Inhlangano iTeddy Bear Foundation, itsi letibalo letibikwa ngekuhlukunyetwa kwebantfwana ativeti sitfombe lesiphelele, njengoba titinyenti tigameko letingabikwa.  Sicocisene nalovela enhlanganweni iSave the Children South Africa, Gugu Xaba.

Umholiw enhlangano lelwela bantfu basemapulazini iGert Sibande Rural Farm Dwellers Association, Umnumzane Malibongwe Soko utsi basachubeka nekubukana netikinga tekuhlukunyetwa bantfu labahlala nalabasebenta emapulazini. Loku kusukela ekutseni inkantolo lebuyeketa tincumo ikhiphe sijubo lesivuna Jacob Pieters lobekabukubene nekucoshwa epulazini lelise Stellenbosch lebesekahleti futsi asebente kulo iminyaka lengema-37.  Lenkantolo ijube kutsi Pieters nemkakhe abachubeke bahlale encenyeni lencane yalomhlaba ngoba lilungelo labo lemhlaba livikelwa ngumtsetfo i-Extension of Security of Tenure Act (ESTA). Sikhulumisana naye uMnumzane Malibongwe Soko nganhlalo yebantfu basemapulazini.

Sekusuke tinkhulumo kulandzela kutsi iNdvuna Yetekuchumana, Solly Malatsi isolwe ngekutsi ifuna kukhipha inkampani yetebucwepheshe i-Starlink kutsi ingaphocelelwa ekutseneni ihlangabetana nemgomo yeB-BBEE (Broad-Based Black Economic Empowerment). Kepha Malatsi utsi lesinyatselo sakhe asikentwela kuvulela indlela lenkapani ye-Starlink kepha kunaloko injongo lenkhulu kukhulisa kuncintisana kulomkhakha kuze kuncishiswe emanani . Sicocisene nemhlatiyi wetepolitiki lotimele uMnuzane Sandile Swana

Sikhulumisene nelilunga lesigungu lesisetulu enhlanganweni yebameli i-National Association of Democratic Lawyers (NADAL), Umnumzane Themba Mathenjwa ngalokuniketwa sikhatsi sekuphumula lokukhetsekile kweCEO ye-RAF Collins Letsoalo.

Umntfwanenkhosi Thulani Zulu utsi bayasisekela lesincumo samengameli Cyril Ramaphosa sekumukela Inkosi yesive semaZulu, Misuzulu ka Zwelithini njengeNkhosi. Bekakhuluma ngaphandle kwasenkantolo lebuyeketa emacala e Bloemfontein. Lenkantolo bekadze ilalela sicelo samengameli lesikhala ngesincumo senkantolo lephakeme yase Pitoli leyajuba kutsi mengameli wenta liphutsa ngekusayina emaphepha lagcoba ngalokusemtsetfweni Inkhosi Misuzulu. Sicocisana nasolwati ngemlandvo webukhosi bakaZulu, Prof Sihawu Ngubane.

Kushone bantfu labasikhombisa etingotini temgwaco letenteke ngekwahlukana kulesifundza se Mpumalanga. Labatsatfu bashe bangcongca emgwaceni i-R23 emkhatsini kwe Vaal ne Balfour. Kulenye ingoti kushone bantfu labane emgwaceni i-R38 emkhatsini kwe Kaapmuiden ne Louw's Creek. Simeme lokhulumela litiko letekuphepha kwemphakatsi, kuvikeleka nekuchumana eMpumalanga, Moeti Mmusi.

 Likhomishana lemalungelo eluntfu lisamukele sijubo senkantolo lebuyeketa timcumo (Supreme Court of Appeal)  kulelicala lemhlaba lelibandzakanya umuntfu lobekasebenta epulazini, lebesekacoshwa ngumnikati walelipulazi. Kutosichazela ngalomtsetfo, simeme Nkomishana weHuman Rights Commission, Philile Ntuli.

Uyakhala umndeni wakaMsimango, lapha Kabokweni ngaseWhite River kulesifundza seMpumalanga, kulandzela kushona kwendvodzakati lekusolwa kutsi igagadlelwe. Kuva kabanti sicocisana namalume wemufi Umnumzane Delisa Kubheka, kantsi siphindze sibe nalokhulumela emaphoyisa esifundza, Jabu Ndubane.

Libhange letekutfutfukisa ingabadzi ye Africa, i African Development Bank, kulindzeleke likhetsa mengameli lomusha mhlaka 29 kulenyanga lesikuyo, emhlanganweni lotawubanjelwa e-Ivory Coast. Kutfola kabanti ngenjongo yalelibhange nekutsi yini lelingayenta kusita lelivekati le Africa, sikhulumisana nemcwaningi wetemnotfo khona lakhaya ka SABC Umnumzane Velemseni Mthiyane........

Inkantolo yesigodzi eMalahleni kulesifundza se-Mpumalanga igwebe liphoyisa kanye nalomunye bekaliphoyisa, iminyaka lesihlanu babhadla ejele, ngelicala lekwetama kubulala nelekushaya. Sayitjeni Louise Venter naloyo bekaliphoyisa Stefaans Breytenbach baboshwa nga 2020 kulandzela sigameko lesenteka ngalesikhatsi bente sivimba-mgwaco (roadblock) emgwacweni i N4 dvute ne Balmoral. Simeme mabhalane wenyonyana iPOPCRU eMpumalanga, Sipho Nkambule kutewuva kutsi baphefumula batsini ngalesigwebo.