Podcast Radio Cerna

Tratará de converterse nun dos catalizadores da chamada "III Revolución Humana". A revista 15-15-15 nace coa pretensión de encauzar os contidos que se están a xerar na procura dunha civilización alternativa ao colapso ecolóxico e social que estamos a vivir. Dun dos promotores da exitosa "Guía para o descenso enerxético", xorde agora estoutra iniciativa que ten visos de acadar tamén unha importante repercusión social.

Escoita as novas sobre o medio ambiente galego que nos deixou esta semana

A Universidade compostelá, xunto con Avifauna, organiza para os días 15 e 16 de novembro o curso "Veterinaria e conservación da fauna silvestre", apoiado polas Reservas da Biosfera Terras de Lugo e Ancares lucenses e pola Área de Cultura da Deputación. O lobo, o corzo e o oso pardo serán as especies sobre as que se vai versar, como pacientes e como patrimonio natural a conservar.

Na UE vense de crear unha rede de avogados e xuristas contra os delitos ambientais. Impulsada por SEO/Birdlife, co apoio de fondos europeos, pretende afondar na análise do actual funcionamento do sistema xudicial con respecto á aplicación da Directiva do medio ambiente e contra os delitos ambientais. REDA está formada por letrados dos 28 estados membros que a partir de agora comezan a traballar conxuntamente. Neste espazo tamén saberemos a que se lle denomina “delito ambiental” desde o eido xurídico.

Repasamos a novas máis destacadas da actualidade ambiental de Galiza na última semana!

ADEGA denunciou na Fiscalía os traballos que Cementos Cosmos está a realizar enriba do xacemento paleolítico, posiblemente, de maior importancia de Galiza. As obras que a canteira está a efectuar a poucos metros da cavidade poñen en perigo inminente a conservación das pinturas rupestres que nela se atopan, e que lle outorban ao xacemento a categoría de Ben de Interese Cultural. ADEGA esixe a paralización inmediata das obras e a adopción de medidas preventivas.

Nos últimos anos están a aparecer en Galiza varias propostas de formación profesional (polo de agora non regrada) en Bioconstrución. Unha das experiencias máis coñecidas é ao CIFP de Someso (A Coruña), da que falaremos neste espazo. A bioconstrución amósase, non só como alternativa ecolóxica na construción, tamén como alternativa de futuro para os profesionais da edificación.

Neste espazo Cerna repasamos as novas ambientais máis destacadas en Galiza nos últimos días.

Camiñar pola cidade sen ter que sortear obstáculos e sentir a invasión dos vehículos a motor é posible. Concellos de todo o Estado que conforman a Rede "Cidades que Camiñan" reúnense mañá e pasado en Pontevedra para falar daquelas medidas que se poden adoptar nas políticas municipais para darlle prioridade ao peón e facilitar a vida colectiva no espazo urbano. Pontevedra é unha das cidades de referencia nesta Rede. Coñezámola!

Ata o vindeiro 1 de novembro haberá prazo para presentarse á IV edición dos Concursos polo Territorio que convoca ADEGA e que inclúen certames de fotografía, relato e curtametraxes. Esta edición enmárcase no proxecto "Cultura e Territorio" que intenta promover os valores culturais relacionados co espazo no que nos desenvolvemos, dando a oportunidade á cidadanía galega a expresar a través da imaxe e da palabra a súa visión do territorio galego. Os certames están apoiados pola Área de Cultura da Deputación de Lugo.