Samoan Devotional

OPEN HEAVENS

MATALA LE LAGI MO LE ASO LUA 11 IULAI 2023

Manatu Autu:  E sili atu I ou faamoemoega 2(Exceeding Expectations 2)

Tauloto – Tusi Paia: Filipi 4:19 ‘‘A o lo‘u Atua e fa‘a‘atoa e ia ‘iā te ‘outou mea uma e matitiva ai ‘outou, e tusa ma le faula‘i o lona vi‘iga, ‘iā Keriso Iesu..”

Faitauga - Tusi Paia: Efeso 3:20-21

Upu Folafola

Sa amata ona tatou su’esu’eina le mataupu o le sili atu I ou fa’amoemoega, ma sa tatou mauaina ai ua na o le Atua mata’utia e faia ni tulaga e sili ma maualuga atu I o tatou fa’amoemoega tusa po’o le a le maualuga. O lo’u Tama, e fa’amalieina mana’oga uma ma e leai se gata’aga a lona mana. E ia te ia mea silisili ma afai na te faamanuiaina se tasi, o le a taumasuasua lana ipu (Salamo 23:5). O le aso, o le a fa’aauau le tatou vaavaai i le Atua mata’utia  e mafai ona ia faia mea e sili atu ma maualuga I lo tatou faamoemoga, e sili atu I manatunatuga o le tagata. O lo’o faapea mai le Tusi Pa’ia I le Filipi 4:19 ‘A o lo’u Atua e fa’aatoa e ia ia te outou mea uma e matitiva ai outou, e tusa ma le faulai o lona viiga, ia Keriso Iesu.” 

O le fuaitau o le Tusi Pa’ia o lo’o taua I luga, e fa’aalia manino ai le tulaga e tasi: E faavae le foai a le Atua e fua I le vavalalata o le mafutaga a le tagata ma Iesu Keriso. O le mafua’aga ona ua maea ona togiolaina e Iesu Keriso le tau o faamanuiaga mo I latou ua faatuatua ia te ia. O lo’o fai mai le Tusi Pa’ia I le 2 Korinito 8:9 “Auā ‘ua ‘outou iloa le alofa tunoa o lo tatou Ali‘i o Iesu Keriso, sa tamao‘āiga ia, a ‘ua fa‘amativaina ‘ona o ‘outou, ‘ina ‘ia fa‘atamao‘āigaina ‘outou i lona mativa.”

I le tatou tusi faitau o le asō ua fa’amautinoa mai, o le Atua Silisiliese e mafai ona ia faia mea e sili atu ma faafaulai e sili atu I mea tatou te ole atu ai pe mafaufauina. O lea la, e ao ona tatou ave ia te ia le viiga e le aunoa. Ua aumai e lo tatou Alii le fa’ataitaiga manino o fa’amanuiaga na te faia mo tatou, pe afai tatou te ave ia te ia le viiga, le fa’ane’etaga ma le fa’afetai; a tatou manatu i lona fafagaina o tagata e 5000 i le na o le lua o tama’i i’a ma falaoa e 5, ae sa lava ma totoe, ma sa ia mua’i ave le fa’afetai i le Atua (Ioane 6: 11-14). Sa matua manino mai ai lona fa’aatoa ma lona faia o se tulaga e sili atu i fa’amoemoega o le ‘au so’o fa’apea ma le motu o tagata sa auai i lena aso. O le mafua’aga foi lea sa lapata’ia ai e Mose le fanauga a Isara’elu ia latou manatua pea le Atua na foaiina ia i latou le malosiaga e maua ai le tamaoaiga faulai (Teuteronome 8:18).

O le manatua o le Atua, o le tatou manatuaina lea ia faia mea uma e tusa ma ana poloaiga. Le ‘au pele, afai e moni lou faatuatua ia te ia, o le a ia fa’ataunu’uina ou faamoemoega i se tulaga e sili atu, i le suafa o Iesu. Faafetai i le Atua aua o soo se tulaga ua le atoatoa, o le a ia fa’aatoa ma faafaulai e sili atu I ou faamoemoega, i le suafa o Iesu Keriso, Amene. 

OPEN HEAVENS

MATALA LE LAGI MO LE ASO GAFUA 10 IULAI 2023

Manatu Autu:  E sili atu I ou faamoemoega 1(Exceeding Expectations 1)

Tauloto – Tusi Paia: 1 Tupu 3:13 ‘‘Ua ‘ou foa‘iina atu fo‘i ‘iā te oe ‘atoa ma mea ‘ua e lē fa‘atoga mai ai, o le ‘oloa ‘atoa ma le mamalu; ‘ina ‘ia leai se tupu e tusa ma oe i ou aso uma.....”

Faitauga - Tusi Paia: 1 Tupu 3:4-15

Upu Folafola

O le faamoemoega I se tulaga e maua pe ausia, o le faatuatuaga mautu lea I se mea o le a tupu pe afai e tutusa mea uma. Mo se faataitaiga, o le tutusa o mea uma o le tulaga lea o le maua o le totogi o le tagata faigaluega I le faaiuga o le masina. I nisi faaupuga, o lenei faamoemoega e suia ma le maua pe afai e tei lava ua musu ma le toe faigaluega lea tagata. O le talalelei lenei, o so’o se faamoemoega o lo’o faavae I luga o folafolaga a le Atua Silisili ese ia te oe, e taunuu pe afai e te tumau I le mulimuli ma usitai ia te ia. 

I le tatou tauloto mai le Tusi Paia, e sili atu le foai a le Atua I lo le faamoemoega o Solomona. Na ole atu Solomona mo le poto e na te pulea ai tagata o le Atua, ae na matua ofo o ia aua na faaopoopo ma sili atu le foai a le Atua I lo lona faamoemoega mo le poto. Fai mai le 1 Tupu 3:13 ‘Ua ‘ou foa‘iina atu fo‘i ‘iā te oe ‘atoa ma mea ‘ua e lē fa‘atoga mai ai, o le ‘oloa ‘atoa ma le mamalu; ‘ina ‘ia leai se tupu e tusa ma oe i ou aso uma.

Ou te manatua na ou ole atu I le Atua mo se fale feoloolo ou te nofo ai ina ua tofia au I le taitai aoao o le Ekalesia Redeemed Christian Church of God, ae na sili atu le foai a le Atua I lo o’u faamoemoega, ua ia aumaia se taulaga atoa. O le taimi nei, o le nofoaga e taua o le ‘togalauapiga’ a le Ekalesia, e ui o loo faaopoopo pea, e mafai ona faatusa I se taulaga tele. O le maua o se faamanuiaga e sili atu I ou faamoemoega, ma le maua o mea e sili atu I mea e te manatu iai, e manaomia le siitia pea o le lelei o lou auauna I le Atua Silisili ese, ua na o ia e mafai ona sili atu lana foai I so’o se faamoemoega maualuga. 

E tatau ona vavaeeseina mai lou tagata ia ola faapaiaina pe afai e te fia maua faamanuiaga e sili atu I ou faamoemoega. Mo se faataitaiga, e leiloa po’o e ole atu mo se tulaga pule sili ae o lo’o finagalo le Atua e avea oe ma tupu. E ono e naunau e te manumalo I le palota mo le tofiga o le faipule ae iu ane ua tofia oe e avea ma Palemia o lou atunuu. E iai ea se mea e le mafaia e le Atua? E faigofie I le Atua ona foai atu e sili atu I ou faamoemoega ae pau lenei, ia e iai I lana itu I le ola faapaiaina ma le amiotonu. E na o le Atua lava e mafai ona sili atu lana foai nai lo soo se faamoemoega maualuga o loo ia te oe, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO SA 9 IULAI 2023

Manatu Autu:  O le poto o le Atua (The wisdom of God)

Tauloto – Tusi Paia: 1 Korinito 1:25 ‘‘Auā o le valea o le Atua e sili lona poto i tagata; o le vaivai fo‘i o le Atua e sili lona malosi i tagata....”

Faitauga - Tusi Paia: 1 Korinito 1:18-31

Upu Folafola

O lo tatou Alii o Iesu Keriso o le mana lea ma le poto o le Atua (1Korinito 1:14)

Na fetalai le Atua i le Luka 4:18 ‘Ua i o‘u luga le Agaga o le Ali‘i, auā ‘ua nā fa‘au‘u mai ‘iā te a‘u e folafola le tala lelei i ē matitiva. ‘Ua ‘auina mai a‘u e ia e fa‘amālōlō i ē loto momomo, e tala‘i le sa‘olotoga i le tāfeaga, ma ‘ia pupula mata o ē tauaso, e tu‘u sa‘oloto i ē ‘ua fa‘asauāina. 

Ua faapea mai fo’i, so’o se tasi e talia le Talalelei a Iesu Keriso o le tagata poto ia. Peita’i o Afioga Paia a le Atua e lē mafai ona faamalamalamaina i mafuaaga ua tatou masani ai. Fa’ata’ita’iga na lauga Iesu ai se fia faasaogalemuina lona ola ia mua’i fa’amaumauina ona o ia. (Mareko 8:35). Na folafolaina fo’i, a tatou fia maua le malologa i o tatou agaga, ia o tatou amoina lana amo. E faapefea ona maua le malologa o le agaga pe a e amoina avega? O le mafuaaga lea e faigata ai e le toatele o saienisi ma le au fai tofā ona talia ma talitonu i le Upu a le Atua. Mo se fa’ata’ita’iga a’o fou lo’u olaga Kerisiano sa faigata ona o’u malamalama I le a’oa’oga o le sefulua’i. E faafefea ona lava le 90% pe afai e o’o I le 100% e lē taitai lava mo a’u? Sa ou fesili fia malamalama. Faafetai I le Atua ua o’u malamalama.

O le Talalelei lenei, i le tusi o Galuega 10:38 ua folafolaina mai ai o Iesu Keriso na fetalai ma o ana fetalaiga ua maua ai le fa’asa’olotoga mo I latou uma e faalogo ma talia o ia. (Mataio 21:14).

Le au pele e, e te talitonu ea I le Talalelei? O le Talalelei o le afio mai o Iesu I le lalolagi na te faaolaina o e agasala. (1 Timoteo 1:15). O le poto lea o le Atua o lo’o afifi I le Talalelei a Iesu Keriso. Sau iā Iesu i le asō e talia lona poto e suia lou olaga.

O a ni ou manaoga? Na ia folafola mai afai tatou te mua’i saili lona mālō ma lana amiotonu, na te faaopoopo ia mea uma e te mana’o i ai. (Mataio 6:33) Talia le poto o le Atua, talitonu i lana Upu, na te lē tuulafoaiina oe. I le suafa o Iesu Keriso Amene.

OPEN HEAVENS

MATALA LE LAGI MO LE ASO TOONAI 8 IULAI 2023

Manatu Autu:  O le faamoemoe I le Manuia (The hope of Glory)

Tauloto – Tusi Paia: Roma 5:2 ‘‘o ia fo‘i ‘ua tatou maua mai ai le ta‘ita‘iga i lenei alofa tunoa, tatou te i ai i le fa‘atuatua; o lo‘o mitamita fo‘i i tatou ma le fa‘amoemoe i le manuia mai le Atua...”

Faitauga - Tusi Paia: Roma 5:1-5

Upu Folafola

O loo faapea mai le Kolose 1:27 Na finagalo fo‘i le Atua ‘ona fa‘ailoa atu ‘iā i latou le uiga o le silisili o le lelei o lenei mea lilo o i nu‘u ‘ese, o Keriso lea o lo‘o ‘iā te ‘outou, o le fa‘amoemoe i le manuia. 

Fai mai le Tusi Paia I le Eperu 11:6 a leai se faatuatua e lē mafai ona fiafia mai iai le Atua. Ina ia maua e so’o se tasi le faamoemoe I le manuia, e tatau i le uso ona filifili tonu po’o ai e auauna i ai (Iosua 24:15). O le faatuatua e filifili tatau ai e pei o la tatou upu tauloto o le asō.

E ala i le faatuatua i le Atua soifua, ua ta’uamiotonuina i tatou i le togiola ia Keriso Iesu, o le na te ta’ita’iina ma lē na te fa’aatoatoaina lo tatou faatuatua. Na afio mai e fa’aola i tatou e ala i lona maliu, i le fufulueseina o a tatou agasala i lona toto. O le ala lea na fetalai mai ai lana Afioga Paia I le 1 Korinito 15:13-14,20 13‘Ae ‘āfai e leai se toetū mai o ē ‘ua oti, po ‘ua lē toe fa‘atūina mai Keriso; 14‘āfai fo‘i ‘ua lē toe fa‘atūina mai Keriso, po ‘ua fa‘alēaogā la matou tala‘i, ‘ua fa‘alēaogā fo‘i lo ‘outou fa‘atuatua.20A o lenei, ‘ua toe fa‘atūina mai Keriso i ē ‘ua oti, ‘ua ‘avea ma fa‘apolopolo o ē ‘ua momoe.

O le fuaitau ua taua i luga o le faavae lea o lo tatou faamoemoe I le manuia. Ua toe faapea mai fo’i le Upu, “afai e gata i le olaga nei lo tatou faamoemoe iā Keriso ua sili lo tatou malaia i tagata uma lava.” (1 Korinito 15:19) O le ala lea, I lo tatou olaga kerisiano e lē tatau ona tatou faavaivai, tusa pe o’o mai puapuaga aua ua mautinoa lo tatou manuia iā Keriso.

O lo tatou faamoemoe I le manuia o le faamoemoe ola e pei ona fai mai le Faaaliga 21:1-7 ua faamautinoa mai ia I tatou le lagi fou ma lalolagi fou e lē toe i ai se tigā, faanoanoa, mativa, ma’i ma le oti. E faaumatia le oti i le manumalō (1 Korinito 15:54).

O lea le au pele e, ina ia e maua lenei faamoemoe, talia Iesu Keriso e fai ma ou Alii ma ou Faaola i le asō. Afai ua e talia Iesu Keriso, faamautinoa e te lē toe tepa i tua aua na fetalai Iesu “O lē tago loa lima i le suotosina ma tepa i tua, e lē tatau ia I le mālō o le Atua.” (Luka 9:62)

Ou te tatalo ia faatumauina i tatou uma lava e le Atua Silisili ese ia te ia e o’o i le iuga I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 7 IULAI 2023

Manatu Autu:  Faamanuia a le Atua 3 (Divine blessings 3)

Tauloto – Tusi Paia: Ioane 15:8 ‘‘E vi‘ia lo‘u Tamā i lenei mea, pe a ‘outou fua tele mai; ‘ona fai ai lea ‘outou mo‘u so‘o”

Faitauga - Tusi Paia: Luka 13:6-9

Upu Folafola

O le tele a faamanuia a le Atua e iai lava aiaiga ma tapulaa. O le tulaga lea e tele ai le fuaitau faapea ‘pe afai’ e I totonu o le feagaiga a le Atua ma le tagata. Mo le faataitaiga, I le Teuterenome 28:1, na folafola e le Atua I le fanauga a Isaraelu e na te faamanuia ia tele iai latou e sili atu I so’o se malo o le lalolagi ‘pe afai’ latou faalogo I le siufofoga o le Atua ma anaana I ana poloaiga. 

O le faavae mautu o le faamanuia a le Atua ina ia avea le tagata o lo’o avatu iai le faamanuia ia fua tele ma avea ma faamanuiaga I isi tagata. O le fua tele mai o se tasi o faamanuia a le Atua e iai tapulaa. O le tapulaa faavae o le maua o le fua tele mai o loo taua I le Ioane 15:4 ‘Inā tumau ia o ‘outou ‘iā te a‘u, o a‘u fo‘i ‘iā te ‘outou. Fa‘apei o le la e lē mafai ona fua pe a na o ia, pe ‘āfai e lē mau i le vine; e fa‘apea fo‘i ‘outou, pe ‘āfai tou te lē tumau ‘iā te a‘u.

O le fesili, ‘e faapefea ona mau I le vine?’. O le tali e le faigata. E muamua ona avea oe ma vaega o le vine I lou talia lea o le valaau a Iesu I le Mataio 11:28-30. Afai e te tautino o Iesu o lou Alii ma ou Faaola, e faapipii atu oe I le vine, le Alii o Iesu Keriso. 

O le vaega lona lua o lou tumau lea ia Keriso. O le tumau ia Keriso o lona uiga o lou ola e tusa ma lona finagalo. Na fetalai Iesu I le Ioane 8:31‘o ē ‘ua fa‘atuatua ‘iā te ia, “‘Āfai tou te tumau pea i la‘u a‘oa‘oga, o o‘u so‘o moni ‘outou. Na fetalai foi o ia I le Ioane 15:10 ‘Āfai tou te tausia a‘u poloa‘iga, ‘ona tumau lea o ‘outou i lo‘u alofa; pei ‘ona ‘ou tausia poloa‘iga a lo‘u Tamā, ma ‘ou tumau i lona alofa.

E mafai ona e fua tele mai I le agaga e pei o Peteru e tasi lava le lauga na faia ae 3000 agaga na manumaloina mo le malo o le Atua (Galuega 2:38-41), pe o Paulo, na faaaogaina lona solosolo e Ie Atua e faamalolo ai le toatele o tagata mama’i (Galuega 19:11-12). E mafai foi ona e fua tele mai e ala I le tamaoaiga, e pei o Isaako, na matua maualuga lona tamaoaiga ma mauoa na matua ofo ma mo’omo’o iai le atunuu atoa (Kenese 26:14-17). E mafai foi ona e fua tele mai e ala I lou tino maloloina pe a oo ina avea ma tagata matua, e tumau pea lou malosi e pei o Mose (Teuteronome 34:7). 

Le au pele, e pei ona tatou faitauina I le Tusi Paia o le aso, e matuia pe afai e leai se fua. E te maua le fua tele mai pe afai e lafoai lou ola ia Iesu Keriso ma e ola ma soifua e tusa ma lona finagalo I lou olaga atoa, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO TOFI 6 IULAI 2023

Manatu Autu:  Faamanuia a le Atua 2 (Divine blessings 2)

Tauloto – Tusi Paia: Kalatia 5:1 ‘‘O lenei, ‘ia ‘outou tumau i le sa‘olotoga ‘ua fa‘asa‘oloto mai ai Keriso ‘iā te i tatou ‘ae ‘aua ne‘i toe tāofia ‘outou i le amo o le pologa..”

Faitauga - Tusi Paia: Ioane 5:5-14

Upu Folafola

 E lelei le maua o faamanuia a le Atua ae e tatau foi ona taofiofi iai. Ou te aoaoina lava la’u fanau I le faatuatua, o le alofa tunoa e manaomia e maua ai se vavega e le sili atu I le alofa tunoa e taofi ai. E le se tulaga faigata I le Atua ona faamanuia I lana fanau, peitai o le matafaioi a le tagata e taofi ai e masani lava ona le ausia. O le asō, o le a tatou suesue ai pe faapefea ona taofi mau le faamanuia a le Atua. 

O le mea muamua e tatau ona faia, ia tumau le fesootai ma le o lo’o aumai ai le faamanuia, o le Atua. E tumau le fua fetiitii o le lala pe afai e pipii pea I le vine, ma e mautinoa e le toe fua pe a oo ina vavaeeseina mai le vine. O Iesu o le vine moni ma o I tatou o ona soo, o lala. E le mafai ona tatou faia se mea e aunoa ma ia (Ioane 15:5). 

Lona lua, o le tapulaa e mafai ona fesootai ai pea ma le punaoa o le faamanuia, e tatau ona ola faapaiaina. E mafai e le agasala ona vavaeeseina le tagata agasala mai le Atua (Isaia 59:2). Afai e le faafofoga le Atua I se tagata agasala, e faapefea I lea tagata ona maua ma taofi mau I se faamanuiaga mai le Atua? Na fetalai le Atua ia Aperaamo e faatatau I lenei mea lilo I le Kenese 22:17o le mea lea ‘ou te matuā fa‘amanuia ai ‘iā te oe, ma ou matuā fa‘ato‘ateleina lava lau fānau e pei o fetū o le lagi e pei o le oneone fo‘i i le matāfaga; e maua fo‘i e lau fānau faitoto‘a o ē ita ‘iā i latou.

E tusa ma le tatou faitauga o le Tusi Paia o le aso, ina ua maea ona faamaloloina e Iesu le tamaloa na ma’i mo le 38 tausaga, na ia lapatai ia  te ia ia taumamao ma le agasala ina ia aua nei oo atu o ia I se tulaga e sili atu le leaga. 

Mulimuli, e tatau ona e faafoi pea le viiga ma le faafetai I le Atua ona o ia na foai atu mea um aua e maua. Mo se faataitaiga, sa lei manatu pe faailoa e Nepukanesa o le Atua na avatu ai mea uma ma na ia leiloa uma. Peitai, ina ua maea ona tautau e Nepukanesa o le Atua na foai atu mea uma ia te ia, na toe faafoi uma iai e le Atua (Tanielu 4:30-37). 

O la’u tatalo ia aua lava nei leiloa au faamanuiaga na maua mai le Atua I le suafa o Iesu. 

Tatalo, 

Tama, faafetai o oe lava o le puna o faamanuiaga. Faamolemole, ia aua lava nei vavaeeseina a’u mai ia te oe, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LULU 5 IULAI 2023

Manatu Autu:  Faamanuia a le Atua 1 (Divine blessings 1)

Tauloto – Tusi Paia: Faataoto 10:22 ‘‘O le fa‘amanuia a le ALI‘I, o lea e fa‘atamao‘āiga ai; na te lē fa‘aopoopo i ai se tigā..”

Faitauga - Tusi Paia: Kenese 26:12-17

Upu Folafola

O le faamanuia a le Atua e mafai ona faamatalaina o se poloaiga mai le Atua e usitai uma iai malosiaga I le lagi, le lalolagi ma lalo o le lalolagi ina ia avatu le alofa faapitoa I se tagata po’o se vaega o tagata. O se tagata po’o se vaega o tagata e maua le faamanuia a le Atua, e manuia mea latou te faia I vaega o le olaga e matua le mafai ona manuia ai le toatele. Mo se faataitaiga, I le tatou faitauga o le Tusi Paia mo le aso, na lulu Isaako I le taimi o le oge tele ae na ia maua fua e tasi selau. I nisi faaupuga, sa manuia o ia I vaega o lo’o matua le manuia ai isi tagata. E mafai ona tatou fesootai lenei manuia o Isaako I faamanuiaga na tuuina atu e le Atua ia Aperaamo, lona tama I le Kenese 22:17

o le mea lea ‘ou te matuā fa‘amanuia ai ‘iā te oe, ma ou matuā fa‘ato‘ateleina lava lau fānau e pei o fetū o le lagi e pei o le oneone fo‘i i le matāfaga; e maua fo‘i e lau fānau faitoto‘a o ē ita ‘iā i latou.

Na folafola e le Atua e na te faamanuia ia Aperaamo ma faatoateleina lana fanau ina ua manumalo I le tofotofoina o lona faatuatua I le Kenese 22. Leitioa a lulu ma selesele Isaako ma le manuia I fua e tai selau I le taimi o le oge. 

Ae na iai foi le matafaioi na manaomia ona faia e Isaako ina ia maua ma faamalosia le faataunuuina o le faamanuia a le Atua I lona olaga. Muamua, e tatau ona  usitai I lona tama tusa pe o’o I le oti. Sa ono mafai ona sola ese Isaako mai ia Aperaamo ina ua tuuina atu o ia e lona tama I luga o le fata faitaulaga, peitai e leai. E mautinoa na faafiafiaina ai le Atua. Lona lua, na ia usitai I le faatonuga a le Atua e nofo ai pea I Kira tusa pe e le talafeagai I le vaaiga faaletagata, ona o le oge. 

E na o I latou e usitai I faatonuga a le Atua e mafai ona latou maua faamanuiaga mai le Atua. O Maria le tina o lo tatou Alii o Iesu Keriso, na ia fai atu I taupou, ia faia so’o se mea e fai mai ai Iesu, ma o lo latou usitai na oo atu ai I le faamanuia a le Atua I le maua o uaina lelei mo malo I le faaipoipoga (Ioane 2:5-10). 

Le au pele, o faamanuiaga mai le Atua e suamalie, e lelei ma e leai se faanoanoaga ma se tiga. Lafoai lou ola ia Iesu Keriso, ola I le usitai I le Atua ona e maua lea o faamanuiaga mai le Atua I so’o se vaega o lou olaga, I le suafa o Iesu.

Tatalo

Tama, faamolemole ia e faamanuia mai ia te a’u ma aveese mamao le amioleaga mai ia te a’u. 

OPEN HEAVENS

MATALA LE LAGI MO LE ASO LUA 4 IULAI 2023

Manatu Autu:  Fesoasoani mai le Atua 3 (Divine help 3)

Tauloto – Tusi Paia: 1 Tupu 19:5 ‘‘Ua ta‘oto ia, ‘ua moe i lalo ifo o le ratami, fa‘auta mai, o le agelu ‘ua pa‘i mai ‘iā te ia ma fai mai ‘iā te ia, “‘Inā tu ia i luga, ‘inā ‘ai.”

Faitauga - Tusi Paia: 1 Tupu 19:1-8

Upu Folafola

Fai mai le Faaaliga 4:11 “Lo matou Ali‘i e, ma lo matou Atua e tatau lava oe ‘ina ‘ia tu‘u atu ‘iā te oe le vi‘iga, ma le fa‘ane‘ene‘ega ma le mana. Auā na e faia mea uma lava, ‘ona o lou finagalo fo‘i e i ai i latou ma ‘ua faia.”

O le fuaitau o le Tusi Paia o lo’o taua I luga o loo faapea mai, na faia mea uma mo le finagalo o le na faia. Mo se faataitaiga I le faitauga o le Tusi Paia mo le aso, ua tatou vaaia ai le fafagaina e le Atua o Elia ina ia maua lona malosi e faatino ai le misiona mai leAtua ua atofaina mo ia. Na faapea mai le agelu a le Atua ia te ia “‘Inā tu ia i luga, ‘inā ‘ai, auā e mamao le ala”. O le meaai lea na maua ai lona malosi mo le fasefulu ao ma le fasefulu po ao malaga atu I Horepa, le mauga o le Atua (1 Tupu 19:7-8). 

Ae toatele tagata e mananao I le fesoasoani faaleAtua ona o le manatu faapito iai latou lava. O nisi oi latou e lei faaolaina, peitai o lo’o latou saili I ni vavega. E leiloa e nei tagata, o le Atua Silisili ese, e silasila I vaega e faatupuina lona malo, e le taitai ona ia galue I ni galuega e ono gau ma le siitia ai lona malo. Mo se faataitaiga, na manaomia e le Atua se perofeta, ma ina ua ole atu Hana mo se tamaitiiti ma folafola e na te toe foai atu ia te ia, na foai  e le Alii ia te ia (1 Samuelu 1). 

Na fetalai Iesu I le Mataio 7:6 “‘Aua tou te avatu le mea pa‘ia i ta‘ifau; ‘aua fo‘i tou te lafo a ‘outou penina i luma o pua‘a, ne‘i latou soli ai i o latou vae, ma liliu mai, i le saeia ai ‘outou”.

O le fuaitau o loo taua I luga o loo atagia ai, e le avatua e le Atua se mea paia i se tagata o lo’o ola I le agasala. E le mafai ona e tumau I le malo o le pogisa pe taalo foi I le agasala ao oe o se kerisiano, ma e manatu e fesoasoani le Atua ia te oe. 

Le au pele e, afai e te naunau I le fesoasoani faale Atua, lafoai lou ola ia Iesu Keriso ma e filiga e faia mea uma e fiafia ma finagalo iai le Atua. Ia e faamaoni e faaali ma avatu le viiga I Le na valaau ia te oe mai le pogisa ma aumai I lona malamala (1 Peteru 2:9) ona ia fesoasoani lea ia te oe. 

Amata ona e faia mea e avatu ai I le Atua le viiga, le faane’ene’ega, le mamalu ma faafiafia I lona finagalo, e amata atu nei, ona e maua lea o le fesoasoani mai le Atua, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO GAFUA 3 IULAI 2023

Manatu Autu:  Fesoasoani mai le Atua 2 (Divine help 2)

Tauloto – Tusi Paia: Mataio 15:28 ‘‘Ona tali atu ai lea o Iesu, ‘ua fa‘apea atu ‘iā te ia, “Funa e, ‘ua tele lou fa‘atuatua; e pei o lou mana‘o, ‘ia fa‘apea lava ‘ona faia ‘ia te oe.” ‘Ona mālōlō ai lea o lana tama teine i lea lava itū aso.”

Faitauga - Tusi Paia: Mataio 15:22-28

Upu Folafola

O le fesoasoani fa’a le Atua e faamafanafana ma e faamalosiau. Peitai ane e le mo tagata uma. Seiloga lava o le Atua o lou tama, ona mafai lea ona e maua le fesoasoani fa’ale Atua. I le tatou faitauga o le Tusi Paia o le aso, na faapea atu le Atua I le fafine na saili fesoasoani atu ia te ia, o le faamalologa e agavaa iai na o le fanau a le Atua ma e le agavaa iai o ia. Peitai o lona faatuatua ia Iesu Keriso na mafai ai ona agavaa o ia. 

O lona uiga, e tatau ona e fesili ia te oe I lenei: ‘o a’u ea o se afafine po’o se atalii o le Atua?’ Ua lafoai ea mea uma I lo’u Alii o Iesu? O le tuuina atu o lou faatuatua atoatoa ia Iesu ma lafoai lou ola ia te ia e pau lea o le auala e te maua ai le fesoasoani fa’a leAtua (Ioane 14:6).   

O leisi vaega taua e manaomia e maua ai le fesoasoani faaleAtua, o lou iloa lelei lea o le mea o lo’o e manaomia ai le fesoasoani. O le fafine I le tatou faitauga o le Tusi Paia na matua manino I lona manaoga, ma na ia maua auā sa filiga ma finau pea mo lana talosaga faatasi ma le faatuatua ia Keriso Iesu. O Patimaio o se faataitaiga lelei o se tagata na manino lelei I le mea sa naunau e faia e le Atua mo ia ma na ia maua le fesoasoani faale Atua na ia sailia (Mareko 10:46-52). 

E taua tele le iloa po’o fea e saili fesoasoani iai. Le au pele e, o fea o e saili fesoasoani iai? E tele tagata e saili fesoasoani mai so’o se vaega, o tagata, o vaitafe, o mauga ma faapena. O so’o se tagata o saili fesoasoani mai isi vaega e ese mai le Atua Silisili ese e faateleina lo latou faanoanoaga e pei ona tusia I le Salamo 16:4. 

E mafai ona e faapea mai, ‘E faapefea ona ou sailia le fesoasoani faale Atua? Na fetalai Iesu, ‘ia outou ole atu ona foaina mai lea’ (Mataio 7:7). Afai e te ole atu I le Alii mo se fesoasoani, aua e te ole atu I mea ua maea ona ia faaaupegaina ia tatou e faia. Mo se faataitaiga, afai e foai atu e le Atua se galuega ia te oe, ‘aua na o le moe ma le manatu e faia e ia o mo oe. Peitai e tele ma anoano mea e le mafai I le malosi o le tagata ona faia ma o le talalelei lenei, e leai se mea e sili atu ona tele e le mafai e le Atua ona faia. Ole atu I le Atua mo lana fesoasoani mo mea e le mafai ese tagata ona faia mo oe. Mo se faataitaiga, e mafai e le Atua ona foai se masaga pepe I se fafine ua leai sona toala fanau. O le tautinoga lena a se tina I ni tausaga talu ai ma ou te tatalo e mafai foi ona e mauaina se tautinoga faapena, I le suafa o Iesu. 

Le au pele e, afai e lafoai atoatoa lou ola ia Iesu Keriso, e valaaulia mai oe e te ole atu mo so’o se mea I le faatuatua ona ia faia lea mo oe e tusa ma lona finagalo. Afai o le Atua o lou tama moni, ole atu loa ia te ia I le aso mo mea e na o ia e mafaia ona faia, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO SA 2 IULAI 2023

Manatu Autu:  Fesoasoani mai le Atua 1 (Divine help 1)

Tauloto – Tusi Paia: Salamo 121:2 ‘‘O lo‘u fesoasoani mai i le ALI‘I lea, o lē na faia le lagi ‘atoa ma le lalolagi.”

Faitauga - Tusi Paia: Salamo 121:1-8

Upu Folafola

O le ituaiga fesoasoani e mafai ona ofoina atu e so’o se tasi e fua i le malosi o lea uso po’o lona mafai. E leai se tasi e mafai ona ia avatu se mea e lē o iā te ia. O le pogai lea tatou te manaomia uma ai le fesoasoani fa’a le Atua aua e mai i le Atua e leai se mea e mativa ai, o ia fo’i e ona mea uma lava. Na silafia e Tavita lenei mealilo ma ia tusia ai le Salamo ua avea o se vaega o le tatou tusi faitau o le asō. Fai mai Tavita i le Salamo 121:1-2 “E fa’asaga a’e o’u mata i mauga e maua mai ai lo’u fesoasoani. O lo’u fesoasoani e mai le Alii ia o lē na faia le lagi ma le lalolagi.”

O sitepu nei e ao ona tatou fai e mautinoa ai lo tatou maua o le fesoasoani mai le Atua.

Muamua ia tatou mātata’u ma faamoemoe I le e ana le mana lē fa’atuaoia e fesoasoani mai. Fai mai le Salamo 37:39-40 “O loo mai le Alii le faaolataga o e amiotonu, o ia lava lo latou malosi i ona po o le puapuagā. E fesoasoani fo’i le Alii ma lavea’i iā te i latou auā ua latou faatuatua iā te ia. “

Lona lua ia tatou tausi tulafono a le Alii. Ua faapea mai le Salamo 119:145-146 “ Ua ou valaau atu iā te oe ma le loto atoa; le Alii e, ia e tali mai ia te a’u, ou te anaana lava i au tulafono. Ua ou valaau iā te oe ia e fa’aola mai ia te a’u ona ou tausi lea I au tulafono.” Pagā lea o le toatele o nisi e fai mai o i latou o Kerisiano, e matua’i lē fia faalogo lava I se vaega e tā’ua ai le tulafono a le Atua ae faamoemoe I le alofa tunoa ae fai pea le amioleaga. E lē o le finagalo lea o le Atua.

O le ala lona tolu mo i latou e manana’o I le fesoasoani fa’ale Atua o le valaau I le Alii mo le fesoasoani mana’omia. Fai mai le Tusi Paia I le Esoto 20:3 “Aua ne’i fai mo oe ni atua ese i o’u luma.” O lou faamuamua o se tasi po’o se isi lava mea e ese mai le Atua o le ifo i tupua lava lea. O se tulaga mata’utia lea aua o lo tatou Atua o le Atua fuā. (Esoto 20:5) O le mea moni, ua tatou agasala i lo tatou faatuatua i le tagata e gata lona malosi ma lona iloa ae lē faamoemoe i le Atua Silisili ese e leai se mea na te lē mafaia. Fai mai le Isaia 31:1

1‘Oi talofa i ē ō ifo i Aikupito e sā‘ili ai le fesoasoani; ma latou fa‘alagolago i solofanua ma latou fa‘atuatua i kariota, auā e tele ia; ‘ua fa‘atuatua fo‘i i ē ti‘eti‘e i solofanua, auā e matuā malolosi i latou; a ‘ua latou lē fa‘alagolago i le Pa‘ia o Isaraelu ma latou le sā‘ili‘ili i le ALI‘I. 

Le au pele e, ou te fa’amalosiau ia te oe e tu’u lou ola Iā Iesu, ola amiotonu ma faamoemoe i le Atua ua na o ia lou fesoasoani. Na te lē tu’u lafoa’i iā te oe. I le suafa o Iesu Keriso, Amene.