളത്തിൽ വ്യാപകമായി ചർച്ച ചെയ്യപ്പെടുകയുണ്ടായി. എന്തുകൊണ്ടാണ് കർഷകർ വീണ്ടും വഞ്ചിക്കപ്പെടുന്നത്? കർഷകരുടെ അവകാശങ്ങൾക്ക് വേണ്ടി പ്രവർത്തിക്കുന്ന പി.ടി ജോൺ മോണിം​ഗ് വോയ്സിൽ സംസാരിക്കുന്നു.

അതിരൂക്ഷമായ സാമ്പത്തിക പ്രതിസന്ധിയിലൂടെ കടന്നുപോവുകയാണ് കേരളം. ദൈനംദിന ആവശ്യത്തിന് പോലും പണം കണ്ടെത്താൻ കഴിയാത്ത അവസ്ഥയാണുള്ളതെന്ന് ചീഫ് സെക്രട്ടറി തന്നെ ഹൈക്കോടതിയെ അറിയിച്ചു. പിന്നാലെ മുഖ്യമന്ത്രിയും പ്രതിസന്ധിയുണ്ട് എന്ന് തുറന്ന് സമ്മതിച്ചു. ആരെയെല്ലാമാണ് ഈ പ്രതിസന്ധി രൂക്ഷമായി ബാധിക്കാൻ പോകുന്നത്? മോണിം​ഗ് വോയ്സിൽ, മുതിർന്ന സാമ്പത്തിക ശാസ്ത്രജ്ഞൻ ഡോ. എം.എ ഉമ്മൻ സംസാരിക്കുന്നു.

ഒരു സമൂഹം എത്രമാത്രം സാംസ്കാരികമായി ഉയർന്നതാണ് എന്നതിന്റെ അളവുകോലാണ് നൈറ്റ് ലൈഫ് അഥവാ പൊതു ഇടങ്ങളിലെ രാത്രി ജീവിതം. കേരള സമൂഹം ഇനിയും അതിനുള്ള പക്വത കൈവരിച്ചിട്ടില്ല എന്നാണോ തിരുവനന്തപുരം മാനവീയം വീഥിയിൽ നൈറ്റ് ലൈഫിന് ഇടയിലുണ്ടായ പ്രശ്നങ്ങൾ സൂചിപ്പിക്കുന്നത്? പൊലീസ് സംരക്ഷണത്തോടെ സാധ്യമാകേണ്ടതാണോ രാത്രി ജീവിതം? മോണിം​ഗ് വോയ്സിൽ, സാമൂഹ്യ പ്രവർത്തക ഡോ. എ.കെ ജയശ്രീ സംസാരിക്കുന്നു.

ജനാധിപത്യത്തിന്റെയും സർ​ഗാത്മകതയുടെയും ഇടങ്ങളാകേണ്ട ക്യാമ്പസുകൾ സമ​ഗ്രാധിപത്യത്തിന്റെയും ആൺകയ്യൂക്കിന്റെയും രാഷ്ട്രീയവേദിയായി മാറുന്ന കാഴ്ച പതിവായിരിക്കുന്നു. യൂണിയൻ തെരഞ്ഞെടുപ്പുമായി ബന്ധപ്പെട്ട് അടുത്തിടെ ഉയർന്നുവന്ന സംഘർഷങ്ങൾ അതിന്റെ ഭാ​ഗമാണ്. ഈ സാഹചര്യത്തിൽ എല്ലാവർക്കും പ്രവർത്തിക്കാനുള്ള സ്വാതന്ത്ര്യമുണ്ടാകുക എന്നത് എന്തുകൊണ്ട് വിദ്യാർത്ഥി രാഷ്ട്രീയത്തിൽ പ്രധാനമാണ് എന്ന് വിശദമാക്കുന്നു, മോണിം​ഗ് വോയ്സിൽ എ.ഐ.എസ്.എഫ് നേതാവ് അഡ്വ. നിമിഷ രാജു.

കേരളത്തെ ലോക ബ്രാൻഡ് ആക്കുമെന്ന മുഖ്യമന്ത്രിയുടെ പ്രഖ്യാപനത്തോടെ തലസ്ഥാനത്ത് കേരളീയം 2023 ആരംഭിച്ചിരിക്കുകയാണ്. കേരളത്തിന്റെ നേട്ടങ്ങളെ ലോകത്തിന് മുന്നിൽ അവതരിപ്പിക്കുകയാണ് ലക്ഷ്യം. എന്നാൽ അങ്ങനെ അവതരിപ്പിക്കപ്പെടാവുന്ന നേട്ടങ്ങളിലൂടെയാണോ കേരളം കടന്നുപോകുന്നത്? ഈ ആഘോഷത്തെ വിലയിരുത്തുകയാണ്, മോണിം​ഗ് വോയ്സിൽ മുൻ പ്ലാനിം​ഗ് ബോർഡ് അം​ഗവും രാഷ്ട്രീയ നേതാവുമായ സി.പി ജോൺ.

കഴിഞ്ഞ ദിവസങ്ങളിൽ കേരളം വ്യാപകമായി ചർച്ച ചെയ്തത് രണ്ട് നടന്മാരുമായി ബന്ധപ്പെട്ട വിഷയങ്ങളാണല്ലോ, സുരേഷ് ​ഗോപിയും വിനായകനും. തൊഴിലിടങ്ങളിൽ പോലും സ്ത്രീയെ വ്യക്തിയായി പരി​ഗണിക്കാത്ത പുരുഷാധികാരവും കറുത്ത ശരീരങ്ങളോട് പൊലീസും പൊതുബോധവും വച്ചു പുലർത്തുന്ന ജാതി വേർതിരിവുകളുമാണ് ഈ രണ്ട് സംഭവങ്ങളിൽ വെളിപ്പെടുന്നത്. ഇക്കാര്യം വിലയിരുത്തുകയാണ് മോണിം​ഗ് വോയ്സിൽ സാമൂഹ്യപ്രവർത്തകയായ അഡ്വ. കുക്കു ദേവകി.

സിനിമയ്ക്കെതിരെ മോശം അഭിപ്രായം രേഖപ്പെടുത്തുന്നതിന്റെ പേരിൽ കേസെടുക്കുന്ന രീതി കേരളത്തിൽ ആരംഭിച്ചിരിക്കുന്നു. റിവ്യൂ ബോംബിം​ഗ് എന്നാരോപിച്ച് നടത്തുന്ന ഈ പൊലീസ് ഇടപെടലിന് ഹൈക്കോടതിയുടെ നിരീക്ഷണങ്ങളും കാരണമാണ്. ഈ സാഹചര്യത്തിൽ, സിനിമയ്ക്കും കാണിക്കും ഇടയിൽ ഭരണകൂടത്തെ വലിച്ചിഴയ്ക്കുന്നത് സിനിമ എന്ന കലാരൂപത്തിന് തന്നെ ഹാനീകരമായി മാറും എന്ന് നിരീക്ഷിക്കുന്നു മോണിം​ഗ് വോയ്സിൽ, ചലച്ചിത്ര നിരൂപകനും എഴുത്തുകാരനുമായ സി.എസ് വെങ്കിടേശ്വരൻ.

വിദ്യാരംഭച്ചടങ്ങുകൾ വിപുലമായി നടക്കുന്ന ദിവസമാണിന്ന്. എന്നാൽ, എല്ലാവർക്കും തുല്യാവകാശത്തോടെ അക്ഷരജ്ഞാനത്തിലേക്ക് പ്രവേശിക്കാൻ സാധിക്കുന്ന ഒന്നായിരുന്നില്ല മുമ്പ് ഈ ചടങ്ങുകൾ എന്നത് മറക്കരുത്. അയ്യൻകാളി, സാവിത്രി ഫൂലെ, ഫാത്തിമ ഷെയ്ഖ് തുടങ്ങിയ നിരവധി സാമൂഹ്യപരിഷ്കർത്താക്കളുടെ ശ്രമഫലമായാണ് അറിവ് നിഷേധിക്കപ്പെട്ടവർക്കും അക്ഷരം പഠിക്കാൻ അവസരമുണ്ടായത് എന്ന സത്യം വിജയദശമി ആഘോഷങ്ങളിൽ മറഞ്ഞുപോകരുത് എന്ന് ഓർമ്മിപ്പിക്കുന്നു, മോണിം​ഗ് വോയ്സിൽ രേഖാരാജ്.

പലവിധ കാരണങ്ങളാൽ കേരളത്തിൽ അടുത്തകാലത്തായി തീവണ്ടി യാത്ര വളരെ ക്ലേശകരമായി മാറിയിരിക്കുന്നു. ഇപ്പോൾ അവധി ​ദിനങ്ങൾ ആയതിനാൽ തിരക്ക് കൂടുതൽ രൂക്ഷമാണ്. എന്തെല്ലാമാണ് ഈ യാത്രാ ​ദുരിതം പരിഹരിക്കാനുള്ള വഴികളെന്ന് സംസാരിക്കുന്നു, മോണിം​ഗ് വോയ്സിൽ റെയിൽവെ പാസഞ്ചേഴ്സ് അസോസിയേഷൻ ഭാരവാഹിയായ പി കൃഷ്ണകുമാർ.