Regsake

9 November 2026: Tiaan Joubert praat verder oor rolspelers in die regswêreld, en fokus op die mense wat die regsberoep uitmaak, hoe hulle opgelei word, en hoe jy seker kan maak die persoon wat jou help, is werklik gekwalifiseer. Elsa Kruger Willemse beantwoord ’n vraag oor of 'n afwesige ouer van 'n kind se boedel kan erf?

2 November 2026: Tiaan Joubert praat verder oor rolspelers in die regswêreld, en fokus op hoe ‘n wet in Suid-Afrika tot stand kom, en wanneer dit van krag is. Est-marié McCallahan praat oor die regte en verpligtinge van huurders en verhuurders van ‘n residensiële eiendom. Wat skryf die Huurbehuisingswet voor, veral in die geval waar mense nie van ‘n agent gebruikmaak nie.

26 Oktober 2026: Tiaan Joubert praat verder oor rolspelers in die regswêreld, en fokus op die werksaamhede van die Kommissie vir Versoening, Bemiddeling en Arbitrasie. Volker Kruger bespreek ‘n belangrike hofsaak oor vuurwapenlisensies wat verval het, en gee ook raad oor die hantering van vuurwapens in bestorwe boedels.

19 Oktober 2026: Tiaan Joubert praat oor borgtog in die Suid-Afrikaanse strafregstelsel. Wat is dit? Hoe word dit toegestaan? Wanneer word dit geweier? Elmari Richter beantwoord ‘n luisteraarsvraag oor of dit wettig is om die nasionale register vir seksuele oorstreders openbaar te maak.

12 Oktober 2026: Tiaan Joubert fokus op die werksaamhede van die Aktekantoor. Est-Marié McCallahan bespreek ‘n onlangse hofuitspraak wat te doen het met die Verbruikerswet en verskaffers wat sekere klousules in kontrakte baie duidelik onder 'n verbruiker se aandag moet bring, en dit nie net in die fynskrif kan wegsteek nie.

5 Oktober 2026: Prokureur Tiaan Joubert praat oor die rol en werk van ‘n gesinsadvokaat. Elsa Kruger Willemse beantwoord ‘n luisteraarsvraag oor die strik van lewenslange vakansieklub-kontrakte.

28 September 2026: Prokureur Tiaan Joubert bespreek die werksaamhede van die balju. Arbeidsregkenner Johan Botes praat oor ‘n onlangse hofuitspraak wat handel oor ‘n werknemer in Kaapstad wat R2,8 miljoen aan haar werkgewer moet terugbetaal omdat sy gejok het oor haar werkservaring.

21 September 2026: Prokureur Tiaan Joubert bespreek die werksaamhede van die Meester van die hof. Familieregkenner Elmari Richter verduidelik wat die reg oor peetouers sê.

14 September 2026: Elsa Kruger-Willemse praat oor die kuns van gee, en wat jy moet weet van skenkingsbelasting in Suid-Afrika. Volker Kruger bespreek die geldigheid van 'n testament sonder 'n datum, inkomstebelasting by trusts, die verkoop van 'n huis sonder die erfgename se toestemming, en ander vrae oor testamente, boedels en trusts.

7 September 2026: Prokureur Tiaan Joubert praat onder meer oor die voortslepende agterstand van die Meesterskantoor in Johannesburg. Boedelspesialis Volker Kruger praat oor die regte van lewensmaats in terme van die intestate erfreg, onderhoudseise teen bestorwe boedels en eise vir verlies aan onderhoud ná die dood van 'n lewensmaat in 'n motorongeluk.