Kosmos 94.1

Rise Mzansi vra dat die Nasionale Tesourie die brandstofheffing hersien en verligting bied aan verbruikers en ondernemings wat onder stygende koste gebuk gaan. Die party sê wêreldwye ekonomiese onsekerheid en hoër oliepryse vererger die land se lewenskostekrisis. Mabine Seabe van Rise Mzansi doen ’n beroep op die minister van finansies, Enoch Godongwana, om die mediumtermyn-begrotingsverklaring te gebruik om brandstofkoste aan te pak, plaaslike ondernemings teen wêreldwye handelsdruk te beskerm en sukkelende munisipaliteite te ondersteun.

'n Belangrike bulletin misgeloop? Geen probleem, luister na elke bullie net hier. Al die hoof nuus op een plek.

Drikus Coetzee sê hy is moeg ná ’n moeilike laaste skof waarin hy deur reën en dik modder moes sukkel voordat hy Dinsdag as wenner van die 2026 Rhino Run oor die eindstreep gery het. Coetzee het die uitmergelende 2 800 kilometer-rit van Windhoek na Robert Sobukwe-dorp in net meer as agt dae voltooi, sowat 130 kilometer voor sy naaste teenstander. Hy deel sy ervaring van die uitdagende wedren met Kosmos 94.1 Nuus:

Die Otjizeka-laerskool in die noordweste van die land het ’n veiligheidshupstoot gekry nadat ultimate.earth en bewaringsvennote byna 100 000 Namibiese dollar belê het om leerders te beskerm, terwyl woestynaangepaste leeus deur die omliggende landskap beweeg. Tristan Cowley, besturende direkteur van ultimate.earth, sê die inisiatief het ten doel om kinders se veiligheid te versterk en terselfdertyd mens-dier naasbestaan te ondersteun.

In jou finansiële nuus vanoggend: Bek-en-klouseer, stygende inflasie en wie weet, dalk Namibia Air - die stoom draai behoorlik uit finansminister Ericah Shafudah se sompompie vir haar hersiene mediumtermynbegroting wat Donderdagmiddag ingedien word.

In ander KosmosKapitaal-nuus: Die Suid-Afrikaanse Voerkraalvereniging sê dis niks persoonlik nie, maar hulle is gekant teen invoere uit Namibië weens die BKS-krisis.

Namibië se tweejaar-spertyd om die bek-en-klouseer-uitbreking onder beheer te bring, begin sodra die beheerheining van Klein Manasse tot by die Visrivierkloof voltooi is. Die uitbreking is op 23 September in die Karasburg-distrik van die //Kharas-streek aangekondig. Die ministerie van landbou het bevestig dat daar op 18 plase in die streek 131 bevestigde gevalle van bek-en-klouseer aangeteken is. Die ministerie se hoofveearts, dr. Kenneth Shoombe, verduidelik waarom die heining belangrik is en wat dit vir die beweging en verhandeling van vee en vleis in die streek beteken.

'n Belangrike bulletin misgeloop? Geen probleem, luister na elke bullie net hier. Al die hoof nuus op een plek.

Politieke ontleder Ndumba Kamwanyah sê tradisionele owerhede moet aan konsekwente standaarde van deursigtigheid en aanspreeklikheid voldoen wanneer staatsfondse gebruik word. Dit volg op ’n waarskuwing deur die minister van stedelike en landelike ontwikkeling, James Sankwasa, teen die wanbestuur van openbare fondse deur tradisionele leiers. Die kwessie kom te midde van vrae oor die administrasie van fondse wat met Oonani Investments Group, die beleggingsarm van die Namibia Traditional Authorities Trust, verband hou. Kamwanyah het met Kosmos 94.1 Nuus gepraat.

President Netumbo Nandi-Ndaitwah is terug in Windhoek ná ’n driedaagse staatsbesoek aan Angola. Die presidensiële woordvoerder, Jonas Mbambo, sê die eerste vergadering van die Angola-Namibië Bi-nasionale Kommissie dui op ’n historiese verskuiwing van diplomatieke betrekkinge na praktiese ekonomiese samewerking. Hy sê Nandi-Ndaitwah se besoek het tot ooreenkomste op die gebiede van verdediging, toerisme, sport, kultuur en onderwys gelei.

Luister na vandag se boodskap met Ds. Johan Els