Tertius de Villiers, Hoof Finansiële Beampte van Acumen Sagteware, gesels oor die 'My Smart City App' wat nou ook inwoners van Pretoria bemagtig om die stad op te hef en te herstel.

Die sangeres Rita Li kuier in die ateljee en stel haar sexy nuwe enkelsnit ‘Dink Aan Jou Lyne’ vry.

Alhoewel hulle nie meer in 'n liefdesverhouding is nie, bly hulle steeds sangmaats. Boer Soek 'n Vrou se Richann Brüssow van Reën kuier in die ateljee met René de Klerk wat telefonies vanaf die Kaap by ons aansluit. Hulle gesels met Francois oor hulle splinternuwe, tweede enkelsnit sedert die stof gaan lê het.

Jy weet jy het dit gemaak as jou naam op 'n '30 Seconds' algemene kennis kaartjie verskyn... Die blonde bom van die Suid-Afrikaanse musiekbedryf, Patricia Lewis, gesels met Francois van Rensburg vanuit Ballito. Hulle praat nie net oor haar nuwe vrystelling in 11 jaar nie, maar fokus ook op 'n paar ander aspekte wat soos mylpale in haar persoonlike lewe en loopbaan uitstaan.

Nataniël gesels oor sy nuwe debuutproduksie 'Moscow' vanaf 05 Oktober by die Atterbury Teater, sy nuwe televisiereeks 'Terwyl Ek Wag' & sy boek '107 Kaalkoppe'.

Nie net is dr. Dirk Hermann se boek 'Begrond' in 'n enkeldrama vir radio verwerk nie, dis ook in 'n fliek omskep. Luan Jacobs is in die film te sien, hy speel ook saam met Su-an Müller-Marais in die radiodrama. Hulle twee kuier in die ateljee om te gesels oor die tema van die verhaal wat onder andere handel oor die Anglo Boereoorlog asook plaasmoorde in Suid-Afrika.

Franz Marx, die skepper van die eerste daaglikse Suid-Afrikaanse sepie 'Egoli: Plek van goud' is Sondag 26 September 2021 op die ouderdom van 78 in Pretoria oorlede. Hy het in Julie positief getoets vir Covid-19 en volgens sy broer Johan, het hy nooit weer volkome daarvan herstel nie. Hy het nog op Stellenbosch gewoon toe hy uitgevind het dat hy die virus opgedoen het. Hy het ook vier jaar gelede 'n vorm van borskanker gehad, wat intussen verwyder is, maar sy een long was weens bestraling beskadig. Hy was ook 'n akteur in flieks soos 'Jy is my liefling' en 'Die drie van der Merwes'. Hy het ook in die fliek 'Danie Bosman' teenoor Min Shaw die rol van die bekende komponis vertolk. Franz los sy seun, 'n aangenome dogter en een kleinkind agter.

Jan Braai het in 2005 met die Nasionale Braaidag-inisiatief begin en sy doel is om 'n nasionale viering te skep deur die één aktiwiteit wat alle Suid -Afrikaners gemeen het, ongeag ras, taal, geslag of rykdom. Sy TV-reeks 'Jan Braai vir Erfenis' word sedert 2011 op kykNET aangebied en sy nasionale braaitoer word vinnig 'n groot hoogtepunt op die jaarlikse braaikalender.

André Schwartz vertel meer oor sy konsert 'Jy sê, ek sing' by die Atterbury Teater op Sondag, 26 September om 15:00.

Hoof uitvoerende beampte van Aardklop, Alexa Strachan, gesels oor hierdie jaar se unieke opwipfees, oftewel Mini-Aardklop, in Pretoria. Dit sluit ‘n verskeidenheid van drama, musiek, films, gesprekke, kursusse en visuele kuns in.