Samoan Devotional

OPEN HEAVENS

MATALA LE LAGI MO LE ASO LUA 20 IUNI 2023

Manatu Autu:  Vaiinu faatupu malosi fa’ale Atua 3 (Divine energy drink 3)

Tauloto – Tusi Paia: Mataio 10:8 ‘Ia ‘outou fa‘amālōlō i ē mama‘i, fa‘amamā lepela, fa‘atutū i ē ‘ua oti, tutuli i temoni. ‘Ua maua fua ‘outou, ‘ia ‘outou foa‘ifuaina atu.,.”

Faitauga - Tusi Paia: Mataio 2:1-10

Upu Folafola

E sili atu i le olioli tele, o lo o iai le vaiinu o le faatupu malosi e ta’ua o le ‘olioli matua tele’. I le tatou tusi faitau mai le Tusi Paia o le aso, a’o faasolo le malaga mamao a Makoi e tausa’ili le Tupu, o le taimi na latou toe va’aia ai le fetu ua faatupula’ia ia i latou le olioli matua tele! Ona fa’aauau lea o le latou malaga e pei faato’a amata. O le maua o le ‘olioli matua tele’ e faaosofia ai lou malosi fou e fa’ataunuu ni mea sili atu, o mea e le gafatia e tagata lautele ona latou ausia.

O le olioli matua tele, e te maua mai i le Agaga Pa’ia (Efeso 5:18). A e maua le olioli matua tele lea, o le a taumate tagata po ua e fa’asua’ava. E te manatu faalemafaufau I le tulaga o ni tagata se toalua ua latou fai atu i se tagata na pipili i lona olaga atoa, e tulai ma savali. E le mafai ona tupu, sei vagana ua faatumulia oe e le Agaga Pa’ia. 

O le isi tulaga i le iai o le olioli matua tele, a e faaaogaina, e toe faaopoopo atili ia te oe. A e va’aia se tagata ua faapea iai se fomai e toe o ni vaiaso ae uma le ola, ona e tatalo lea mo ia, ona malolo lea o ia ma ua faaopopoopoina nisi Tausaga se tele o lona soifua manuia, e te mauaina le olioli matua tele. E faatupuina lou faatuatua ma faaaupegaina oe e fai nisi mea faaopoopo. E to’atele tagata e faatumulia e le Agaga Pa’ia ae latou te le’i tatalo lava mo e mama’i pe taumafai e faatino se vaega. E iai se taimi sa ou ‘ai’oi ai i le Atua e aumai le malosi ou te faia ai ni vavega, ae tali mai le Atua: “Filemu, pe na e fa’aaogaina le mana na ou avatu ia te oe?” Sa ou fesili iai: ‘O lea le mana?’ O lana tali: “O lea le upu i le Galuega1:8?” Ou te iloa lelei le uiga o lea upu ae ou te manatu ou te lei lagonaina ua o’o mai ia te a’u lea mana.  Ona ou tali lea iai: ‘Ou te le o faalogonaina lea  malosi’, ae tali mai le Atua ia te a’u, “Pe na ou faapea atu ea e ola tagata amiotonu i ni o latou lagona pe ola i le faatuatua?”

O le aso na soso’o ai ma lea talanoaga, sa o’o mai ai se fafine ma se tamaititi o tau fa’aola mo ni tatalo, ma ua tele aso e le’i maua se moe. Sa ou manatua le ma talanoaga ma le Atua, ona ou tatalo lea mo le tamaititi. Ina ua uma la’u tatalo, ma pupula o’u mata, sa ou vaaia ua moe le tamaititi. Ina ua ala mai, ua manuia o ia. O iina sa fa’aopoopoina ai lo’u faatuatua ma faatumulia lo’u loto i le olioli matua tele. Ou te faafetai o lo’o fa’aopoopoina mai pea e le Atua lo’u olioli matua tele ma faatino le tele o vavega e ala ia te a’u. E mafai foi ona faia e le Atua mo oe pe afai e lafoai ia te ia mea uma. Ia fa’aaogaina le mana sa e maua i lou papatisoga i le Agaga Pa’ia, e te faia ai ni vavega e ala i lou faatuatua ia Keriso Iesu, Amene. 

OPEN HEAVENS

MATALA LE LAGI MO LE ASO GAFUA 19 IUNI 2023

Manatu Autu:  Vaiinu faatupu malosi fa’ale Atua 2 (Divine energy drink 2)

Tauloto – Tusi Paia: Luka 2:10 ‘Ona fai mai lea o le agelu ‘iā te i latou, “‘Aua tou te matata‘u; auā fa‘auta, ‘ou te ‘aumai ‘iā te ‘outou le tala lelei o le ‘oli‘oli tele e o‘o mai i nu‘u uma,.”

Faitauga - Tusi Paia: Galuega 8:1-8

Upu Folafola

E iai foi seisi vaiinu faatupu malosi e malosi atu e mai le Atua mo le tagata, e taua o le ‘olioli tele’. O lo’o faamatala e le Luka 2:8-16 agelu I le fanau mai o Keriso, na latou fai atu I le au leoleo mamoe e latou te aumaia le talalelei o le olioli tele. Fai mai le Neemia 8:10 o le olioli I le Alii o lo latou malosiaga lea. Afai e te maua le olioli tele, e mafai ona e faia so’o se mea e naunau iai lou loto mo le Atua. 

A’o amata ona matou fausia le nofoaga o le togalauapiga, ona o le olioli I le maua lea o so matou lava nofoaga, ua matou faia se galuega e toatele tagata e manatu e le mafai ona faia, e pei o le fausia o se fale tele e fai ai le galuega  ma se fale e nonofo ai tagata ona tuu lea iai o meaafale manaomia I totonu o le fitu aso. Auā o le Alii o lo’o soifua pea, e te maua le olioli tele I le aso, I le suafa o Iesu. 

O lenei, o a mea e mafai ona e maua ai le olioli tele? Fai mai le 3 Ioane 1:4 E leai so‘u fiafia e sili i lenei, pe ā ‘ou fa‘alogo ‘ua sāvavali la‘u fānau i le ‘upu moni. E te maua le olioli tele pe afai o lo’o e galue e fai tagata ma so’o o Iesu, pe a e vaai atu ua faaolaina tagata mai tigā o le pogisa I le malamalama o le Atua. I le faataitaiga e pei ona taua I luga, e lei faapea ua matou olioli tele ona ua maua se fale e matou te nonofo lelei ai, ae ona ua maua se nofoaga e sili atu ona telē ma lelei e manumaloina ai ni agaga mo Keriso. Afai e te le’i manumaloina se agaga mo Keriso, e te le o iloaina le olioli o lo’o e misia. Na fetalai Iesu e ‘oli‘oli agelu i le lagi i le tagata agasala e to‘atasi e salamō (Luka 15:7). O lenei, afai e manumaloina e le Atua se agaga e tasi ona o oe, ma o lo’o iai le olioli tele I le lagi, e le ono talafeagai foi la ona e maua lea olioli? 

O lenei olioli tele e matua faatuputeleina I le iloa e alofa tele Iesu ia te oe. Fai mai le Filemoni 1:7 e tupu le olioli tele ma le mafanafana ona o le alofa. Afai e tatou te manatu I le telē ma le maualuga o le alofa o le Atua iai tatou, e faatupu malosi iai tatou e faia so’o se mea ina ia mautinoa o lo’o faia pea lona finagalo I le lalolagi. E leai seisi tulaga e sili atu I lona finagalo e manumaloina agaga. Ia e galue e manumaloina se agaga se tasi mo Keriso I le aso, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO SA 18 IUNI 2023

Manatu Autu:  Vaiinu faatupu malosi fa’ale Atua 1 (Divine energy drink 1)

Tauloto – Tusi Paia: Salamo 16:11 ‘‘‘E te fa‘ailoa mai ‘iā te a‘u le ala o le ola; o i ou luma le fiafia e malie ai; o i lou itū taumatau le ‘oli‘oli e fa‘avavau.”

Faitauga - Tusi Paia: Sapakuka 3:17-19

Upu Folafola

I le Tusi o Neemia 8:10 o loo faapea mai o le olioli i le Alii o lo outou malosi lea. O le olioli e maua ai le malosi a’o le malosi o le atamai ma le agavaa e fai le galuega. O le olioli o le vai inu faatupu malosi lea mai le lagi e faa tumau ai lou malosi ma lou soifua maloloina e galue ai. O le vai inu faatupu malosi lenei e eseese ona malosi e fua i le tele o le mana’omia I taimi ta’itasi. O le olioli e aupito laititi le malosi faaopoopo manaomia e ta’u o le olioli masani. E tatau ona faafou lou olioli i taeao uma. Ua faapea mai le Salamo 30:5 “e afe ane le tagi i le afiafi, a’o le alaga fiafia i le taeao.” O tagata e aafia i le loto faavaivai e feagai ma faigata, e o’o i le tula’i mai o latou moega i le taeao. Afai o e lagona se loto faavaivai pe faanoanoa, ou te tatalo ia faatumu oe e le Alii I le olioli ma le fiafia ma faamalosi ‘au ia te oe i le suafa o Iesu.

O le tasi auala e maua ai le olioli, e ala i le faalogo I le tala lelei. Fai mai Salamo 51:8 “‘Ia ‘ou fa‘alogo mai ‘iā te oe i le ‘oli‘oli ma le fiafia;‘ina ‘ia fiafia ivi ‘ua e fa‘amomomoina..”

Sa i ai se uso na manava mai lana galuega i se tasi aso ua lē lavā ma ua lē fia ai, ua na o le fia malolō. E taunuu atu I lona potu o le a moe ae o’o atu ma lana uo tamaita’i e asi. Na fa’afeiloa’i e lona tinā le tamaita’i ma fai i ai o le uso ua moe ua vaivai. Peita’i na faalogo mai le uso mai le potu I le leo o lana uō tamaita’i ma oso mai i fafo mai le potu. Na alu atu le uso fesili i lona tinā mo se meaai mo le tama’itai. Na tali le tinā “o lo’o i ai le araisa ae tatau la ona e alu e kuka.” Na toe tali le uso “E leai se afaina faitalia a’u ma kuka.” Na ofo le tinā pe faafefea e se tagata vaivai ma le lē lavā ua o’o i le tausami ua lē mafai, a lea ua fai mai faitalia ia ma kuka. O le tala lelei ua asiasi atu lana uo tamaita’i ua maua ai lona malosi e o’o iā te ia na te lē o iloa ua faafouina lona malosi. O le a e faafofoga i se tala lelei i taeao uma i le suafa o Iesu.

O afioga a le Atua o le tala lelei, e maua ai lou olioli. Suesue le Upu i taeao uma, e te lagona ai le olioli ma le malosi. Fai mai le tusi o Ieremia 15:16 “Na maua au Afioga ona o’u ‘ai ai lea, sa iā te a’u lau afioga e fai ma mea e olioli ai ma fiafia ai lo’u loto auā ua tā’ua a’u i lou suafa le Alii e, le Atua o ‘au.”

Ae e te le’i faitaua le nusipepa poo nisi tusitusiga e te ono faalogo ai i ni tala e lē lelei ma faanoanoa, faitau le Upu a le Atua e te maua ai tala lelei e te manaomia e faamalosi’au ia te oe mo le aso. O Afioga Paia a le Atua e fa’afouina ai lou malosi e fai ou tiute i aso ta’itasi. I le suafa o Iesu Keriso. Amene.

OPEN HEAVENS

MATALA LE LAGI MO LE ASO TOONAI 17 IUNI 2023

Manatu Autu:  O taimi ma avanoa (Time and opportunities).

Tauloto – Tusi Paia: Salamo 90:12 ‘‘Ia fa‘apea ‘ona e a‘oa‘o mai ‘iā i matou e faitauina o matou aso, ‘ina ‘ia maua ai le poto i o matou loto..”;.

Faitauga - Tusi Paia: Faataoto 3:4-7

Upu Folafola

O le taimi, e fai a si faigata ona faamatala. O se faamatalaga faigofie o le taimi, e faatusa i se vaitafe e tafe pea i taimi uma ma aso uma. E tafe faasoloatoa agai I le itulagi e tasi ma taena’i atu ai ma tagata e maua atu e le tafe. Poo le a lava lau o loo fai e gaioi pea lava le taimi e lē faatali. O lea la a e lē faia mea I le taimi e tatau ona fai ai, e lē gata ua maimau se vaega o lou taimi i luga o le fogaeleele a’o se vaega fo’i o lou olaga. O le ala lea e lē tatau ai ona e paie.

O le tasi tulaga e tatau ona e malamalama ai e uiga i le vaitafe e taua o le taimi, a’o ia tauaveina oe a o loo ofo faatasi atu fo’i ma avanoa ia te oe. Na i ai lava nei avanoa mo oe mai le aso na e soifua mai ai ma e tumau pea seia o’o ina e maliu. A’o e faimalaga, e te alu atu i lea nuu ma lea nofoaga, fetaui ma mafuta i lea tagata ma lea tagata. O tagata uma tou te fetaui ma nuu e te o’o i ai o avanoa uma ia mo oe. A e lē pu’ea ma fa’aaogā a’o maua le avanoa e te ono misia e faavavau auā o le vaitafe e tafe agai I luma ma e lē toe fo’i i tua. A e malamalama I le taimi e faigofie ona e iloa o vaega e faia le fa’aiuga pe ete manuia pe leai o lou mafaia ona saili ma faaaoga avanoa, e pei ona fai mai Failauga 9:11 “o le tausaga ma le mea e tupu ai, e o’o ia te i latou uma.”

O le vaitafe ua tāua o le taimi e i ai ona tuāoi i itu uma e lua ae ogatotonu oe. O nisi taimi e ala i le alofa o le Atua, na te aumaia tagata e fetaui lelei ma avanoa ua ia tapena mo oe ma faapea atu e te mulimuli ai i lea uso. Afai e te poto ma usitai i le Atua e aunoa ma le masalosalo, o le a e taunuu manuia I le taunuuga na fuafua ma tapena e le Atua mo oe. O le tulaga fo’i lea na tupu iā te a’u ina ua ma fetaui ma lo’u tamā i le Alii o Pa Akindayomi. O se tulaga maoa’e ma maualuga ia te a’u i nā aso lo’u faailoga PhD i le Matematika. O lo’u tamā I le Alii e lē iloa faitau tusi pe tusitusi. Na o le Tusi Paia sa mafai ona ia faitaua e ala i se fesoasoani faapitoa mai le Atua, ae fai mai le Atua ia o’u usita’i, faalogo ma mulimuli ai. Mulimuli ane ina o le a maliu le tamā na ia tusi I totonu o lana mavaega o a’u e sui iā te ia i le ta’ita’iga o le ekalesia. O lo’u totogi sa maua i la’u galuega I le taimi lea e sili atu nai loo le aofa’i o le tupe maua a le ekalesia aoao, peita’i na o’u usitai. O le amataga lenā o la’u faigamalaga mai i le vaitafe o le taimi i le valaau a le Atua i lo’u olaga.

A e mana’o e taunuu manuia lau malaga, faalagolago i le Atua e faaali ma faasino atu ia te oe avanoa e ala i tagata tou te fetaui ma mafuta ma nofoaga e te alu i ai ina ia e taunuu ai i le manuia. I le suafa o Iesu Amene.

OPEN HEAVENS

MATALA LE LAGI MO LE ASO FARAILE 16 IUNI 2023

Manatu Autu:  Amata loa (Just Start).

Tauloto – Tusi Paia: Iosua 1:9 ‘Ou te le‘i fai atu ‘ea ‘iā te oe? ‘Ia e fa‘amalosi, ma loto tele; ‘aua ‘e te fefe, ‘aua ‘e te mata‘u; auā o le ALI‘I lou Atua o lo‘o ‘iā te oe i mea uma ‘e te alu i ai.”;.

Faitauga - Tusi Paia: Isaia 43:15-19

Upu Folafola

Na ou tupu ma ola ane I se aiga mativa tele. E matua mativa lo’u tama ae peitai, e toalua ana ava ma le toatele o le fanau. Sa iai foi sana tamai faatoaga e le mafai ona ola ai lana fanau ma le aiga pe a oo ina oo mai le valaau. Ona ou manatu lea ou te le oti I se tulaga mativa faapea ma ou te iloa e pau le ala e alu ese ai ma lenei tulaga mativa, o le toaga I le aoga. Na ou toaga I le aoga ma mafai ai ona ou ulufale I le aoga tulaga lua, ae ina ua maua mai le iuga o suega, na feau mai a’u e lo’u tina ma faapea mai: ‘o le a le mea o loo e taumafai e fai? E te iloa lelei e leai ni tatou tupe ae e te fai mai e te fia aoga?’. Na augani mai ia te a’u: ‘si a’u tama foi, vaai o lea ua lata mai le Kerisimasi, o le a ou faatauina ni ou ofu lelei ae tu’u lou fia alu I le aoga’. Na ou fai I lo’u tina ou te le manao I ni meaalofa o le Kerisimasi, ae ou te fia aoga. Ma o le Tausaga 1955 lea ou te talanoa atu ai. Na lua aso ou te le a’I e faaali atu ai I lo’u tina e moni lou naunau I le aoga. O le a o’o atu I le aso lona tolu o le lē ‘ai, ae o loa o’u matua ma totogi sina tupe I le aoga ina ia mafai ona ou a’e ai. E ui I le faigata, ae na iu lava le aoga I le kolisi maualuga ma mafai ai loa ona ou ulufale atu I le Iunivesite ma o’o atu ai I le tulaga o lo’o ‘ou iai nei. 

O le ola faamanuiaina,  e le mafai ona o’o mai I tagata e tilotilo muamua I vaega e le mafai ai ona tupu, ae le’i la’ala’a I luma. Fai mai le Faataoto 26:13 Ua fai ane le paiē, “O lo‘o i le ala le leona; ‘ua i malae le leona.”

Tusa po’o le a le faigata o lo’o faasaga mai ia te oe, afai e te le ano tele iai ae taumafai pea ia e alualu I luma, o lo’o faatali mai faamanuiaga I tua atu o na faigata. Ia e vaai atu I na faigata ua e manatu e le mafai ona e faia o ni luitau e suesueina le malosiaga o mea e mafai ona e faia. O le siamupini e fua lona lelei I le tagata e la te fetaui I le fusuaga, o le lelei ma le maualuga o le tagata e mafai ona ia faatoilaloina, o le telē ma le maualuga foi lena o le fusi ma le taui na te maua. E toatele tagata e latou te silafia siamupini o le fusu I le paga mamafa o le lalolagi ae laiti lava tagata e latou te iloa le siamupini o le paga mama o le lalolagi. 

O le mafuaaga e maitauina ai e tagata le tala e faatatau I lo’u olaga ona o le tulaga maualalo tele na ou sau ai. Tu I luga ma fai sau faatatau I na mea faigata o lo’o e manatu e le mafai ona e faia aua e lelei ma matagofie le taui. Fai mai le 2 Nofoaiga Tupu 15:7 ‘Ia fa‘amalolosi ‘outou, ‘aua fo‘i tou te lima vaivai; auā e tauia a ‘outou galuega.”

E leai se mea e te le mafaia pe afai e iai Keriso I totonu ia te oe, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO TOFI 15 IUNI 2023

Manatu Autu:  Ia loto I la le Agaga (To be spiritually minded).

Tauloto – Tusi Paia: Roma 8:6 ‘Auā o le loto i la le tino o le oti lea; o le loto i la le Agaga o le ola lea ma le manuia;.

Faitauga - Tusi Paia: 2 Nofoaiga Tupu 16:1-14

Upu Folafola

E faigatā i nisi tagata ona faatuatuaina le Atua. E sili atu ia i latou le tuuina atu o o latou faatuatuaga i mea e mafai ona latou vaaia, nai lo le Alii, e le mafai ona latou vaai i ai. O le tele o taimi, , ua faapea ifo lava I tatou, o tatou o tagata popoto, ma o tatou tomai na faaaoga i aso ua tuanai, ua tatou mananao e faʻaaoga mo mea uma. Sa ou auai i se papatisoga o le Agaga Paia mo se vaega o tagata; o ē e leʻi aʻoaoina I ni aoga, ina ua papatisoina, na vaaia lo latou faaeaina, ae o ē maualuga le aʻoaʻoina na vaavaaia solo ma taumafai e fia malamalama pe faapefea ona o’o mai le papatisoga. O i latou ia ua faatusaina o ni Tomasi masalosalo. O Toma o se tagata e le talitonu seia vaai iai ona mata. O lo’o faapea mai le Ioane 20:29, Ua fetalai atu Iesu ia te ia, Toma e, ua e talitonu, auā ua e vaai mai ia te au. Amuia o e le vaai mai, a e talitonu mai pea.

O loo faapea mai foi le Aposetolo o Paulo:

O lo‘o matou lē mānatunatu i mea ‘ua va‘aia, a o mea e lē va‘aia; auā o mea ‘ua va‘aia e gata mai ia, a o mea e lē va‘aia e fa‘avavau ia 2 Korinito 4:18

A e mana'omia se fesoasoani, o I tonu e taoto ai lou fa'atuatua. Mo se faataitaiga, na faapea mai Tavita, e faasaga ae o‘u mata i mauga, e o’o mai ai lo‘u fesoasoani (Salamo 121:1-2). Afai e te faalagolago i le tagata, o lona uiga o lou faatuatua e taoto i le tagata. Afai e te faalagolago i au tupe, o iina e taoto ai lou faatuatua. E mafai e le Atua ona faʻaaoga nei vaega e faʻafetaui ai ou manaʻoga, ae e tatau ona e silasila i le Atua, na o le Atua lava ma oe. E le fiafia le Atua pe a e faatuatua i so’o se mea po’o se isi lava tagata ae na o Ia. Fai mai le Eperu 11:6 A leai foi se faatuatua e le mafai ona fiafia mai o ia;  Seiloga e te aveesea o tatou mata mai le faaletino ae tuu atu ia te Ia i le Agaga, o le a tumau pea nisi mea e le mafai ona e mauaina.

I la tatou faitauga o le Tusi Paia mo le aso, na faigatā iā Asa ona saʻili atu i le Atua mo lana faamālōlōga ona ua le faamaloloina o ia e fomaʻi. O se olo malosi lea a le tiapolo e tatau ona talepeina. Afai e te suʻesuʻe ma le filiga i lau Tusi Paia, tatalo e le aunoa ma mafuta ma isi tagata talitonu, o le a le pine ae amata ona e iloa le auala e pulea ai e le faaleagaga le faaletino.

Ia faateleina le taimi e te mafuta ai I le Alii nai lo le taimi e te mafuta ai ma isi tagata, o le 'olo malosi lea e te faʻalagolago I ai, e talepe ai lou faalagolago I mea faaletino. Tuu lou faatuatuaga I le Atua. Ua na o ia e mafai ona fesoasoani ia te oe, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LULU 14 IUNI 2023

Manatu Autu:  Aua e te fefe (Don’t be afraid).

Tauloto – Tusi Paia: 1 Ioane 4:18 ‘E leai se fefe i le alofa, a o le alofa ‘ato‘atoa e fa‘ate‘a‘eseina ai le fefe. O le mea lea o le alofa e lē ‘ato‘atoa i se tasi e fefe auā e tatau lava ‘ona fa‘asalaina le fefe’.

Faitauga - Tusi Paia: Isaia 41:10-20

Upu Folafola

O le tatou upu tauloto o le aso o loo faapea mai o le fefe e faasalaina le tagata. Fai mai le 2 Timoteo 1:7, o le fefe o se agaga, ma afai e le mai le Atua, o lona uiga e mai le tiapolo. Fai mai le Faataoto 29:25, O le fefe i tagata e tupu ai le mailei. O lona uiga, afai e te fefe I se tagata, e te ono pau atu I se mailei. O le mafuaaga e tamomoe ai tagata I le au vili tusi ma le au fofo faataulaitu, o le fefe ma o le mafuaaga lea e latou te sailia pea le puipuiga mai so’o se fili. 

O se tasi o tulaga maaleale o le fefe, o le tulaga o lo’o fefe ai, e ono vave ona o’o mai (Iopu 3:25). O le fefe I le oti o lo’o tele ina saisaitia ai le toatele o tagata I le asō. O le fesili lenei, e iai ea ni tagata e ono lē o’o iai le oti? Fai mai le Eperu 9:27, ua tofia le tagata e iai le taimi e tasi e oti ai. E saisaitia e le tiapolo le tagata, aua foi o le oti o se mea e tatau ona latou sauni iai ae ua faia ma mea e fefefe iai. 

Afai e te maua le Alii, e alu ese mamao le fefe mai ia te oe. Fai mai Tavita o le mafuaaga e leai ai sona fefe tusa pe a ui I le vanu o le oti aua o loo faatasi le Atua ma ia (Salamo 23:4). Fai mai le Roma 8:15 Auā ‘ua ‘outou lē maua le agaga o le pologa, e toe fefefe ai; a ‘ua ‘outou maua le Agaga o tamafai, tou te vala‘au atu ai, “Ava, le Tamā e.” O le foliga vaaia e faamaonia ai o oe o le atalii poo le afafine o le Atua ma o loo faatasi le Atua ma oe, o le tulia ese lea o le fefe mai lou ola. E leai se tamaitiiti e fefe I isi tamaitiiti tau faafefe I latou pe afai o loo tu ai lona tama I ona tafatafa. Afai o oe o se atalii poo se afafine o le Atua o lo’o ola faapaiaina, e matua mautinoa ma faamaonia e faatasi le Atua ma oe I taimi uma. O le tatou faitauga o le Tusi Paia o le aso o loo faapea mai e le tatau ona e fefe aua o loo faatasi le Atua ma oe, o loo is u’uina lou lima ma faamalosi ia te oe. Afai e iai le Atua I lau itu, e leai ma se mea e te fefe ai.

Ia ‘outou fa‘alatalata atu i le Atua, ‘ona fa‘alatalata mai lea o ia ‘iā te ‘outou (Iakopo 4:8). O lona uiga a lafoai lou ola ia Iesu ma amata ona e ola ma soifua faapaiaina, e faalatalata mai le Atua ia te oe ona sola ese lea o le fefe mai lou ola. O le agasala e faatupuina le va o le tagata ma le Atua ma e le mafai ona lagonaina e le Atua tatalo a tagata agasala e leai se salamo (Ioane 9:31) ma e na te le puipuia I latou mai so’o se mea e lamatia ai o latou ola. 

E pau le mea ou te fefe ai, pe a tuua a’u e le Atua, aua afai e na te tuua a’u, ou te iloa ua uma foi a’u. O le tulaga lea ou te ola faapaiaina ai, e le mafai ona ou gafatia e alu ese mai I ona luma. Ae faapefea oe? O le faatasi o le Atua ma oe, e alu ese mamao ai le fefe, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LUA 13 IUNI 2023

Manatu Autu:  O uiga faaletonu I le Agaga (Spiritual personality disorder).

Tauloto – Tusi Paia: Roma 1:28“Ua latou lē loto fo‘i e tāofi i le matā‘upu i le Atua, o lea ‘ua tu‘uina atu ai i latou e le Atua i le loto leaga, latou te fai ai mea e lē tusa;..”

Faitauga - Tusi Paia: 1 Peteru 4:7-11

Upu Folafola

O uiga faaletonu I le agaga ua amata ona ta’atele e o’o lava i totonu o le fanau a le Atua. O ia uiga faaletonu e faaalia I amioga ma mafaufauga e masani ona punitia ma lē mafai ona fa’aauauina ai se mafutaga vavalalata ma le Atua. E avea foi ma faafitauli i le ausia o fuafuaga mo le olaga o le tagata, o galuega ma le ola faaleagaga. Fai mai molimau a tagata e iai tomai faapitoa; o ia uiga faaletonu e tino mai i ni vaega se tolu: Muamua, o ni uiga malosi ma le lē mautu, lona lua, o gaioiga e leai se tapasā ma e mata’utia i le maitau o isi, ma lona tolu, o le fememea’i ma le fefe e tulaga ese. E iai ni suesuega ua fa’aalia mai ai o ituaiga uiga faaletonu faapenei, e masani ona taumafai e faamanu’a o latou tino, ma e o’o atu lava I le fuafuaina e pule i le ola. E matua ogaoga tele ma o loo faamatalaina e Iopu I le Iopu 10: 22 e faapea: “O le nu‘u o le pouliuli, e tusa lava ma le pouliuli tele; o le ata o le oti, e lē i ai ni mea tonu; o lona pupula mai e tusa ma le pouliuli tele.” Ou te tatalo ia ‘aua lava nei oo iai oe ma e e pele ia te oe, i le suafa o Iesu. Afai ua e o’o iai ma o lo’o e iai I lea tulaga, ia laveaiina ma faasa’olotoina ‘oe i le mana o le Atua, i le suafa o Iesu.

E tele ni vaega o le Tusi Pa’ia ua fa’amaonia ai o uiga faaletonu nei e tauala ma mafua mai i ni vaega se tolu: Muamua, o le osofa’i mai e le fili (Ioane 10:10), lona lua, o le fa’aleaga e le tagata o ia lava (Mareko 7:23, Kalatia 5: 21) ma lona tolu, o se fetu’u I le agaga ona o le taui o se agasala e pei ona faamauina I le 1 Korinito 3:17. O lo’o faapea mai le Teuterenome 28:20:

“E fa‘ao‘o e le ALI‘I ‘iā te oe le malaia, ma le atuatuvale, ma le a‘oa‘iga, i mea uma lava e tago i ai ou lima e faia, se‘ia fa‘aumatia oe, ma e vave fano lava; ‘ona o le leaga o lau amio na e lafoa‘i mai ai ‘iā te a‘u”.        

Ia salamō loa i au agasala uma ma talia Iesu e avea ma ou Alii ma Fa’aola. Sa fa’alavelave le Atua ma toe fa’atula’i mai ni tagata se toatele, sa maua I latou I uiga faaletonu I le agaga e aofia ai ma gasegase o le mafaufau, ae ua laveai ma faamalolo I le atoatoa I latou e ala I Lana Upu. O lea, ou te folafola atu i le suafa e sili atu I suafa uma ‘Ia faasaolotoina oe mai soo se uiga faaletonu I le agaga ma so’o se gasegase o le mafaufau i le asō, i le suafa o Iesu!’

Tatalo 

Tama, fa’amalolo ma faasa’oloto I tagata uma o lo’o pagatia ona o gasegase e faatatau i uiga faaletonu I le agaga ma gasegase o le mafuafau, i le suafa o Iesu Keriso, Amene. 

OPEN HEAVENS

MATALA LE LAGI MO LE ASO GAFUA 12 IUNI 2023

Manatu Autu:  Pe a valaau le Atua iā te oe 2 (When God calls you 2).

Tauloto – Tusi Paia: 2 Timoteo 1:9“o lē na fa‘aola mai ‘iā i tatou, ma vala‘au mai i le vala‘au pa‘ia, e lē tusa ma a tatou galuega, ‘ae tusa ma lona lava finagalo ma lona alofa tunoa na foa‘iina mai ‘iā i tatou ‘iā Keriso Iesu talu mai le vavau.,..”

Faitauga - Tusi Paia: 1 Peteru 4:7-11

Upu Folafola

A maea ona faaolaina oe e le Atua, o le isi valaau ia te oe o le galue faatasi ma ia I le talai lea o le talalelei ina ia faaolaina isi agaga o lo’o leiloa I le lalolagi atoa. E le gata e na te faaolaina tagata I le fata faitaulaga, e na te valaau foi I tagata mai so’o se vaega o le olaga e avea ma ana tagata faigaluega I lena vaega. Mo se faataitaiga, e mafai ona ia valaau I tagata e galulue ma ia I upu fai o malo aua o lo’o finagalo o ia e faaaogaina le ofisa o loo latou nofoia I totonu o le malo o se auupega e manumaloina ma faaolaina le lalolagi. 

O le Atua e le na o le Atua I le Aso Sa. O ia o le Atua I aso uma. E le faapea e na o faifeau e iai agavaa e faaaogaina e le Atua. Afai ua faaolaina oe, ae o lo’o e galue I pisinisi, mataupu o tagata lautele, e o’o I le gaosia o lavalava, e mafai ona faaaogaina oe e le Atua I lena matafaioi, e faaolaina le lalolagi. Na fetalai o ia I le Kolose 3:17 O mea uma fo‘i tou te faia i le tautalatala, po o le amio, ‘ia faia uma lava ia mea i le suafa o le Ali‘i o Iesu, ma le fa‘afetai i le Atua le Tamā e ala ‘iā te ia.  

Afai e te faia se galuega I le suafa o se tagata, o lona uiga e le faapea o e faia mo o’e, ae mo le tagata o lo’o fai oe ma ona sui. Afai e te lagonaina o lo’o valaau le Atua e te galue I so’o se vaega, e tatau ona e fesili ia te ia po’o le a mea e tatau ona e faia e o gatasi ma ana fuafuaga. E pau lena o le auala e mafai ai ona e faia sea galuega I le suafa o le Alii. Ia e manatua o oe o lona sui I le ofisa poo le faalapotopotoga o lo’o e galue ai, ma e le tatau ona e faia se mea e na te le faia pe ana faapea o iai faatasi o ia ma oe. 

O le taui mo le talia o le valaau e galulue faatasi ma ia aua le faaolaina o le lalolagi, e faamautinoaina e le Atua e galulue mea uma mo lou lelei. Fai mai le Roma 8:28 ‘Ua tatou iloa fo‘i e galue le Atua i mea uma lava mo le lelei fa‘atasi ma i latou o ē ‘ua alolofa atu ‘iā te ia, o ē ‘ua vala‘auina i lona finagalo. 

O le taimi e valaauina ai oe e tusa ma lona finagalo ae e talia, o le faataunuuina lona finagalo I le galuega o lo’o e galue ai, e galue le Atua I mea uma lava mo lou lelei. O lo’o valaau le Atua ia te oe e fai ma ona sui I mea uma e te faia ma e tautala atu ai, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO SA 11 IUNI 2023

Manatu Autu:  Pe a valaau le Atua iā te oe 1 (When God calls you 1).

Tauloto – Tusi Paia: Efeso 4:1-2“1O lenei, o a‘u o lē ‘ua noanoatia ‘ona o le Ali‘i ‘ou te ‘ai‘oi atu ‘iā te ‘outou ‘ia ‘outou sāvavali ‘ia tusa ma le vala‘au ‘ua vala‘auina ai ‘outou. 2‘Ia ‘outou loto maulalo lava ma le agamalū, ma le ‘onosa‘i, ‘ia ‘outou fa‘apalepale le tasi i le tasi ma le alofa,..”

Faitauga - Tusi Paia: 2 Peteru 1:1-11

Upu Folafola

O le valaau a le Atua o lona uiga moni o le valaau I le Atua. Toatele tagata e manatu a valaau le Atua ia I latou o lo’o valaau mo se galuega, peitai o le valaau e alu atu ia te ia. A valaau le Atua ia te oe, o loo ia faapea mai, “fa’alatalata mai ia te a’u.” Ua faapea mai le Mareko 3:14 o le mafuaaga muamua na tofia ai e Iesu le auso’o e to’a sefululua ina ia latou mafuta faatasi ma ia.

O le valaau a le Atua e alalua, muamua o le valaau e lafoa’i le agasala, alu ese mai le mālō o le pouliuli ae sau iā Iesu i le mālō o le malamalama. O le valaau lea na ia faia i le Mataio 11:28 e faapea “ia outou omai ia te a’u o outou uma o e tigaina ma mafatia i avega, o a’u fo’i e malolo ai outou.” Sei o tatou tulimata’i le valaau muamua lenei i le asō.

O le valaau tonu lenei e maua e tagata soifua uma. A e auai I se sauniga ma e faalogo I le failauga o faapea I tagata e o atu i luma I le la’oai, o le Atua lava lea ua valaau i e agasala e o ese mai le agasala ae omai iā te ia mo le faaolataga mo o latou agaga.

Sa i ai se taulealea talavou fasioti tagata sa ia aumaia se tagata I le lotu I lana uila afi. Sa ia faatali laititi I fafo ma faalogo I le lauga. Ina ua fai le valaau sa manatu e tu’u lona ola iā Keriso, peita’i na toe musu ma alu ese. Paga lea na aafia i se faalavelave mulimuli ane I le aso lea ma maliu ai. Pe ana ia talia le valaau mo le fa’aolataga, pe maliu lava a’o le measili ua ia maua le ola e faavavau.

O le valaau a le Atua mo le faaolataga e mo tagata uma lava. O lona finagalo ia valaau I ē agasala ia o ese ma le pouliuli ma o atu i lona malamalama pupula. O lo’o saili le Atua ia fai tagata uma ma auga tupulaga filifilia, o tupu ma ositaulaga, o le nuu paia ma le nuu na faatauina mai e le Atua (1 Peteru 2:9). Peita’i o nisi e talia le valaau a le Atua ma avea ma tagata faaolaina ona toe amata fo’i lea o na fai le agasala ma le iloa. O ituaiga tagata ia e lē fai mo i latou le mālō o le Atua (Luka 9:62) ma ua faapea mai fo’i na te luai atu i latou ‘ai lona fofoga pe ā latou lē toe fo’i atu iā te ia (Faaaliga 3:16) o le valaau a le Atua mo le faaolataga o se valaau mo le ola Paia. A e lē ola faapaiaina o lo’o e tete’e I le valaau a le Atua. I le suafa o Iesu Keriso Amene.