Indvuna yetasekhaya Dkt Leon Schreiber kulindzeleke avule inkomfa yekucala lehlelwe ngumtimba i-Border Management Authority (BMA) letawube ibanjelwe ePitoli namuhla. Ngekusho kwe-BMA lenkomfa, ekhatsi kwalokunye, itawube ibonisana ngetindlela tekutfutfukisa tekuphepha eminceleni kuphindze kubukwe netinsita tetebuchwepheshe letingalekelela ekwenteni umsebenti uhambe lula. Sicocisane nelisekela lemsiti waNkomishana kuBMA, Sakhile Lekhuleni.

Kulindzeleke icala namuhla ingcungcutsela yemashumi lamabili nesikhombisa, iAfrica Tech Festival, lebanjelwe eCape Town.  Sicocisene na Siphumelele Zondi longumetfuli wetifundvo tebuchwepheshe eDUT.

Namuhla umhlaba wonkhe ugubha lilanga lelatiwa nge-World Pneumonia Day, lapho kucushiswa bantfu ngebungoti nekuvikelwa kwalesifo. Sicocisana na Dr Thulani Mhlabane  lovela etikweni letemphilo kulesifundza seMpumalanga.

Tiphatsimandla tamasipala waseMkhondo itolo beticubungula kutsi ungakanani umonakalo lodalwe ngulesiphepho lesihlasele leyendzawo. Sodolobha Ngelosi Ndlovu uvakalise kutsi lesiphepho sitsikamete kakhulu kusebenta kwagesi, kwaphephuka luphahla lwetindlu nelwetikolo. Utsi inchubekela embili iyabonakala kulomsebenti lebawentako wokwetama kulungisa lesimo.

Indvuna yetekuchumana netebuchwepheshe Solly Malatsi uwuhocisile lomtsetfo-soivivinywa lowatiwa ngeSABC Bill. Ngekusho kwalendvuna intfo lenkhulu leholele kulesincumo kwekutsi lomtsetfo-sivivinywa awucaci kahle kutsi lenhlangano lesakata ngemoya itatitfola kuphi noma njani timali letitayenta ichubeke nekusebenta ngaphandle kwetihibe. Labanye lebebawuhlaba lomtsetfo-sivivinywa ngumkhandlu webahleli betindzaaba kuleli, i-South African National Editors Forum (SANEF). Siwumemile lomkhandlu webahleli betindzaba lomelelwe nguMnumzane Hopewell Radebe

Siphepho besihambisana nesangcotfo sidale umonakalo lomkhulu etindzaweni letitsite letingephansi kwamasipala wase-Mkhondo kulesifundza se Mpumlanga. Kubikwa kutsi lesiphepho sitsikamete nekusebenta kwageziu edolobheni laseMkhondo, kwaphephuka luphahla lwetindlu tebantfu , tikolo kanye netakhiwo takamasipala. Sikhulumisana nemphatsiswa welitiko lekuhlaliswa kwebanftu, kubusa ngekuhlanganyela kanye netindzaba tebaholi bendzabuko kulesifundza,  Speedy Mashilo.

Losandvwa kucokwa njengamabhalane jikelele we- MK Party, Floyd Shivambu, sewucacisile kutsi kungani sekasebentisana namengameli waphambilini Jacob Zuma.  Ngalesikhatsi aselisekela lemengameli we-EFF, Shivambu bekalihamba embili ekukhishweni kwaZuma njengemengameli welive ngemuva kwembiko wemvikeli wesive Thuli Madonsela lebekaphenya ngekutfutfukisa ngetigidzi temaRandi kwemuti wakhe loseNkandla. Intsatseli yetfu yetepolitiki Ntebo Mokobo usihlanganisele lombiko lohunyuswa nguBongani Mondlane..  

Sekufuna kubuyela esimeni lesetayelekile kusebenta emnceleni wase-Lebombo lekulihheke lelingena eMozambiki. Loku kuta ngemuva kwekuvalwa kwalelihheke ngenca yemibhikisho beyineludlame leyeyamene nemphumela welukhetfo lwaseMozambiki. Intsatseli yeSABC Motsebi wa Monareng usihlanganisele lombiko...

Mengameli weMK Party, Jacob Zuma, sewumemetele kucokwa kwa-Floyd Shivambu njengamabhalane jikelele walenhlangano. Kubuka kutsi sisho kutsini lesincumo kanye nemsebenti lobukene naShivambu, sikhulumisana nemhlatiyi wetembangave, Prof Bheki Mngomezulu.

Siphepho lesinemandla lesihlasele kumasipala wase Mkhondo, kulesifundza se-Mpumalanga sidale umonakalo lomkhulu. Kucekeleke phansi tindlu, takhiwo tamasipala kwaphindze kwancamuka netintsambo tagezi. Kuva ngalesimo sicocisene nesakhamuti Lucky Gamede lesimtfole endleleni lesiphepho; kanye lomelele Masipala we-Mkhondo, Umnuzane Robert Kubheka.