La classica

L'element blau ha inspirà numerus cumponists. Saja quai ils daguts d'in urizi, l'imposanta forza dals flums u las reflexiuns ch'ins vesa en aua ruassaivla. En la «Classica» udis Vus cumposiziuns ch'han en ina furma u l'autra in connex cun l'aua.

Sin il cedel da program da quest'emissiun stattan dasper las renumadas ovras sco «La Moldau» da Bedrich Smetana u «An der schönen blauen Donau» da Johann Strauss, il figl, er in scherzo or da la sinfonia «Die Rheinische» da Robert Schumann. Er en ils titels per clavazin «Une barque sur l'océan» da Maurice Ravel e «Le Onde» da Ludivico Einaudi han ils cumponists vulì metter aua en musica. Lura pudais Vus er tadlar in extract or da la suita da Tchaikovsky «Schwanensee» ed il preludi dals daguts da plievgia, ina cumposiziun da Frédéric Chopin.

La Classica cun hits da la musica classica.

La classica – questa giada cun ovras da: Wolfgang Amadé Mozart (Le nozze di Figaro - uvertura e l'aria: Voi che sapete ed Eine kleine Nachtmusik – Allegro), Ludwig van Beethoven (Romanze Nr. 2 in F e Für Elise), Giuseppe Verdi (Aida - Gloria all'Egito e Nabucco - Va, pensiero), Frédéric Chopin (Minutenwalzer), Jacques Offenbach (Les Contes dHoffmann - Barcarole) e da Pjotr Ilitsch Tschaikowsky (Der Nussknacker - Blumenwalzer).

Ins taidla musica e dat in gieu. Ma en gieus da video datti musica e quella audan ins segir pli pauc conscientamain. En La Classica pudais Vus però tadlar ina schelta da talas melodias, per il pli en versiuns sinfonicas.

Gia il 2011 ha l'orchester da grond renum, il London Philharmonic Orchestra registrà in album en quel connex. Quest album porta il titel curaschus «The Greatest Video Game Music», pia la pli grondiusa musica en gieus da video. Quellas interpretaziuns orchestralas furman la basa da l'emissiun.

Brachial enfin dultsch

Il repertori da musica da gieus da video è vast. Uschia audan ins per part en il medem gieu d'acziun cumposiziuns fitg pesantas sco er melodias pli finas. Musica cun in caracter pli luc, quasi divertent porschan savens gieus d'aventuras u da puzzle.

La musica da gieus da video è pia fitg differenta e quai sto ella er esser. La finala raquinta in gieu ina istorgia. La musica creescha ina atmosfera, accumpogna la persuna che sesa avant il computer tras il gieu e suttastritga uschia l'entira istorgia. Per part dovri passaschas pompusas che sumeglian grondas furmas sinfonicas, per part er be simpla musica d'ambient senza gronds puncts culminants.

La Classica cun musica che dechanta il bel paese.

L'Italia stat en il center da questa Classica. L'Italia sco terra cun sias citads pittorescas e sias bellas piazzas. Nus udin musica che dechanta il bel paese, cumposiziuns d'Antonio Selieri (La fiera di Venezia), dal russ Pjotr Ilitsch Tschaikowsky (Capriccio italien, op. 45), d'Ottorino Respighi (La fontana di Trevi) e dal tudestg Felix Mendelssohn-Bartholdy (dus moviments da sia Sinfonia nr. 4 en A-Dur, op. 90 intitulada Italienische – 1. Allegro vivace e 4. Saltarello Presto). E garnida vegn quella musica sinfonica cun chanzuns napolitanas cumponidas da Francesco Paolo Tosti e chantadas dal grond tenor Carlo Bergonzi (Sogno, Non tamo pìu, La serenata e Mattinata).

En questa emissiun spetga Vus musica da clavazin plain emoziuns. Igl è ina schelta d'ovras dals gronds cumponists da la classica sco Beethoven, Schubert, Liszt e Debussy. Enramadas vegnan quellas ovras da melodias pli actualas da Yann Tiersen e Karl Jenkins.

La glina è in simbol ch'ins chatta adina puspè en la musica. Per exempel è il segund moviment da la «Suite bergamasque» da Claude Debussy titulada «Clair de Lune» – per rumantsch clerglina.

Era la sonata nr. 14, cis-moll, da Ludwig van Beethoven è enconuschenta sut il titel «Mondscheinsonate». Però na deriva quel titel betg dal cumponist, mabain d'in schurnalist da musica. Tge associaziuns che Beethoven ha gì durant cumponer, pudais Vus udir tranter auter en «La Classica».

Hits da la musica classica che stgaudan cor ed olma.

La classica – questa giada cun ovras da: Jacques Offenbach (La belle Hélène), Carl Maria von Weber (Oberon), Franz von Suppé (Dichter und Bauer), Wolfgang Amadé Mozart (duas chanzuns: Das Veilchen, Un moto di gioia ed ord: Hornkonzert nr. 1 – Allegro), Ludwig van Beethoven (Menuett in G-Dur), Joseph Haydn (ord: Streichquartett in F-Dur – Serenade Andante cantabile), Johannes Brahms (Saut ungarais nr. 5 e 6), Antonin Dvorak (Humoresque), Franz Schubert (Das Wandern) – e da Hans May il hit chantà dal grond tenor Joseph Schmidt, Ein Lied geht um die Welt.

Sch'ins discurra da la «Novavla» èsi cler da tge ovra ch'i sa tracta: Igl è ina da las monumentalas sinfonias da Beethoven, sia ultima per esser precis. Ma, daco è gist quell'ovra talmain speziala e co èsi ì vinavant suenter cun il gener da la sinfonia? Questa Classica emprova da dar respostas.

Ludwig van Beethoven (1770-1827) tutga sco Joseph Haydn (1732-1809) e Wolfgang Amadeus Mozart (1756-1791) tar ils trais gronds cumponists da l'epoca classica. Er Haydn e Mozart han cumponì sinfonias. Beethoven ha però sviluppà quel gener sco nagin auter. Cun sias contribuziuns è la sinfonia daventada il gener cun il pli grond prestige insumma.

Beethoven – il cumponist da sinfonias

Tut en tut ha el cumponì nov sinfonias e tuttas èn singularas. Da renum spezial èn cunzunt la terza cun ils surnum «Eroica», la tschintgavla che vegn er numnada «Sinfonia dal destin» e l'ultima, la novavla. Lezza ha gì sia premiera l'onn 1824. Spezial è cunzunt che Beethoven ha integrà in chor, tge ch'è stà in grond novum. Enfin lura era la sinfonia in gener sulet instrumental, senza cuntegn u text. Quai n'ha betg plaschì a tuts. Da la premiera èn blers stads surstads u schizunt schoccads. Ils pli paucs han apprezià quella sinfonica, nua ch'in chor conta la oda da Schiller «An die Freude».

Tuttina è la chapientscha creschida cun il temp ed a partir la generaziun suenter han las ovras da Beethoven marcà il gener da la sinfonia. Uschia han ils collega-cumponists anc stuì morder ditg ils dents vid l'ierta che Beethoven ha laschà enavos.

La Classica cun hits da la musica classica.

La classica – questa giada cun ovras da: Wolfgang Amadé Mozart (ord: Klavierkonzert Nr. 21 – Andante, Klavierkonzert Nr. 27 – Allegro ed ord: Le nozze di Figaro – uvertura e l'aria: Voi che sapete), Ludwig van Beethoven (Romanze Nr. 2 in F e Für Elise), Carl Maria von Weber (Abu Hassan – uvertura), Johann Peter Salomon (Romanze für Violine und Streichorchester), Michail Iwanowitsch Glinka (Ruslan und Ludmila – uvertura), Antonin Dvorak (Slawischer Tanz nr. 6) e da Giuseppe Giordani (Caro mio ben). (Repetiziun d'ina emissiun dals 18-10-2020).

La musica dal cumponist talian contemporan Ludovico Einaudi (*1955) è enconuschenta ad in public vast. El è in dals paucs che dumogna dad emplenir tant salas da concert sco er stadions. Questa Classica dat in'invista en si'ovra.

Ludovico Einaudi cumpona en emprima lingia per il clavazin, dentant betg sulettamain. Gist l'ultim decenni ha el agiuntà instruments d'artg sco er suns e tuns electronics a sias cumposiziuns. A la surfatscha para la musica da sa midar. I tuna magari «pli pauc classic», pli datiers al gener dal pop, pli modern, forsa er pli popular. Dentant, il coc da sias cumposiziuns n'è strusch sa midà en cumparegliaziun cun sias emprimas cumposiziuns dals onns 90.

Musica classica u pop?

Attribuir sia musica ad in gener è magari grev. Sia musica è caracterisada d'elements repetitivs, structuras simplas e paucs moviments armonics, quai che correspunda al minimalissem. Ed a quel chantun sa senta er Einaudi sez sco i para il pli tgunsch dachasa: «En general n'hai jau betg gugent definiziuns. Ma minimalissem munta eleganza ed avertadad. Uschia preferiss jau da vegnir numnà in minimalist – e betg insatge auter.»

La musica derasa anc pli fermamain la poesia!

Poesias d'Arnold Spescha zugliadas en musica sinfonica – quai è il tema da mia davosa emissiun La Classica. E qua datti duas ovras interessantas cumponidas da duas dunnas da la Ucraina. 2014 metta Victoria Poleva (*1962 a Kiew) quatter poesias dal sulegl en vestgi musical e numna quest'ovra scritta per sopran ed orchester da chombra «El bratsch dil sulegl». La primaudiziun ha gì lieu 2015 a Lemberg (Ucraina). Simon Camartin ha dirigì là il Lviv Philharmonic Orchestra. Solista: Christina Daletska, ina ucraina che viva dapi onns en Svizra.

2017 ha la cumponista Bohdana Frolyak (*1968 a Lemberg) cumponì «Flurs da glatsch», in'ovra per mezzosopran ed orchester sinfonic tenor set poesias d'Arnold Spescha che tractan l'aura. Il medem onn ha la primaudiziun gì lieu a Lemberg. Simon Camartin ha dirigì qua il National Symphony Orchestra INSO. La chantadura da l'opera da Lemberg, Svitlana Mamchur ha chantà per l'emprima giada en rumantsch e gì grond tschaffen e gust da quest'ovra e da nossa lingua.

Davart questas duas cumposiziuns e las preschentaziuns hai jau discurrì cun ils dus protagonists: Arnold Spescha, il poet e Simon Camartin, il dirigent.

Redacziun: Giusep G. Decurtins