Go karolwana ya 'Ke kgopela tebalelo', motheeletsi o re ngwaletše mme a re botša ge warra wa gagwe a re o mo swaretše eupšwa a se sa mo nyaka ka ga gagwe ebile a sa nyake le ge a mo leletša. Motheeletši o be a nyaka go tseba gore naa taba yeo ke tshwarelo ya nnete naa ka ge yena a  ekwa bohloko ka mokgwa owe ngwanabo a mo swarago ka gona.

Go Moremogolo re memile setsebi sa menagano go tlo re tlhahla ka taba ya go re naa ke maemo a fe ao re ka re go motho o go ona go ka nyala goba go tsena lenyalong. E re fetola mawa re memile banna le basadi bao ba re go bona ba tšhaba go tsena lenyalong e le ge re be re nyaka mabaka a bona tabeng yewe.

Re botšišitše banna le basadi ka manyalong gore naa melokong ya bagatša ba bona, ke bo mang goba ke mang o tee yowe ba sa kwanego le yena goba ba ka se tsogego ba kwanne le yena go ya le ka mowe a ilego a ba kgopiša ka gona.

Ka go le lengwe re be re thušana le mosadi yowe a re go ge a eya go mmatswale wa gagwe go bega mogatšagwe yowe a sa robalego ka gae le go boa mašego, mmatswale le dikgadi di fetole ka gore a dule ka gae a iketle ka gore mogatšagwe ga a mmolaiše tlala.

Re boledišana le mma yo mongwe yo arego o na le mengwaga ye 15 ka lenyalong monna a mo tima thobalano eupswa a efa mokaola. Mosadi yo o re o kgopela mogatšagwe gore a mo lokolle le yena a nyake mokaola yowe a tla mo fago thobalano ka ge le yena go e na le mosadi wa mokaola yowe a mo fago thobalano. Mosadi yo o re ge monna a gana taba ye, gona ga a mo tšeye a ye go dula le yena mošomong wa gagwe gore a hwetše thobalano, go se go bjalo yena o bona okare o tlo ikhweletša mokaola.

Re ahlaahla mokgwa wa basadi wa go dula le banna ba sa ba nyala, ga mmogo le go šomiša ditšhelete tša bona le banna ka nepo ya go ba dira gore ba ba nyake. Ge re fetola mawa re boledišane ka taba  ya bagatša ya go tsebantšha le go tlwaelantšha bagwera ba bona le bagatša ba bona.

Re bolela ka batho bao ba tsenago manyalong le ba bangwe eupšwa ba sa ba utollela ditaba tše dingwe tše bohlokwa ka ga bona, go no swana le ge monna goba mosadi a ka tsena le motho lenyalong eupšwa a se mmotše gore yena ga a kgone go dira bana. Banna le basadi ba bangwe ge ba tlo tseba taba ye ka morago ge šetše ba tsene ka lenyalong, ba a hlala. Bjale re lebeletše ka mowe taba ye e ka thubago manyalo ka gona, le go hlohletša banna le basadi go thea manyalo a bona godimo ga motheo wa therešo.

Re bolela ka banna le basadi bao ba elego ba ba golo gore ba ka tsena lenyalo, eupswa ka mehla ba sa kgotsofalelego ke balekani bao ba ba hwetšago, mme se se dira gore bona ba phele ba fetola balekane ba sa tsene lenyalong le bona go fihla ebile ba bangwe ba tšofala ba sa ka ba tsena lenyalong.