Podcast Radio Cerna

A Serra do Courel non só é un destino atractivo para os amantes da natureza, os turismas, os científicos ou os deportistas, tamén o é para os profesionais do audiovisual. Manuel Valcárcel, realizador galego, foi o último en atreverse a filmar as marabillas do Courel para contalas ao mundo. Pero a súa mirada, a través do documental "Tempo" vai ser a de observador, a de ver pasar o tempo desde os ollos da Natureza. Os detalles cóntanolos el...

Dunha nova forma de entender os camiños tradicionais xorde o proxecto "Camiños seguros do Morrazo". O seu obxectivo é devolver a utilidade aos vellos camiños como percorridos de mobilidade sostible, pero tamén como elementos de conexión entre a veciñanza e entre o territorio e as persoas. A experiencia nace na comarca do Morrazo da man do arquitecto Martín Barreiro Cruz e do colectivo Rurbán.

As compañías de seguros están a ver na ecoloxía un nicho de mercado aínda por explorar. Algunhas empresas xa están a lanzar pólizas ou seguros verdes para persoas e entidades con actitudes respectuosas co ambiente. Neste espazo coñecemos algúns dos produtos que xa están en activo relacionados coa redución da contaminación, coa redución na xeración de residuos, cos vehículos eléctricos ou coa mobilidade sostible.

Neste espazo repasamos as novas ambientais máis resaltables da última semana. Coñéceas!

A campaña Cousa de Raíces tamén porá en valor as potencialidades do bosque galego como recurso de vida. Actualmente hai moitas empresas e propietarios de monte que viven do bosque autóctono e neste espazo recollemos algunhas destas iniciativas. Alibós, Asoporcel, Fruga e ORGACCMM relatan a súa experiencia co bosque galego como recurso a aproveitar.

Do 1 ao 4 de xullo, a Universidade da Coruña impartirá o curso "Iniciativas de conservación ambiental e participacón social" que tentará trasladar os coñecementos básicos sobre este eido a estudantes universitarios e a todas aquelas persoas interesadas. O curso abordará contidos sobre as ferramentas máis habituais de conservación e aquelas máis novidosas das que pode botar man a propia cidadanía. Os estudantes da UDC recibirán 1 crédito de libre configuración pola asistencia a este curso.

Este domingo lanzouse a campaña "Cousa de Raíces" en defensa do bosque galego. Máis de 40 colectivos e entidades de diversos eidos (ecoloxista, empresarial, investigación, comunidades de montes, sindicatos, etc.) poñen a andar esta campaña que intentará aglutinar nun esforzo común o traballo de todos os colectivos do país que promovan e potencien as masas de árbores autóctonas. O obxectivo é deter a regresión das escasas masas de árbores autóctonas que quedan en Galiza, dar a coñecer a sociedade os motivos da necesidade de preservalas e facer ás galegas e galegos conscientes de todos os valores fundamentais e oportunidades que obstenta o noso bosque.

Un novo proxecto de autoestrada ameaza con impactar a comarca de Pontevedra, desde o punto de vista ambiental, patrimonial e social. A A-57, no seu treito Vilaboa-A Ermida, a pesar de só ter unha lonxitude de 7 quilómetros, está a crear un gran rexeitamento social polas agresións que supón para o territorio afectado. Neste espazo coñecemos as razóns de oposición a este proxecto manifestadas pola recentemente constituída plataforma "Salvemos A Fracha".

Neste espazo repasamos as novas ambientais máis destacadas desta semana mundial do Medio ambiente. Compárteas con nós!

Unha sentenza do Tribunal de Luxemburgo senta xurisprudencia sobre como se debe interpretar a Directiva Hábitats con respecto á execución de obras ou infraestruturas que potencialmente afecten os valores ambientais de Rede Natura 2000. En concreto, dito fallo, denegou a construción dunha autoestrada en Holanda que atravesaba hábitats protexidos por non considerala unha obra de interese xeral de primeira orde. Analizamos a sentenza coa profesora en dereito ambiental, Alba Nogueira.