Onda San Pío X

Carla, Ander e Juan presentan un dos proxectos máis emocionantes do final de curso: a PÍO LEAGUE, o gran torneo deportivo do Colexio San Pío X.

Ao longo do podcast descubriredes como se desenvolverá esta competición e todas as novidades, na que participará o alumnado de primaria.

A PÍO LEAGUE nace co obxectivo de fomentar a práctica deportiva, o traballo en equipo, o respecto e a participación de todo o alumnado nun ambiente festivo e cheo de emoción.

Neste podcast coñeceremos un pouco mellor a María Arias, a nosa mestra de AL e tamén xogadora do equipo Estrela de Cortegada. Martina e Inés, alumnas de 3º de primaria prepararon unha entrevista moi especial para descubrir máis cousas sobre a súa vida, o seu traballo no colexio e a súa afección polo deporte. Falaremos dos seus gustos, das súas experiencias e de como compaxina ser mestra e deportista. Un podcast cheo de curiosidades, preguntas divertidas e moita ilusión.

Neste podcast, Xoel, Lucía, Izan, Iago, Carly e Candela, de 3º de primaria, achegáronnos á tradición dos Maios, festa que celebra o inicio da primavera e sobre a cal traballaron na aula facendo tamén as súas propias figuras.

Durante semanas vistes carteis dentro do colexio sen saber moi ben a que facían referencia. A espera chegou ao seu fin. Uxía, Lois, Valery e Abel, de 2º de primaria, toman os micrófonos para revelar o segredo mellor gardado destes meses.

Trátase dun reto. Esta iniciativa nace desde a área de educación física cun obxectivo claro: recuperar o xogo e combater o sedentarismo. Nunha época na que as pantallas gañan terreo queremos que os nosos peques volvan ser os donos do movemento. Dádelle ao play e escoitade con moita atención!

Neste episodio falamos con Iris e Carla, gañadoras do I Concurso de Creación Artística do Día Internacional da Muller e a Nena na Ciencia. Este certame é unha iniciativa da Facultade de Ciencias e das Escolas de Aeronáutica e Enxeñaría Informática, co apoio da Unidade de Igualdade da Universidade de Vigo.

O obxectivo do concurso é achegar o coñecemento sobre o papel das mulleres na ciencia e na enxeñaría, así como poñer en valor as súas achegas ao desenvolvemento humano ao longo da historia.

Durante a conversa, Iris e Carla cóntannos como foi o proceso creativo das súas propostas, que as inspirou e que significa para elas participar nunha iniciativa que visibiliza o talento feminino no ámbito científico.

Os galardóns entregáronse ao alumnado o venres 20 de febreiro pola tarde no campus de Ourense, no marco da celebración da feira eXXperimenta en Feminino.

Neste podcast entrevistamos á Federación Galega de Automobilismo, xa que recibimos a súa visita no cole. Durante a xornada aprendemos sobre como se preparan pilotos e equipos, puidemos gozar dunha exhibición de vehículos e incluso subir neles! Un xeito divertido e próximo de sentir a emoción do motor!

Neste episodio de Onda San Pío X falamos do Entroido ourensán desde unha perspectiva divertida e educativa. Contamos coa participación de Brais, Dylan e Adriana (5º de primaria) e Raúl, Andrés e Martín (6º de primaria), que se caracterizaron como Pantalla, Cigarrón e Peliqueiro para explicar as historias, tradicións e curiosidades destes personaxes emblemáticos.

A través das súas intervencións descubrimos o triángulo máxico do Entroido, aprendendo sobre a súa importancia cultural e a riqueza desta festa tan querida en Galicia.

Actuación de 5º de primaria no festIAval de Nadal 2025 celebrado o 18 de decembro de 2025 no salón de actos do centro coas familias.

Un grupo de pastores vai camiño do Portal e, entre bromas e “paradas” para descansar, reflexiona sobre que agasallo levarán ao Neno. A obra transforma as risas en mensaxe: o máis importante non é o material, senón os agasallos invisibles (axudar, compartir, perdoar, levar paz...). Remata lembrando que Belén empeza onde escolles querer un pouco máis.

Actuación do alumnado de 4º de primaria no festIAval de Nadal 2025 celebrado o 18 de decembro de 2025 no salón de actos do centro coas familias.

Trátase dun fermoso poemario, onde o inverno, o obradoiro do norte, a carta, a estrela, a noite de ledicia e un agasallo invisible axudan a espertar por dentro.

Neste episodio entrevistamos a Uxía e Claudia, alumnas de 5º de primaria e gañadoras do 1º e 3º premio do concurso “Jóvenes y Mayores” organizado por La Región e a Fundación Dorzán. Ademais de explicarnos en que constitiu este certame tamén nos contan como viviron a entrega de premios e o ben que o pasaron nesta experiencia única que conecta xeracións.