Die Verenigde Nasies se sekretaris-generaal, António Guterres, is bekommerd oor Suid-Afrika se uitsluiting van G20-prosesse onder Amerikaanse leierskap. Die Amerikaanse president, Donald Trump, het in November gesê Suid-Afrika sal nie genooi word na geleenthede wat sy land aanbied nie na maande van toenemende spanning oor handelstariewe en Trump se bewering van wit volksmoord in Suid-Afrika. Guterres sê die G20 is nie 'n multilaterale organisasie nie, maar 'n samevoeging van lande:

Okahandja het Woensdagaand meer as 100mm reën gekry in dele van die dorp. Gelukkig was geen elektrisiteit infrastruktuur beskadig nie, ten spyte daarvan dat die infrastruktuur oud is. Vroeër in die jaar het Cenored groot skade in die dorp gelei tydens donderstorms. Kosmos 94.1 Nuus het met die woordvoerder van Cenored, Chali Matengu gepraat.

Die onderwysaktivis Hendrick Makaneta verwelkom die Spesiale Ondersoekeenheid se herwinning van 1,7-miljard Suid-Afrikaanse rand wat aan die Nasionale Finansiële Hulpskema vir Studente teruggegee is. Dit is deel van meer as twee-miljard-rand wat die Ondersoekeenheid tot dusver teruggevind het by universiteite, TVET-kolleges en studente wat nie geregtig was op befondsing nie. Makaneta sê dis ʼn belangrike stap om seker te maak studente uit arm en werkersklashuishoudings kry die finansiële ondersteuning wat vir hulle bedoel is:

Die waarnemende minister van Polisie, Firoz Cachalia, sê hy het by die nasionale polisiekommissaris, Fannie Masemola, aanbeveel dat beamptes wat in die Madlanga-kommissie se verslag betrek word, tydelik geskors word. Dit volg nadat president Cyril Ramaphosa Cachalia en Masemola beveel het om ʼn spesiale ondersoektaakspan aan te stel om die individue wat by korrupsie betrek word te ondersoek. Cachalia het aan die SABC gesê die kommissie het bevind daar is prima facie bewyse teen vyf SAPD-beamptes:

Venezuela se wetgewers het die hervorming van die land se oliesektor, wat privaatmaatskappye toelaat om sake te bedryf, goedgekeur. Die waarnemende president Delcy Rodriguez werk nou saam met Amerikaanse owerhede. Maar daar is uitdagings met vervalle infrastruktuur en die koste van ontginning van die ru-olie. Intussen het Donald Trump die land se lugruim heropen.

Die N/a’an ku sê-stigting gaan 'n omvattende gemeenskapsbehuisingsprojek van 40 huise ontwikkel in Epukiro in die Omaheke-streek. Die ontwikkeling is ontwerp om te verseker dat inwoners met waardigheid leef en toegang het tot moderne sanitasiegeriewe, 'n gemeenskapstuin om vars en lewensbelangrike voeding te ondersteun, 'n herwinningsaanleg en 'n veilige, ondersteunende omgewing waarin beide kinders en volwassenes kan floreer. Een-en-twintig eenhede word vir die eerste fase beplan. Kosmos 94.1 Nuus het met die mede-stigter van N/a’an ku sê, Marlice van Vuuren gepraat.

Die Stadspolisie het inwoners weereens versoek om waaksaam te bly wanneer hulle taxi's gebruik. Die waarskuwing volg op 'n voorval vanoggend waarin 'n One Africa-joernalis aangeval en beroof is nadat sy in ‘n bedrieglike taxi geklim het. Sy was kortstondig as vermis aangegee. Kosmos 94.1 Nuus het met sersant Nqobizwe Shipanga gepraat, wat inwoners aangemoedig het om die Stad Windhoek-toep af te laai en die taxi-verifikasiefunksie te gebruik.

Nanso het nuwe kommer uitgespreek oor die uitsluiting van leerders met gestremdhede in die land se onderwysstelsel. Nanso sê die 2025 Namibië Senior Sekondêre Sertifikaat Gewone en Gevorderde Aanvullende eksamenuitslae is vrygestel sonder gestremdheid-spesifieke data, wat leerders met gestremdhede weereens onsigbaar maak in nasionale verslagdoening. In 'n onderhoud met Kosmos 94.1 Nuus sê die nasionale leier van die Namibiese Nasionale Vereniging van Dowes, Paul Nanyeni, dat dit slegs een van die voortdurende uitdagings is waarmee die land se gestremdheidsgemeenskap te kampe het. Sy tolk, Luisa Massango:

Die ANC het homself weereens verbind tot die bekamping van misdaad, korrupsie, onwettige mynbou en geslagsgeweld. Die party beskryf hierdie kwessies as groot bedreigings vir openbare veiligheid en maatskaplike bestendigheid. Die party het ook belowe om strenger op te tree teen onwettige mynboubedrywighede wat gemeenskappe en infrastruktuur benadeel. Tydens 'n media-inligtingsessie het die sekretaris-generaal van die ANC, Fikile Mbalula, gesê die beskerming van vroue en kinders en die herstel van openbare vertroue in die regstelsel bly sleutelprioriteite:

Die besoek van premier Keir Starmer na China werp reeds vrugte af vir die Briste skotse whiskey bedryf. China het ingestem om tariewe op die invoer van die whiskey te halveer van 10 na 5 persent. Dit is 250 miljoen pond vir die Britse ekonomie werd. Die handelsminister Chris Bryant.