ORF Roma Podcast

Ando bersch 2015, o 2to august le europitike parlamentostar uso internacijonali di le gondolipeske upro genocid upro Roma taj Romnja, Sinti taj Sintize akardo ulo. Ando lejcti bersch, ada te andi Austria le nacijonakere rotistar ojs nacijonali gondolipeskero di aun prindschardo ulo. Sar sako bersch, te adabersch gondolipeskere mulatintschage upro Ceija-Stojka-Than kerde ule.

Andi gastronomija but berscha prik te dschil, but keraschtschenge jek upredipe hi. Butvar neve tschatschiptscha taj i Corona-pandemija, but gastronomtschen use jek tschangalinipe mujsinde. Na afka le diskotekakere keraschi Hans-Jürgen Horvath. Ov leskera diskoha „Hallelujah“ Pinkafate imar o 30-berschengero jubilejum mulatinel. O reporteri Adi Gussak use ada jubilejumiskero mulatintschago use sina.

Ande amaro sendungakero redo „Naschade Romengere-sidlungtscha le Burgenlandistar“ akan la foroskera gemajndejaha Erba donde amen bescharas. Imar ando bersch 1674 o erschti Roma adaj tel pumen mukle. La cajtaha, trin Romengere-sidlungtscha kerde ule. Amaro kolega Adi Gussak upro jomakero rodipe pe kertscha taj dikla, so le manuschenca ando sidlungtscha pasirintscha taj kitschi Roma adi meg Erbate dschin.

I Romengeri-redakcijona le ORF-istar Burgenland, jek nevi serija kerel. „Romengere-papruschengere neviptscha andi Austrija“ hi o anav adala serijatar, ande savi o cile Romengere-papruschengere neviptscha, save andi Austrija del, angle terdscharde on. Akan o reporteri Mario R. Czory o papruschengero nevipe Romano Kipo le Kulturakere Farajnistar le austritike Romendar aun peske dikel.

Dschi angle trin deschberschengere tschak tschulo peder o Burgenland-Romani prindschardo sina. Duach o asimilacijonakero dschumintschago o tschibtschakero naschajipe fogosim sina. Kaj ada upre likerdo te ol, upri Karl-Franzens-universiteta jek projekto uso kodificirinipe taj didaktisirinipe kesdim ol. Adi use jek le erschti varijantschendar genel, savi bulhi khetan kedim taj tel pisim hi.

Ando keripe le ERINNERN:AT berscheskere pharipeskere punktostar „O genocid upro Roma & Sinti“ o film „Wankostättn“ sikado ol. O dokumentacijonakero film upre vakeriptscha terdschol, save i Karin Berger 1997 le Karl Stojkaha kertscha. O Stojka pedar i „Wankostättn“ Betschiste phukal, kaj dschi 1941 jek baro nugodinipeskero than le Romendar taj Romnjendar, Sintijendar taj Sintizendar sina.

I Usnija Buligovic i vodaschkija le projektostar THARA hi, savo adi ando eftato gemajndakero becirk Betschiste hi. Sajt valami 18 berscha butschalinel oj usi Volkshilfe taj le Romengere taj Romnjengere, Sintijengere taj Sintizengere kojenge and pe bescharel. Lakeri buti la flogoskera grupnake imar andi Serbija kesdinel. Pal lakero ajipe andi Austrija, i Buligovic lakeri karijera ando NGO-than kesdintscha.