Vandag is dit wêreldbevolkingsdag, die dertigste viering van die dag, wat in 1989 geloods is, toe die aarde maar net vyf miljard mense gehad het. Vandag staan daardie syfer op 7,7 miljard. En om dit in 'n historiese konteks te plaas - slegs een eeu gelede, was daar maar net een komma nege miljard aardbewoners. Volgens vooruitskouings van die Verenigde Nasies, sal ons teen die jaar 2100 10,9 miljard mense wees. Vir meer oor hoe dit ons afstammelinge gaan raak, het Anita Visser met Doris Viljoen van die Universiteit van Stellenbosch se Instituut vir Toekomskunde, asook die filosoof, professor Anton van Niekerk, verbonde aan dieselde universiteit gepraat.