"Ons is nie almal so nie." Nee, ons praat nie nou van Jeanne Goosen se baanbrekers boek nie, maar van die gevoel wat onder Parys se landbou gemeenskap heers oor die gedrag van mense wat die vierkleur en ou landsvlag vroeër die week by die landdroshof op die Vrystaatse dorp rondgeswaai het. Dit tydens die hof verskyning van vier boere, Johan Cilliers en sy seun Johan junior, Boeta van der Westhuizen en Anton Loggenberg wat intussen op borgtog van R 5000 elk tot 12 Februarie vrygelaat is. Die saak hou verband met die moord op Samuel Tjixa en Simon Jubeba, wat dood is na 'n aanval op van der Westhuizen se pa, Loedie op sy plaas, Biesiesbult. Hennie Viljoen boer al sy hele lewe lank in die Parys distrik en het per epos aan Monitor geskryf dat nie almal die oproerige gedrag by die hof goedkeur nie.