13. febuar verður fyrsta sjónvarpsrøðin, ið er tikin upp í Føroyum, frumsýnd. At gera eina krimisjónvarpsrøð í Føroyum er ein gamal dreymur hjá upphavsmanninum til røðina. Vit hava eitt longri prát við gøtumannin, Tórfinn Jákupsson. 

Tórshavnar Big Band endar VetrarJazzin við einum braki leygarkvøldið, tá tey fara at spæla saman við danska "croonaranum" Mads Mathias. Vit fáa tvey umboð fyri Tórshavnar Big Band, Eirik Skála og Torleik Mortensen, á gátt at tosa um konsertina og Big Band tónleik

Hoyr alla sendingina her.

13. februar verður TROM, fyrsta sjónvarpsrøðin, ið er tikin upp í Føroyum, frumsýnd á Viaplay.

Tá fara vit at kunna síggja Hannis Martinson og aðrar persónar úr bókunum hjá Jógvani Isaksen trína fram á skíggjan í vakra og harðbalna føroyska landslagnum.

Upptøkurnar til sjónvarpsrøðina, sum er í seks pørtum, vóru lidnar mitt í juni í fjør, og síðani hevur filmstoymið arbeitt við at klippa, gera ljóð og eftirviðgerða filmin.

Bókaárið var gott, tí har komu nýggj bókasløg, har vóru debutantar, og so eru skaldsøgurnar komnar í eina fasta legu. Soleiðis tekur Malan Marnersdóttir saman um bókaárið 2021.

Í hesi samrøðuni viðgera vit fagurbókmentaliga partin. Vit fáa tað til, at 13 yrkingasøvn, fýra stuttsøgusøvn og seks skaldsøgur komu út í Føroyum í fjør. Harumframt komu nógvar týddar bøkur út, eins og yrkisbókmentaliga rúgvan var stór.

Hoyr alla samrøðuna við Maluna Marnersdóttir her.

Saman við Maluni Marnersdóttir, bókmentafrøðingi, viðgera og taka saman um bókaárið 2021.

Haraftrat hava vit kjak millum Annfinn Brekkstein og Gunnvør Balle, núverandi og fyrrverandi forfólk í mentanarnevnd Tórshavnar Býráðs, um býarsavnið í Havn, sum framvegis eingi høli hava at sýna fram í.

Hoyr alla sendingina her.

Nón hevur hitt Guðruna Ludvig og Guðruna Rógvadóttir til eitt prát um hesi fyrstu 20 árini, fyritøkan hevur virkað, nú hon fekk heiðursgáva landsins.

Og tann ætlan, sum tær frá byrjan settu sær fyri, í mun til burðardygd og virðilig viðurskifti í sambandi við framleiðslu, hevur verið avgerðandi.

Mikudagin vórðu heiðurslønir landsins handaðar í Salti á Drelnesi.

Vit hoyra samrøður við tveir av heiðurslønarmóttakarunum. Olaf Johannessen fekk mentanarvirðisløn landsins, Martin Joensen fekk serstøku virðisløn landsins, og Guðrun&Guðrun fingu heiðursgávu landsins.

Vit tosa við Guðrun Ludvig og Guðrun Rógvadóttir, og samrøðuna við Olaf Johannessen gjørdi Suni Merkisstein herfyri.

Og so hoyra vit hvørjar tankar Høgni Djurhuus hevur gjørt sær hesa vikuna í Høgnatáttinum.

Hoyr vikuliga Høgnatáttin, har Høgni Djurhuus tekur saman um hendingar og útsagnir hesa farnu vikuna

Samband er millum partarnar, sigur Ólavur Jøkladal, nú boykottið av Tjóðpallinum gongur á øðrum ári. Hvat sigur formaður í Leiklistaráðnum, ið er stýrið fyri Tjóðpallin, um varandi kreppuna á leiklistaøkinum. Ólavur Jøkladal er formaður í Leiklistaráðnum, sum er stýrið fyri Tjóðpallin.

Sjálvmorð, sorg, sálarsjúka, sosialir miðlar, happing og ágangur á netinum. Tað eru millum evnini, ið verða viðgjørd í nýggju føroysku ungdómsskaldsøguni, Loynigentan, sum eisini er ein spenningsøga. Vit hitta rithøvundin, Tórunn Karinu Henriksen.

"Loynigentan" er heitið á nýggjari føroyskari ungdómsskaldsøgu, sum kom út um mánaðarskiftið november/desember 2021. 

Tað er Tórunn Karina Henriksen, sum hevur skrivað, og bókin er onnur skaldsøga hennara. Fyrsta skaldsøgan hjá Tórunn, "Månelyset viste vej", kom í 2010. Hon var á donskum. 

"Loynigentan" er serlig á tann hátt, at hon viðger evnir, sum kanska ikki eru so nógv lýst í føroyskum skaldskapi; sjálvmorð, sorg, sálarsjúku, sosialar miðlar og happing og ágang á netinum.

Í 1950´unum og 60´unum vóru 33 føroysk børn send til viðgerðar í Danmark fyri mjadnasjúku.

Har lógu tey fastbundin við beininum í spenni í yvir tvey ár, uttan at hava foreldur ella onnur avvarðandi hjá sær. Tí tað kravdi viðgerðin.

Børnini vóru rættiliga smá, tá tey vóru send niður. Jógvan Andrias Joensen, tað eina barnið í sendingini, var trý ára gamal og Thorbjørn Joensen var fimm ár.