Visepresident Lucia Witbooi het Vrydagaand by die Copps 94.1-span in die hoofstad aangesluit om haar van die doen en late van Windhoekers op maandeinde te vergewis. Op die misdaadfront was dit ‘n stil aand met geringe insidente en Witbooi het haar tevredenheid met inwoners se gedrag uitgespreek. Sy het met Darren Smith van Kosmos 94.1 gepraat:

Energieminister Modestus Amutse het aangekondig dat Namibië se jaarlikse brandstofverbruik ongeveer 1,1 miljard liter is, waarvan 70 persent diesel en 30 persent petrol is. Dit is gelykstaande aan ongeveer 100 miljoen liter petrol en diesel wat maandeliks verbruik word. Amutse sê ten spyte daarvan dat die land nie sy eie olieraffinadery het nie, is ooreenkomste met vier groot oliebemarkingsmaatskappye, Namcor, Puma Energy Namibia, Vivo Energy Namibia en Total Energies Namibia, stabiel.

Kry die nuus soos dit breek.

Die minister van Menslike Nedersettings, Thembi Simelane, het 'n beroep gedoen vir dringende, grootskaalse samewerking tussen die regering, die privaat sektor en finansiële instellings om Suid-Afrika se behuisingsagterstand aan te spreek. Die agterstand staan tans op ongeveer 2,6-miljoen eenhede, wat meer as 12-miljoen mense raak. Simelane sê die land word in 'n ingewikkelde omgewing bedryf, gekenmerk deur vinnige verstedeliking, stygende boukoste, infrastruktuurbeperkings en toenemende klimaatverwante gevare:

Tennis: Die wêreld-nommer-een, Aryna Sabalenka van Belarus, kom môre in die Miami Ope se eindstryd teen Coco Gauff te staan. Sabalenka, ʼn viermalige Grand Slam-kampioen, het Elena Rybakina van Kazakstan geklop. Sy kort net een oorwinning om met die gesogte Sonskyn-dubbel te spog ná haar sege vroeër die maand by Indian Wells. Gauff het die Tsjeg Karolina Muchova afgeransel om haar eerste Miami Ope-eindstryd te haal. Sabalenka vertel wat ondersteuners van die eindstryd teen Gauff kan verwag:

Dit is vandag 41 jaar sedert die Westdene-busramp waarin 42 kinders gesterf het toe 'n bus wat leerders van Hoërskool Vorentoe vervoer het, op die Westdene-damwal verongeluk en in die dam gesink het net na een-uur die middag. Daar is 30 kinders gered. Tot vandag toe weet niemand presies wat die ongeluk veroorsaak het nie. Dit is deur die destydse regering in Suid-Afrika as nasionale ramp verklaar. Ooggetuie Kobus van Wyk het by die 40ste herdenking verlede jaar met die media gepraat.

Tydens die aankonding vir die prysverhoging van petrol met 2 Namibiese dollar en 50 sent per liter en 'n verhoging van 4 dollar per liter vir beide grade diesel, het lynminister Modestus Amutse gewaarsku teen paniekaankope van brandstof. Hy sê dat die land tans genoeg brandstofvoorraad het om in twee maande van nasionale vraag te voldoen. Hy het vanmiddag 'n perskonferensie toegespreek:

Agribank het bevestig dat hy 'n potensiële belegger gevind het om die Witvlei-slagpale te laat herleef, meer as 'n dekade na die ineenstorting daarvan, veroorsaak deur die verlies van 'n winsgewende Noorse beesvleisuitvoerkwota wat die staat aan Meatco toegeken het. Die geskil oor kwotas en verminderde toewysings het Sidney Martin se Witvlei Meat nie in staat gestel om volhoubaar te funksioneer nie, wat uiteindelik sluiting gedwing het en meer as 200 werksgeleenthede in die Omaheke-streek gekos het. Agribank-woordvoerder Fillemon Nangonya het met Kosmos 94.1 Nuus gepraat:

Die Elektrisiteitsbeheerraad van Namibië is pas verkies as die nuwe voorsitter van die Vereniging van Reguleerders van Energie- en Waterdienste van Afrika. Die organisasie se fokusareas sluit in regulatoriese raamwerke, infrastruktuurontwikkeling en streeksintegrasie. Robert Kahimise, die uitvoerende hoof van die beheerraad, neem die rol van voorsitter oor:

Die voormalige apartheidspolisiebevelvoerder Eugene de Kock het in die Hooggeregshof in Gqeberha getuig president Cyril Ramaphosa was op 'n lys van mense wat vir 'n sluipmoord geteiken was. De Kock het virtueel getuig in die Cradock Vier-ondersoek en gesê hy is beveel om 33 individue te vermoor, maar het geweier om Ramaphosa dood te maak en aangedring hy is onskuldig. Hy het ook verduidelik hoe topbeamptes in die SAPD, nadat moorde gepleeg is, in die kerk “gereinig” sou word: