ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་ནོ་བྷེལ་ཞི་བདེའི་གཟེངས་རྟགས་ཚོགས་པ་གསུམ་ལ་འབུལ་གཏན་འཁེལ་བ་དང་། ༧གོང་ས་མཆོག་གིས་བལ་ཡུལ་གྱི་སློབ་ཕྲུག་ཁག་ཅིག་ལ་མཇལ་ཁ། ལྷ་ས་རུ་དམ་དྲག་བྱས་ནས་ཟླ་གཉིས་འཁོར་གྲབས་ཡོད་པ། ཡུག་ཀེ་རན་དམག་འཁྲུག་ཁྲོད་ཀྱི་རྡུལ་ཕྲན་ཉེན་ཁ་སོགས་ཡོད།

མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐེངས་༥༡ པ་འཚོགས་བཞིན་པའི་སྐབས་སུ་དེའི་ཟུར་ཚོགས་སུ་༼ཏཱ་ལའི་བླ་མའི་ཡང་སྲིད་ལས་འཕྲོས་ཏེ་འགྲོ་བ་མིའི་ཐོབ་ཐང་དང་གོ་ལ་ཡོངས་ལ་ཐེབས་སྲིད་པའི་ཤུགས་རྐྱེན་༽ཞེས་པའི་སྐུའི་ཡང་སྲིད་སྐོར་ལ་སྙན་ཐོ་ཞིག་བཏོན་པ།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ཉེ་ཆར་ཉི་ཧོང་དུ་ཕེབས་ཏེ་གྲོས་ཚོགས་འཐུས་མི་ཁག་ཅིག་དང་མཇལ་འཕྲད་གྲོས་གནང་ཡོད་པ་སོགས་ཀྱི་ཐད་བཅར་འདྲི་ཞུས་ཡོད།།

མོན་ཡུལ་ནས་གསར་དུ་རྙེད་པའི་བོན་གྱི་དཔེ་རྙིང་སྐོར་གྱི་རྩོམ་ཡིག་སྒྲོགས་སྦྱང་ཞུས་པ་དེའི་བརྗོད་བྱ་སོགས་ལ་གཡུང་དྲུང་བོན་གྱི་དཔེ་མཛོད་ཁང་གི་ཉམས་ཞིབ་སྡེ་ཚན་གྱི་འགན་འཛིན་དགེ་བཤེས་གཡུང་དྲུང་སྐལ་བཟང་ལགས་སུ་བཅར་འདྲི་ཞུས་ཡོད།།

བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་ལགས་འཕྲིན་གཏོང་ཁང་དུ་གདན་འདྲེན་ཞུས་ཏེ་ཉེ་ཆར་བྷོ་སི་ཊོན་དུ་གྲུབ་མ་ཐག་པའི་བྱང་ཨ་རིའི་ཚོགས་ཆེན་ཐེངས་༢༠ བའི་གྲུབ་དོན་སོགས་ཀྱི་ཐད་བགྲོ་གླེང་ཞུ་རྒྱུ་ཡིན་པས་དུས་ཐོག་གསན་གཟིགས་གནང་བར་ཞུ།།

ཀུན་གླེང་ལས་རིམ་དུ་ཚེ་རིང་སྐྱིད་ལགས་ཀྱིས་བོད་ཀྱི་སྲིད་བྱུས་ཉམས་ཞིབ་ཁང་གི་བསྟན་འཛིན་ཕན་ཐོགས་ལགས་ལ་རྒྱ་ནག་གིས་བརྡ་འཕྲིན་རྒྱུད་ལམ་དུ་གཏམ་བརྗོད་དབང་ཐང་ཆེ་རུ་གཏོང་གི་ཡོད་པའི་འཐབ་ཇུས་ལ་བོད་གཞུང་མང་གཉིས་ནས་གདོང་ལེན་བྱེད་ཕྱོགས་ཐད་བགྲོ་གླེང་ཞུས་ཡོད།

ཨ་མི་རི་ཀའི་རྒྱལ་ས་ཝ་ཤིན་ཀྲོན་དུ་ཨ་རིའི་མངའ་སྡེ་༢༠་ལྷག་ནས་བོད་པ་དང་བོད་དོན་རྒྱབ་སྐྱོར་བ་བརྒྱ་ལྷག་ཕེབས་ཏེ་ཨ་རིའི་གྲོས་ཚོགས་སུ་བོད་དོན་ཞུ་གཏུག་བྱེད་བཞིན་ཡོད་པ་རེད། འདི་ནི་ཞུ་གཏུག་སྤེལ་ཐེངས་༡༤་བ་དེ་ཡིན། དེ་རིང་ང་ཚོས་ཞུ་གཏུག་པ་གསུམ་གདན་འདྲེན་ཞུས་ཏེ་བགྲོ་གླེང་ཞུ་རྒྱུ་ཡིན།

སྐུ་འབུམ་དགོན་པའི་དགོན་བདག་ཨཀྱཱ་རིན་པོ་ཆེ་ཉེ་ཆར་སོག་ཡུལ་ལ་ཕེབས་པའི་སྐོར་སོག་པོའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་མང་པོ་ཐོན་སོང་། དེ་རིང་ང་ཚོས་ཨཀྱཱ་རིན་པོ་ཆེ་དང་མཉམ་དུ་ཁོང་སོག་ཡུལ་དུ་ཕེབས་པའི་མཛད་འཕྲིན་ཁག་དང་དེ་གར་ད་ལྟའི་དུས་ཚོད་ལ་བོད་དོན་ཐོག་ལ་དོ་སྣང་ག་འདྲ་ཡོང་གི་ཡོད་པ་བཅས་ལ་བགྲོ་གླེང་ཞུ་རྒྱུ་ཡིན།

རྒྱ་ནག་གཞུང་གིས་ནད་ཡམས་རྩ་མེད་ཟེར་བའི་སྲིད་ཇུས་འོག་བོད་ཀྱི་རྒྱལ་ས་ལྷ་སར་སྒོ་རྒྱ་བསྡམས་པ་དང་ཟུར་བཀག་བྱེད་དེ་ད་ལྟ་ཉིན་༤༠་ལྷག་སོང་ཡོད་པས། བོད་མི་ཚོས་འུ་ཐུག་ཐབས་ཟད་ངང་ཞུ་འབོད་ཀྱི་བརྙན་པར་མང་པོ་སྤྱི་ཚོགས་དྲ་ལམ་དུ་འགྲེམས་སྤེལ་བྱེད་བཞིན་པ་ཕྱོགས་སྒྲིག་བྱེད་ཡོད།

བལ་ཡུལ་གྱི་རྒྱལ་ས་ཀ་ཐ་མན་རྡུར་ཆགས་ཡོད་པའི་ཐང་དཀར་བདེ་ཆེན་ཆོས་གླིང་དགོན་པའི་བསླབ་པ་མཐར་སོན་གྱི་ལག་འཁྱེར་རྣམས་ལིམྦི་ནི་ནང་བསྟན་གཙུག་ལག་སློབ་གྲྭ་ཆེན་མོས་སྤྲོད་རྒྱུའི་མཉམ་འབྲེལ་གྲོས་མཐུན་ཞིག་བཞག་ཡོད་པའི་དགེ་མཚན་སོགས་ལ་ཐང་དཀར་བདེ་ཆེན་ཆོས་གླིང་དགོན་པའི་དགོན་བདག་ཁང་སེར་རིན་པོ་ཆེ་དང་ལྷན་བགྲོ་གླེང་ཞུས་ཡོད།