Inkantolo yemtsetfo sisekelo ikucinisekisile kutsi umbuso unemandla ekukhipha esikhundleni umholi wendzabuko nangabe enta lokuphambene nemtsetfo. Loku kuta ngemuva kwekutsi umndeni wasebukhosini ukhale ngekukhishwa kwe-Nkhosi Bhekizizwe Nivard Luthuli, lolalehlekelwe sikhundla sekuba ngumholi wendzabuko kulandzela kutsi umphakatsi umsole ngekungatiphatsi kahle. Lomdeni wasebukhosini bewutsi ngiwo lonemandla ekumkhipha esikhundleni nekumcondzisa emabatsa. Simeme mengameli wenhlangano yebaholi bendzabuko iCONTRALESA, Kgosi Mathupa Mokoena

Inyonyana yetisebenti i-Public Servants Association (PSA)  isola litiko letemphilo eMpumalanga ngekuniketa tisebenti tasesibhedlela seTB iBongani Hospital tifonyo lesetendlulelwe sikhatsi. Sinalokhulumela iPSA kulesifundza Nomfundo Mlangeni.

Solwati wabomakhalekhikhini nemininingwane legciniwe, lovela ka vodacom sewucedzile kwetfula bukazi enkantolo lephakeme yase Pitoli. Tsholanang Golele bekatfula bufakazi ngenhloso yekuyisita  kubuka kutsi ingabe leminingwane legciniwe yamakhalekhikhini wa Mabhungu Ntuli kufanele yini yamukelwe njengebufakazi. Lerato Makola na Bongani Mondlane basihlanganisele lombiko

Sewusongiwe lomhlangano weBRICS lobewubanjelwe eveni laseNdiya. Kuyibuka kabanti lendzaba sicocisana nemhlatiyi wetindzaba temave emhlaba Dr William Mpofu.

Litiko letemisebenti yesive, imigwaco netekutfutsa ngekubambisana nelitiko letemfundvo kulesifundza se-Mpumalanga belibambe umhlangano losezingeni lelisetulu kutewubonisana ngendzaba yekutsikameteka kwekutfutswa kwebafundzi etindzaweni letitsite takulesifundza. Lomhlangano uta ngemuva kwekutsi batali betikolwa letahlukahlukene bangenele imibhikisho bakhonondza ngaloluhlelo lwe-scholar transport kutsi labanye bantfwana basele bangenako kwekubafikisa etikolweni. Kutfola kutsi uhambe njani lomhlangano, sikhulumisana nelisekela lemcondzisi kuto tindzaba te-scholar transport, June Sibiya.

Live lase-Swatini ligubetelwe lifu lelimnyama kulandzela kwendlula emhlabeni kwenhloko yetekwahlulela (Chief Justice) Bheki Maphalala kuleliviki leliphelile. Maphalala wacokwa kulesikhundla ngemnyaka wa-2015. Kuva kutsi ungubani lowa-Maphalala, sichumana nentsatseli yakhon eSwatini, Zweli Martin Dlamini.

Emaphoyisa akucinisekise kutsi sinye saletidvumbu tebafati letitfolakele eKempton Park empumalanga neJozi  sa-Elizabeth Moselakgomo lewanyamalala ngalesikhatsi ativocavoca emgwacweni. Kubikwe ngekunyamalala kwakhe kuleliviki leliphelile ngemuva kwekuphuma ayogijima. Kutfolwe lesinye futsi sidvumbu semfati kulendzawo lamuhla lekwenta kutsi tibesihlanu tidvumbu letitfolwe kulendzawo. Kutfola kutsi sibakhatsata nganani nasi simo bomake, sichumana na-Sarah Motha lovela ka-Women United for Change 

Kuleliviki kubungatwa liviki lekubhalwa kwencwadzi yemafa.  Motsebi Monareng usihlanganisele lombiko.

Umkhandlu lobuke tebuciko i National Arts Council, uvakashele kulesifundza se Mpumalanga kuleliviki kutewufundzisa ngekukhishwa kwetimali tekwesekela labasemkhakheni wetebuciko. Sicocisana nalokhulumela lomkhandlu  Zola Lumko. 

Kushone bantfu labasiphohlongo lekubalwa kubo nebantfwana lababili engotini yemoti leyenteke emgwaceni i-N17 emkhatsini kweErmelo neDavula kulesifundza seMpumalanga. Lokhulumela litiko letekuphepha kwemphakatsi, kuvikeleka nekuchumana eMpumalanga, Moeti Mmusi uyasichazela