'Into The Gap' var ein av stórsøluplátunum í 80'unum, harav kendasta lagið er 'Hold Me Now'. Í hesum sambandi hoyra vit eisini løg frá øðrum album, sum Thompson Twins gav út í 80'unum og tí er talan er um eitt slag av heildarsending. Bólkasøgan verður søgd og hittløg undan og eftir 'Into The Gap' fara at tóna.

Temapláta í Plátubarrini er 'Into the Gap' hjá bretska Thompson Twins bólkinum; eitt av stóru poppfyribrigdunum í áttatiárunum. Tann úgávan er frá 1984 og vit spæla fýra Gap-løg, men fyri at lýsa Thompson Twins sum best, havi eg haraftrat valt at spæla trý løg frá 1985 plátuni, ið nevnist 'Here's To Future Days'.

'Into the Gap' hjá Thompson Twins verður víða mett sum eitt av teimum, um ikki tað fullkomna synth-pop meistaraverkið í áttatiárunum. Tað rakk upp á fyrstaplássið í Bretlandi, við sølu omanfyri fimm milliónir eintøk um allan heimin. Plátan er róst fyri sítt fullkomna popp ljóð, við gitnum hittum sum 'Hold Me Now', 'Doctor! Doctor!' og 'You Take Me Up'. Ummælarar og fjepparar rósa blandingini av fangandi, snildum melodium við fjølbroyttari, kreativari framleiðslu.

Plátubarrin 21. februar 2026

'Blackout' er ikki bara ein pláta. 'Loudersound.com' hevur hana sum bestu útgávu bólksins yvirhøvur. Ein grundgeving er, at eftir rættiliga nógv virkin ár, var tað í samband við 'Blackout', at bólkurin fann sítt vælkenda stev. Hetta mentist síðani til ein rættiliga breiðan stíl, ið vit kenna so væl, og tað uttan at rokkurin varð ofraður. Útgávan var á Top 10 á Billboard 200.

Plátubarrin 14. februar 2026 (handritið skrivað í 2022)

Av tempo-løgunum, sum eisini komu á singleplátu, er 'Healing Hands' tað kendasta, meðani tað minni kenda, 'Club At The End Of The Street', hevur verið ynskt í Plátubarrini, so heilt ókent er tað ikki. 'Sleeping With The Past' er poppur, harav okkurt lag kann kallast popp-rokkur.

Í fýrsunum varð nógvur negativur kritikkur skrivaður um pláturnar hjá Elton John, og tað gjørdi hann firtnan. Sum eitt aftursvar gjørdi hann heildarverkið 'Reg Strikes Back' í 1988. 'Reg' er stytting av dópsnavni hansara, 'Reginald'. Men har var ov lítið krút í aftursvarinum til ummælararnar, so hann vann ikki tann tvírdráttin. Útgávan er heldur ikki ein Elton John klassikari. Tí var tað eitt sindur óvæntað frá Elton, at hann longu árið eftir í 1989 gav okkum hesa flottu temaplátuna, 'Sleeping With The Past'. Kanska var hon byrjanin til 90'ini, tí tey vóru eins og 70'ini eitt sera væleydnað útgávuskeið við løgum, sum hann skrivaði til tekstir hjá Bernie Taupin og Time Rice.

Plátubarrin 7. februar 2026

Hesin tung- og harðrokk sjeytiárabólkur úr enska miðlandinum rakk upp í hæddirnar í áttatiárunum, og British Steel var byrjanin. Judast Priest útgávurnar undan henni høvdu selt lítið, men nú kom ferð á. Stakløgini vóru: 'Living After Midnight', 'Breaking the Law', og 'United'.

Heitið frá einum av albumumløgunum, Metal Gods, var fest á sangaran, Rob Halford, sum gongur fyri at vera 'Metal God'. Útgávan í 1982, Screaming For Vengeance, er tann mest keypta Judas Priest heildarútgávan. Men 'British Steel' er tann størri klassikarin, nú eftirtíðin hevur talað. Enska blaðið, The Gurardian, lýsir British Steel sum definitiónina uppá heavy metal.

Plátubarrin 10. januar 2026

Eins og Different Light í 1986, innihelt hetta albumið ein Hot 100 eittara og eitt annað Hot 100 Top 5 lag. Eternal Flame og In Your Room. Alment góvust The Bangles at spæla í apríl 1989, men tær vóru ikki gloymdar.

Tá tær aftur spældu konsertir í 1998, vórðu tær bilsnar, viðmerkti Susanna Hoffs. Ein partur av teirra fjepparum vóru nevnliga stórir drongir, hvørs mammur vóru um sama aldur sum tær sjálvar, har tær stóðu á pallinum.

Plátubarrin 3. januar 2026

Nógv er hent síðani teir sum hálvvaksnir fingu loyvi at venja við ljóðførunum hjá The Birds í Antlantis Bio. Tað eru góð hálvtrýss ár síðan og menninir eru eisini vorðnir hálvtrýss ár eldri, hvat ikki heldur teimum aftur at spæla tónleik og hava framtíðarætlanir. Á 50-ára heiðurskonsertunum, sum spældar vórðu í Varpinum í Klaksvík á heysti 2025, vóru lovorðini mong um bólksins dygdir og førleikar. Men talan er eisini um tann bólkin, sum í seinnu helvt av hálvfjerðsunum og fyrru helvt av fýrsunum var Føroya best umtókti dansibólkur, til teir sjálvir valdu at seta ferðina niður. Í 1984 og 1995 góvu teir heildarverk út, í 1978 og 1982 var talan um singleplátur.

Henda sendingin er ein ferð gjøgnum tónleikaskeiðið hjá Hjarnar. Eisini ber til at hoyra demo-upptøku, sum ikki hevur verið spæld fyrr. Teir, ið siga frá eru: Karl Martin Samuelsen, sangari, Hans Black, trummusláari, Eyðun Nolsøe, bassgittaristur, Jógvan Olsen, tangentspælari, og Mikkjal Hvannastein, gittaristur, sum er nýggjur í bólkinum. Hvannastein er ein av okkara góðu rokkgittaristum, sum haraftrat hevur upptøkuhøli. Tískil er tað einans ein spurningur um tíð, til vit aftur fara at hoyra nýggj Hjarnar løg.

Plátubarrin 31.12.25 (Gott nýggjár í Plátubarrin)

TYRIL ætlanin ber navn eftir upphavsmanninum, Búa Tyril, ið sjálvur hevur navn frá fjallinum 'Tyril' við Gøtu, har hann vaks upp. Hæddin á fjallinum er 639 metrar, meðan tónleikurin mangan, men ikki altíð, tykist gera tað øvugta av hæddum, nevniliga at knýta jørðsamband við sínum grøvandi rútmum. Í 2018 gav TYRIL sína fyrstu heildarútgávu út, 'Tectonic Change', meðani onnur útgávan frá 2025 ber heitið: 'Glowing Sparkles'. Í báðum førum er talan um sera rútmiskan tónleik, ið vit tosa við Búa Tyril um.

Hann fær nógvu hugskotini á gongutúrum. Búi sigur tað ikki sláa falska mentu, at, tá hann gongur ein túr, koma hugskotini streymandi. TYRIL er hansara einmansætlan við gestatónleikarum, sum er serlig við egnum 'Nu World Beat' stíli, ið dyppar í jazz, r&b, rokk, popp og funk. Hóast nógv innflutt ljóð og effektir, er ikki talan um eitt heil-elektroniskt album, tí vanlig ljóðføri verða eisini nýtt. Til dømis spæla tveir gesta-guittaristar á løgunum, og Búi slær sjálvur trummurnar.

Umrøðan og spælingin av TYRIL varð gjørd í Plátubarrini 27. desember 2025. Hettta er tó ein nakað longri netútgáva av innslagnum. Í henni eru løgini: 'Conrad of Cork' frá 'Tectonic Change' í 2018, 'Blue Saturday (Run from the Cold)' og 'Rising South' frá seinnu TYRIL útgávuni í 2025, 'Glowing Sparkles'.

Temapláta í Plátubarrini er (What's The Story) Morning Glory, ið enska Oasis- orkestrið gav út í 1995 hjá plátufelagnum Creation Records, sum ein skoti leiddi. Noel Gallagher framleiddi plátuna saman við valisaranum, Owen Morris, so hon var eitt rættiliga bretskt um landamørk samstarv. Upptøkurnar vórðu gjørdar í marts ''95 í Rockfield Studios. Og hetta var eisini ein av teimum heilt mætu útgávunum, ella ein kann siga ER ein av teimum best lagaðu varðunum í rokk- og popptónleiki. Fyri plátuna vann Oasis í 1996 ein Brit Award í 'besta bretska album' bólkinum, og ein fyri 'besta bretska albumið seinastu 30 árini', harumframt valdi tíðarritið New Musical Express (What's The Story) Morning Glory at vera 'ársins LP'.

Í 2012 hevði amerikanska tíðarritið Rolling Stone Temaplátuna sum nummar 378 av teimum 500 bestu útgávunum higartil. Blaðið segði í sínum ummæli tvey ár frammanundan, at (What's The Story) Morning Glory var ein vinnari; dunandi, boysin, og við óvæntaðum eymleika.

Alment verður tónleikurin á (What's The Story) Morning Glory kallaður britpoppur og rokkur. Britpoppurin var eitt slag av nítiárarokki, ið tilætlað var framleiddur sum rættiliga ljósur og melodiskur tónleikur, tó hann eisini kann vera harður. Hann skal síggjast sum eitt aftursvar til tann meira myrka og tunga grunge-rokkin, sum amerikanarar høvdu ment.

Plátubarrin 20.12.25

Temapláta er 'Diffucult To Cure' hjá Rainbow í 1981. Tá var Joe Lynn Turner komin við at syngja. Vokal-avloysari fyri upprunasangaran i Rainbow, Ronnie James Dio, hevði verið 'Graham Bonnet', men hann sang einans við á 'Down To Earth' í '79. Tað skuldi vísa seg, at Joe Lynn Turner fór at innspæla eins nógvar studioplátur sum Rainbowsangari og Ronnie James Dio, sum fór úr bólkinum í 1978 - tríggjar í part. Graham Bonnet er breti, meðani bæði Joe Lynn Turner og Ronnie James Dio, sáli, vóru føddir í USA.

Í 1981 var trummusláarin, Bobby Rondinelli, úr New York City eisni nýggjur í bólkinum, meðan bæði Roger Glover á bassi og Don Airey á tangentum høvdu plátuna frammanundan, 'Down To Earth', sum sína Rainbow-debut. Rainbow varð upployst í 1984 og teir báðir seinast nevndu eru í 2025 við í dagsins Deep Purple. Roger Glover er bæði bassgittaristur og framleiðari, og Don Airey er ein meistari á hammondurgu í rætta tangent-anda John Lords, sála, sum tók stig til Deep Purple.

Undir leiðslu av Roger Glover varð 'Diffucult To Cure' tilfarið tikið upp í Sweet Silence Studios í Keypmannahavn og Kingdom Sound Studios, Long Island, New York City. Plátufelagið Polydor gav verkið út tann 9. februar í 1981.

Plátubarrin 13.12.25

'A Night at the Opera' var eitt av stóru nýbrotunum í rokki, hvørs originalitet Bjørn í Abba segði fara at broyta kósina fyri allan popp- og rokktónleik. Henda Temaplátan varð fyrireikað í samband við fimti ára dagin fyri útgávu av verkinum. Men sendingin er annars ein vanlig Temapláta í Plátubarrini.

Sambært nógvum miðlum hevur 'A Night at the Opera' eitt meistaraverk í sær, nevniliga ta kendu og ógloymandi 'Bohemian Rhapsody'. Sigast kann, at 'rapsodiin' hevur meira ávirkan frá Mozart, enn nøkrum av sjeytiárarokkarunum. Talan er um sang ella tónleikastykki, sum Freddy Mercury hevði ment og skrivað í brotum frá seinast í 1960 árunum. Byrjað verður við einari a capella vokal harmoni intro, ið ber okkum til sjálva sangin hjá Freddy Mercury við klaverspæli. Síðani flytur lagið seg ígjøgnum fleiri serstakar fasur og ljóð-dynamikk; tann kendasta er tann langa miðjan, pseudo-opera parturin. Hetta varð gjørt gjøgnum eina útførda kóreffekt, sum Mercury, May og Taylor sungu sínar serligu vokalpartar til í fleiri tímar, har yvir 180 serstakir omanádubbar vóru blandaðir og undirblandaðir á 24-spors masterband, har øll tilgongdin tók umleið tríggjar vikur. Men aftrat stórslignu og ógvusligu framleiðsluni eigur ein ikki at gloyma teir stillu partarnar, so sum Freddysa seinastu solo vokalreglu við undirliggjandi guitar-bakspæli hjá May, sum eru við at gera sangin til nakað heilt serligt.

Annars kann sigast, at flestu løgini á útgávuni eru sannar tónleikaperlur.

Plátubarrin 29.11.25