【我返工，我打機，我自豪！】

相信唔少人曾經畀阿媽話過「衰仔又打機？」不過依家世代唔同左啦，ESports 係運動嚟嘅，甚至可以喺奧運競賽～

不過，對某啲地方嘅小朋友嚟講可能就難啲喇，希望你哋周末玩一個鐘會夠皮啦！

遊戲世界裏面，人人都可以成爲美斯、尼馬，加埋大細哨 Dream Team的班主，不過要瘋狂課金又有冇意義呢？想聽下兩位阿 Sam 點睇課金文化、電競產業，同Show「球技」，咩通曬大小坑渠，扭埋脚法咁，就記得睇依集啦～

（P.S 話唔埋可以睇到記者Sam 個 Fifa ID，想同佢瘋狂連線打機，就記得落足眼力！）

By 製作組編導 M

【藝術，只在乎曾經擁有？】

擁有藝術品就等於擁有藝術？見到令你心心眼的藝術品，係咪一定要擁有？學 MC 仁話齋，如果只在乎曾經擁有，講到尾你都只係一個炒家，唔係藝術世界的朋友。

今集繼續有MC 仁、嘉瀛，同我哋美術部大佬劉仁，傾下藝術品買賣、邊個先係創作嘅老細，點樣對自己誠實…

喺好多人試圖掩蓋真實的時代，對自己誠實，唔單單係Artist的Value，更加係所有人要做嘅嘢。

By 製作組編導 M

MC仁 In Da House! 平時冷漠嘅美術部大佬劉仁，一見到 MC仁即刻心心眼，不過都唔怪得佢嘅，聽 MC仁講創作，邊個可以唔興奮？

今集嘉瀛同劉仁會捉實 MC仁，由佢喺法國讀書開始，一路講到之後做塗鴉創作，到底喺香港做藝術，點樣Art得自己Art得人？

「你對住嘅都係蠢人，如果你對住聰明人，就係佢同你sell藝術品，係佢用藝術感染你啦」（MC仁，2021）

By 製作組編導 K

盂蘭勝會～歸家都心慌慌～

農曆七月鬼門開，大家夜晚返屋企，有無覺得條街熱鬧咗先？其實盂蘭節只係向先人致意嘅節日，無咁恐怖嘅～不

過呢兩年因為疫情，好多地方嘅盂蘭勝會搞唔成，陽間嘅香港人唔開心，連陰間嘅先人都無得開心。一年一度嘅 party 就咁無咗。

學我哋嘅主持溫佐治話齋，正所謂陰不安陽不樂，先人唔開心，香港點會安寧？

想知多啲盂蘭習俗嘅故事？咁就要聽我哋今晚講經啦！By 製作組編導 K

＊＊＊

有人話過，如果美斯喺香港出世，佢只會係一個鍾意踢波嘅矮仔，佢身邊嘅朋友、家人，可能都會勸佢唔好發夢，畀啲心機讀書，最後佢只會打份牛工，每日諗幾時可以上車。

OK，其實無咁灰嘅，而家香港人對運動員真係支持咗好多，但係「香港隊長」陳偉豪都係話，喺香港踢波，始終都係難。其他嘢唔講，淨係講比賽時間，原來已經有段故。

有無留意，港超聯成日有啲比賽，會日正當午，點幾兩點開波？點解呢？點解要虐待啲球員？

原來，係因為如果踢夜晚，就要開燈，開燈就要電，要電就要錢……

Welcome to 港超聯。

想了解多啲香港足球？就唔好錯過呢集啦！

By 製作組編導 K

介紹返，今晚嘉賓，「香港隊長」陳偉豪。2009 年，偉豪帶領港隊，喺東亞運奪得金牌，令唔少香港人重新認識本地足球。

雖然近年好多人都會入場支持本地波，不過同外國整個完善嘅產業相比，香港足球都仲有好長嘅路要行。就講我哋最熟嘅英超，一個 Grealish 轉會曼城，一億磅。呢個價錢，原來已經係港超咁多隊班費總和嘅六七八倍。

係，我知，港超點都無得同英超比。不過足球員都係人，佢哋都要生活。咁點樣先可以改善球員待遇，改善成個行業？

今晚，就等阿匡、杰寧同偉豪一齊傾吓，由 Grealish 到美斯到哈利簡尼到本地轉會，傾吓香港足球嘅未來。

By 製作組編導 K

【怕死的人才可以活下去？】

死，喺社會上好多時都係一個禁忌。 

意外、病嘅嘢冇人想，但身爲脆弱嘅人類，總要艱難地接受人有一死。雖然如此，不過絕大部分人都會恐懼死亡。

依種恐懼，究竟係來自死時的痛苦，定係對死後嗰種絕對虛無的不安？ 

農曆七月啱啱過咗一半，今晚就等最近脾胃弱、聲稱依樣嗰樣都唔食得（啫係驚死）的編導 K（劉偉程），同看透生死的李家麟醫師，同大家談生論死。

*注意：編導 K 首次下海！

By 製作組編導 M

【而家去旅行仲帶 Lonely Planet？】

曾幾何時，孭住個大背囊，拎住本 Lonely Planet，喺陌生嘅城市入面穿梭，喺迷路嘅時候向異國美人求助，係幾咁浪子……

不過隨住科技進步，而家去旅行，望住 google map，已經好難迷路…… 

好似我哋嘅記者 Jojo 咁，作為一個 90 後到掹嘅小寶寶，已經無機會享受迷路帶嚟嘅刺激同豔遇，條友仲連旅遊支票都未聽過。  今集，三個年代嘅旅遊人，會傾吓唔同時代嘅旅行工具同心態。而你又係屬於邊一種呢？ 

By 製作組編導 K

【睇仔定奧運，我兩樣都要曬】

有咩好爭？一邊睇運動員精彩嘅表現，一邊欣賞佢哋千錘百鍊嘅身形，先至係最高享受。

今屆東京奧運，被譽為係「最平權」嘅一屆，例如有男女混合接力賽啦、有首位跨性別運動員出賽啦等等…不過都有唔少 LGBTQ 圈中人，話今次奧運平權係假嘅！得個殼嘅！

咁到底

【浮城是滋養美好文字的土壤？】

香港傷痕處處，在現實比筆下世界更荒謬的時候，我們還可以用文字回應時代嗎？ 

創作是回應時代，還是創作本來，就是作家内化後的成果？

今晚，有 《秋鯨擱淺》作者、電影《幻愛》改編作家蔣曉薇與林彥邦，用聲音、文字和大家梳理情緒，正視傷痕。 

「維港越縮越窄了，可幸海風仍是颯颯。

 （但維港兩岸的高樓招牌，多了很多LED 燈和中國品牌，很刺眼。）

 這是美感淪落的年代。

 （所以像你這種人，目睹這城的變臉，不會活得開心，美麗都在上世紀。）

 （你是在懷舊嗎，懷舊可是一種罪名。）

 我是念舊之人，非懷舊，但我以為，懷舊也不必然就是空洞。」

 ——〈在街上跳最後一場離別舞〉潘國靈

 在最壞的時代，要讀最多的書。

 By 製作組編導 M