Nuus

Die nasionale veldtog vir humanitêre hulp aan Kuba reik nou uit na die kulturele sektor, om musiek en die kunste te gebruik om openbare steun vir noodsaaklike mediese voorrade en noodhulp te mobiliseer. Die fondsinsamelingsinisiatief het reeds meer as 700 000 Namibiese dollar ingesamel. Die sosiale geregtigheidsaktivis Lucy Edwards-Jauch herinner die publiek aan Kuba se belangrike rol en opofferings tydens Namibië se bevrydingstryd.

Die Ohangwena- en Oshikoto-streke is geïdentifiseer as die land se brandpunte vir geslagsgeweld, wat gesamentlik verantwoordelik is vir meer as 17 persent van alle gevalle landwyd. Tydens die amptelike bekendstelling van die “Anti GBV”-veldtog in Omuthiya het die waarnemende hoof van die Namibiese polisie, generaal-majoor Anne-Marie Nainda, onthul dat uit 6 304 nasionale gevalle wat in die 2025/'26-boekjaar aangeteken is, Ohangwena 654 gevalle geregistreer het, terwyl Oshikoto 448 aangeteken het. Nainda het diep kommer uitgespreek oor die aard van hierdie misdade en beklemtoon dat gewone aanranding en ernstige fisiese geweld Ohangwena se syfers oorheers, terwyl kinderverkragting, veral op jong seuns, skerp gestyg het in die Oshikoto-streek.

Die visserysektor het aksie nodig, nie nog 'n lang proses nie. Dit is die boodskap van Graham Hopwood, uitvoerende direkteur van die Instituut vir Openbare Beleidsnavorsing, wat sê drie eenvoudige hervormings kan vinnig deursigtigheid en verantwoordbaarheid in die bedryf verbeter. Hy sê geleenthede soos die 2026 Nasionale Visserye Indaba, wat vandag afgeskop het, is onnodig. Hopwood het aan Kosmos 94.1 Nuus gesê dat deursigtigheid nodig is om korrupsie te verhoed.

Stad Windhoek het sy toegangs- en permitstelsel vir swaar voertuie gefinaliseer om padskade, verkeersopeenhopings en veiligheidsrisiko's op munisipale strate te verminder. Na konsultasies met die bedryf is maandelikse permittariewe vasgestel tussen 120 en 500 Namibiese dollar. Stadswoordvoerder Lydia Amutenya het aan Kosmos 94.1 Nuus gesê dat September as 'n bewusmakingsmaand dien.

'n Amerikaanse federale regter het president Donald Trump se administrasie verhoed om sy uitvoerende mag te gebruik om geboortereg-burgerskap te beperk deur federale departemente te verbied om burgerskap aan kinders wat in Amerika gebore word, te gee. Die Hooggeregshof het in Junie Trump se aanvanklike poging om geboortereg burgerskap te beëindig voorkom met die verstandhouding dat enige iemand wat in Amerika gebore word 'n burger word al is die kind se ouers nie burgers nie. Prokureur-generaal Todd Blanche het aan Fox News gesê hulle gaan appèl aanteken:

Die Stad Johannesburg se bestuur het opdrag gegee dat dringend ingegryp word om wet en orde, en netheid in die middestad te herstel. Burgemeester Dada Morero en stadsbestuurder Floyd Brink het gister met die Johannesburg Metropolisie se senior bestuur vergader en eis strenger toepassing, groter aanspreeklikheid en sigbare operasionele verbeterings. Die metro-woordvoerder, Nthatisi Modingoane, sê onwettige handel, wetstoepassing, afvalbestuur, openbare ruimtes en stedelike netheid is probleme wat met mekaar verband hou en vereis dat departemente en instellings saamwerk:

Nanso het kommer uitgespreek oor Nsfaf se voortdurende vertragings in die uitbetaling van nie-onderriggelde aan tersiêre en beroepsgerigte studente. Nanso-woordvoerder Ndayola Mulongeni sê dat terwyl baie studente uitbetalings ontvang het, 'n beduidende aantal eerstejaar- en finalejaarstudente sonder fondse bly, wat hulle laat sukkel om basiese lewenskoste te dek. Mulongeni kritiseer Nsfaf omdat hulle herhaaldelik hul eie betalingstermyne misloop. Sy het met Kosmos 94.1 Nuus gepraat:

Die Franse president, Emmanuel Macron, sê Brittanje en Frankryk is eensgesind wat Oekraïne, die Midde-Ooste en multilateralisme betref. Die twee lande beywer hulle vir Europese ondersteuning aan Kiëf sedert Rusland se volskaalse inval meer as vier jaar gelede. Macron en koning Charles het gister die Britse Museum besoek vir die amptelike opening van die Bayeux Tapisserie-uitstalling. Die Middeleeuse meesterstuk is ʼn eeue oue simbool van die verhouding tussen die Franse en Britte. Macron sê daar is nou vertroue tussen Parys en Londen:

Die ANC het sy volle vertroue in die Verkiesingskommissie en sy integriteit uitgespreek. Die party hou vol tegniese probleme met die kommissie se kandidate-vasleggingstelsel het ʼn paar van sy kandidate vir die plaaslikeregeringsverkiesing se invoering op die stelsel geraak. Politieke partye en onafhanklike kandidate se benoemings moes teen vyfuur op 28 Augustus op die stelsel wees. Die kommissie sê egter sy stelsel het reg gewerk. ANC-woordvoerder Mahlengi Bhengu het aan Newzroom Afrika gesê hulle glo hulle sal die probleem met die kommissie oplos:

Elisenheim Eiendomsontwikkelingsmaatskappy bevorder planne vir 'n nuwe lae-digtheid residensiële en gemengde gebruikskomponent van die Elisenheim Leefstyllandgoed nadat ‘n hernude omgewingsklaring vir die voorgestelde landgoed verkry is. Dit maak voorsiening vir die verdere uitbreiding van Elisenheim se residensiële aanbod noord van die hoofstad. Le-Hugo van Rooyen, uitvoerende hoof van APxHouse Eiendomsontwikkeling, het met Kosmos 94.1 Nuus gepraat: