Mengameli wase Melika Donald Trump sewutsetse sincumo sekutsi iMelika iyaphuma ekwesekeleni ngetimal sivumelwano sekulwa nekugucugucuka kwesimo selitulu emhlabeni i-United Nations Framework Convention on Climate Change kanye naletinye letingephansi kwa Mhlabuhlangene. Tilinganiselwa emashumini lasitfupha nesitfupha tinhlangano temhlaba iMelika lememetele kutsi iyaphuma kuto njengoba beyitesekela ngetimali. Kodvwa kutfola kabanti kutsi ingabe loku kutaba namuphi umtselela kulemitamo yekuncandza kugucugucuka kwesimo selitulu, ecingweni asamukele Thando Lukuko longumphatsi enkapanini i Mansa Advisory lebuke tindzaba te climate 

Licembu le-National Freedom Party (NFP) seliphumile ekubeni yincenye yalohumunde welubumbano esifundzeni KwaZulu Natal. Lenhlangano ihlela nekucondzisa tigwegwe lilunga layo lelikusishayamtsetfo salesasifundza, Mbali Shingo.  Kubuka loludzaba sicocisene nemhlatiyi wetepolitiki Dr. Zamo Mbandlwa. 

Namuhla kuhlangana iminyaka leli-114 kwasungulwa inhlangano yeANC. Kantsi umcimbi lomkhulu wekubungata lelilanga utawubanjelwa enkhundleni yetemidlalo eMoruleng eRustenburg esifundzeni saseNorth West ngeMgcibelo. Kepha kusukela kucale leliviki buholi beANC buphishekile behla  buyenyuka eNorth West butilungiselela lomcimbi wangeMgcibelo. Kuva kutsi kuhamba njani kutilungiselela kwalenhlangano, sicocisene nentsatseli yetepolitiki khona lapha kaSABC, Ntebo Mokobo

Vusi Thani lovela kulitiko letemfundvo kulesifundza seMpumalanga, utsi akusilo liciniso kutsi luyabhadalelwa loluhlelo lwe-Matric Second Chance Program.

Sihlalo wenhlangano yebafundzi iSASCO kulesifundza seMpumalanga Siyabonga Shabalala utsi bayatamukela letincumo teNSFAS kulomnyaka.

Takamuti taseMattafin, ngaphandle kancane kwelidolobha iMbombela kulesifundza seMpumalanga, bavalise kukhatsateka ngekucitseka kwendle legeletela emakhaya abo ikakhulu nakuta tlitulu. Nonkululeko Shongwe uyasibikela. 

Umkhandlu lobuke kutfutfukiswa kwemtsetfo sisekelo i CASAC, utsi kucokwa kwa Andy Mothibi njengemcondzisi wetekushushisai kulelive, bekungakalindzeleki. Mengameli Cyril Ramaphosa umemetele lokucashwa kwakhe itolo. Mothibi utawucala kusebenta mhlalulunye kulenyanga letako, nakuphela sikhatsi senkontileka ya Shamila Batohi. Kutfola kabanti kutsi ingabe letingucuko titayisita ngani i NPA ecingweni samukele umcondzisi we Mogale P.T Attorneys lophindze atfule tifundvo temtsetfo enyuvesi yase North West, Patric Mogale.

Litiko letekutfutfukisa tenhlalo eMpumalanga livakalise kukhatsateka ngekwenyuka kwetibalo tebantfwana labakhulelwa basebancane. Kuva kabanti kutsi ingabe yinkhulu kangakanani lenkinga, sicocisana na- Mdu Shongwe longumphatsi egunjini lelibukene netemindeni kulelitiko letekutfutfukisa tenhlalo e-Mpumalanga. 

Kulamalangana lengcile kudaleke umonakalo emakhaya lamanyenti ngenca yesangcondvo lesashaya ngemandla ikakhulukati kumasipala waseHlanzeni. Lesangcontfo samosha kakhulu ePienaar nakuletinye tindzawo taseMbombela ngekusho kwemibiko. Tindlu letinyenti tapheshukelwa luphahla letinye kwadzilika tindvonga kwaphuka nemafastelo. Sicocisene nalokhulumela litiko le CoGHSTA Freddy Ngobe kutewuva takamuva mayelana nekusitwa kwalaba lebakhahlametekile.

Inhlangano ye ANC nayo seyeleke lisindvo lelivi layo kulabo lebasola iMelika ngekubopha mengameli wase-Venezuela Nicolas Maduro kanye nemkakhe. Mabhalane jikelele we ANC Fikile Mbalula  ukhulume ase-Rustenburg e North West kutsi lesento asihambisani nemtsetfo wemave emhlaba. Kuyibuka ngeliso lebahlatiyi lendzaba, simeme Njingalwati Ntsikelelo Breakfast