Samoan Devotional

 OPEN HEAVENS

MATALA LE LAGI MO LE ASO GAFUA 31 IULAI 2023

Manatu Autu: Manumalo I tu’inanau ma le faaosoosoga (Overcoming lusts and temptations)

Tauloto – Tusi Paia: 1 Tesalonia 5:22 “Ia mamao ‘outou ma mea leaga ‘ese‘ese uma lava”

Faitauga - Tusi Paia: 1 Korinito 10:13

Upu Folafola

O le a se mea o lo’o taitaiina oe I le olaga nei? O lou tino ea poo le Agaga o le Atua? So’o se taimi e te faatagaina le tino e taitaia oe, e i’u lava I le leaga, ae a faataga Agaga Paia e taitaia oe I mea uma, e mautinoa e i’u I le lelei ma le manuia. O le laasaga muamua o le manumalo I le tuinanau ma le faaosoosoga o le gaua’i I le Atua, e auina mai ai le mana e manaomia e tetee ai I le tiapolo, ona ia sola ese lea ma oe e tusa ma le Iakopo 4:7. O le isi talalelei lenei, o le faamaoni o le Atua e le faatagaina ai lana fanau e tofotofoina e sili atu I lo latou malosi e lavatia ai e aunoa ma le saunia o le auala e sao ai. 

I le tatou faitauga o le Tusi Paia o le aso, ua tatou iloa ai e fa‘amaoni le Atua, o lē na te lē tu‘uina atu ‘outou i le tofotofoga e sili i se mea ‘ua ‘outou lavātia, ‘ae sauni fo‘i fa‘atasi ma le tofotofoga se mea e sao ai, ‘ina ‘ia ‘outou lavā ‘o‘ono. O se tulaga lelei tele. O le mafuaaga tonu lea o loo lapatai mai ai Iakopo 1:2-4,12 ia tatou faitauina I le fiafia ma o se faamanuiaga pe a tofotofoina I tatou. Aua foi e faaaogaina e le Atua e faaatoatoa ai le onosai o lana fanau, po’o se suega foi e siitia ai le tulaga ma maua le pale o le ola. 

E ui I lenei faamalosiau mo se faataitaiga, o loo naunau pea o tatou mata I ata faatosina I luga o le tv, o upega tafailagi ma lo tatou siosiomaga, e avea ma tulaga e fafagaina pea le tuinanau o le tino e taitaiina ai I seoli. Aua nei e toilalo ai. Afai e te faatagaina le tuinanau leaga e tupu I lou loto, e le mafai ona tupu manatu mai le lagi, o le tofa mamao, tofa manino ma ni manatu lelei mai ia te oe. 

O tagata faatuatua uma e manaomia le tuuina atu o latou tino o le taulaga ola, e paia ma talia e le Atua. O lou tino o le malumalu o le Atua, e le o se tino e faalialia I tagata. Afai e te laei I ofu e faatupuina le tuinanau I le isi itupa, e le tatau ona ta’ua oe o se afafine po’o se atalii o le Atua, ae o se auupega I le lima o le tiapolo. Po’o ai lava e ave iai lau faaaloalo e ala I ou laei, e iloa ai lē e te auauna iai ma le faamaoni. Ua saunia e le Atua mea uma e tatou te manaomia e manumalo ai I le tuinanau ma faaosoosoga e ala ia Iesu Keriso, pau le mea e tatau ona e faia o le mulimuli I ana faataitaiga. Fai mai le Eperu 4:15 o Iesu o lo tatou ositaulaga sili ma na tofotofoina o ia I mea uma, ae na ia manumalo I itu uma e aunoa ma le agasala. Ua ia foai iai tatou le mana e tetee ai I le tiapolo ae ola ma soifua I se olaga e sili atu I le tuinanau ma faaosoosoga. Aleluia!

Tatalo

Tama, faamolemole aumai le mana ia te au e manumalo ai I le tuinanau ma faaosoosoga, I le suafa o Iesu Keriso, Amene.  

OPEN HEAVENS

MATALA LE LAGI MO LE ASO SA 30 IULAI 2023

Manatu Autu: Tu’inanau ma le faaosoosoga ( Lust versus temptation)

Tauloto – Tusi Paia: Iakopo 1:15 “Pe a tō le tu‘inanau ‘ona fānau mai ai lea o le agasala; a matua le agasala ‘ona fānaua mai ai lea o le oti”.

Faitauga - Tusi Paia: Iakopo 1:12-15

Upu Folafola

O le faaosoosoga o le malosiaga e tuleia se tasi e fai amioga e mafai ona ta’ita’ia ese le tagata mai le Atua ma fai le agasala. O loo faamanino mai i le Tusi Paia o tagata uma e faaosoosoina peita’i o le manumalō ma le toilalo I le faaosoosoga e fua i le mafaufau o le tagata ma lona alofa i le Atua. O le isi itu, o le tu’inanau o se lagona e tosina e naunau I le faitaaga, mea tausami, tamāoaiga po’o le malosi. O le tuinanau o se lagona masani i e lē faaolaina, (2 Peteru 2:14-18) a’o kerisiano e tatau ona tete’e atu i le tuinanau e ala i le pulea o latou loto. (Kalatia 5:16-21). E fa’asāina i le Tusi Paia le tuinanau ma fa’amatalaina o se mea e inosia e le Atua. O se fa’ata’ita’iga faigofie o se naunautaiga lē talafeagai o le mana’o na faaosoosoina ai Atamu ma Eva e aai i le fua o le laau na fa’asāina.(Kenese 3:6). 

O le tuinanau ma faaosoosoga e pei se ‘autau siamupini - e lelei tele le la galulue faatasi vavalalata e faigata na iloa so la eseesega. O le mana’o i tulaga tofi ma tulaga maualuga, a lē ta’ita’ia e Agaga Paia e ono avea ma auala sesē e saili ai le malosi ma le pule ma avea ai nisi ma fasioti tagata. O nisi o ta’ita’i fa’alemalō latou te faia nei faiga palapalā ma a o’o ifo le faamasinoga a le Atua ia I latou ona latou faapea mai lea o galuega a le tiapolo. Na amata le faaosoosoina o Tavita, I lona mana’o tau lava o lona mafuta atu iā Patisepa le toalua o Uria, peita’i na i’u I le fasiotia o Uria ma o’o mai ai fetu’u I le aiga o Tavita.

Le au pele e, o le a se mea o tuinanau I ai lou loto? Salamō nei loa i le asō auā e oona ma tigā le taunuuga, e i’u i le agasala ma le oti. Fai mai le Iakopo 1:13-15 “ A fa’aosoosoina se tasi, aua le faapea , “ Ua fa’aosoosoina a’u mai le Atua,” auā e lē mafai ona faaosoosoina o le Atua i mea leaga, e lē fa’aosooso atu fo’i o ia i se tasi; a ua ta’itasi ma fa’aosoosoina, pe a tosina ma maileia i lona lava tu’inanau. Pe a to le tu’inanau ona fanau mai ai lea o le agasala; a matua le agasala ona fanaua mai ai lea o le oti.”

O le Upu mai le Tusi Paia ua taua i luga ua faamalamalama atili mai ai aafiaga o le tuinanau ma le faaosoosoga. E le faaosoosoina e le Atua le tagata. E tupu le faaosoosoga I le tagata pe a tosina lona loto I le tuinanau ma toilalo ai. O lenei o le tuinanau e tupu ai le agasala e o’o mai ai le oti. Ou te tatalo mo oe I le asō, aua ne’i faaleagaina oe ma tuulafoaiina pe oti fo’i ona o le tuinanau.

Tatalo

Tamā faamolemole fa’asa’oloto a’u mai le malosi o le tu’inanau ma faaosoosoga i le suafa o Iesu Keriso, Amene.

OPEN HEAVENS

MATALA LE LAGI MO LE ASO TOONAI 29 IULAI 2023

Manatu Autu: O le Paia o le Toto – (The Sacredness of the Blood)

Tauloto – Tusi Paia: Levitiko 17:11 “Auā o i le toto le ola o le tino; ‘ua ‘ou tu‘uina atu ai fo‘i ‘iā te ‘outou e fai a‘i le togiola mo ‘outou i luga o le fatafaitaulaga; auā o le toto o le mea lava lea e fai a‘i le togiola mo le tagata.

Faitauga - Tusi Paia: Eperu 12:22-24

Upu Folafola

O le toto e le gata e taua i le soifua o le tagata, ae paia i le silafaga a le na faia i tatou, le Atua Silisiliese. O le Paia o le toto ua fai mai ai le Tusi Paia i le Kenese 9:6 “O se na te faamaligiina le toto o le tagata, e faamaligiina lona lava toto e le tagata; auā o le faatusa o le Atua na fai ai e ia le tagata.” O le taimi muamua na tatou iloa ai le to’atāma’i o le Atua i se tasi na faamaligiina le toto o se isi uso o loo i le Kenese 4, ina ua fasiotia e Kaino lona uso o Apelu. Na fetalai le Atua Silisiliese; “Se a le mea ua e faia? O loo alaga mai iā te a’u mai le eleele le leo o le toto o lou uso. O lenei, ua malaia oe mai le eleele, ua faamaga mai lona gutu e tali a’i le toto o lou uso mai lou lima.” (Kenese 4:10-11)

O le Paia o le toto e mafai ona tatou iloa ma vaaia i le tatou Upu tauloto o le asō. “Auā o i le toto le ola o le tino, o le ala fo’i lea ua faamamāina ai tatou i le toto o Iesu ma faamagaloina ai a tatou agasala ma fa’asa’olotoina ai i tatou mai le fa’afanoga o loo faatali mai mo e agasala uma.

O le toatele o tagata e matua’i leai ma se faaaloalo I le Paia o le toto. Toatele ua auai pe lagolago ina fo’i le faatino o le aveese o pepe pe faamuta maitaga e lē manana’o ai, o le fasioti tagata ma isi. O nisi ua fai tala pepelo ma i’u ina maimau ai ola o isi. O nisi ua fa’aaogā sesē pe gaoi fo’i tupe sa tatau ona fausia lelei ai auala ma falema’i, ma tutupu ai lea o faalavelave tugā tau taavale ma maliliu ai tagata ona o le leaga o auala ma falema’i ma le auaunaga o le soifua maloloina ona ua lē lava tupe o le galuega. O e soli tulafono ua faamaligi toto e aunoa ma se mata’u I le Atua Silisiliese.

Le au pele e, o e agasala ea I le toto? E tatau ona e salamō i le asō auā o le toto e mamala ma e lē fa’asaoina e le Atua i latou o e lē salamō i le faamaligi toto. O le tala lelei lenei o Iesu Keriso lo tatou Fa’aola ua uma ona ia totogi le tau mo a tatou agasala uma, e aofia ai ma e faamaligi toto e pei ona fai mai ai le tatou Tusi Paia faitau o le asō. O le taimi lava e ta’utino ai le tagata o Iesu Keriso na maliu mo ana agasala ma toetū mai ina ia tatou maua le ola e faavavau, o le taimi fo’i lea faaolaina ai le uso mai agasala uma na ia faia e o’o fo’i i le faamaligi toto.

Talia ne’i Iesu e avea ma ou Alii ma ou Fa’aola ona faamagaloina lea o au agasala uma. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 28 IULAI 2023

Manatu Autu:  O e saili I le Atua 2(God seekers 2)

Tauloto – Tusi Paia: Eperu 11:6 “A leai fo‘i se fa‘atuatua e lē mafai ‘ona fiafia mai o ia; auā e tatau i lē alu atu i le Atua ‘ona talitonu o lo‘o soifua o ia, o ia fo‘i na te tauia mai o ē matuā sā‘ili ‘iā te ia..”

Faitauga - Tusi Paia: Ioane 12:20-22

Upu Folafola

O ananafi na tatou talanoa ai ini auala se tolu e tatou te saili ai I le Atua, e ala lea I lana upu, o tatou loto ma le usitai I lona finagalo. O le aso, o le a faaauau pea ona tatou suesue I auala tatou te saili ai I le Atua ma vaavaai I faamanuiaga mo I latou e saili ia te ia. E mafai ona tatou saili ma maua le Atua I le faatuatua. Fai mai le Eperu 11:6A leai fo‘i se fa‘atuatua e lē mafai ‘ona fiafia mai o ia; auā e tatau i lē alu atu i le Atua ‘ona talitonu o lo‘o soifua o ia, o ia fo‘i na te tauia mai o ē matuā sā‘ili ‘iā te ia. 

E manaomia le faatuatua e maua ai le Atua aua o ia o le Agaga. E le mafai ona iloa I o tatou mata ae e mafai ona tatou tapuai ia te ia i le agaga ma le faamaoni (Ioane 4:23). O lo’o taua e le Tusi Paia se tasi o tulaga pito taua I le olaga o le fanauga a Isaraelu: “Na ia fa‘ailoa ona ala ‘iā Mose, o ana galuega i le fānauga a Isaraelu” (Salamo 103:7). O lo’o faaalia ai, na silafia e Mose ala o le Atua, ae na mulimuli le fanauga a Isaraelu ia Mose sa taitaia I latou I le tele o vavega na faia e le Atua. O lona uiga sa matua loloto le mafutaga a Mose ma le Atua, ae matua papau lava le fanauga a Isaraelu ma sa faigofie ona luluina I latou I tele o luitau na feagai ai ao agai atu I le nuu o le folafolaga. Na talitonu Mose I le Upu a le Atua ae o le fanauga a Isaraelu na taitaia I mea ua latou vaai iai. O le tulaga lea na tele ai ina tomumu pe a fetaiai ma puapuaga I le vao. Na matua latou  teena le Atua I mea faigata uma na ui ai. O I latou e saili I le Atua e latou te su’e nisi ala faaopoopo ina ia latou maua le Atua. I le faitauga o le Tusi Paia o le aso, ua tatou faitau ai I le au Eleni na latou talitonu I le talalelei ia Iesu keriso. Na latou o mai e fia maua se feiloaiga ma Iesu. 

Le au pele e, o ai o lo’o e sailia I le Lotu? o le faifeau, taitai pese, o ai? Ou te faamalo ia te oe pe afai o lo’o e saili I le Atua e ala ia Iesu Keriso. E le taitai ona faamāina I latou e saili I le Atua. O loo faamatala mai e le Tusi Paia o I latou e saili I le Atua e puipuia I latou mai le faamāina. E lē mamā i latou i le aso vale; e mā‘o‘ona fo‘i i latou i ona po e i ai le oge (Salamo 37:19).

Ao tatou savalivali atu I le afa mulimuli o lenei Tausaga 2023, saili I le Alii ia vave ona faia ona e maua lea o ia, e matautia o ia e faaolaina oe, e matautia e faamanuia ia te oe ma matautia e avatu ia te oe le ola. 

Tatalo

Tama, ou te faafetai ia te oe mo le faaaliga ia te au. Ia aua nei toe avea le agasala e faalafi mai a’u ia te oe, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO TOFI 27 IULAI 2023

Manatu Autu:  O e saili I le Atua 1(God seekers 1)

Tauloto – Tusi Paia: Salamo 42:1 “Le Atua e, e fa‘apei ‘ona naunau o le ‘aila i vaitafe, o lo‘o fa‘apea ‘ona naunau o lo‘u agaga ‘iā te oe.”

Faitauga - Tusi Paia: Salamo 42:1-5

Upu Folafola

O e saili I le Atua o I latou e mafanafana I ana poloaiga. Ua le toe saili tagata I le Atua I nei aso, e le faapea o pogisa I latou I faamanuiaga e maua mai I Lē o le puna o faamanuiaga. Ae ona e le faigofie iai latou le faia o poloaiga a le Atua aua o loo manatu pea I a latou aia tatau e filifili ai I le ituaiga olaga e soifua ai. Afai tatou te le saili I le Atua, e leaga ai lava I tatou ae le o le Atua. 

O Tavita I la tatou faitauga o le Tusi Paia o le aso, sa ia faailoa mai le mafuaaga e naunau ai e saili I le Atua ina ua ia fai mai: auā ‘ou te toe vivi‘i ‘iā te ia, ‘ona o le fa‘aolataga mai ona luma (Salamo 42:5). Na ia faapea mai foi: 

E fa‘asaga a‘e o‘u mata i mauga, e o‘o mai ai lo‘u fesoasoani. 2O lo‘u fesoasoani mai i le ALI‘I lea, o lē na faia le lagi ‘atoa ma le lalolagi (Salamo 121:1-2). Le au pele e, e iai le tau e totogi I le saili I le Atua, O lo’o faamalosiau mai le Isaia 55:6 ia tatou faia semanu o maua o ia. O lona uiga e o’o mai le taimi e saili atu ai le tagata I le Atua a ua le toe maua o ia. 

O le mea lea e tatalo atu ai ‘iā te oe, o ē amio Atua uma lava, i ona po e maua ai oe; e moni, e lē o‘o ‘iā te i latou tāfega o vai e tele Salamo 32:6.

E faapefea ona tatou saili I le Atua? E mafai ona saili I le Atua e ala I le Upu Moni, le Tusi Paia. Afai tatou te suesue I le upu a le Atua ma le filiga, o lo’o tatou saili I le Atua aua o Iesu Keriso o le Upu a le Atua ma o ia foi o le Atua (Ioane 1:1). E tatau foi ona tatou saili I le Atua ma le loto atoa ona tatou maua ai lea (Ieremia 29:13). 

E tatou saili foi I le Atua I le vaavaai lea I auala e faafiafia ai ia te ia. Na fetalai Iesu o I tatou o ona so’o pe afai tatou te usitaia ana poloaiga. E toa fia tagata e fai mai o i latou o kerisiano o lo’o latou faia le finagalo o le Atua? 

O lo’o folafola e le Atua, afai tatou te saili ia te ia ma o tatou loto atoa, e tatou te maua o ia. Ia e filiga e saili I le Atua I le aso ma lou loto atoa ona e maua lea o ia. 

Tatalo

Tama, faamolemole ia e faailoa mai ia te au a’o ‘ou saili atu  ia te oe ma le filiga, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LULU 26 IULAI 2023

Manatu Autu:  Matau I le Atua 2(Fear God 2)

Tauloto – Tusi Paia: Salamo 33:18 “Fa‘auta, o lo‘o silasila le ALI‘I i ē matata‘u ‘iā te ia, o ē fa‘amoemoe i lona alofa;..”

Faitauga - Tusi Paia: Salamo 96:1-9

Upu Folafola

Na amata ananafi ona tatou talanoa I le matau I le Atua ma o le aso o le a tatou vaavaai I faamanuiaga e maua e I latou e matatau I le Atua. Fai mai le tatou tauloto mai le Tusi Paia o le aso:

Fa‘auta, o lo‘o silasila le ALI‘I i ē matata‘u ‘iā te ia, o ē fa‘amoemoe i lona alofa; Salamo 33:18

O lo’o faaalia I le fuaitau I luga faamanuiaga tele e maua I le matau I le Alii. O le faamanuiaga, o lo’o silasila le Alii I e matatau ia te ia. O lenei faaaliga o loo atagia ai le tele o taui o faamanuiaga, ma afai e silasila le Alii I se tagata, e mautinoa lona puipuiga. Fai mai le Eperu 11:6 e tauia e le Atua I latou e matua saili atu ia te ia. O lo’o faapea mai foi le Tusi Paia “O lo‘o i mea uma lava fofoga o le ALI‘I; o lo‘o matuā silasila i ē amio leaga ma ē amio lelei” Faataoto 15:3. I nisi faaupuga, o loo silasila le Alii I mea uma, e o’o I fuafuaga ma mailei a le fili ma e amioleaga o lo’o taupulepule e faao’olima ia te oe ma e na te silafia lelei le mea e faia iai latou. 

I le tatou faitauga mai le Tusi Paia o le aso, ua taitaiina I tatou ia matata’u I le Atua e sili atu I isi atua aua foi ua na o galuega a tagata ia mea (Salamo 96:4-5). Ia maitau lelei, o nisi tagata ua faia isi tagata ma o latou atua ona o le fefefe iai latou. Peitai ane, o loo faapea mai le Salamo 56:11‘Ua ‘ou fa‘atuatua i le Atua; ‘ou te lē fefe i se mea e faia e tagata ‘iā te a‘u. O loo faapea mai foi le Salamo 118:6 O lo‘o ‘iā te a‘u le ALI‘I; ‘ou te lē fefe; se a se mea e faia e tagata ‘iā te a‘u. Ua aoaoina I tatou e lo tatou Alii o Iesu Keriso ia tatou matatau I le Atua ae le o tagata. (Mataio 10:28). 

O leisi faamalamalamaina o le matau I le Atua o lo’’o I le fuaiupu e 9 o le faitauga o le Tusi Paia e faapea

 ‘Ia ‘outou ifo atu i le ALI‘I i le malumalu e matagofie; ‘ia ‘outou gatete i ona luma le lalolagi uma (Salamo 96:9). E leai se tapuaiga moni I le Atua e aunoa ma le ola faapaiaina. O le vaega tonu lava lea e tele ona misi ai e le toatele. O le usitai e uiga tutusa ma le faapaiaina ae o lo’o faapea mai le Tusi Paia e sili le usitai I lo le taulaga (1 Samuelu 15:22). O lona uiga e tatau ona tatou mataala ia faia le viiga tusa pe faia I le matau I le Alii pe na o le faafoliga foi. Afai e te tumau I le matau I le Alii I taimi uma, e le mafai ona tuua oe e le Alii, I le suafa o Iesu. 

Tatalo

Tama, faamolemole ia e faatumau lo’u matau ia te oe ma ia e tatala mai taui o au faamanuiaga, I le suafa o Iesu Keriso, Amene.  

OPEN HEAVENS

MATALA LE LAGI MO LE ASO LUA 25 IULAI 2023

Manatu Autu:  Matau I le Atua 1(Fear God)

Tauloto – Tusi Paia: Faataoto 9:10 “O le mata‘u i le ALI‘I, o le amataga o le poto lea; ‘ia iloa fo‘i lē Pa‘ia, o le atamai lava lea..”

Faitauga - Tusi Paia: Salamo 34:1-11

Upu Folafola

O loo manino I le tauloto mai le Tusi Paia o le aso, le manaomia o le mata’u i le Atua pe a fia maua le atamai ma ia manino le olaga nei. O lo’o fesili le Alii: “E āva le atali‘i i lona tamā, e āva fo‘i le ‘au‘auna i lona ali‘i; ‘āfai o a‘u o le tamā, o ifea ni ‘ou āva?” (Malaki 1:6).  E faapefea ona tatou mata’u I le Alii? O le tusi faitau mai le Tusi Paia o le aso o loo momoli mai ai ni manatu i auala tatou te mata’u i le Atua silisili ‘ese. Muamua, e tatau ona tatou faafetai ma faaneenee I le Alii ona o ia o le Atua. Afai tatou te faafetaia ma faatauaina le Atua, ua tatou mata’u ia te ia. Fai mai le fai Salamo

Le ALI‘I e, lo matou Ali‘i, e silisili lava lou suafa i le lalolagi uma lava; o oe lava ‘ua e fa‘asilisili lou vi‘iga i le lagi. A ‘ou va‘ai atu i lou lagi, o le galuega a ou tamatama‘i lima, o le masina ‘atoa ma fetū na e faia; (Salamo 8:1,3).  

Lona lua, e manaomia ona tatou fa’atuatua ma le atoatoa ia te ia. O le le faatuatua ia te ia e ono tupu mai ai lo tatou le usita’i ia te ia, e pei o le mea na tupu ia Atamu ma Eva. Sa la folafola le faatonuga na fetalai ai le Atua iai la’ua, ae sa feliuaina e le gata lea fa’atonuga, ma ia ta’u pepelo ai le Atua. O lo’o ta’ua i le tusi o Kenese 3: 4-5 – “Ona fai mai lea o le gata i le fafine, Lua te le oti lava; aua ua silafia e le Atua, o aso lua te a’ai ai, e pupula ai o oulua mata; ona avea ai lea o oulua e pei ni atua o lo o iloa le lelei ma le leaga.” Ana iai le mata’u o le Atua ia Atamu ma Eva, se manu e le mafai e Satani ona sao atu i o la olaga. O lo’o tatou iloa ai, o le mata’u i le Atua, o le amataga lea o le poto (Faataoto 9:10). 

O Iosefa, o se isi lea fa’ataitaiga o le tagata na mata’u i le Atua. O lona mata’u i le Atua sa ia teena atu ai le mana’oga a le to’alua o lona pule e faia le mulilua. Sa matua teena e Iosefa e faia le agasala o le tino, ma sa ia faapea atu i le to’alua a Potifara: E leai se sili ‘iā te a‘u i le fale nei, ‘ua na lē tāofi sina mea ‘iā te a‘u, ‘ua na o oe, auā o oe lona faletua; pe fa‘apefea ‘ona ‘ou faia lenei mea leaga tele ma ‘ou agasala ai i le Atua?”(Kenese 39:9).  

Ia e mata’u i le Atua ma tausi ana tulafono. Aua afai e te faia, o le ituaiga fa’amanuiaga sa mauaina e Iosefa (Kenese 41:14) e fai foi mou tofi.  

Tatalo

Tama e, faamolemole fesoasoani mai ia ou matua mata’u ia te oe, ma ia faatumuina a’u i lou poto, i le suafa o Iesu Keriso, Amene.     

OPEN HEAVENS

MATALA LE LAGI MO LE ASO GAFUA 24 IULAI 2023

Manatu Autu:  O loo fetalai pea le Atua I ona tagata 2(God still speaks to His people 2)

Tauloto – Tusi Paia: Eperu 1:1 “O le Atua, na fetalai mai anamua i o tatou tamā e ala mai i perofeta, na auaua‘i mai i faiga ‘ese‘ese.”

Faitauga - Tusi Paia: Eperu 1:1-2

Upu Folafola

Na tatou talanoa ananafi e moni o lo’o fetalai pea le Atua I ona tagata e oo mai lava I le aso. I le faitauga mai le Tusi Paia o le aso, ua tatou faitau ai na fetalai le Atua I ona tagata e ala mai I ana perofeta, ae o le taimi nei, o lo’o fetalai mai e ala I lona atalii o Iesu Keriso. Ua faataunuuina e ala ia Agaga Paia, na auina mai e Iesu Keriso I lana Ekalesia na amata mai I le aso Penetekoso. Na ia folafola:

26A o le Fesoasoani, o le Agaga Pa‘ia lea, e ‘auina mai e le Tamā i lo‘u igoa o ia lava na te a‘oa‘o ‘iā te ‘outou i mea uma lava; e fa‘amanatu mai fo‘i e ia ‘iā te ‘outou i mea uma na ‘ou fai atu ai ‘iā te ‘outou Ioane 14:26.

O loo fetalai pea le Atua I ona tagata, e leai ma se faanunumi I lea tulaga. Ae tatau ona tatou maitau lelei le faaiuga o lenei fuaiupu, ‘I ona tagata’. O lona uiga e fetalai le Atua ua tau lava o ona tagata. Aisea e fetalai ai na o ona tagata? Aua foi na o ona tagata lava e faalogo ma usitai e faia ana poloaiga. E le faamaumauina le taimi o le Atua e talanoa ai I tagata e le faia lona finagalo. O le mafuaaga lea e fiafia ma masani Iesu e talanoa ai I lona au soo aua ua ia silafia e latou te faia lona finagalo. Na ia fetalai foi: 

21“O lē ‘ua ‘iā te ia a‘u poloa‘iga ma tausi i ai, o ia lea e alofa mai ‘iā te a‘u; o lē alofa mai fo‘i ‘iā te a‘u, e alofaina o ia e lo‘u Tamā; ‘ou te alofa fo‘i ‘iā te ia, ma ‘ou fa‘aali ‘iā te ia.” Ioane 14:21

Le au pele e, e tele faamanuiaga e maua e I latou e lagonaina ma faalogo i le siufofoga o le Atua. O se tasi o ia faamanuiaga e latou te iloa ona alo ese mai le faia o faaiuga sese. Mo se faataitaiga, o le upu a le Atua na momoli atu I le aiga o Konelio na tauala atu ina ua faalogo Peteru I le fetalaiga a le Atua ma ua usitaia e Konelio le faatonuga na avatu (Galuega 10). I le tulaga lava e tasi, o le mafai e Filipo ona faalogo I le siufofoga o le Atua na taitaiina ai o ia I le toafa I Kasa lea na manumaloina ai le agaga o le eunuka I Aitiope (Galuega 8:26-39).

O le isi faataitaiga, o le faalogo i le siufofoga o le Atua e faaalia mai ai le ituaiga pisinisi e te manuia ai. E fesoasoani foi ia te oe e te iloa ai le mea e te agai iai, o le nofoaga e nofo ai, ma le ituaiga o uo e tatau ona e taofiofi iai. Afai e te naunau e fetalai sa’o atu le Atua ia te oe, e tatau ona tuuina atu lou ola ia Keriso ma ia e ola atoatoa mo ia, I le suafa o Iesu Keriso, Amene.   

OPEN HEAVENS

MATALA LE LAGI MO LE ASO SA 23 IULAI 2023

Manatu Autu:  O loo fetalai pea le Atua I ona tagata 1(God still speaks to His people 1)

Tauloto – Tusi Paia: 1 Tupu 3:5 “Ua fa‘aali mai le ALI‘I ‘iā Solomona i le miti i le po i Kipeona ‘ua fetalai mai fo‘i le Atua, “‘Inā fai mai ia, pe se a se mea ‘ou te avatu ‘iā te oe?”.”

Faitauga - Tusi Paia: Kenese 12:1-4

Upu Folafola

O lo’o fetalai pea le Atua e o’o mai i le asō ae pagā lea e toatele tagata latou te le lagonaina lona siufofoga auā o loo pisi tele i mea e manana’o ai i o latou olaga. O le tulaga matūiā e lē o iloa e tagata le oloa tāua ua latou misia i lo latou lē faalogo i le siufofoga o lē na faia i latou. I le tatou tusi faitau mai le Tusi Paia o le asō, tatou te faitau ai i le fesāgaiga a Aperaamo ma le Atua.

“Ua fetalai mai le Alii iā Aperaamo, Ia tuua e oe o lou nu’u, ma tagata o lou nu’u ma le aiga o lou tamā, ae alu atu i se nuu ou te faasino atu ai ia te oe.” Kenese 12:1

E i ai ni lesona e mafai ona tatou a’oa’oina mai le fetalaiga lenei a le Atua, aua o lenei foi fesagaiga na suia ai le olaga o Aperaamo. Muamua, na silafia e le Atua le faamaoni o le alofa o Aperaamo na ia faailoa atu ai ia te ia. O le alofa lea o Aperaamo i le Atua na faaalia i lona usita’i ma lona gaua’i e faia le faatonuga a le Atua e tuua le aiga o lona tamā. O le isi lesona ua tatou maua mai le talanoaga a le Atua ma Aperaamo e lē gata o faatonuga ae faapea foi na i ai ma faamanuiaga. Fai mai le Tusi Paia, “ O lenei, e tupu le faatuatua i le taulogologo atu, o le taulogologo atu fo’i o i le afioga a le Atua ia.” (Roma 10:17). Na avea Aperaamo ma tamā o le au faatuatua auā na ia faataua le upu a le Atua i lona loto. I la tatou upu tauloto mai le Tusi Paia o le asō, ua tatou faitau ai i le fesagaiga a le Atua ma Solomona. Na foai e le Atua ia Solomona se faamanuiaga tatala e aunoa ma ni faamatalaga na tusia ai, ma o ituaiga faamanuiaga masani ia e maua e i latou e talanoa ma le Atua. “Ua faaali mai le Alii ia Solomona i le miti i le po i Kipeona; ua fetalai mai fo’i le Atua, Ina fai mai ia, pe se a se mea ou te avatua ia te oe?” (1Tupu 3:5)

Ina ia avea i tatou o se fanau usitai a le Atua, e tatau ona tatou tuu atoa o tatou loto i ana poloaiga. O le vaega lea e tele ina misi e le toatele o tagata, e usitai na o se vaega o poloaiga a le Atua ae le mafai ona usitai atoatoa i poloaiga uma. Ou te faamalosi ia te oe e tuu lou ola ia Iesu Keriso i le asō. Saili i ona fofoga e lē aunoa - e le gata i le mafutaga vavalalata ma ia, ae na te faailoa ia te oe mea lilo ma faaaliga e feliuaina ai lou olaga mo le manuia.

Tatalo

Tamā faamolemole fetalai mai ia te a’u i le asō ma aso uma lava. I le suafa o Iesu Keriso, Amene.

 OPEN HEAVENS

MATALA LE LAGI MO LE ASO TOONAI 22 IULAI 2023

Manatu Autu:  Alofa ma le amio Atua 2 (Love and Godliness 2)

Tauloto – Tusi Paia: 1 Ioane 4:8 “O sē lē alofa ‘ua lē iloa e ia le Atua; auā o le Atua, o le alofa lava ia.”

Faitauga - Tusi Paia: 1 Ioane 4:7-10

Upu Folafola

Fai mai le fuaiupu e 8 o le tatou tusi faitau, o le tatou Upu tauloto fo’i lea o le asō, “O se lē alofa ua lē iloa e ia le Atua; auā o le Atua, o le alofa lava ia.” (1 Ioane 4:8). Ua faamaonia mai foi e le fuaiupu lenei e le o tagata uma tatou te fetaui i le lotu e iloa le Atua, pe mafai fo’i ona e faamoemoe i ai. I le amataga o le Ekalesia, e le’i manatu māmā ta’ita’i i le mataupu o le alofa auā na latou iloa, e iloa le so’o amio Atua i le tele o lona alofa i le isi uso. Na tatalo le Aposetolo o Paulo faapea:

“ Ia faatele fo’i e le Alii, ma ia faasilisili ona tele o lo outou alofa, o le tasi i le tasi, atoa ma tagata uma, faapei o i matou nei lava ia te outou; ina ia fa’atumauina o outou loto e le mata’uleagaina i le amio lelei i luma o le Atua lo tatou Tamā, pe a afio mai lo tatou Alii o Iesu faatasi ma ona au paia uma.”

(1 Tesalonia 3:12-13)

O le alofa e amio Atua ai auā o le Atua o le alofa ia. O le alofa lea na ia auina mai ai lona alo pele e toatasi o se taulaga ola mo i tatou ina ia aua ne’i fano i tatou (Ioane 3:16 ma le 1 Ioane 4:9). O le faailoga lea ua faia e lo tatou Atua Silisiliese mo i latou uma e fai mai o fanau i latou a le Atua. O le alofa e faia ai e le tagata mea e sili atu e fesoasoani ai i isi. Na fiafia le finagalo o Iesu i le Samaria agalelei i le Luka 10: 33-37 auā o le faamaoniga o le afio o le Atua ia i tatou o lo tatou faia o mea lelei. Ua saunia e lo tatou Alii o Iesu Keriso le fa’ata’ita’iga mo i tatou e pei ona tusia i le Galuega 10:38; “O Iesu o le Nasareta, o le na fa’au’uina e le Atua i le Agaga Paia ma le mana, o ia sa femaliua’i ma agalelei ma fa’amalolo atu i e na faatoilaloina uma lava e le tiapolo; auā sa ia te ia le Atua.”

Na faamatala manino e le Aposetolo o Iakopo le alofa ina ua tusi faapea; A e fai mai se tasi, “o ia te oe le faatuatua, o ia te au foi galuega”; ia, ina faaali mai ia ia te au lou faatuatua e aunoa ma galuega; ou te faaali foi ia te oe lo’u faatuatua i a’u galuega. (Iakopo 2:18). O le fa’amaoniga o le amio Atua o le agalelei i tagata, e pei ona taua i le 2 Timoteo 2:21. Ua faapea mai foi le Ioane 15:9 “Faapei ona alofa mai o le Tamā ia te a’u, e faapea lava ona ou alofa atu ia te outou; ia tumau pea outou i lo’u alofa.”

O se poloaiga mai le Atua mo lana fanau uma ia faaauau i lona alofa. O e soifua i le alofa o Keriso?

Tatalo

Tamā faamolemole faatumu a’u i lou alofa ou te faia ai galuega lelei uma I le alofa ia suluia ai le lalolagi atoa, I le suafa o Iesu Keriso, Amene.