【點解維尼愛蜂蜜？】

話説蜂蜜唔單止受維尼喜愛，仲好受人類喜愛添～ 就咁飲得、配多士又得，BBQ就更加得。

不過蜂蜜究竟係咩東東？ 誠意邀請遠離學生生活嘅大家，趁暑假上返個小Lecture，聽下科學達人 Karen 博士，同我哋嘅科普編輯小肥波 ，講令人流曬口水的蜂蜜，究竟有咩玄機？

請注意劇透！！（得個講字）嘅減肥人士記得入來睇下，蜂蜜係咪減肥恩物喇～

By 製作組編導 M

【我追星，我自豪！】  

身為掹車邊嘅 90後，喺 2021年之前，數得出而又鍾意嘅香港明星/歌手，畀一隻手都嫌多。不過，依家用曬自己對手，竟然都 唔 夠 用！(借多 1隻手加 1隻手指就差唔多)  

好喇，表達完愛意喇。

 喺依個做唔到幾多嘢的時代，睇到默默努力的人，一步一步成長，喺舞臺上發光發熱，真係揾到份代理滿足感㗎 (hug hug) 

 誠意邀請各位前夫/妻，攬住另一半一齊直擊被害經歷~ 大家都可以回味下邊啲明星，行過入大家個心裏面。 

 By 製作組編導 M 

介紹返，我哋嘅美術部主管劉仁顯。

不過呢，呢個咁靦腆嘅劉仁顯，我都係第一次見。一向喺公司嘅佢都係霸氣十足，估唔到一上鏡會變成咁。準備今集嘅時候，一路望住畫面入面怕怕醜醜嘅佢，一路聽住佢喺後面霸氣地屌晒全世界…個喜感真係不得了。

喺度要多謝我哋嘅客席主持嘉瀛，喺見到 partner 「咿咿哦哦」唔知自己講緊咩嘅時候，二話不說就衝出嚟幫手 hold 住個場，今集先可以順利拍落去…

但唔知點解，我總係覺得會有人覺得佢呢啲怕醜係反差萌，然後又覺得佢好正…

Anyway，大家想知聽美術部大爆平時到底吸啲咩，就唔好錯過今集啦！

By 製作組編導 K

【好眼瞓，無得瞓，有得瞓，瞓唔著】

呢一集，係我嘅私心之作。

坦白講，自從 2019 年之後，經常會失眠。相信唔止我，好多香港人都係咁。每晚碌手機，睇到嘅都係唔開心嘅嘢，有咩可能瞓得好？

所以，各位失眠之友唔好太大期望，你唔會喺呢集聽到咩「十個瞓得著嘅方法」、「一句話解決失眠」呢啲嘢。純粹想同各位失眠之友一齊圍爐取吓暖。

邊個無睇《大叔的愛》嘅，舉手！

好，無人舉手。

呢段時間，大家田牧睇得好開心，睇簡慕華睇得好開心…開心之餘，香港好似一下子踏出咗平權一大步，好似人人都接受到 LGBTQ 咁。

咁，係唔係呢？我哋嘅主持 Simon 同知性青年就話，兩睇啦。如果佢哋唔係咁靚仔，唔係 Edan 同 Anson Lo，大叔唔係黃德斌咁嘅型佬…大家仲會唔會咁開心先！S

imon 話喎，你哋隨便開個 Gay App，睇吓上面啲真正嘅大叔先。如果唔靚仔，仲有無愛的權利？

你離開我～就是旅行的意義～

香港人不嬲都明白，只有離開香港，先會真正得到休息。可惜喺疫情之下，大家都好難去到旅行，今時今日，會離開香港嘅人，多數，都係一去不返。

以前，離開是為了回來。而家，離開是為了未來。

喂呀…點解講旅行都要講到咁 sad…再講過！  其實今集係好 chill 嘅！唔係要傷春悲秋，只係想同大家一齊，喺呢 45 分鐘入面，透過兩位主持分享嘅旅行經歷，用耳仔走一轉柬埔寨、墨西哥、阿富汗等等嘅地方。

兩位主持話，對佢哋嚟講，去旅行嘅意義，唔止係吃喝玩樂，更加係體驗人生。有啲國際視野，只有真係走遍國際先會有。 

屯馬～開通～真的很～興奮～

咪住先，喺好興奮嘅同時，大家又知唔知「宋皇臺」三隻字，背後係咩故事先？

話說距今差唔多 800 年前，南宋畀北方嚟嘅外族蒙古窮追猛打，去到亡國邊緣。為保皇族血脈，唔夠人打，惟有走啦。文天祥、陸秀夫等幾個士大夫，就帶住兩個皇子一路向南走難，一路走到落嚟香港……雖然最後喺無路可逃之下，陸秀夫惟有孭住小皇帝投海自盡，但當年呢班文官嘅氣節，忠臣不侍二主，唔會貪圖個人榮華富貴，一直為歷朝歷代所景仰。

而原來，除咗宋皇呢段故仔，宋朝同香港仲有好多淵源。好似大名鼎鼎嘅鄧氏家族，原來北宋年間已經落到嚟香港，仲快手揀埋錦田一啲靚地添。 

想聽更多歷史典故？快啲 Click 入嚟《生活的立場》歷史篇：遺民的眼淚，聽陳朗昇同溫佐治講經啦！

導演，我想講籃球！

呢一集，其實係半推半就下出現……

由上星期開始，林彥邦就不停咁纏住我，「我想講 NBA」、「我想講籃球」、「唔係喎，真係可以講吓籃球喎」、「我可以放工錄喎」、「唔係喎，我可以放假錄喎。」

於是，喺佢堅持不懈（?）之下，就有呢一集出現了……

必須要感謝家謙，趕頭趕命咁搵你，你都應承我哋。

而家公鹿對太陽打到 2 : 2，大家又有無咩心水？

如果哈維爾生於今日香港，佢會……

哈維爾（Václav Havel）（1936-2011），捷克劇作家，曾於 1993 年至 2003 年間擔任捷克共和國總統。在捷克斯洛伐克時期，哈維爾一直主張人民要「活在真實中」，並因其言論、主張等而多次被捕、陷獄。

1989 年，捷克斯洛伐克舉行了第一次民主選舉，剛出獄不久的哈維爾獲選為總統。至 1992 年，捷克斯洛伐克解體，捷克共和國成立，哈維爾當選為捷克總統。  以上，係我喺維基抄返嚟嘅資料。多謝維基、多謝 Google。

講返哈維爾。引用我哋同事 Lea 嘅講法，哈維爾寫嘅《無權力者的權力》（The Power of the Powerless），已經成為咗香港人嘅「公廁讀本」，一人一本，睇書保平安。

有個講法係，社會越紛亂，越陷落，思潮就越興旺。如果呢個講法成立，今時今日嘅香港，應該係思想家嘅樂土。  就好似今集嘅客席主持鹽叔所講，比起大家都覺得繁榮穩定、歌舞昇平嘅 90 年代，今日嘅香港，公民社會先更有活力。

亂世之下，睇多本書，飲多啖水。一齊嚟聽鹽叔同 Lea 講哈維爾。

一個人孤軍作戰，係對抗唔到世界嘅荒謬。

雖然 Sad but true 嘅係，無論幾多人走埋一齊，似乎都改變唔到個社會。不過，我哋至少可以互相提醒，唔好畀自己變成荒謬嘅一部分。記住咩係正常、咩係唔正常。就算出面每一把聲都講緊，一件事應該係點，我哋都可以圍埋，然後細細聲講：

「唔係咁㗎。」

呢個就係圍爐取暖嘅作用。世界越痴線，個爐火就要燒得越旺。  今晚，我哋嘅主持 Melody，就會同客席主持 Sampson 一齊，同大家講吓，點樣喺日常生活中盡量圍爐。