Gsund essa, regelmässig Sport macha, meditiara, nochhaltig läba und aifach immer glücklich sii? Äähhh nope!😅 Schocki ghört zu mim Läba genau so wia Salat und i verbring mini Nomitäg gern mit ma Buach am See, aber au mit Prosecco am na Rave. #Balance! Um das goht's hüt i mim Podcast - los doch mol drii, #oderaunid 🥰Du suachsch es Gsicht zu miner Stimm? Uf Instagram findsch mi unter @evagaudenz ☺️

130 Iwohner*inna, drü älteri Gschwüsterti, an Lehrer und a Heilpädagogin als Eltera und es grosses Huus: Willkomma in miner Kindheit. I erinner mi zurck, wia's so gsii isch, bim Buur früschi Milch z'hola, Sexualkund vo mim Papi in dr Schual unterrichtet z'kriaga und mit 16i zu mim grössera Bruader in di tollscht WG ever z'zücha. Was dabi nid fähla kann: a grossi Liabeserklärig an mini Muatersproch, Rätoromanisch. Los doch mol drii - oder au nid 🥰

#fitchick #bodypositivity #curvygirl #skinnygirl. Wieso müand üsi Körper eigentlich immer in a Schublada gsteckt werda? Was macht Social Media mit dr Wohrnehmig vo üsem eigena Körper, und wia het sich mit Körpergfühl durch Pubertät, Exfründa und anderi Iiflüss so entwicklet? Um das goht's hüt in minem Podcast. Los doch mol drii - oder au nid 🥰

Verschwendeti Fründschafta, funktioniarendi Fernbeziehig und Tinder. Es goht um z'Thema "Beziehig". Hützutags inera Beziehig z'sii isch nämli gfühlt fascht unmöglich; es könnt jo no öper bessers geh, oder? I teil hüt mit eu mini Beziehigsprinzipia, was mr mini Eltera scho als Kind in Bezug uf Beziehiga mitgeh hend, wieso i super gern inera Fernbeziehig gsi bin und wasi so vo Tinder halta. Los mol drii; oder au nid 🥰

Wieso i Influencer so bitzli müahsam finda, wia miar üs täglich ufs neua vo Social Media verarscha lönd, und mini Tipps & Tricks zum weniger Konsumiara und dabii sogar no viel glücklicher sii als mit allem Grümpel womer jo sowieso nid bruuchend. I red hüt über Konsum, verzell eu abitz wia mis Konsumverhalta sich in da letschta zwai Johr so veränderet het und wiani zum absoluta Second Hand Freak worda bin. Los miar doch mol zua, und überdenk au dis Konsumverhalta - oder au nid 😌!

6 Mönet ischs häär, sit i mis gliabta Grossstadt-Läba gäg es kanadischs Kliistadtläba iituscht han. Wia fühlt's sich eich so ah, uszwandera, wia gross isch mis Heiweh und kummi jemos wieder zruck ind Schwiiz? I han euri Froga beantwortet und verzell eu bitz über di gröschta Unterschied zwüschet Kanada und dr Schwiiz.

It's been 6 months since I moved to Thunder Bay. Time to reflect my time here, answer some questions and point out some differences between Switzerland and Canada.

I waiss nid wia's bi eu so usgseht, aber obwohl i jetzt nid suuper religiös ufgwachsa bin, hets bi üs am Karfritig jewiils kai Fleisch geh. Grund gnuag, zum eu hüt mol bitzli verzella, wieso i eigentlich Vegetarierin worda bin, was i vo dem ganza Veganismus-Trend so halta, und wieso i Fleischesser*inna trotzdem no genau so liab han. 🌱♥️

I han eu uf Instagarm abstimma loh, und d'Entscheidig isch ziemlich eidütig gsi: Es söll um Schlof goh. I verzell eu hüt also wiani am liabschta iischlofa und was i so macha, wenni mol stundalang wach im Bett ligga. Viellicht isch jo de eint oder ander Tipp mit dabii, damit au iar besser schloofend! In dem Sinn; pfuusend guat

(Und los miar 20 minuta lang bim labera zua, lol ). Ungschnitta, ganz ehrlich und no bitzli wirr. döffi vorstella: min erst versuach, mini gedanka mol zäma z'fassa. han bitzli usgholt und probiart eu z'verzella, wia's miar grad goht, wieso d'quarantäna für mi eigentlich nüt neus isch, und was i so macha, damit miar d'decki momentan nid uf da kopf keit. viellicht nützt mis geläber jo bitz gäg eui langwiili, unterhaltet eu a bitz oder regt eu bitz zum nohdenka ah. i freu mi uf eues feedback!