Útlitið er svart og raunir Harrys eru margar. Meðal annars tapar hann Quidditch-leik, slasast og kústurinn hans mölbrotnar, það slettist upp á milli hans og Hermione og ófrýnilegu vitsugurnar herja á með þeim afleiðingum að hann heyrir örvæntingaróp móður sinnar augnabliki áður en Voldemort myrðir hana. Til að bæta gráu ofan á svart heyrir Harry á tal nokkurra kennara og kemst að því að strokufanginn Sirius Black var ekki aðeins besti vinur föður hans, heldur einnig guðfaðir Harrys. Myrkar hugsanir leita á galdrastrákinn, en hann á góða vini sem styðja hann, auk þess sem nýi kennarinn, Lupin, veitir honum aðstoð með því að kenna honum varnargaldur gegn vitsugunum. Til þess nota þeir bogga nokkurn. Systkinin Emil og Bryndís hittast á Skype og kryfja kafla 7-11 í Harry Potter og fanganum frá Azkaban.