Դժվար է ընդունել կյանքն իր լավ ու վատ կողմներով: Դա անել իրավաբան Զեպա Մկրտչյանին օգնում է բոլոր ժամանակների լավագույն երգերից մեկը` The Beatles-ի Let it be-ն:  

Լինում է, որ քո ամենասիրելի երգը գտնում ես Եվրատեսիլի շնորհիվ: Ու թեպետ Marco Mengoni Due vite երգը մրցույթում չհաղթեց, բայց լուսանկարիչ Մադաթ Սադոյանի սրտում գրավեց առաջին տեղը:

Գործնական հարաբերություններից մինչև մեծ սեր: Այսպիսին է երաժշտասեր Սարգիս Հակոբյանի ու Եվգենի Գրինկոյի «Վալս» ստեղծագործության հարաբերությունների էվոլյուցիան: 

Երգ, որ ստիպում է արթնանալ առավոտ շուտ իր հետ քեզ ծանոթ ճանապարհներով հերթական անգամ անցնելու համար ու չի հոգնեցնում: Մելոման Էլեն Մեջլումյանն ու The Animals-ի House of the rising sun երգը ճանապարհի ընկերներ են:

Radiohead խմբի Creep–ը եղել է Լիանա Թուրյանի տխուր օրերի երգն ու ընկերը: Դեռահասության խնդիրներից մինչև հասուն կյանքի դժվարություններ, այդ ճանապարհները նրանք միասին են անցնում:

Երգ, որ հուզում է մինչև հոգու խորքը։ Իր երիտասարդ օրերի մասին իրականում դեռ շատ երիտասարդ հաղորդավար Կարեն Կոլոսովին հիշեցնում է Շառլ Ազնավուրի Yesterday when i was young երգը:

Մենք փոխվում ենք, կորցնում ենք ու գտնում մարդկանց, մեկ-մեկ նույնիսկ մեր հին «ես»-ը: Այդ ճանապարհին ծրագրավորող Հայկի ականջակալներում այս երգն է հիշեցնում վայելել պահը:

Երգել գոռալով` մինչև ձայնդ կկտրվի, բայց մեկ է, չդադարել երգել: Տխրությունից` ուրախություն, իր բոլոր էմոցիաները բարմեն Արման Բարսեղյանը այս երգով է ապրում:

Լինում են պարադոքսալ երգեր, որ տխուր են, բայց և հույս են տալիս։ Քեյ  փոփ երաժշտության սիրահար, արմի Մագա Սարգսյանի համար այս կորեական երգը դրանցից մեկն է ու ամենասիրելին է։

Սա սեր էր առաջին հայացքից, մի երեկո մելոման Զառա Տոնիկյանը միանգամից սիրահարվեց այս երգին, որը ստիպեց նրան մտածել էքզիստենցիալ  հարցերի մասին: