Menntavísindavarpið

Anna Magnea Hreinsdóttir, lektor á Menntavísindasviði í leikskólafræðum er öflugur rannsakandi sem leiðir mörg verkefni og rannsóknir; t.d.  Föruneyti barna, nýja rannsókn á skólamenningu og raunfærnimat í leikskólakennarafræði. 

Kristján Ketill Stefánsson, lektor í kennslufræði við Menntavísindasvið HÍ kíkti í Menntavísindavarpið og ræddi rannsókn sína Lestur á mið- og unglingastigi og tengsl við snjallsímanotkun á skólatíma, Skólapúlsinn sem hann setti á laggirnar, snjallsímanotkun ungmenna og rannsóknirnar á teikniborðinu. 

Guðrún Ragnarsdóttir, prófessor og María Jónasdóttir, aðjúnkt og doktorsnemi á Menntavísindasviði eru hluti af rannsóknarhópi sem skoðað hafa áhrif styttri námstíma til stúdentsprófs í samhengi við aðrar stefnubreytingar sem gerðar hafa verið á framhaldsskólastiginu. Í þessu fimmta varpi Menntavísindavarpsins ræðum við um undirbúningstíma stúdentsprófa og hvernig framhaldsskólanemar í dag eru undirbúnir fyrir nám á háskólastigi, jafnréttissjónarmið tengd styttingu framhaldsskólans og hvernig rannsóknarniðurstöður Guðrúnar og Maríu verðar nýttar áfram samfélaginu til heilla. 

Í þessum þætti Menntavísindavarpsins mæta meistaranemarnir, Andrea Marel úr tómstunda- og félagsmálafræði, M.Ed. og Ebba Áslaug Kristjánsdóttir úr uppeldis- og menntunarfræði, MA og ræða meistaraverkefni sín sem þær kynntu á dögunum á málþingi meistaranema á Menntavísindasviði.

Andrea segir frá rannsókn sinni og meistaraverkefni sem ber heitið: „Vettvangsstarf er lífsnauðsynlegur hlekkur í stuðningskerfi varðandi börn“ Sýn fagfólks á vettvangsstarf félagsmiðstöðva í Reykjavík og Ebba segir frá meistaraverkefni sínu: „Þakklát fyrir reynsluna en ekki fyrir krabbameinið“ Upplifun ungra kvenna af krabbameini og lærdómur þeirrar reynslu.

Ingólfur Ásgeir Jóhannesson, prófessor emeritus í kennslufræðum við Menntavísindasvið mætti í  Menntavísindavarpið og ræddi rannsóknina sem hann vann með Maríönnu Jónsdóttur Maríudóttur grunnskólakennara og Valgerði S. Bjarnadóttur lektor við Menntavísindasvið sem þau kynntu á Menntakviku og ber heitið: Jafnvægi starfs og einkalífs ungra kvenkyns kennara í íslenskum grunnskólum. Ingólfur ræddi rannsóknina, stöðu barna í íslensku skólakerfi, femíniskar rannsóknir og hvað sé á rannsóknardöfinni.  

Lesfimipróf hafa verið gagnrýnd og áhyggjur eru uppi um að læsi og lestrarkunnáttu barna og ungmenna fari dalandi. Greint var frá því nýverið að 40 prósent nemenda í 6. bekk næðu ekki grunnviðmiði í lesfimi til að mynda.  

Auður Soffíu- og Björgvinsdóttir, aðjúnkt og doktorsnemi á Menntavísindasviði og fyrrum grunnskólakennari til margra ára mætti í Menntavísindavarpið og sagði frá niðurstöðum rannsóknar sinnar um læsi sem hún kynnir á Menntakviku og ræðir í Menntavísindavarpinu m.a. hvar við stöndum á Íslandi hvað varðar læsi, lestrarkunnáttu og hvernig megi bæta læsisfærni barna okkar. 

Síðastliðið vor var í fyrsta sinn spurt um hnífaburð í Íslensku æskulýðsrannsókninni sem Menntavísindastofnun Menntavísindasviðs Háskóla Íslands stýrir. Rannsóknin er framkvæmd á hverju ári í grunnskólum en annað hvert ár í framhaldsskólum.

Þær Ragný Þóra Guðjohnsen, dósent við Menntavísindasvið og er faglegur stjórnandi Íslensku æskulýðsrannsóknarinnar og Kolbrún Þ. Pálsdóttir, forseti Menntavísindasviðs kynna niðurstöður íslensku æskulýðsrannsóknar á Menntakviku árlegri ráðstefnu Menntavísindasviðs sem fer fram dagana 26.-27.september.

Menntavísindavarpið, nýtt hlaðvarp Menntavísindasviðs HÍ ræddi við Ragnýju og Kolbrúnu um aukinn vopnaburð ungmenna, Íslensku æskulýðsrannsóknina og hvernig styðja megi við börn sem finna sig ekki tilheyra.