Hip-hop musika, rapa, trap doinuak edota reggaetoia, denetarik izan dugu 2020an ere Euskal Herrian geroz eta gehiago errotzen ari den musika urbanoaren baitan. Hiru proiektu desberdinen kantuak ekarri dizkigu Jon Eskisabelek aste honetan MusikHaria saioko ‘Badok’ tartera.

Kontu ugari izaten ditugu ‘Zarata’ tartean Iker Bárbara kazetariarekin. Izan ere, ekartzen dizkigun proposamenek musikaren esparruko hainbat ertz jorratzeko aukera ematen digute MusikHaria saioan. Aste honetan, besteak beste, soinu banden inguruan aritu gara.

Iazko Durangoko Azokan sormen beka eskuratu zuen Iratxe Aguilerak bere buruan bueltaka zuen Kai Nakai proiektuari forma emateko. Urtebete beranduago, ‘Baimenik gabe’ lanak argia ikusi du. Euskal musikan orain arte gutxi landu den genero bati ikuspegi berria ematen dion diskoa.

Hiri tribuek halako eragina izan dute musikan ere. Edota musikaren inguruan sortu izan dira hainbat hiri-tribu ere. Horietako bat izan da EMOena, musikaren bueltan eragin zuzena izan duen tribua. Marina Landak haietako talde batzuk ekarri dizkigu gogora aste honetako bere tartean.

Izkander Fernandezek astero gai baten bueltan hainbat kantu ekartzen dizkigu. Kasu honetan duela urte batzuk itxi zen Bergarako Jam aretoa izan dugu gogoan MusikHaria saioan. Bertatik nazioarteko talde garrantzitsuak pasa ziren irekita egon zenean.

Lehendabiziko diskoa da ‘Deshumanizazioa’ Oñatiko boskotearentzat. Artisau erara, entseatzen duten musika lokalean bertan grabatu dute bost abesti jasotzen dituen albuma. Deseroso sentiarazteko hitzak eta doinu gogorrak eskaini dizkigute Bizarro taldekoek.

Lau proposamen berri ekarri dizkigu astero bezala Iker Bárbara Zarata Mondosonoroko koordinatzaileak MusikHaria saiora. Estilo anitzeko hautaketa da aste honetarako prestatu duena kazetari bilbotarrak.

Gatibu taldeak ‘Musikak salbatuko gaitu’ diskoa kaleratu du gaur bertan. Mezu zuzenak, errealitatearen isla direnak eta ahalik eta modu baikorrenean biltzen ditu beren azken lanak. Haimar Arejita izan da diskoaren inguruan hitz egiten MusikHaria saioan.

Abestien mezuak garrantzia izaten du, are gehiago propio mezu bat zabaltzeko sortzen direnetan. Abenduaren 3a, euskararen eguna, pasa berritan, Marina Landak euskararen alde sortu diren kantuen mezuak aztertu dizkigu MusikHaria saioan.

Aurreko asteetan gai bat hartu eta haren bueltan ibili gara ostegunetan Izkander Fernandezek egiten digun tartean. Aste honetan, ordea, urte bukaerari begira jarri eta gehien gustatu zaizkion artisten lanak errepasatu dizkigu.