Onda San Pío X

Olivia, Marco, Luana e Ander comparten a súa experiencia na carreira de cros de Monterrei, unha actividade xa clásica do colexio dentro do programa Xogade, na que participou o alumnado de 2º, 3º, 4º e 5º de Primaria. No podcast falan do que sentiron antes de comezar, dos momentos máis especiais do percorrido e das emocións ao cruzar a meta, nun episodio que recolle á perfección o espírito de superación e convivencia deportiva.

Neste episodio especial, o alumnado de 5º de primaria pon voz á conmemoración do 25 de novembro, Día Internacional da Eliminación da Violencia contra a Muller. Mentres soa a canción Ni una más de Aitana, cada estudante le unha mensaxe que invita á reflexión e ao compromiso.

A través destas palabras breves pero cheas de forza, lembramos o que podemos facer no colexio e na casa para construír relacións baseadas no respecto: coidar a nosa linguaxe, rexeitar calquera forma de discriminación, apoiar a quen o precisa, compartir tarefas, escoitar con empatía e dicir sempre NON Á VIOLENCIA.

Neste episodio, Martín, Leo, Valery, Eimy e Raúl (6º de primaria) contan a súa experiencia participando no V Concurso de Ciberseguridade no Cole! organizado por Telefónica e Cibergal. Aínda que nesta ocasión non conseguimos pasar á fase final en Santiago, a experiencia foi fantástica e permitiu aprender moitísimas cousas sobre o mundo dixital e a seguridade en internet.

Ao longo do podcast explican como se preparou toda a aula empregando materiais do INCIBE, escoitando charlas e contos do seu titor, moi útiles para comprender mellor conceptos clave.

E para rematar, xogaron ao noso Ciberpalabra, un pasapalabra especial con termos relacionados con internet e a ciberseguridade.

Neste episodio falamos do San Martiño, figura clave nas tradicións de Ourense e protagonista do festivo local. Sofía, Leire, Pablo e Thelma (5º de primaria) explican quen foi, a súa historia e a relación cos magostos, unha das festas máis queridas na nosa contorna. Un repaso sinxelo traballado coa súa mestra de ciencias sociais para comprender mellor as nosas tradicións!

Neste episodio mergullámonos na máxica tradición do Samaín, unha festividade de orixe celta celebrada o 31 de outubro en Galicia e noutras rexións como Irlanda e Escocia. Grazas a Xoel, Martina, José e Lucía descubrimos a historia, as crenzas e as tradicións que rodean esta festa, desde as cabazas decoradas ata o popular "truco ou trato". Falamos tamén de como o celebramos no cole, recibindo a visita dun mago, facendo talleres e xogando a xincanas.

Neste primeiro podcast de Onda Deportiva, un espazo dedicado ao deporte, Sara, Brais e Adriana falan da XLVIII Carreira do San Martiño 2025 que se celebrará en Ourense o vindeiro domingo 9 de novembro.

Neste episodio especial de Onda San Pío X, o alumnado de 3º, 4º, 5º e 6º de Primaria únese para alzar a voz contra unha realidade que nunca debería pasar desapercibida: o acoso escolar.

A través de mensaxes curtas, os estudantes convídannos a romper o silencio, a fomentar a empatía e a construír xuntos un espazo escolar máis seguro, respectuoso e solidario.

Este programa non só busca concienciar sobre a importancia de actuar fronte ao acoso, senón tamén render un emotivo homenaxe á memoria dunha rapaza española cuxa historia recente nos lembra de forma desgarradora a urxencia de comprometernos coa prevención e o acompañamento.

✨ Un episodio cheo de sensibilidade, compromiso e esperanza, creado desde o corazón.

Neste episodio falamos da nosa visita á Cooperativa Loureiro con motivo do Ano Internacional das Cooperativas 2025.

Descubrimos como se elaboran queixos, iogures, kéfir e leite fresca, exploramos o seu laboratorio e fábrica, e comentamos a mestura de procesos mecanizados e de artesanía no seu envasado.

Ademais, compartimos as nosas impresións tras a degustación dos seus produtos e reflexionamos sobre a importancia das cooperativas na nosa economía e comunidade.

A primeira entrevista de Onda San Pío X... e agardamos que cheguen moitas máis! Nesta entrega contamos coa presenza de Julia Aguiar, misioneira e referente mundial no tratamento da úlcera de Buruli, recentemente galardoada co Premio Beata Paulina Jaricot 2025.

Os alumnos de 3º e 4º de primaria, Inés, Javier, Juan e Carla, baixo a guía do noso párroco e mestre de relixión Luis Rodríguez, realizáronlle algunhas preguntas na que Julia compartiu a súa experiencia, os retos e os aprendizaxes que marcou a súa vocación solidaria e sanitaria.

Unha conversa inspiradora sobre compromiso, empatía e o poder de axudar aos demais.

Allison, Anxo, Amelie, Álex e Izan, alumnos de educación infantil, convídannos a mergullarnos no mundo da poesía a través das súas voces cheas de tenrura e emoción, recitando versos que inclúen unha peza de Gloria Fuertes. Un episodio para escoitar co corazón aberto e deixar que a poesía máis cativa nos envolva.