ORF Roma Podcast

Ando keripe le projektostar „O DROM ANDI CUKUNFT“ le Trendwerkistar, Erbate jek sensibilisirinipeskero workshop usi tema Roma kerdo ulo. O Martin Horvath le farajnistar HANGO Roma taj o Marcel Horvath le projektostar „O DROM ANDI CUKUNFT‘“ le institucijonenge, save use sina, dikiptscha andi historija, kultura taj ando dschivipe la Romengera flogoskera grunatar dine.

Amaro jomakero rodipe pal naschade Romengere sidlungtscha ando Burgenland ando naschipe le berschendar imar ande 15 gava amen vodintscha. Jek lendar Gruna sina. Sajt amari reportascha ando lejcti bersch, jek gondolipeskero bar le murdarde Romenge, save agun ande ada gav dschivnahi, kerdo ulo.

I Lovara dschilaschkija Ruža Nikolic-Lakatos angle trin berscha muli. Lakeri duge berschengeri vodaschkija, i etnomusikologkija Ursula Hemetek, ando lejcti trin deschberschengere, jek bulho archivo lakere muschikatar upre baunintscha. Adala barikane koji akan ande jek digitali artschijipe aun dikle schaj on. O reporteri Adi Gussak usi presentacija le artschijipestar ando 3ti betschitiko becirk use sina.

O vargajengero rodipe butenge akan ando terno dschend jek akardo naphandlo keripe andi natura hi. O lek feder adaj hi, kaj pe o phiripe latsche jeke loke vargajengere rodipeha khetan te phandel mukel. Upri jek rik o aktivi micinipe andi frischni diha taj i cajt andi natura, upri kija rik o atscha upro vargajengero rodipe te irinel taj afka upre avre gondi te perel taj sor khetan te kedel.

I Rada Kalandija jek ukrajnitiki Romni hi, savi khetan lakere dschenenca la inicijativatar „Chirikli“ le Romenge andi Ukrajnija and pe bescharel. Uso presejakero vakeripe ando khera la asilakera kordinacijonatar Austrija ando 7to betschitiko gemajndakero becirk, phukal oj pedar i situacija taj pedar lakero keripe le feder iriniptschenge.

Pop, Austropop taj dschila ande Romanes. I Post Meridiem banda muschikakero mindenfelitiko upre sako than anel. O duj terne muschikaschkiji, i Michelle Horvath taj i Pia Putz, upre mindenfelitike mulatintschage lengere tschatschikane dipeha taj lengere muschikakere dschanipeha, voja anen.

Ande amaro sendungakero redo „O naschade Romengere sidlungtscha le Burgenlandistar“ na dschas tschak upro jomakero rodipe, hatek te le manuschenca, save agun ando sidlungtscha dschivnahi vaj adi meg odoj dschin, donde amen bescharas. Ando aktujeli ardipe, resel o reporteri Adi Gussak la Romnja Erika Horvath, savi buteder sar pantsch deschberschengere andi Romengeri sidlung Tenu Erbate dschil.

Adi o botakero vodaschi le Roma VHS-atar Burgenland, Horst Horvath, amaro kherodaschi hi. Ov phukal pedar aktivitetscha taj pedar programoskere punktscha, save ando terno dschend kerde on.

ORF Backstage jek barikano taj interaktivi terdschijipe del, savo loschando ham te siklimo hi. Uso vodiniptscha o tschave jek dikipe ando them le medijendar taj la komunikacijonatar schaj jerinen.

O Joschi Schneeberger nan tschak jek barikano bumbaschi, hatek ov te jek barikano botschofteri le jazzistar taj le gypsy swingistar andi Austrija hi. Na dur pal, ov leskere muschikakere dschivipeskere verkiske, le somnakune patijaripeskere cajchniha vasch barikane keriptscha pasche i republika Austrija, patijardo ulo. Amaro reporteri, o terno Adi Gussak, le Joschi Schneeberger ande leskero kher ando 22to betschitiko gemajndakero becirk kher rodija.