I-Human Rights Watch  isola licembu le-M23 lelisekelwa yi-Rwanda ngekubulala bantfu phaca lababalelwa emashumini lamabili nakunye  lapha emphumalanga  yeDRC. Loku kuvele kulombiko loshicilelwe ngulenhlangano nalapho ivete kutsi letigameko tenteka ngamhlaka 22 na 23 February e-Goma. Kukhuluma kabanti ngalendzaba sicocisene na-Advocate Sipho Mantula, losati ngetindzaba tase Afrika. 

Inhlangano yeIFP itsi idvumatekile ngekubulawa ngesihluku kwelisekela lasosiswebhu wayo ephalamende Khethamabala "KP" Sithole. Sithole uhlaselwe e Katlehong eMphumalanga Randi ye-Gauteng ngeMgcibelo ebusuku. Sihlalo weIFP velonkhe Blessed Gwala utsi betsemba kutsi emaphoyisa atawenta konkhe lokusemandleni kucinisekisa kuboshwa nekushushiswa kwalabatsintsekako kulesehlakalo. 

Dr Nandipha Magudumana umikisa ludzaba lwakhe enkantolo yemtsetfo-sisekelo ngoba akholelwa ekutseneni kunyatseleke emalungelo akhe. Sikhulumisana nemmeli Melusi Xulu lophuma enkapanini  i-Donda Attoneys.

Inkantolo lenkhulu yaseNshonalanga Kapa isibalule njengaleshayisana nemtsetfo-sisekelo futsi lesiphambene nemtsetfo sincumo seNational Assembly sekutfumela lilunga leMK ephalamende Dr John Hlophe njengalotayimelele kuJudicial Service Commision. I DA yaya enkantolo kuyokhala ngalokutfunyelwa kwaHlophe kuJSC. Yenanelwa yi Freedom Under law kanye neCorruption Watch. Kukhuluma ngalesincumo senkantolo, asemukele. Sicocisene na Mbekezeli Benjamin lovela kuJudges Matter.

Inhlangano ye-EFF seyifake sicelo lesiphutfumako lesiphikisana nekunyuswa kwentsela yamafutsa etimoti, enkantolo yemacala laphakeme eKapa. Lentsela lebitwa nge General Tax Levy kulindzeleke icale kusebenta mhla titine kulenyanga yeNhlaba (4th of June). Kubuka lendzaba ngeliso lemhlatiyi wetemnotfo sicocisana neMnumzane Lunga Mahlaba lovela enkapanini iNkunzi Wealth Group.

Tisebenti letingaphasi kwemklamo we EPWP e Barberton kulesifundza se Mpumalanga tibambe umbhikisho emahhovisi amasipala we Mbombela nalapho tikhala ngekutsi tifuna kucashwa ngalokuphelele. Ngekusho kwaletisebenti tatsenjiswa kutsi titawucashwa ngalokuphelele kulomnyakatimali. Sikhulumisana na Godfrey Sthole longulomunye waletisebenti .

Inhlangano yebaholi bendzabuko, i-CONTRALESA itsi itawucinisekisa kutsi kute basokwa labatawulahlekelwa yimpilo yabo kulomnyaka. Kuvamile kutsi kushone basokwa njengoba sekusikhatsi sekucala kwalelisiko lekusoka. Sicocisene namengameli weCONTRALESA, Kgoshi Mathupa Mokoena.

Litiko letemfundvo kulesifundza se-Mpumalanga lincome emaphoyisa ngekunonopha abophe basolwa labasitfupha labasemkhatsini kweminyaka leli-16 neli-19. Labasolwa labasitfupha basolwa ngekubandzekanyeka ekubulaweni kwemfundzi waka Grade 12 , lobekafundza eNsika Secondary School eTjakastad, Mncedisi Nhlapho. Sicocisene nalokhulumela emaphoyisa esifundza, Lieutenant Colonel Jabu Ndubane.

Inhlangano ye-African People's Convention i-(APC),yetfule ngalokusemtsetfweni sigungu lesisetulu  sebaholi bayo kulesifundza se-Mpumalanga . Loku kulandzela lomhlangano wemkhandlu walenhlangano i-PGC leyabanjelwa lapha e-Dundonald  kumasispala we Chief Albert Luthuli evikini leliphelile . Sicocisene naMengameli we-APC  uMnumzane Themba Godi.

Iphela namuhla lapha e-Nkomazi inkomfa yavelonkhe yesikhungo semkhakha wetebucwephesha lebeyibanjwe yi-Progressive Black in ICT. Sikhulumisena namengameli lomusha walesikhungo Welcome Magagula.