Samoan Devotional

OPEN HEAVENS

MATALA LE LAGI MO LE ASO LULU 31 ME 2023

Manatu Autu:  O Vaitau o le olaga 4 (Life season 4)

Tauloto – Tusi Paia: Efeso 2:10 “Auā o lana lava galuega i tatou, na faia i tatou ‘iā Keriso Iesu, ‘ina ‘ia faia galuega lelei, na saunia anamua e le Atua, ‘ina ‘ia tatou sāvavali ai.”

Faitauga - Tusi Paia: Iosua 13:1-6

Upu Folafola

O le a tatou talanoa I le vaitau lona fa o le olaga. O le vaitau lenei, o le naunautaiga autu o le tagata, ia ausia faamoemoega o le olaga. I le vaitau lea, ua tei lava ua e iloa, ua le o toe umi se taimi o totoe, ma a lē faaeteete, e te ono lē ausia le faamoemoega o lou olaga. 

O lou iai I lea vaitau o le olaga, e le fua I lou matua I tausaga. E iai lava le tausaga e te ono tei ai ma manatu, e tatau loa ona ausia le faamoemoega o lou olaga ma na o le pau lena o le tulaga o loo e momoo ai, o lona uiga ua e oo I le vaitau lona fa o le olaga. I le vaitau lenei, e le mamafa tele ia te oe po’o le a le tele o mea ua e faia, ae o le mea e pito sili ona e manatu iai, pe ua e faia ea le faamoemoega na faia ai oe e le Atua. 

I le Iosua 12, o lo’o e vaaia ai Iosua o loo matua fiafia ma ta’uta’u tupu e toatolu na ia faatoilaloina, ae tatou te o’o atu I le Iosua 13:1 ua tatou iloa ai le mamao na o’o iai I le faataunuuina o le faamoemoega o lona olaga. Fai mai le Iosua 13:1 ‘Ua toeaina lava o Iosua, ‘ua tele ona tausaga; ‘ona fetalai mai lea o le ALI‘I ‘iā te ia, “‘Ua e toeaina lava, ‘ua tele ou tausaga; e matuā tele fo‘i le lau‘ele‘ele o totoe e fai mo ‘outou.

Na manatu Iosua e tele ni mea na ia ausia I lona olaga, peitai e lei taitai ona ia ausia le faamoemoega o lona olaga. E tele lava le eseesega o le iloa poo a ni mea na ausia ma le tulaga o le faamoemoega e tatau ona ausia. Peitai, e toatele tagata o lo’o sese le itu o lo’o agai atu iai i le olaga atoa ae I’u ane, faatoa latou iloa e sesē le itu o lo’o iai. O se faafitauli matautia. 

O le aposetolo o Paulo o se tasi o tagata e matua naunau ia taunuu faamoemoega mo lona olaga. Fai mai le Galuega 20:24 A ‘ou te lē manatua se tasi mea, o lo‘u lava ola fo‘i ‘ou te lē naunau i ai, se‘i ‘ou fa‘auma lo‘u momo‘e ma le ‘oli‘oli, ‘atoa ma le faiva ‘ua ‘ou maua mai le Ali‘i o Iesu, ‘ou te molitino atu le tala lelei o le alofa tunoa o le Atua.

O le tulaga lea I le iuga ao sauni atu e tuua le lalolagi nei, na alu o ia ma le malie o lona loto ma faapea mai I le 2 Timoteo 4:7‘Ua ‘ou tau le tā‘ua lelei, ‘ua i‘u ‘iā te a‘u le tausinioga, ‘ua ‘ou tāofi i le fa‘atuatua.

O e galue ea ina ia ausia le faamoemoega o lou olaga? O e iai ea I le vaitau o lo’o finagalo le Atua e tatau ona e iai? I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LUA 30 ME 2023

 Manatu Autu:  O Vaitau o le olaga 3 (Life season 3)

Tauloto – Tusi Paia: Mataio 28:20 ‘‘‘ia ‘outou a‘oa‘o atu ‘iā te i latou ‘ia tausi i mea uma ‘ua ‘ou fai atu ai ‘iā te ‘outou; fa‘auta fo‘i, ‘ou te ‘iā te ‘outou i aso uma lava, e o‘o lava i le gata‘aga o le lalolagi.”

Faitauga - Tusi Paia: Mataio 28:19-20

Upu Folafola

Ua tatou talanoaina le vaitau muamua ma lona lua o le olaga nei, i aso e lua ua tuana’i atu, ma o le a tatou talanoaina le vaitau lona tolu o le olaga i le asō. I le vaitau lona tolu o le olaga o le tagata, e agai ese mai i le taumafai e faafiafia ma faamalie tagata ae agai loa i le taumafai e avea ma faataitaiga mo isi tagata. O le taimi lea ua mana’omia ai loa le avea o le tagata ma siufofoga e faalogo iai tagata. O le vaitau lenei ua tatou fia faia le tala a le aposetolo o Paulo:

1 Korinito 11:1 ‘Ia ‘outou fa‘aa‘oa‘o mai ‘iā te a‘u, pei o a‘u ‘iā Keriso

E tele taimi, i tagata ua o’o i le vaitau lenei o le olaga, ua  latou tausa’ilia nisi o tupulaga talavou latou te faasoa atu iai. Aua o le vaitau lenei i le olaga o le tagata soifua, ua naunau e fa’asoa atu lona malamalama mo isi. Afai e te ausia le vaitau lenei, ua e avea o se tagata matua ma ua e naunau i ni taunuuga lelei mo tagata nai lo seisi lava tulaga. O lo’o faapea mai le 2 Timoteo 2:2O mea fo‘i na e fa‘alogologo mai ai ‘iā te a‘u i luma o molimau e to‘atele, ‘ia e tu‘uina atu ai i tagata fa‘amaoni, o ē ‘ua mafaia ‘ona a‘oa‘oina atu i nisi.

Afai ua e le mafai ona a’oa’oina lou tagata I mea moni o le olaga, lona uiga o le a e tu’uina atu lou malamalama sesē i isi tagata ma avea ai oe ma se tagata o le a afaina ai isi, nai lo le faamanuiaina o i latou. E tatau ona e fa’aeteete i le vaitau lenei ina nei avea oe ma se isi e sasao ai se vairasi i totoga o isi tagata. Afai e maua e tagata se tagata ma se feau taua e latou te fiafia iai, o le a latou faasalalau atu lena tala ma e le umi ae avea ma se a’oa’oga mautu ma talitonuina. O le tulaga ua iloa i nei aso, o se tala maoa’e ae sese e uiga i le alofa tunoa, sa amata mai e se tagata e suafa ia Nikolao. O ia o se tasi o tiakono (Galuega 6:5) sa ia ola ma soifua I se itua’iga olaga e taua o le fa’akerisiano ae e oo atu i le tusi o Faaaliga 2:15 ona tatou iloa ai o se auala sese ma ua ‘avea ma se talitonuga tau fa’asese i totonu o le Ekalesia, ma o lo’o tumau e o’o mai i le asō.

I le vaitau lona tolu, o le ituaiga olaga e te soifua ai ma au amioga, o le a avea ma fa’ata’ita’iga mo isi tagata. O se fa’ata’ita’iga e tatou iloa i le Peteru 2:15 i le avea o isi tagata Kerisiano ma e sa mulimuli i tulaga vae a Palaama o se tagata na filifili e faaaoga le mana o le Atua ina ia maua ai ni ‘oa faalelalolagi. Le ‘au pele, e matua tele le afaina o lou taitaiina sese o tagata o vaai maualuga ia te ‘oe. E manaomia lou fa’aeteetega ina nei avea oe ma fa’ataitaiga leaga mo isi tagata kerisiano. (Mataio 18:6).

Afai o loo e iai I le vaitau lona tolu o lou soifua, ia e mautinoa o sa’o ma lelei au faata’ita’iga mo isi tagata. I le suafa o Iesu Keriso, Amene.   

OPEN HEAVENS

MATALA LE LAGI MO LE ASO GAFUA 29 ME 2023

Manatu Autu:  O Vaitau o le olaga 2 (Life season 2)

Tauloto – Tusi Paia: Kalatia 1:10 ‘‘Ou te fa‘amalie ‘ea i ona pō nei i tagata, po o le Atua? ‘Ou te sā‘ili ‘ea ‘ina ‘ia ‘ou fa‘afiafia i tagata? Auā ‘āfai ‘ana ‘ou fa‘afiafia pea i tagata, po ‘ua lē fai a‘u ma ‘au‘auna a Keriso..”.

Faitauga - Tusi Paia: Mataio 6:1-8

Upu Folafola
Na tatou talanoa I le vaitau muamua o le olaga I le aso ananafi ae o le a tatou talanoa I le vaitau lona lua I le aso. I le vaitau lona lua o le olaga, o le naunautaiga numera tasi a le tagata, o le iloa atu e tagata o loo manuia. I le vaega lea, o loo naunau e iloa atu e tagata o loo faamanuiaina lona olaga. Mo se faataitaiga, o le aufaipese poo faifeau I le vaitau lea e naunau I faafiafia I tagata pe a oo I le taimi e pepese ai pe lauga ai foi. O le tagata I le vaitau lea e leiloa po’o ua manuia I tulaga tau tupe, ae o loo saili pea ia tauoloa. 

O le vaitau tonu lea na iai le tupu o Saulo I le 1 Samuelu 15:24

‘Ona fai mai lea o Saulo ‘iā Samuelu, “‘Ua ‘ou agasala, auā ‘ua ‘ou tu‘umavaega i le afioga a le ALI‘I ‘atoa ma lau ‘upu; auā sa a‘u fefe i le nu‘u ma ‘ou fa‘alogo ‘iā latou ‘upu.

Sa maua e Saulo le tamaoaiga ma le pule, ae na naunau lava e faamalie I tagata ma oo atu ai ina faaletonu. 

Afai o loo e faia mea ona o lou manatu I le vaaiga a tagata, e te ono o’o I le faaletonu I se taimi lata mai. O le fiafia mai o tagata ia te oe  e ono lelei I le taimi nei, ae ua lata ona e iloa o I latou o loo alalaga ‘Osana’ I le aso, o I latou lava na o le a alalaga I se taimi lata mai ‘faasatauro ia te ia’. O le tulaga lea e le tatau ai ona e manatu I le vaaiga a tagata ae faia le mea e tatau ona faia pe fiafia iai le toatele pe leai. 

O le sauniga faapitoa tele o Agaga Paia e masani ona faia I Nigeria e vaiaso atoa e faia ai, ma o le aso Faraile o le aso e pito I tumu ai tagata e o’o atu I le faitau miliona. E iai se tamaitai pese na valaaulia e sau e pese I le aso Tofi o le vaiaso o le sauniga faapitoa lea. Na musu ma faapea mai e na o le aso Faraile e mafai ona sau ai, o le aso e pito I toatele ai tagata. E mautinoa lo matou teena o lana talosaga aua ua iloa lelei, e le o naunau o ia e pese mo le Atua ae e fia pese e faafiafia I tagata. 

O I latou o lo’o naunau po’o a le vaaiga a tagata iai latou I luga o upega tafailagi e ono lamatia I le ta’uleagaina e tagata lava ia. E te manatunatu iai, afai o lo’o e naunau ia faafiafia ma ia tulaga lelei I le vaaiga a tagata, o lona uiga e tatau ona vave lou auai atu I ni suiga fou. E le uma le tulai mai o ni suiga fou, o lona uiga e te ono I ai i se tuuga e le o’o I se tini. Afai o loo e iai I le tulaga e naunau e faamalie ma ia lelei le tulaga I le vaaiga a tagata, e tatau ona e tuua lea tulaga ae oo atu I le isi vaitau o lou olaga. 

O le a le mafuaaga e te faia ai mea o loo e faia pe faatauina mea o loo e faatauina? O e soifua ea e faamalie ma faafiafia i tagata pe o le faia o le finagalo o le Atua? I le suafa o Iesu Keriso, Amene. 

OPEN HEAVENS

MATALA LE LAGI MO LE ASO SA 28 ME 2023

Manatu Autu:  O Vaitau o le olaga 1 (Life season 1)

Tauloto – Tusi Paia: 1 Timoteo 6:10 ‘‘Auā o le mana‘o i tupe, o le pogai lea o mea leaga uma lava; ‘ua manana‘o tele i ai nisi, ‘ona sesē ai lava lea o i latou i le ‘upu o le fa‘atuatua, ‘ua tuia ai ‘ua ati i latou e i latou i puapuagā e tele.”.

Faitauga - Tusi Paia: Luka 12:15-21

Upu Folafola

I nai aso o soso’o mai o le a tatou talanoa ai i vaitau eseese o le soifuaga. O le tasi lenei aoaoga taua e lē tatau ona manatu faatauvaa i ai. Ou te mana’o e te taofi lelei ma manatua vaitau uma ina ia e malamalama lelei i le tatou fa’amalosiau.

O le vaitau muamua o le soifuaga o le tagata o le taimi e laititi ai ma mana’o i oloa eseese o le olaga. A fanau mai le tamaititi e lē tau a’oa’oa e u’u mau i lona lima so’o se mea e mana’o ai, a pau ese la mea mananaia ia ma lona lima e tagi e toe avatu. O le tau muamua lenā o le olaga.

O le vaitau lona lua, o le taimi e momoo ai le uso ia na maua ni tupe, taavale, fanua ma so’o se oa o lenei olaga. O le vaitau fo’i lenei e toatele tagata e maua ai o latou tusipasi ina ia maua ni galuega totogi lelei. O gaioiga uma a le tagata e fai i le vaitau lenei e ‘auga uma i le fia mauoloa ma tele se tamāoaiga. Ae pagā lea o totonu fo’i o le vaitau lenei e toatele ai tagata e faasesē e le tiapolo e fai solitulafono ma uiga mataga ia maua ai tupe. A e su’esu’ea tagata ua faamaonia e faia solitulafono fa’a tekonolosi po’o tamaita’i o faia le talitane mo le tupe, faapea fo’i tagata e ave faamalosi tagata, ma gaoi, e te maua ifo lavā o tagata laiti ma talavou. Afai o lo’o talavou lou soifua ma e leai sou loto tuinanau ia matua’i tele naunau ni au tupe, o lenā e te saogalemū mai faaosoosoga a le tiapolo. E ui e lelei le tele o tupe e le tatau ona e saili le tamāoaiga ae maimau ai lou agaga. A uma le matape’ape’a i tupe mo se taimi umi e i ai se taimi e vaavaai ai le uso talavou lenei ma ia iloa e o’o i tupe e lē faamalieina ai o ia. (Failauga 5:10) Na te iloa ai fo’i le moni o le Upu a le Atua i le Luka 12:15 o loo faapea mai

15 “Ia leoleo ‘outou ‘iā te ‘outou ‘ona o le matape‘ape‘a; auā e lē ola se tasi i le tele o ana mea ‘ua ‘iā te ia.”

I le tele o tausaga ua mavae, so’o se taimi ou te asiasi ai i Amerika ma faatali mai a’u e lē uso faifeau o Stephen, o la’u fesili muamua lava iā Stephen “o fea se faleoloa o fai se latou pau?” O se mea taua tele iā te a’u le faatau o oloa mai Amerika i taimi e taugofie ai. I tausaga mulimuli ane ina ua o’u toe malaga i Amerika sa matuā fa’ateia le faifeau i lo’u lē toe fesili pe ou te mana’o fo’i e ave a’u i faleoloa o loo fai pau faapitoa e fai ai sa’u faatau. Sa ou faapea atu ia Stephen ua uma aso na ua o’u iloa o na oloa uma e leai tele sona taua. Ua ou saili nei ma mulimuli i mea e sili atu le taua. O le mana’o i tupe o le pogai lea o mea leaga uma lava. I le suafa o Iesu Keriso. Amene.

OPEN HEAVENS

MATALA LE LAGI MO LE ASO TOONAI 27 ME 2023

Manatu Autu:  O le fanau o auupega fa’alē Atua (Children as Divine Weapons)

Tauloto – Tusi Paia: Isaia 8:18 ‘‘Fa‘auta, o a‘u nei ma la‘u fānau, o ē ‘ua foa‘iina mai ‘iā te a‘u e le ALI‘I, e fai ma fa‘ailoga ma mea e ofo ai ‘iā Isaraelu, mai le ALI‘I o ‘au, o lē afio i le mauga o Siona”.

Faitauga - Tusi Paia: Salamo 127:3-5

Upu Folafola

O auupega fa’alē Atua e mafai ona foliga fa’a lē iloga ma masani ai ona manatu faatauvaa i ai ma lē amanaia e le fili peita’i o auupega nei e fa’atamaia latou. Fa’ata’ita’iga o nei auupega o loo i le Tusi Paia e aofia ai le to’oto’o o Mose i le Esoto 14:13-16, o le alaga aleluia na soloia i lalo pa o Ieriko i le Iosua 6:20, o le tatalo ma le viiga na matalatala ai noanoataga o Paulo ma Sila ma isi uma pagata I le Galuega 16:25-26 ma le tele o isi auupega. O nei fa’ata’ita’iga ua fa’ailoa mai ai o auupega fa’ale Atua e foliga faatauvaa i le tiapolo ae na auina mai e fa’ato’ilalo le fili ae manumalō a’ia’i le fanau a le Atua.

O loo i ai fo’i fa’ata’ita’iga manino o le mea e tupu pe a avea le fanau e fai ma auupega a le Atua, e pei ona taua i le Salamo 127:3-5 e faapea “3Fa‘auta, o le fānau, o le tofi lea mai i le ALI‘I; o ē ‘ua fānau mai, o le taui lea mai ‘iā te ia. 4E pei o ū fanafana i le lima o le toa, e fa‘apea lava atali‘i o taulele‘a. 5‘Amu‘ia le tagata ‘ua tumu ai lana utu; e le mamā i latou pe a latou tautala i le faitoto‘a ma ē ita mai.

Ua fa’a mautinoa mai e le fuaitau lenei e ui e i ai matua na fananau mai ai le fanau, peita’i o fanau lava i latou a le Atua. Ua faatusa tamaiti i u fanafana e manaomia le poto, tomai ma le a’oa’oina fa’atoā mafai ona faaaogaina i latou. E lē gata i lea e mana’omia e le fanau le iloa o le Upu a le Atua, a’oa’oina lelei, faautauta ma le olaga e faavae i le Atua, e faataunuu ai tulaga ta’ita’i ua saunia e le Atua mo i latou.

Ua faamatala atili mai e le fuaitau lava lea e tautala I latou ma e ita mai i le faitotoa. I aso la o le faitotoa o le aai sa pei se nofoaga faitele, e potopoto ai tagata ma saofafa’i ai toeaiina e fa’alelei fe’ese’esea’iga, fofō faafitauli ma fai fa’aiuga taua. Na fa’amautū e Poasa lona fa’atauina o Ruta e fai ma ana avā i le faitotoa o le aai. (Ruta 4:1-6) O matua o fanau e matata’u i le Alii, e leai se mea e mamā ai i latou, latou te feoa’i ma faaeaea i luga o latou ulu i so’o se potopotoga a le nu’u. O fanau a le Atua o auupega mautinoa i latou i le aao o le Atua.

Tatalo

Tamā faamolemole ia avea la’u fanau e aofia ai ma ē le’i fananau mai e fai ma auupega malolosi fa’ale Atua i le suafa o Iesu Keriso. Amene.

OPEN HEAVENS

MATALA LE LAGI MO LE ASO FARAILE 26 ME 2023

Manatu Autu:  O le faitotoa o le alofa mutimutivale (The gate of mercy)

Tauloto – Tusi Paia: Salamo 25:10 ‘‘O ala uma lava o le ALI‘I, o le alofa ia ma le fa‘amaoni i ē ‘ua tausi i lana feagaiga ma ana tulafono.’

Faitauga - Tusi Paia: Roma 9:15

Upu Folafola

O le faitotoa o le alofa mutimutivale e lautele ma o lo’o faaosofia e le alofa e le faamatusalia o le Atua mo i tatou. Fai mai le Salamo 108:4 Auā ‘ua sili lou alofa i le maualuga o le lagi, o lou fa‘amaoni fo‘i ‘ua o‘o i ao.

O le faitotoa o le alofa mutimutivale e matua lautele e mafai ona ofi atu ai soo se tagata (Ioane 3:16), peitai o lenei faitotoa o le alofa mutimutivale e mafai ona tapunia faafuasei, I se auala e le mafai ona faamatalaina e se tagata. O le faitotoa o le alofa mutimutivale e mafai ona tapunia faafuasei e pei o le emo o le mata. Fai mai le Faataoto 29:1 O le tagata ‘ua a‘oa‘iina so‘o, ‘ae fa‘ama‘a‘a lona ua, e fa‘afuase‘i ‘ona nutimomoia o ia, ‘ae leai se fofō.

O le tele o taimi e vave ona tapunia faafuasei le faitotoa, ae o le alofa o le Atua e toe tatala ai, ae e iai le taimi o le a tapunia ai faafuasei ma e leai lava seisi mea e mafai ona toe faia e tatalaina ai. 

I Tausaga e tele talu ai, sa iai se fafine na ma’I ma ua fai iai fomai ua le toe aoga iai se togafiti, ona o mai lea o lona aiga ma aumai ia te a’u mo ni tatalo. A’o faae’e o’u lima I ona luga, na ou faalogoina le tafe atu o le faauuga mai ou lima, peitai e pa’I loa I lona ulu, e toe foi mai. Na ou fesili I le Atua pe aisea ae na faapea mai: “Sa iai pea lou alofa mutimutivale ia te ia ma e tele taimi na ou lapatai ai ia te ia peitai e le faalogo. Ua o’o I lo’u taimi ou te teena ai le talosaga mo lona faamalologa”. Ua ou tamoe I le fata faitaulaga ma ou aioi atu I le Atua ‘ Faamolemole le Alii e, na e fetalai e le o lou finagalo e fano se tasi ma o lou alofa mutimutivale e tumau e faavavau. Faamolemole aumai lou alofa mutimutivale’. Ua ou toe tamoe atu ma faaee ou lima I ona luga ae o le mea lava e tasi. Ua ou toe tamoe I le fata faitaulaga ma tagi atu I le Atua ina ia maua lona alofa mutimutivale mo ia, peitai ina ua ou toe foi atu ia te ia I le taimi lona tolu, ua maliu o ia. 

Ia e manatua le tala I le laau e leai sona fua I le Luka 13:6-9. Na fetalai le Atua ‘ Mo le tolu Tausaga na ou suesue ai ia te oe ma ou faia mea uma e manaomia ina ia e fua, peitai sa leai se fua, ona ou tuu ai lea I lalo’. O lo’o faapea mai le alofa mutimutivale: ‘toe tuu iai se avanoa, ave iai seisi  tausaga sei vaai pe iai se suiga, afai lava ua leai lava se fua, ona e tuu loa lea I lalo’. 

E te leiloa poo a le avanoa mulimuli e te ono maua. E te ono leiloa o le taimi mulimuli lava e te faia ai le agasala o lou taimi mulimuli lena ae lei tapunia le faitotoa o le alofa muitmutivale ia te oe. Ia lafoai ma le atoatoa lou ola ia Iesu Keriso ae lei tuai. 

E mafai e le faitotoa o le alofa mutimutivale ona tapunia I so’o se taimi. Amata loa ona e ola faapaiaina I le taimi nei ina ia aua lava nei tapunia lou maua pea o le alofa mutimutivale o le Atua. I le suafa o Iesu Keriso, Amene. 

OPEN HEAVENS

MATALA LE LAGI MO LE ASO TOFI 25 ME 2023

Manatu Autu:  O le fili I totonu o I tatou (The internal enemy)

Tauloto – Tusi Paia: Faataoto 16:32 ‘‘E sili ‘ona lelei o lē ‘ua gesegese i le ita i lē ‘ua malosi; e sili fo‘i lē ‘ua pule i lona loto i lē na te ā‘ea le ‘a‘ai..’

Faitauga - Tusi Paia: Faamasino 14:1-3

Upu Folafola

E moni o lo’o tatou tauivi ma le tele o fili i fafo o lo tatou siosiomaga, ma ua faamatalaina e nisi, o nei fili, e faatusaina o ni alii sili, ma faipule, po o alii o le pouliuli o lenei lalolagi, ua I ai le amioleaga faaleagaga i mea o i le lagi (Efeso 6:12). O le tele o tagata, ua faasagatau I a’i latou lava, ma ua avea i latou, o latou lava fili.

Mo se faʻataʻitaʻiga, e toʻatele tagata ua talitonu, ua saoloto e fai soʻo se mea latou e mananaʻo ai i o latou tino, o le mea lea latou te le teenaina ai  so’o se mea o lo o naunau i ai o latou loto. O nei mafaufauga, e mafai ona taitai atu ai i faiga agasala e pei o laei faatosina, onāna, faitaaga, o le matapeʻapeʻa, mataitu, ifo i tupua, ita, manatu faapito, faaaogaina o fualaau faasaina ma isi mea faapena. O nei faiga e maua ai iʻuga e faʻaleagaina ai le tino, o nisi taimi ua tupu ai aʻafiaga e lamatia ai le ola ma le soifua. O nei agasala e tatau lava ona faailoa sa'o, o ni fili i totonu o tagata uma. O lo o faapea mai le tusi 1 Korinito 3:17

Āfai e fa‘aleaga e se tasi le malumalu o le Atua, e fa‘aleagaina lenā tagata e le Atua; auā e pa‘ia le malumalu o le Atua, o ‘outou lava ia.

O se fa'amatalaga taua lea e matua'i ogaoga lona uiga. E finagalo le Atua le Silisili Ese o Lē na foafoaina i tatou, ina ia tatou iloa na ia faia i tatou e fai ma ona lava nofoaga. Na ia fetalai mai, afai e faaleagaina e se tasi le malumalu o le Atua, o le a faaumatia o ia. Masalo o le mafuaʻaga lea o le faʻateleina o gasegase esese ma ua faʻaitiitia ai soifua o tagata o le lalolagi atoa. O i latou e faaleagaina ma ua  sauaina o latou tino i le ava malosi, fualaau faasaina, feusuaiga le mama, taumafa I meaai le mama, ma le aafiaga i Fualaau Matautia,  ua maua ua vave mama’i ma ua faaitiia ai le soifua. O le tele o mea ua tutupu i talavou o le lalolagi atoa, ua maliliu ona o le tagofia o fualaau faasāina, ua maua I gasegase o le mafaufau, toto maualuga, pule i le ola, gasegse o totoga o le tino, faapea ma nisi gasegase I totonu o latou tino. O loo faapea mai le Mareko 7:23; O ia mea leaga uma e sau mai totonu ma leaga ai le tagata (le malumalu o le Atua) ae o loo faapea mai le Kalatia 5:21, e le mafai ona ‘alo ai seisi, o i latou uma e faia mea faapena e le fai mo latou tofi le malo o le Atua.

Ta’atia ese le naunautaiga e faamalie manaoga o le tino ae gauai ma le atoatoa I le Atua, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LULU 24 ME 2023

Manatu Autu:  Gaua’i I le Atua (Submit to God)

Tauloto – Tusi Paia: Ioane 4:34 ‘‘Ua fetalai atu Iesu ‘iā te i latou, “O la‘u mea e ‘ai, ‘ia ‘ou faia le finagalo o lē na ‘auina mai a‘u, ma fa‘ai‘u lana galuega.’

Faitauga - Tusi Paia: Mataio 8:5-9

Upu Folafola

O le gauai e le tutusa ma le galulue faatasi. O le galulue faatasi, o le galue lea o se tagata ma nisi tagata ina ia ausia ni fuafuaga tutusa. O le gauai I leisi itu, pe a o’o I se tulaga e te naunau e ausia se fuafuaga e ese mai le fuafuaga o loo naunau iai le isi tagata, ae ona o lo’o e gaua’i, o le a e faia ai le tulaga o loo naunau iai le isi tagata e pei ona ia faatonu mai. 

O le tagata e gauai I le Atua o le tagata e na te faia so’o se mea e fai mai ai le Atua, pe talafeagai I le manatu pe leai, pe talafegai le taimi pe leai foi. O I latou ia e faamatuu ese a latou fuafuaga ae faapea mai ‘Afai o le tulaga lea o loo finagalo ai le Atua, o le mea lena ou te faia’. E iloa loa e le tiapolo e faapena lou gauai I le Atua, afai e amata  ona e tete’e ia te ia, e sola vave ese ma oe. Fai mai le Iakopo 4:7

O le mea lea ‘ia ‘outou gaua‘i ai i le Atua; ‘ia ‘outou tete‘e atu i le tiapolo, ‘ona sola ‘ese ai lea o ia ‘iā te ‘outou.

E iloa lelei e le tiapolo I latou e 100% lo latou gauai I le Atua. I latou e faia so’o se mea e finagalo iai le Atua tusa pe oti ai. Ao le isi itu, e na te iloa foi I latou e gauai I o latou laualo ma le tuinanau o le tino, I latou e fiafia I mea o le lalolagi ma o loo iai. Seiloga lava e atoatoa lou gauai I le Atua ona faatoa mafai lea ona ia te oe le pule e te maua ai le taui ma sui iai latou e lē o usitai (2 Korinito 10:6). 

Afai e te manao e tetee atu I le tiapolo, ina ia sola ese ma oe, e tatau ona e gauai ma le atoatoa I le Atua. O lē e te gauai iai e fua iai le pule e te maua. O le Pule Sili o le Matagaluega o Galuega e gauai I le Taitaifono o le Komiti Faafoe, e le tutusa lana pule ma le pule a le Minisita o Galuega e gauai I le Palemia. I le Mataio 8:9, fai mai le taitai o le toaselau:

9Auā o a‘u fo‘i o le tagata ‘ua pule i ai le tasi, ‘ua ‘ou pule fo‘i i le ‘au tau; a a‘u fai atu i le tasi, ‘‘Inā alu ia, ‘ona alu ai lea;’ ma le tasi, ‘‘Inā sau ia, ‘ona sau ai lea;’ ma la‘u ‘au‘auna, ‘‘Inā faia lenei mea, ‘ona fai ai lea.’”

Afai e te gauai moni I le Atua, e na te avatu ia te oe se vaega o lana pule ma a o’o ina e tautala atu, e tetemu le tiapolo ma sola ese. O nisi o faafitauli o lo’o faapogai ona o le tiapolo, e mafai ona taofia pe afai e te gauai I le Atua. 

Taatia ese ou naunautaiga ae gauai ma le atoatoa I le finagalo o le Atua, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LUA 23 ME 2023

Manatu Autu:  Mata’u I le Atua (Fear God)

Tauloto – Tusi Paia: Faataoto 14:27 ‘O lē mata‘u i le ALI‘I, o le puna o le ola lea, e ‘alo ‘ese ai i mailei e oti ai.’

Faitauga - Tusi Paia: Faataoto 2:1-5

Upu Folafola

So’o se tagata e atamai moni, e na te silafia lelei, e tatau ona ia mata’u i le na faia le Lagi ma le Lalolagi. O le mafuaaga lena o le faapea mai o le tusi o Fa’ata’oto 9:10

O le mata‘u i le ALI‘I, o le amataga o le poto lea; ‘ia iloa fo‘i lē Pa‘ia, o le atamai lava lea.         

O le valea e pito sili ona ogaoga, o le lē amana’ia o le Atua. E fa’apefea ona e fefe i ni tagata e tapula’a lo latou malosi ma le pule, ae e te le mata’u i le e umia le pule faitalia i so’o se mea e fai, ma e le tali fua i se tasi (Tanielu 4:35)? 

 A fai e te fefe ia i latou e mafai ona fasioti lou tino, e le taumate e tatau ona e fefe i lē e mafai ona fa’aumatia lou tino faapea ma lou agaga i Seoli (Mataio 10:28)? ‘Aua lava ne’i tatou ta’aalo pe fa’afiaula i le Atua! Ou te iloa lelei e iai tagata o lo o faapea atu ia te ‘oe, ‘aua e te fefe i le Atua ae na ona e ava ia te ia. Ou te le mailoa poo faitauina mai lea tulaga mai latou  Tusi Pa’ia, ae e leai se tulaga faapea mai i la’u Tusi Pa’ia o faapea mai: “O le “ava” i le Atua o le amataga lea o le poto”, e leai, ua na o le mata’u i le Atua, o lo o ta’ua.

Ou te lē ta’alo faatalalē i se afi. E tusa po’o le a so’u ma’alili, e le mafai ona tuua lo’u lima i se afi, auā fo’i,  ou te fefe ai. A ia manatua, o lo tatou Atua, o le afi e ma’ama’ai (Eperu10:28). O lona uiga e le gata ina e ava ia te ia ae e tatau lava ona e mata’u i le Atua. E o’o i se taifau e fe’ai, e iloa lelei le afi pe a va’ai iai, ma e le ta’alo faatalalē iai.  

Afai e te lē mata’u i le Atua e mafai ona e faatino so’o se amio leaga. A o le mea e mālie ai, pe e te fefe i le afi pe leai, afai e te pa’i iai, e te mu lava! Afai e te lē mata’u i le Atua ae  fa’aauauina pea ona e agasala, e iai lava le taimi e taunu’u mai ai le taui o ia agasala.

E mafai e le tagata ona maua lona fiafiaga i agasala o le lalolagi nei, ma e mafai foi ona tauoloa lona tulaga ma lauiloa I le olaga agasala, ae e iai le taimi e na te tu’ua ai le Lalolagi ona feagai lea ma le faamasinoga a le Atua, e o’o atu ai lea tagata i le oti e faavavau.

Le ‘au pelē, e sili ona e mata’u i le Atua, ma ia e ola faapa’iaina ona maua lea o le ola e faavavau, nai lo lou le amana’ia o le Atua a o e aumau i le lalolagi nei, ona e i’u lea i le afi e mumū e faavavau. Ia e filifili ma le poto!        

Ia fa’amausalīina lou mata’u i le Atua, I le taumamao lea mai so’o se mea e o’o mai ai lona to’asā. I le suafa o Iesu Keriso, Amene.  

OPEN HEAVENS

MATALA LE LAGI MO LE ASO GAFUA 22 ME 2023

Manatu Autu:  Su’esu’e lelei au uo (Check your friends)

Tauloto – Tusi Paia: Faataoto 13:20 ‘O lē latou te feoa‘i ma tagata popoto, e poto lava ia; a o le uō a ē vālelea, e leaga ai lava ia’

Faitauga - Tusi Paia: Faataoto 1:10-19

Upu Folafola

E tatau ona suesue lelei au uo pe o lo’o agai atu I latou I le lagi. E iai lava tagata e tatau ona e alu ese mamao ma I latou, aua o isi e foliga mai o ni tagata lelei a’o totonu, e matua ese lava. E tatau ona e alu ese mamao ma na uo. 

E iai lava tagata ma latou amioga e tatau ona e mataala ina ia aua nei avea nei tagata o ni au uo. Mo le faataitaiga, afai o au uo e vave ona oso le ita, ia e alu ese mamao ma I latou ina ne’i e maua lea amioga ma leaga ai lou agaga (Faataoto 22:24-25). 

I le tele o tausaga talu ai, a’o ou galue o se faiaoga, sa iai se tasi o uso mai le vaega o le atunuu ou te sau ai ua avea ma a’u uo. Peitai ou te leiloa pe malamalama lelei ia te ia.  E iai se taimi na matou o ai I se polokalame a faiaoga ona fai mai lea o lea faiaoga e ma te o atu e vaai se tasi o matai o le nuu. Na tuitui lea alii I le faitotoa ae fai mai le fesili mai totonu o le fale ‘o se I’a po’o se pa’a?’ ona tali atu lea o lea alii, ‘tasi le i’a, tasi le paa’. Ona tatala mai lea o le faitotoa ma o atu I totonu. Ina ua ma o ese ua ou manatunatu po’o le a le uiga o lea fesili. Na oo atu I le isi nuu ae fai mai e ma te o e vaai se tasi o alii, na tuitui foi I le faitotoa ae sau le fesili mai totonu o le fale ‘o ai oe, o se mamoe po’o se ‘oti?’ Na tali la’u uo, ‘tasi le mamoe tasi le ‘oti’. E o’o mai le taimi lea, ua ou le mautonu lava. Ina ua o’o atu I le matou nuu, na ou fesili atu I le au toeaina po’o le a le uiga o ia fesili. Ae faapea mai po’o fea na ou faalogo ai I nei fesili. 

Na gata ai iina ona ou faauo I lea alii. E o’o mai I le aso, ou te lei malamalama lava I le uiga o nei fesili, ae e le tau faailoa ma ia te au o ni faiga faatemoni e matuia I le itu faaleagaga. Saili ma suesue lelei au uo, ia e mataala ma faaeteete. Fai mai le Tusi Paia I le 1 Korinito 15:33 “O lē feoa‘i ma ē amio leaga e leaga ai amio lelei.” E masani I muagagana a tagata Roma ona faapea ‘e leaga apu lelei ona o apu leaga, e faapena foi ona faaleaga e ni uo leaga tama lelei’. Ae lei maea lenei aso, suesue lelei po’o le a le tulaga o au uo. A iai nisi e le o ola ma soifua I ni olaga faapaiaina, faasoa atu iai le Upu a le Atua ma afai e mumusu e suia o latou olaga, faamolemole vavae ese lou tagata mai iai latou. 

O au uo e atagia ai malosiaga e fuafuaina le ituaiga lumanai o le a e maua. Ia e maua ma taofia na o uo e ola faapaiaina, I le suafa o Iesu Keriso, Amene.