ലോകസഭയിലും സംസ്ഥാന നിയമസഭകളിലും സ്ത്രീകള്‍ക്ക് 33 ശതമാനം സംവരണം ഉറപ്പാക്കുന്ന വനിതാ സംവരണ ബിൽ പാസാക്കപ്പെട്ടെങ്കിലും 2024ലെ ലോകസഭാ തിരഞ്ഞെടുപ്പിൽ വനിതാ സംവരണം നടപ്പിലാകില്ല എന്നാണ് വ്യവസ്ഥ. എന്നാൽ വരുന്ന തെരഞ്ഞെടുപ്പുകളിൽ 33 ശതമാനം സീറ്റുകളിലെങ്കിലും സ്ത്രീകളെ മത്സരിപ്പിക്കാൻ രാഷ്ട്രീയ പാർട്ടികൾ തയ്യാറാകണം എന്ന ക്യാമ്പയിനുമായി മുന്നോട്ടുപോവുകയാണ് തുല്യപ്രാതിനിധ്യ പ്രസ്ഥാനം. ഈ മുന്നേറ്റത്തിന്റെ സാമൂഹ്യപ്രാധാന്യത്തെക്കുറിച്ച് മോണിം​ഗ് വോയ്സിൽ സംസാരിക്കുന്നു പ്രസ്ഥാനത്തിന്റെ കൺവീനറും സാമൂഹ്യപ്രവർത്തകയുമായ എം സുൽഫത്ത്.

54-ാമത് രാജ്യാന്തര ചലച്ചിത്രോത്സവത്തിന് ​ഗോവയിൽ തുടക്കമായിരിക്കുകയാണ്. വിവിധ വിഭാഗങ്ങളിലായി 270ലേറെ ചിത്രങ്ങളാണ് ഇത്തവണ പ്രദർശനത്തിനുള്ളത്. ഈ വർഷത്തെ ​ഗോവ ഫെസ്റ്റിവലിൽ പ്രതീക്ഷിക്കുന്ന സിനിമാനുഭവങ്ങളെക്കുറിച്ച് മോണിം​ഗ് വോയ്സിൽ സംസാരിക്കുന്നു സംവിധായകനും ചലച്ചിത്ര നിരൂപകനുമായ കെ ​ഗോപിനാഥൻ.

ഏറെ ആഘോഷങ്ങളോടെ നവകേരള സദസ് ആരംഭിച്ചിരിക്കുകയാണ്. എന്താണ് ഈ ആഘോഷത്തിന്റെ മറുവശം ? കേരളത്തിന്റെ എല്ലാ മേഖലകളിലേക്കും ഫ്യൂഡൽ മൂല്യങ്ങളും സവർണ്ണബോധവും കടന്നുകയറുകയാണോ? സാമ്പത്തിക സംവരണം നടപ്പിലാക്കാൻ തിടുക്കം കൂട്ടിയ കേരളം ജാതി സെൻസസിനെക്കുറിച്ച് മൗനം പാലിക്കുന്നത് എന്തുകൊണ്ടാണ്? മോണിം​ഗ് വോയ്സിൽ, ചിന്തകനും പ്രഭാഷകനുമായ സണ്ണി എം കപിക്കാട് സംസാരിക്കുന്നു.

ഈ വർഷത്തെ ശിശുദിനവും ഒപ്പം പോക്സോ നിയമത്തിന്റെ പതിനൊന്നാം വാർഷികവും ശ്രദ്ധേയമായത് ആലുവയിൽ നടന്ന പീഡന കൊലപാതക കേസിന്റെ വിധിയിലൂടെയാണ്. പോക്സോ കേസുകൾ തീരാൻ കാലതാമസം വരുന്നു എന്ന ആക്ഷേപം നിലനിൽക്കെയാണ് ഈ അതിവേ​ഗ വിധി. സംസ്ഥാനത്തെ പോക്സോ കേസുകളുടെ വിചാരണ പൊതുവെ വേ​ഗത്തിൽ പൂർത്തിയാകാറുണ്ടോ? നീതി എത്രത്തോളം നടപ്പാക്കപ്പെടുന്നുണ്ട്? മോണിം​ഗ് വോയ്സിൽ സംസാരിക്കുന്നു പബ്ലിക് പ്രോസിക്യൂട്ടർ അഡ്വ. ലിജി മധു.

കേരളത്തിന്റെ നെല്ലറയായ കുട്ടനാട്ടിൽ ഒരു കർഷക ആത്മഹത്യ കൂടി സംഭവിച്ചിരിക്കുന്നു. സപ്ലൈക്കോ നെല്ല് സംഭരിച്ചതിന്റെ വില ബാങ്ക് വായ്പയായി നൽകുന്നതുമായി ബന്ധപ്പെട്ട പ്രശ്നങ്ങളാണ് കെ.ജി പ്രസാദ് എന്ന കർഷകനെ ആത്മഹത്യയിലേക്ക് നയിച്ചത്. കുറച്ച് മാസങ്ങൾക്ക് മുമ്പും ഈ പ്രശ്നം കേരളത്തിൽ വ്യാപകമായി ചർച്ച ചെയ്യപ്പെടുകയുണ്ടായി. എന്തുകൊണ്ടാണ് കർഷകർ വീണ്ടും വഞ്ചിക്കപ്പെടുന്നത്? കർഷകരുടെ അവകാശങ്ങൾക്ക് വേണ്ടി പ്രവർത്തിക്കുന്ന പി.ടി ജോൺ മോണിം​ഗ് വോയ്സിൽ സംസാരിക്കുന്നു.

അതിരൂക്ഷമായ സാമ്പത്തിക പ്രതിസന്ധിയിലൂടെ കടന്നുപോവുകയാണ് കേരളം. ദൈനംദിന ആവശ്യത്തിന് പോലും പണം കണ്ടെത്താൻ കഴിയാത്ത അവസ്ഥയാണുള്ളതെന്ന് ചീഫ് സെക്രട്ടറി തന്നെ ഹൈക്കോടതിയെ അറിയിച്ചു. പിന്നാലെ മുഖ്യമന്ത്രിയും പ്രതിസന്ധിയുണ്ട് എന്ന് തുറന്ന് സമ്മതിച്ചു. ആരെയെല്ലാമാണ് ഈ പ്രതിസന്ധി രൂക്ഷമായി ബാധിക്കാൻ പോകുന്നത്? മോണിം​ഗ് വോയ്സിൽ, മുതിർന്ന സാമ്പത്തിക ശാസ്ത്രജ്ഞൻ ഡോ. എം.എ ഉമ്മൻ സംസാരിക്കുന്നു.

ഒരു സമൂഹം എത്രമാത്രം സാംസ്കാരികമായി ഉയർന്നതാണ് എന്നതിന്റെ അളവുകോലാണ് നൈറ്റ് ലൈഫ് അഥവാ പൊതു ഇടങ്ങളിലെ രാത്രി ജീവിതം. കേരള സമൂഹം ഇനിയും അതിനുള്ള പക്വത കൈവരിച്ചിട്ടില്ല എന്നാണോ തിരുവനന്തപുരം മാനവീയം വീഥിയിൽ നൈറ്റ് ലൈഫിന് ഇടയിലുണ്ടായ പ്രശ്നങ്ങൾ സൂചിപ്പിക്കുന്നത്? പൊലീസ് സംരക്ഷണത്തോടെ സാധ്യമാകേണ്ടതാണോ രാത്രി ജീവിതം? മോണിം​ഗ് വോയ്സിൽ, സാമൂഹ്യ പ്രവർത്തക ഡോ. എ.കെ ജയശ്രീ സംസാരിക്കുന്നു.

ജനാധിപത്യത്തിന്റെയും സർ​ഗാത്മകതയുടെയും ഇടങ്ങളാകേണ്ട ക്യാമ്പസുകൾ സമ​ഗ്രാധിപത്യത്തിന്റെയും ആൺകയ്യൂക്കിന്റെയും രാഷ്ട്രീയവേദിയായി മാറുന്ന കാഴ്ച പതിവായിരിക്കുന്നു. യൂണിയൻ തെരഞ്ഞെടുപ്പുമായി ബന്ധപ്പെട്ട് അടുത്തിടെ ഉയർന്നുവന്ന സംഘർഷങ്ങൾ അതിന്റെ ഭാ​ഗമാണ്. ഈ സാഹചര്യത്തിൽ എല്ലാവർക്കും പ്രവർത്തിക്കാനുള്ള സ്വാതന്ത്ര്യമുണ്ടാകുക എന്നത് എന്തുകൊണ്ട് വിദ്യാർത്ഥി രാഷ്ട്രീയത്തിൽ പ്രധാനമാണ് എന്ന് വിശദമാക്കുന്നു, മോണിം​ഗ് വോയ്സിൽ എ.ഐ.എസ്.എഫ് നേതാവ് അഡ്വ. നിമിഷ രാജു.

കേരളത്തെ ലോക ബ്രാൻഡ് ആക്കുമെന്ന മുഖ്യമന്ത്രിയുടെ പ്രഖ്യാപനത്തോടെ തലസ്ഥാനത്ത് കേരളീയം 2023 ആരംഭിച്ചിരിക്കുകയാണ്. കേരളത്തിന്റെ നേട്ടങ്ങളെ ലോകത്തിന് മുന്നിൽ അവതരിപ്പിക്കുകയാണ് ലക്ഷ്യം. എന്നാൽ അങ്ങനെ അവതരിപ്പിക്കപ്പെടാവുന്ന നേട്ടങ്ങളിലൂടെയാണോ കേരളം കടന്നുപോകുന്നത്? ഈ ആഘോഷത്തെ വിലയിരുത്തുകയാണ്, മോണിം​ഗ് വോയ്സിൽ മുൻ പ്ലാനിം​ഗ് ബോർഡ് അം​ഗവും രാഷ്ട്രീയ നേതാവുമായ സി.പി ജോൺ.

കഴിഞ്ഞ ദിവസങ്ങളിൽ കേരളം വ്യാപകമായി ചർച്ച ചെയ്തത് രണ്ട് നടന്മാരുമായി ബന്ധപ്പെട്ട വിഷയങ്ങളാണല്ലോ, സുരേഷ് ​ഗോപിയും വിനായകനും. തൊഴിലിടങ്ങളിൽ പോലും സ്ത്രീയെ വ്യക്തിയായി പരി​ഗണിക്കാത്ത പുരുഷാധികാരവും കറുത്ത ശരീരങ്ങളോട് പൊലീസും പൊതുബോധവും വച്ചു പുലർത്തുന്ന ജാതി വേർതിരിവുകളുമാണ് ഈ രണ്ട് സംഭവങ്ങളിൽ വെളിപ്പെടുന്നത്. ഇക്കാര്യം വിലയിരുത്തുകയാണ് മോണിം​ഗ് വോയ്സിൽ സാമൂഹ്യപ്രവർത്തകയായ അഡ്വ. കുക്കു ദേവകി.