Teresa de Távora foi unha nobre do século XV con grande influencia nas coroas de Castela e Portugal. Aplicou a xustiza señorial, actuou como mediadora de todos os homes da familia Soutomaior e tivo un vínculo estreito con Isabel A Católica.

É a quinta protagonista do pódcast Raíñas de Galicia, que busca rescatar a memoria das galegas do medievo. Para este episodio contamos con Miguel García Fernández, do Instituto de Estudos Galegos Padre Sarmiento e da Universidade de Santiago, e con Suso Vila, historiador da arte e xestor cultural. 

Urraca, Teresa, María e Sancha Fernández de Traba foron catro irmás pertencentes á nobreza máis
elevada da segunda metade do século XII. Sabías que estiveron implicadas dunha ou doutra
maneira no nacemento da lírica galego-portuguesa?

Falamos cos investigadores Miguel García-Fernández, do Instituto de Estudos Galegos Padre Sarmiento (IEGPS) e da Universidade de Santiago (USC), e con José António Souto Cabo, tamén da institución académica compostelá no cuarto episodio de Raíñas de Galicia.

Inés de Quiroga foi abadesa do mosteiro bieito feminino de Sobrado de Trives a comezos do século XVI. É dicir, xustamente durante a implantación dunha reforma impulsaba polos Reis Católicos que esixía unha maior rigorosidade das normas monásticas. Pero ela opúxose con firmeza. 

Este é o terceiro episodio da serie Raíñas de Galicia. Contamos co investigador Miguel García-Fernández, do Instituto de Estudos Galegos Padre Sarmiento (IEGPS) e da Universidade de Santiago (USC) para debullar a historia de Inés de Quiroga.

Coñeces a dona Urraca? Subiu ao trono a comezos do século XII e foi a primeira muller en conseguilo en Europa! A súa historia é apaixonante, e por iso lle dedicamos o segundo capítulo da serie Raíñas de Galicia, que busca rescatar a memoria das mulleres medievais galegas.

Neste episodio contaremos coas historiadoras Diana Pelaz e Carla Trincado, as dúas da Universidade de Santiago, para descubrir as facetas máis descoñecidas de Urraca.

Teresa de Zúñiga foi unha poderosa condesa do século XV. Foi brutalmente asasinada polos seus vasalos en 1470 en Ribadavia. Malia que o episodio da súa morte é o máis coñecido, a súa vida foi fascinante. Xestionou un inxente patrimonio nunha situación de relativa equidade co seu home, secuestrou un nobre, adoptou o fillo ilexítimo do seu marido...

Contámosche a súa historia no primeiro episodio de Raíñas de Galicia, un podcast de GCiencia.