Nuus

Die Namibiese polisie het die inhegtenisneming van 'n 18-jarige verdagte bevestig in verband met die moord op die vyfjarige Ingrid Maasdorp en die sewe-jarig Fabianu Rosvinds in Okahandja. Die inspekteur-generaal van die Namibiese polisiemag, generaal-majoor Anne-Marie Nainda, het vanoggend tydens 'n perskonferensie bevestig dat DNS-bewyse die verdagte aan die misdaadtoneel van April 2025 verbind.

Twee lede van die ANC-jeugliga is gisteraand in ʼn skietery by Nhlapo-seksie in Katlehong, Ekurhuleni, doodgeskiet. Vyf ander is gewond en hospitaal toe geneem vir mediese behandeling. Die skietvoorval het plaasgevind nadat die slagoffers ʼn gedenkdiens vir ʼn lid van ʼn politieke party by die Mogobeng Primary School bygewoon het. Gauteng se polisiekommissaris, Tommy Mthombeni, sê ʼn verdagte is in verband met die skietery gearresteer:

Veruscka Gertze, welvaartbestuurder van Old Mutual, sê dat die bemagtiging van vroue en die versterking van leierskap volhoubare voordele vir individue, organisasies, beroepe en die samelewing skep. Gertze het by die derde jaarlikse Vrouebyeenkoms gesê dat die ondersteuning van die geleentheid ooreenstem met die firma se verbintenis om geleenthede vir vroue te skep om te skakel, van mekaar te leer en die selfvertroue te bou wat nodig is om die toekoms te vorm.  

Die Namibiese Rugbyunie het 'n reeks komende internasionale wedstryde aangekondig, met 'n hoogs verwagte streeks-toetswedstryd en 'n tuisreeks as hoogtepunte. Die Welwitschias sal eers na Harare reis om teen Zimbabwe te speel, voordat hulle na Windhoek terugkeer vir 'n reeks van twee wedstryde. Jerome Paarwater, wat tans as konsultant-afrigter vir die unie optree, gee meer inligting:

Die kwessie van private dagga-gebruik in Suid Afrika bly in die nuus. Jeremy Acton, een van die aktiviste wat in 2018 daarin geslaag het om dagga in die buurland te wettig vir die kweek van dagga vir private gebruik, het met Kosmos 94.1 gepraat oor die situasie op die oomblik.

Namibië sal vir die res van die dag warm tot baie warm, grotendeels droë en sonnige weer sien, met dowwe sonskyn en stygende middagtemperature in baie gebiede. Die kans op reën lyk volgens die algemene nasionale vooruitsig skraal, hoewel toestande sal verskil tussen die kus, die sentrale hoogland en die warmer binneland. Albertina Anderson van die weerdiens het met Kosmos 94.1 Nuus gesels:

Johannes Iipinge is amptelik die nuwe uitvoerende hoof van die Grootfontein-munisipaliteit en belowe om die dorp na finansiële volhoubaarheid en verbeterde dienslewering te stuur. Iipinge het 'n vyfpilaar-strategie uiteengesit wat fokus op finansiële gesondheid, inkomste-uitbreiding, infrastruktuurontwikkeling, plaaslike ekonomiese groei en mensgesentreerde diens, en doen 'n beroep op verenigde samewerking in die gemeenskap om blywende vordering te behaal.

Motorsport: Rwanda se president, Paul Kagame, verwerp die idee dat Formule Een te groot is vir ʼn klein landjie soos syne. Rwanda het ’n tienjaar-ooreenkoms onderteken om vroeg in die 2030's ’n F-1 Grand Prix aan te bied - die eerste in Afrika sedert 1993. Die wedren sal plaasvind sodra die nuwe baan voltooi is in Bugesera, 40 kilometer suid van die hoofstad, Kigali. Kagame sê geen geleentheid is te groot vir Rwanda nie:

Die Europese Unie-ambassadeur in Namibië, Ana-Beatriz Martins, sê daar is nog baie ruimte vir verbetering en samewerking om te verseker dat meer kinders in die Kunene-streek toegang tot vroeë-opvoeding en onderrig geleenthede en fasiliteite het. Dit, na dit vasgestel is dat slegs 17-persent van kinders in die streek toegang het tot Vroeë Kinderontwikkeling-sentrums. Martins sê dié lae persentasie beklemtoon die behoefte aan groter belegging in onderwys in die streek: 

 

Die voorsitter van die Parlementêre ampsklagkomitee, Makashule Gana, beskuldig die EFF en die African Legal Professionals Association daarvan hulle het die gebeure rondom die terugtrekking van advokaat Thandazani Madonsela se benoeming as getuienisleier vir die Phala Phala-ondersoek wanvoorgestel het. Die EFF en die vereniging het die Wes-Kaapse Hooggeregshof genader om die besluit te betwis. Gana sê die komitee se regspan sal aanvoer sy besluite is in ooreenstemming met die Parlement se reëls geneem wanneer die saak vandag hervat word: