Eg ha ned nach Liebi gfrogt. I ha nach Beruhigung und Bestätigung gfrogt. Und e ha ned gmerkt, dass das s Gegenteil macht und mini Partnerin ermüedet.

Und das isch so e Satz, wo mir hüt weh tuet, will er mega ehrlich isch. Will in dem Moment, wo ich gfrogt ha „Liebsch mi no?“ oder „Bisch du no do?“ hani’s ja ned bös gmeint. I ha’s ned gfrogt, um z kontrolliere. E ha’s gfrogt, will eg Angst ha gha.

Sie het gseit: ‘Es muess ned perfekt si. Guet isch gnue’ Und genau das hani ned chöne.

Dä Satz isch hüt wie ne Spiegel. Will wenn eg ehrlich bi, denn isch sie rückblickend genau das gsi, was eg immer gseit han, ich wott: warm, ehrlich, empathisch, loyal.

I ha so oft gseit: „Eg spüre, do stimmt öppis ned.“ Und e ha das für Intuition ghalte. Für es Warnsignal. Für öppis Gschids.

Aber im Rückblick isch es meistens ned Intuition gsi. Es isch Angst gsi – verchleidet als Bauchgefühl.

E ha immer gmeint, mini Problem heisse „z’vil Liebi“. I ha gmeint, ich bi halt intensiv, romantisch, loyal. Aber i rTherapie isch klar worde: S Problem isch ned Intensität. S Problem isch Unsicherheit, wo sich als Intensität tarnt.

Statt mini Beziehung z erlebe, hani sie verwaltet. Statt se z gniesse, hani bewertet.

Ich ha ned i mim Körper gläbt, sondern i mim Chopf. I ha ned gspürt, was i mer grad passiert, i ha’s analysiert. I ha ned eifach bi ihre chöne sii, i ha ständig überprüeft, öb das jetzt „richtig“ isch, öb das „gnueg“ isch, öb das „für immer“ isch. Und jedes Mol, wenn es sich ned exakt so agfüehlt het wie i mim Film, hani gmeint: Do stimmt öppis ned.