Sikhungo lesicaphele kuphatfwa nekusebenta kwemincele yakulelive i-Border Management Authority (BMA), siyicoshe tisebenti tayso letingetulu kwema-50 ngetinsolo tekukhwabanisa nenkohlakalo. Sikhulumisanae nesikhulu se-BMA, General David Chilembe.

Emaphoyisa esifundza seMpumalanga abophe indvodza leneminyaka lengema-40 budzala  e-Machadodorp ngetinsolo tekubulala singani sayo. Lokhulumela emaphoyisa esifundza Colonel Mavela Masondo uyachaza.

Umphatsiswa welitiko letimali kulesifundza seMpumalanga, Bonakele Majuba, wetfule sabelo timali sakulesifundza etindlini tesishayamtsetfo namuhla. Umphatsiswa utfumele inhloko yalelitiko Gugu Mashiteng kutocacisela umlaleli ngalesabelo timali sakulesifundza

Likhomishana lebatsengi kuleli, I-National Consumer Commission i-(NCC) licele batsengi kutsi babuyisele emuva leminye yemkhicito yelubisi lwebantfwana, lebaka-Nutricia Southern Africa. Loku kulandzela kukhatsateka kutsi kunesitsako lesisetjentiswa kulemikhicito lesingahle sibe nebutsi lobubanga bungoti emphilweni yebantfwana. Sicocisane na Phetho Ntaba lokhulumela lelikhomishana lebatsengi kuleli. 

Kunemibono leyahlukene mayelanga nalokusungulwa kwelicembu lelikhetsekile kuze liphenye ngekubulawa kwabosopolitiki e-Gauteng. Lelicembu lisungulwa nje kusachubeka luphenyo lwelikhomishana laMadlanga mayelana nenkhohlakalo emaphoyiseni kanye nangekuhlakatwa kwelicembu lelifana naleli lebelisebentela esifundzeni saKwaZulu Natal. Kubuka kutsi yini lehlukile ngalelitsimba, sicocisananasolwati wetindzaba tebugebengu Dr Funeka Sihlobo.

Tindvuna tematiko etimali emaveni langaphasi kwe G7 betibambe umhlangano lophutfumako kuyococisana ngetindlela letingabambisana ngato kute kusetjentiswa emafutsa etimoto lagcinwe yi International Energy Agency. Loku kubangelwa kutsikameteka kwekutfunyelwa kwawoyela ngenca yalempi lesemkhatsini we Melika, Israel ne Iran. Sicocisana nasolwati wetemandla, Princess Mthombeni.

Tibalo letikhombisa lizinga lemkhicito wakulelive i-Gross Domestic Product tikhombisa kwenyuka ngeliphesenti linye ekoteni yesine yemnyaka lophelile. Kubuka kutsi kushoni lokwenyuka, simeme somnotfo Lunga Mahlaba lovela enkapanini iNkunzi Wealth Group.

Likomishane lelingamele lukhetfo kulelive belibambhe umhlangano kulesifundza seMpumalanga kutewukhuluma ngenzima lengadlalwa betindzaba ngesikhatsi selukhetfo kulelive. Mthobisi Mkhaliphi uyabika 

Emacala ekunukubeta ngekwemacansi enyuke ngemaphesenti lamatsatfu kulesifundza seMpumalanga, ngekusho kwetibalo letikhishwe nguNomishana wemaphoyisa esifundza.. Palesa Sotomela uyasibikela.

Fakazi wembuso kulelicala lekubulawa kwa-Bontle Mashiyane lobekaneminyaka lesitfupha usolwa ngekutakhela bufakazi ngenhloso yekukhipha make wakhe ecaleni. Motsebi Monareng uyasibikela.