Ormstungur

Við fáum smá pásu frá drápum og fókusinn fer á Þormóð sem glímir við þunglyndi og einmanaleika. Hann tekst á við það með því að taka upp á því að fífla konur. Það veit ekki á gott.

Var komið nóg af drápum? Ó nei! Þorgeir er holdgervingur vígamennskunnar. Hann gerir hins vegar mistök sem mögulega kunna að bíta hann í rassinn seinna meir. Hjalti veltir svo fyrir sér hvenær ostur er forn eður ei.

Við erum stödd á dögum Ólafs helga Noregskonungs. Aftur fara tungurnar vestur. Það hefur sjaldan gefið góða raun. Fóstbræðurnir Þorgeir og Þormóður eru kynntir til leiks. Þorgeir byrjar að drepa og drepa og drepa. Ekki bara menn heldur hvali líka.

Komið fagnandi í hundraðasta þátt Ormstungna! Oddur og Hjalti leggja í Fóstbræðra sögu sem er auðvitað öllum landsmönnum kunnug. Einna helst eftir að Nóbelskáldið gerði stólpagrín að henni á sínum tíma í Gerplu. Það er ekkert víst að þetta klikki.

Hjalti og Oddur ljúka þáttaröðinni með því að skoða lykilhugtak - örlög. Hugtakið útskýrir margt í hegðun fólks í Íslendingasögunum og um leið og Hjalti og Oddur segja frá því draga þeir saman efni Laxdælu.

Það er ljótt að hefna sin, eða hvað? Á miðöldum giltu sérstakar reglur um hefnd sem sést greinilega í Íslendingasögunum. Í þættinum segja Hjalti og Oddur frá þeim og hlutverki kvenna í hefndaraðgerðum í Laxdælu.

Það er hægt að hugsa sér margar hetjur og margs konar hetjuskap. En í Íslendingasögunum fylgdu hetjurnar ákveðnum reglum og í þessum þætti kynna Hjalti og Oddur til leiks eina frægustu hetju Íslendingasagnanna - Kjartan Ólafsson.

Á miðöldum skipti heiður fólk öllu máli og þannig er það líka í Íslendingasögunum. Í þættinum útskýra Hjalti og Oddur hvernig heiður drífur oft áfram sögurnar og segja frá samskiptum húsfreyjunnar Jórunnar og ambáttarinnar Melkorku.

Öll dreymir okkur, en stundum getur verið erfitt að rifja draumana upp að morgni dags. Í þessum þætti útskýra Hjalti og Oddur hvaða þýðingu draumar hafa í Íslendingasögunum og segja frá Guðrúnu Ôsvífursdóttur.

Hugtak þáttarins er feðraveldi. Hjalti og Oddur útskýra hugtakið með því að taka dæmi úr Laxdælu. Hverjar voru Unnur djúpúðga og Melkorka Mýrkjartansdóttir og hvernig notaði hún reglur feðraveldisins ser í hag?