Samoan Devotional

OPEN HEAVENS

MATALA LE LAGI MO LE ASO FARAILE 21 IULAI 2023

Manatu Autu:  Alofa ma le amio Atua 1 (Love and Godliness 1)

Tauloto – Tusi Paia: 1 Ioane 4:7 “Le ‘au pele e, ‘ia tatou fealofani; auā mai le Atua le alofa; o i latou uma fo‘i o ē alolofa, ‘ua fānau mai i latou mai le Atua, ‘ua iloa fo‘i e i latou le Atua.”

Faitauga - Tusi Paia: 1 Ioane 4:7-10

Upu Folafola

O le tasi o faamaoniga o le amio Atua o loo faaalia I le maliu o le Alii o Iesu Keriso, na ia osia le taulaga i lona ola mo I tatou ona o lona alofa. Na ia poloaia I tatou ia alolofa e tusa ma le Ioane 13:34-35

34O le poloa‘iga fou ‘ou te tu‘u atu ai ‘iā te ‘outou, ‘ia ‘outou fealofani; fa‘apei ‘ona ‘ou alofa atu ‘iā te ‘outou, ‘ia fealofani fo‘i ‘outou. 35O le mea lea e iloa ai e tagata uma lava o o‘u so‘o ‘outou, pe ‘āfai ‘ua ‘outou fealofani.”

A tatou tilotilo I le feitagai I le va o tagata ua taua o kerisiano faatuatua, e mafai ona tatou fesili: O fea le faataunuuina o lenei poloaiga o le alofa ma le amio Atua? E ono tele ni mafuaaga o lenei tulaga faaletonu i totonu o le tino o Keriso. Muamua, o le lē toe taulai lea o le silasila I le maua o le lagi, e pei o le faamoemoega I le ola e faavavau. O leisi e fesootai lava, o le fiafiaga I le lalolagi nei. A o’o foi ina loto leaga le tagata I le isi tagata, e amata ona faatupuina le feitagai ma oo atu ai lava ina tiai ma fulitua I le amio Atua. I le tatou tauloto mai le Tusi Paia, mai le tusi o Ioane le aposetolo o le alofa, na ia tusia 

Le ‘au pele e, ‘ia tatou fealofani; auā mai le Atua le alofa; o I latou uma fo‘I o ē alolofa, ‘ua fānau mai I latou mai le Atua, ‘ua iloa fo‘I e I latou le Atua 1 Ioane 4:7

O le fuaitau o loo taua I luga o loo faaalia ai le taua tele o le alofa I le va o le auuso. Le au pele e, o e soifua ea I le alofa? Ia manatua, afai e te le o soifua I le alofa, ua e oti e tusa ma le 1 Ioane 3:14 o loo faapea mai:

14O i tatou, ‘ua tatou iloa ‘ua o‘o i tatou i le ola sa i le oti, auā o lo‘o alolofa i tatou i le au uso; o sē lē alofa i le uso, o lo‘o tumau ia i le oti.

Ua faapea mai le aposetolo o Paulo I le 1 Korinito 13:4-6

4E ‘onosa‘i le alofa, e agamalū, e lē losilosi le alofa, e lē mitamita vale le alofa, e lē fa‘afefeteina, 5e lē amio matagā, e lē sā‘ilia e ia ana lava mea, e lē fa‘aitaitagofie, e lē faitau leaga ‘ua tu‘uina mai e nisi. 6e lē fiafia i le amio leaga, ‘ae fiafia i le fa‘amaoni.

Aveese le feitagai mai lou loto I le aso pe afai e te le manao e maumau ma lē faitauina au galuega I le aso mulimuli. E leai se amio Atua e aunoa ma le alofa. 

Tatalo

Tamā faamolemole ia e toe faamumuina lou alofa ia te a’u ma le au uso kerisiano faatuatua. Ia taitaiina au I lenei alofa e saili I agaga leiloa ma taitaiina I le faaolataga, I le suafa o Iesu Keriso, Amene.

OPEN HEAVENS

MATALA LE LAGI MO LE ASO TOFI 20 IULAI 2023

Manatu Autu:  E mafai ona e silisili (You can be the best)

Tauloto – Tusi Paia: Ioane 8:31 ‘‘‘Ona fetalai atu lea o Iesu ‘iā Iutaia, o ē ‘ua fa‘atuatua ‘iā te ia, “‘Āfai tou te tumau pea i la‘u a‘oa‘oga, o o‘u so‘o moni ‘outou..”

Faitauga - Tusi Paia: Teuteronome 28:1

Upu Folafola

E mafai e so’o se tagata ona ausia le tulaga silisili. Peitai e iai tapulaa e tatau ona ausia ona o’o lea I le tulaga silisili. Fai mai le Tusi Paia 7‘Ua ‘ou iloa ‘au‘auna e ti‘eti‘e i solofanua, a o ali‘i e sāvavali i le ‘ele‘ele e pei o ‘au‘auna’ (Failauga 10:7). E fua lava I le saunia e totogi le tau. I le tatou faitauga o le Tusi Paia o le aso, ua tatou faitau ai I folafolaga a le Atua e faamautinoaina lo tatou ausia o le tulaga silisili. Peitai o loo tatou faitau ai foi I le fuaitau e tasi, le tapulaa e tatau ona ausia, o le faalogo I le siufofoga o le Alii, ma anaana e fai ana poloaiga. 

E toafia I tatou ua saunia e matua faalogo I le siufofoga o le Alii I le aso? Ua ou aoaoina a’u faifeau uma ia malamalama I le matua faalogo, e sili atu I lo le na o le faalogo. E tatau ona faalogo lelei ma maitau I le atoatoa le siufofoga ma le poloaiga a le Atua. E pau lena o le auala e mafai ai ona e faatino I le atoatoa poloaiga a le Atua. Fai mai le Tusi Paia e tupu le faatuatua i le taulogologo atu, o le taulogologo atu fo‘i i afioga poo le Upu a le Atua ae le o upu a tagata po’o le leo o le tagata lava ia (Roma 10:17). Mo se faataitaiga, afai e te fia ausia le tulaga silisili, ia silasila totoa I le Malaki 3:10 o loo faapea mai: 10‘Inā ‘aumaia mea e sefulua‘i a ‘outou mea uma lava i le fale e tu‘u ai mea; ‘ina ‘ia i ai mea e ‘ai i lo‘u fale; ma ‘ia ‘outou tofotofo mai ai ‘iā te a‘u i lenei mea, ‘ua fetalai mai ai le ALI‘I o ‘au; pe ‘ou te lē tōina pupuni o le lagi mo ‘outou ma sasa‘a atu le manuia mo ‘outou, ‘ina se‘ia silisili ‘ona tele.

A silasila manino I le fuaitau o lo’o taua I luga, o loo faaalia manino ai le mafuaaga e le maua ai e nisi le folafolaga o le manuia faulai e ui o lo’o totogi pea a latou sefuluai. Fai mai le Tusi Paia, e aumai uma le sefuluai, e le o faapea mai aumai na o se vaega. O lo’o faapea mai foi ‘aumai’, ae e le o faapea mai ‘lafo’, o lona uiga e faataua tele I le Atua lou auai I ona luma e sili atu I lo lau foai. E naunau le Atua e mafuta ma I tatou. E le o ia o se tagata aisi, e tatau ona tatou o mai ma le mata’u ma le gatete ma tatalo ina ia talia a tatou sefuluai ma taulaga.

O le isi faataitaiga pe afai tatou te mananao e faia e le Atua ni vavega e ala iai tatou. Fai mai le Tusi Paia o nisi o tali o tatou manaoga, e le mafai ona maua le tali e aunoa ma le tatalo ma le anapogi (Mataio 17:21), e ui o nisi Tusi Paia ua aveesea ai le upu anapogi. Le au pele e, e mafai ona e maua le tulaga silisili pe a saunia lou tagata e totogi le tau o le lafoai o lou ola ia Keriso ma ia e ola ma soifua e tusa ma lona finagalo. 

Tatalo 

Tama, faamolemole ia e foai mai ia te au mea silisili ina ia avea a’u ma se tagata e ausia le tulaga silisili, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LULU 19 IULAI 2023

Manatu Autu:  O le taofi matagi 3 (The storm stiller 3)

Tauloto – Tusi Paia: Luka 7:13 ‘‘Ua silasila atu le Ali‘i ‘iā te ia, ‘ona mutimuti alofa lea o ia ‘iā te ia, ‘ua fetalai atu ‘iā te ia, “‘Aua ‘e te tagi.”.”

Faitauga - Tusi Paia: Mareko 4:35-41

Upu Folafola

O le matagi pito sili ona matuia o le olaga o le oti. O le talalelei lenei, o le ‘taofi matagi’ e malosi atu lona mana I lo le oti. Fai mai le Tusi Paia: 25‘Ua fetalai atu Iesu ‘iā te ia, “O a‘u nei o le toetū ma le ola; o lē fa‘atuatua mai ‘iā te a‘u, e ui lava ‘ina oti, ‘ae ola lava ia. 26O tagata ola uma o ē fa‘atuatua mai ‘iā te a‘u, e lē oti lava e o‘o i le fa‘avavau; po ‘ua e talitonu mai ‘ea i lenā mea?”(Ioane 11:25-26)

O le tala I tua atu o le tauloto mai le Tusi Paia o le aso, o lo’o faasino I le upu moni, o Iesu Keriso ua na o ia e mafai ona taofia so’o se matagi e o’o I le matagi e pito sili ona tigā, o le oti. Sa iai se fafine ua oti lana tane na totoe na o ia ma lana tama. Ua ave e le matagi o le oti lana tane ma ua toe o’o mai foi e ave I lana tama e toatasi. A’o latou avatu lana tama e tanu, na fetaiai I le ala lenei fafine ma e na faatasi ma ia, ma le ‘taofi matagi’. Fai mai le faamaumauga a le Tusi Paia: 14‘Ua maliu ane ia, ‘ua pa‘i atu i le fata; ‘ona tutū mai ai lea o le ‘au fata, ‘ona fetalai atu lea o ia, “Le taule‘ale‘a e, ‘ou te fai atu ‘iā te oe, ‘Inā tula‘i ia.” (Luka 7:14). 

Le au pele e, ou te momoli atu le talalelei mo oe I le aso, o le matagi o le o’o mai o le oti ae lei o’o I lona taimi, e taofia ma e le faatagaina I lou aiga, I le suafa o Iesu. E pei ona taofia e Iesu le matagi I le sami, e faapena foi ona taofia soo se ituaiga matagi I lou olaga, I le suafa o Iesu. 

Ua na o Iesu le tali o le matagi o le oti. Fai mai le Tusi Paia: 

14O lenei, ‘ina ‘ua i ai i le fānau le tino tagata ola, na fa‘apea fo‘i ‘ona ‘ua i ai ‘iā te ia, ‘ina ‘ia fa‘aumatia e ia i lona maliu o lē ‘ua i ai le mālō e oti ai, o le tiapolo lea, 15ma tu‘usaunoaina ai i latou uma o ē na fa‘apologaina i o latou olaga uma ‘ona o le mata‘u i le oti (Eperu 2:14-15).

Le au pele e, e le tatau ona e mata’u pe fefe I le oti aua ua manumaloina e Iesu le oti mo I tatou, aua o lo’o soifua o ia, e le toe iai se mana o le oti iai tatou. E te le tau auai atu ini faiga faataulaitu ona o lou fefe I le oti. O lo’o faamaonia I le Roma 6:9 e lē toe pule le oti ‘iā Keriso ma afai o oe o se afafine poo se atalii o le Atua, e le pule foi le oti ia te oe.

Tatalo

Tama, faamolemole ia aua nei faatagaina se tasi o lo’u aiga e o’o I le oti ae lei oo I lona taimi, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LUA 18 IULAI 2023

Manatu Autu:  O le taofi matagi 2 (The storm stiller 2)

Tauloto – Tusi Paia: 2 Korinito 8:9‘‘Auā ‘ua ‘outou iloa le alofa tunoa o lo tatou Ali‘i o Iesu Keriso, sa tamao‘āiga ia, a ‘ua fa‘amativaina ‘ona o ‘outou, ‘ina ‘ia fa‘atamao‘āigaina ‘outou i lona mativa.”

Faitauga - Tusi Paia: Mareko 4:35-41

Upu Folafola

O le matagi po’o le afā i le tulaga tau tupe o se tasi o afā e matua taua tele i le soifuaga, ma e tatau i so’o se kerisiano faatuatua ona fuafua lelei ma fo’ia i le mana o le suafa o Iesu Keriso. Fai mai le Tusi Paia: “E pule le mau‘oa i ē matitiva;

e ‘au‘auna fo‘i lē nō mea i lē ‘ua ‘aumai ai ana mea.” (Faataoto 22:7). O loo faapea mai foi le Tusi Paia “O le ‘oloa o le mau‘oa, o lona ‘olo malosi lea, a o le mativa o ē matitiva, o lo latou malaia lea..” (Faata’oto 10:15). O le mua’i gaioiga e taofia ai le matagi o mea tau tupe o le galue malosi. O loo faapea mai le Tusi Pa’ia: 

“E mativa lē ‘ua galue ma le lima vaivai; a o ē lima malosi e mau‘oa i latou. 5O lē fa‘aputu i le tausaga vevela, o le atali‘i poto lea; a o lē moegase i le tausaga e selesele ai saito, o le atali‘i lea e tupu ai le mā..” Faataoto 10: 4-5.

Ma o le Faata’oto 22:29 o lo’o faapea mai fo’i: ‘‘Ua e iloa le tagata ‘ua fa‘ata‘alise i ana galuega? E tu o ia i luma o tupu, ‘ae lē tu i luma o tagatanu‘u’.

O lona uiga, e lelei le galue malosi. Peita’i e le na o le galue malosi e faamautinoaina lou saogalemu mai matagi o tulaga tau tupe, aua o loo faapea mai le Tusi Pa’ia: “Afai e le atinae e le Alii le fale; e galulue fua i latou o e atiina a’e; afai e le leoleo e le Alii le a’ai, e mataala fua o le na te leoleoina.(Salamo 127:1)” Mai lava le uluai  agasala i le faato’aga i Etena, sa galue lava le tagata ae e faatauva’a lava le taui (Kenese 3:17-19) O lona uiga, o le fetuu ma le malaia o le mativa e tatau ona gausia, ma e pau lē e mafaia ona faia, o lo tatou Alii Faaola o Iesu Keriso.

O le tauloto o le aso mai le Tusi Paia o loo faaalia ai na ositaulaga Iesu Keriso I mea uma ina ia toe faafoisia le ola manuia I le tagata. E tatau ona tatou valaauina o ia io tatou olaga ina ia taofia so’o se matagi o mea tau tupe mai I o tatou olaga. E manaomia ona tatou ole atu i le suafa o Iesu Keriso aua na folafola o ia afai tatou te ole atu i se mea i lona igoa, e na te faia lava (Ioane 14:14). O lo’o ia faapea mai i le Mataio 7:7-8, “Ia ‘outou ole atu, ‘ona foa‘iina mai ai lea ‘iā te ‘outou; ‘ia ‘outou sā‘ili, ‘ona ‘outou maua ai lea; ‘ia ‘outou tu‘itu‘i atu, ‘ona tōina ai lea ‘iā te ‘outou. 8Auā ‘ai sē ole atu, e maua e ia; o lē sā‘ili fo‘i, e iloa e ia; e tōina fo‘i i lē tu‘itu‘i atu.” E fa’aumatia e le Atua le mativa mai lou olaga i le asō ma fa’aaogaina lau molimau e taitaiina mai ai tagata se toatele i lona  malo, i le suafa o Iesu.    

Tatalo 

Tama, faamolemole ia e faamanuia mai ia te a’u ma taofia so’o se matagi o tulaga tau tupe, i lo’u olaga I le aso, I le suafa o Iesu Keriso, Amene.   

OPEN HEAVENS

MATALA LE LAGI MO LE ASO GAFUA 17 IULAI 2023

Manatu Autu:  O le taofi matagi 1 (The storm stiller 1)

Tauloto – Tusi Paia: Ioane 5:8 ‘‘Ua fetalai atu Iesu ‘iā te ia, “‘Inā tu ia i luga, ‘ave ia lou moega, ma ia ē sāvali.”

Faitauga - Tusi Paia: Mareko 4:35-41

Upu Folafola

O le a le matagi? O lona uiga o le fesuiaiga e afatia ai le siosiomaga ona o malosiaga o savili e o’o mai ai timuga mamafa, toulu malosi le kiona, emo uila ma papa faititili. Afai e fai ma faatusa, o le matagi o ni vaega e afatia ai le olaga o le tagata e o’o ina maumau ai ni mea ma isi. O matagi o le olaga e mafai ona tuu vaega. E ono oo mai I le tino, le agaga, o lagona, o le tupe ma le tamaoaiga, le oa, upu fai o malo ma isi faapena. 

I le faitauga o le Tusi Paia, ua tatou faitau ai I se matagi na afatia ma semanu e goto ai le vaa, a’o iai Iesu ma lona au soo. Ae o le ‘Taofi Matagi’, le Alii o Iesu, na ia faatonu le matagi e filemu ma malū ona malū ai lea. O le aso, o le a tatou tilotilo I matagi e o’o mai ai le tino ma’i. Ou te tatalo o soo se matagi o le tino ma’I o loo e tauina, ia malū ma taofia loa, I le suafa o Iesu. 

I le tala o loo mafua mai ai le tauloto mai le Tusi Paia o le aso, o lo’o faatatau i se tamaloa na ma’i mo le 38 tausaga. O le matagi o le mai o le tino na ia tauina mo le tele o Tausaga ma ua oo ane ai le manatu ia te ia e o’o lava ina oti I tafatafa o le vai I Petesa. Peitai o le aso na feiloai ai ma le ‘Taofi Matagi’ na suia le talaaga o lona olaga. Na fesili atu iai Iesu Keriso le ‘Taofi Matagi’:“E te fia mālōlō ‘ea?” (Ioane 5:6). 

O lo’o fesili atu ia te oe le Atua Silisiliese : ‘E te fia malolo ea?’ Afai o lau tali o le ‘Ioe’ e tatau ona e faatinoina le tapulaa o le faamalologa. O le faamalologa a le Atua  o le ‘meaai’ lea e mo na o lana fanau e tusa ma le Mataio 15:26. O lona uiga, e tatau ona e faamautuina ua e fanaufouina aua e tatau ona faamagaloina au agasala ona faatoa e maua ma fiafia I lea faamanuiaga mai le Atua e taofia le matagi o le tino mai. Ina ua finagalo Iesu Keriso e faamaloloina le tama talavou na maua I le ma’I supa, fai mai le Tusi Paia I le Mataio 9:2

2Fa‘auta fo‘i, ‘ua latou ‘aumai ‘iā te ia le tagata supa, ‘ua ta‘oto i le moega; ‘ua silafia fo‘i e Iesu lo latou fa‘atuatua, ‘ona fetalai atu ai lea o ia i le supa, “Lo‘u atali‘i e, ‘inā fa‘alototele ia oe, ‘ua fa‘amāgaloina au agasala.”

O lo’o atagia ai, e tatau ona e salamo mai agasala uma ma saili le faamagaloga a le Atua pe afai e te naunau e na te taofia le matagi o le tino ma’I mai lou olaga. Ao e talia lana valaau I le aso, o so’o se matagi o le ma’I I lou olaga, e malū ma taofia I le aso I le suafa o Iesu Keriso. 

Tatalo

Tama, ou te talia lo’u faamalologa I le aso, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO SA 16 IULAI 2023

Manatu Autu:  Galuega a Agaga Paia 3 (Role of the Holy Spirit 3)

Tauloto – Tusi Paia: Efeso 4:30 ‘‘Aua fo‘i tou te fa‘atigā i le Agaga Pa‘ia o le Atua, ‘ua fa‘amaufa‘ailogaina ai ‘outou ‘iā te ia se‘ia o‘o i le aso e fa‘aolaina ai..

Faitauga - Tusi Paia: Iuta:21-24

Upu Folafola

O le tatou tauloto mai le Tusi Paia o loo faaalia ai leisi galuega taua a Agaga Paia I le olaga o le kerisiano faatuatua, e faamaufaailogaina ai I tatou seia oo I le aso e faaolaina ai. O le uiga o upu ‘aso e faaolaina ai’ o loo talanoa mai I le aso e faaolaina, o lo tatou faamoemoega autu I le iuga, pe a taunuu manuia I le malo o le Atua. O le mafuaaga lenei, e le faapea o iai se faamaoniga a e faaolaina loa, e te faaolaina seia o’o I le faavavau. E iai faataitaiga o tagata na amata manuia ae lei manuia lo latou iuga. Mo se faataitaiga o le Tupu o Saulo, a o’o I le taimi e na te faia ai perofetaga, e fesili tagata faapea: ‘ua perofeta mai ea o ia fa‘atasi ma le ‘au perofeta? (1 Samuelu 10:11). Peitai ane, na amata ona faaletonu Saulo ina ua ia le usitai I faatonuga a le Atua ma ua amata ona saili atu I aitu vavalo. Fai mai le 1 Samuelu 28:7 ‘Ona fai mai lea o Saulo i ana ‘au‘auna, “‘Inā sā‘ili ia se fafine ‘ua i ai se aitu vavalo, ‘ou te alu atu ‘iā te ia, ma ‘ou fesili atu ‘iā te ia.” ‘Ua fai atu ana ‘au‘auna ‘iā te ia, “Fa‘auta, o le fafine na i ai le aitu vavalo o lo‘o i Enetoro.”

Na faia e Saulo lenei tulaga e ui o lo’o fai mai le Tusi Paia I le Isaia 65:24 e faapea:

24A o le‘i vala‘au lava i latou,‘ou te tali atu. A o tautala mai i latou, ‘ou te fa‘alogo atu lava.

I le Ioane 16:7-14 ua tatou iloa ai, e taitaiina I tatou e Agaga Paia I le Upu moni uma, e le na o se vaega. O le tele o mea e tatau ona tatou iloa e faatatau I le Atua, lo tatou Faaola, o I tatou lava, le Upu tusitusia a le Atua, le tiapolo, le lalolagi o loo tatou ola ai ma isi mea faapena, e faailoa mai iai tatou e Agaga Paia. O le Upu a le Atua e mafai ona faapei o isi lava tusi pe a aunoa ma le faamalamalamaina e Agaga Paia. 

O loo tusia I le Tusi Paia I le Ioane 16:13, e faaalia mai e Agaga Paia mea o le a oo mai. 

O le faaitiitia o le malosi I le itu faaleagaga o le Ekalesia I aso mulimuli na uluai faailoa mai e Agaga Paia (1 Timoteo 4:1-2). O le faanoanoaga I le tele o fanau a le Atua, ua latou le faaaogaina le taitaiga a Agaga Paia e taofia ai lo tatou pauū atu. Ia aua lava nei e paū, I le suafa o Iesu Keriso. 

Tatalo

Agaga Paia, faamolemole ia e taofi mau ia te a’u seia oo I le iuga. Fesoasoani mai ia te a’u ina ia taunuu ma maea la’u tausinioga I le manuia ma le malosi, I le suafa mamana o Iesu Keriso, Amene. 

OPEN HEAVENS

MATALA LE LAGI MO LE ASO TOONAI 15 IULAI 2023

Manatu Autu:  Galuega a Agaga Paia 2 (Role of the Holy Spirit 2)

Tauloto – Tusi Paia: Roma 8:27‘‘A o lē su‘esu‘e i loto, ‘ua silafia e ia le finagalo o le Agaga; auā o lo‘o fautua o ia mo le ‘au pa‘ia e tusa ma le finagalo o le Atua”.

Faitauga - Tusi Paia: Roma 8:26-27

Upu Folafola

Sa tatou amata va’ava’ai ananafi i galuega a Agaga Paia I le olaga o se kerisiano. Ua tatou iloa ai o Agaga Paia e faailoaina I le tagata agasala ana agasala ma ta’ita’iina i latou i le salamō. O le asō o le a tatou su’esu’e pe faapefea ona fesoasoani Agaga Paia i le au Kerisiano e tatalo.

Ina ua faapea mai le Tusi Paia tatou te tatalo e lē aunoa (1 Tesalonia 5:17). I le mafaufau o le tagata soifua e faafefea ona fai lea tulaga? E manino lelei ua na o le fesoasoani a Agaga Paia tatou te mafai ai ona tatalo e lē aunoa. O le ala lea ou te alofa ai ia i latou e lē manana’o i le papatisoga a Agaga Paia e pei ona folafolaina mai e lo tatou Alii o Iesu Keriso I le Galuega 1:8.

Na aumai e lo tatou Alii o Iesu Keriso se faataoto e a’oa’o ai tatou i le tāua o le tatalo e lē aunoa mo tatou kerisiano I le Luka 18:1-8. Peita’i a aunoa ma le fesoasoani a Agaga Paia e leai se tasi e mafai ona tatalo faapea. O le mea moni tatou te lē iloa mea tatou te ole atu ai, peita’i o Agaga Paia e ta’ita’ia tatou ma tatalo le finagalo o le Atua e ala ia i tatou. E pei ona tusia i le tusi a Roma 8:26

“E faapea fo’i le Agaga ona fesoasoani mai i lo tatou vaivai, auā tatou te lē iloa mea tatou te ole atu ai ma le tusa, ae peita’i o le Agaga, e fautua o ia mo i tatou i le oi e lē mafai ona talatalaina.”

Mai le fuaiupu ua tusia i luga ua tatou iloa ai tatou te manaomia Agaga Paia e fesoasoani iā i tatou ina ia sa’o a tatou tatalo. O Agaga Paia fo’i e faamanatu mai iā i tatou le taua o le avatu o le faafetai a’o o tatou tatalo. Ioe o la tatou faafetai, viiga ma le ifoga e tatau ona sili atu nai lo’o o tatou manaoga. Fai mai le Tusi o Filipi 4:6 “ Aua ne’i popole outou i se mea e tasi, a ia faailoa atu o outou mana’o i mea uma lava I le Atua, I le tatalo, ma le faatoga, atoa ma le faafetai.”

O ki nei e tatau ona tatou tatalo ai ina ia tali mai ai le Atua ia tatou talosaga. O lea e ao i kerisiano uma ona papatisoina e Agaga Paia. I le suafa o Iesu Keriso. Amene.

OPEN HEAVENS

MATALA LE LAGI MO LE ASO FARAILE 14 IULAI 2023

Manatu Autu:  Galuega a Agaga Paia 1 (Role of the Holy Spirit 1)

Tauloto – Tusi Paia: Ioane 16:13‘‘Ae a maliu mai o ia, o le Agaga lea e tupu mai ai le ‘upu moni, e ta‘ita‘i e ia ‘iā te ‘outou i ‘upu moni uma; auā e lē tautala fua o ia na o ia, a o mea uma e fa‘alogo i ai o ia, e tautala ai lava, ma fa‘ailoa mai ‘iā te ‘outou mea e o‘o mai.

Faitauga - Tusi Paia: Ioane 16:7-14

Upu Folafola

Mo le tolu aso o le a sosoo nei, o le a tatou suesue I le galuega a Agaga Paia I olaga o le au faatuatua. O le aso, o le a tatou vaavaai I lana galuega o se molimau mo Iesu Keriso lo tatou Faaola. O se vaega taua o le galuega a Agaga Paia, e na te fa‘ailoa atu i le lalolagi le agasala, e pei ona taua I le faitauga o le Tusi Paia o le aso. E faitauina se vaega e faapea: 

A maliu mai fo‘i o ia, na te fa‘ailoa atu i le lalolagi le agasala, ma le amiotonu, ma le fa‘amasinoga(Ioane 16:8).

Peitai ane, o le faanoanoaga e toatele tagata e na o le matamata I le galue mai o Agaga Paia ae le fia auai I lona galue mai. O nei tagata e seasea latou faatagaina Agaga Paia e faia lana galuega o le faailoa o latou agasala ma taitai mai ia salamo, aua e le fia salamo. A mumusu tagata e faailoa a latou agasala, o loo faaalia ai e latou te le talitonu I le Upu a le Atua o loo faapea mai, ua agasala tagata uma ma ua le o’o I le mamalu o le Atua (Roma 3:23). O nei tagata e fiafia e faaigoa le agasala I ni upu matagofie. O le tulaga tonu lenei o lo’o faapea mai ai le Tusi Paia ia feta‘uta‘ua‘i a ‘outou agasala, ma tatalo le tasi mo le tasi, ‘ina ‘ia fa‘amālōlōina ‘outou (Iakopo 5:16). 

O le tulaga muamua lava e faailoa mai e Iesu e tatau I le tagata e fia maua le faamalologa ona manatu iai, o le mataupu o le agasala e tusa ma le Mareko 2:5-12. E o’o I le taimi na faamalolo ai e Iesu se tagata, ua ia maua atu foi o ia I totonu o le malumalu ina ua maea ni nai aso, ua fetalai atu Iesu ia te ia: ‘aua ‘e te toe agasala, ne‘i o‘o atu ‘iā te oe se leaga e sili i lenā. (Ioane 5:14). 

Le au pele e, afai e te lei tautino ma lafoai i au agasala, faataga Agaga Paia e faailoa ia agasala ia te oe. Ona amata lea ona suesue lelei I le Tusi Paia i tapulaa a le Atua mo le ola faapaiaina, ona e vaai lea ia Agaga Paia ua ia suia lou olaga mo le lelei e sili atu I ou manatunatuga uma. 

Tatalo

Tama, faamolemole ia e faamalosiau mai  ia te a’u ina ia ou ola faapaiaina, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO TOFI 13 IULAI 2023

Manatu Autu:  Tausiga o e fia maua le fesoasoani (Caring for the needy)

Tauloto – Tusi Paia: Kalatia 6:10‘‘O lenei, ‘ia tatou agalelei, ‘ia fa‘atatau i mea e tutupu i lea aso ma lea aso, i tagata uma lava, ‘ae maise i le ‘āiga o le fa‘atuatua..””

Faitauga - Tusi Paia: Mataio 25:34-40

Upu Folafola

E moni, o so’o se tagata soifua lava, tusa poo le a le atamai, le maualuga o lona aoaoina, le tamaoaiga, e I ai lava le taimi e manaomia ai le fesoasoani e taulimaina ai nisi o tulaga o lenei soifuaga. O ituaiga tulaga ia, e le mafai ai e se tagata maumea ona faia se gaoioiga, ua le mafai e tupe, pule, e o’o I tagata taua e te tau iai ona foia le faafitauli. I taimi faapenei, o le avanoa lea o so’o se tagata e valaau ai mo se fesoasoani mai le Atua e ala i tatalo faatauanau i le Atua Silisiliese. Ou te tatalo, a o e ole atu i le suafa o le Alii i le aso ma taimi o ou puapuaga, o le a Ia tali mai ia te oe ma le afi, i le suafa o Iesu.

Ae afai o le a tali mai le  Atua i au tatalo, o lo’o ia te oe le tiute ma le matafaioi e fesoasoani ai I e matitiva ma ē e le tagolima I lou siomaga. Fai mai le tauloto mo lenei aso, ‘ia tatou agalelei, ‘ia fa‘atatau i mea e tutupu i lea aso ma lea aso, i tagata uma lava, ‘ae maise i le ‘āiga o le fa‘atuatua. So'o se tasi e le manatu ma fesoasoani i ē vaivai ma lē tagolima, o le amioleaga lea. O ia tagata, o le a le amanaiaina i le aso o latou puapuaga, e tusa lava po’o le a le tele o lo latou alalaga mo se fesoasoani (Faataoto 21:13).

O le manatu autu o le faamalosiau o lenei aso, o la tatou matafaioi fai faatasi, o le tausia ma fesoasoani I e manaomia le fesoasoani I lo tatou siomaga. O le a le taimi mulimuli na e fesoasoani ai i se tagata? O le a le taimi mulimuli na e osigataulaga ina ia maua se manaoga o seisi tagata? Ia manatua na taʻua e le Tusi Paia le tausiga o isi, o se tasi lea o tapulaa e ausia ai le Lagi e pei ona vaaia i le tatou faitauga o le Tusi Paia o le asō. Na faamatalaina e lo tatou Alii o Iesu ona so’o ma e na mulimuli ia te ia, na latou fafaga I e fia aai, talimālō i tagata ese, faaofu i e lē lavalavā, tausi I ē mamaʻi, ma asiasi atu i pagota, ma na faamanuiaina I latou e le Atua ma maua le ola e faavavau. Na fetalai foi Iesu, e faapei ona faia  o nei galuega lelei i so’o se tasi o le au uso kerisiano, ua faia lava lea ia Iesu ma e faapena foi ona toe faia mo I latou. 

O tagata kerisiano faatuatua uma faapea le ekalesia, e le tatau ona latou faatalale ma tuua le au matitiva ma le tagolima i lalo o le alofa tunoa ma fesoasoani a le malo. E lē tatau ona lē faia le matafaioi a le Tino o Keriso o le tausia lea o ē matitiva ma le tagolima o loo I totonu o le Ekalesia. Ia manatua, afai e te iloa mea lelei e tatau ona faia ae le faia, e faitauina ia te oe o se agasala ( Iakopo 4:20 ), I le suafa o Iesu Keriso, Amene

OPEN HEAVENS

MATALA LE LAGI MO LE ASO LULU 12 IULAI 2023

Manatu Autu:  Auai mai o le Atua (Divine intervention)

Tauloto – Tusi Paia: Esoto 3:10‘‘O lenei, ‘inā sau ia, ‘ou te ‘auina atu oe ‘iā Farao, ‘ina ‘ia e ‘aumai lo‘u nu‘u o le fānauga a Isaraelu mai Aikupito.”.””

Faitauga - Tusi Paia: 2 Nofoaiga Tupu 20:21-24

Upu Folafola

O lo’o tusia I le Tusi o Kenese sa iai le taimi na soona nunumi ma pogisa le lalolagi, peitai e le o le faamamafa lea mo le tatou mataupu o le aso. O le a tatou suesue I le tulaga ua faasoa ma auai mai le Atua I se galuega e manaomia I le olaga o tagata. Mo se faataitaiga, ao nofo pologa le fanauga a Isaraelu, na latou ole ma tagi atu I le Atua o lo latou tama. Fai mai le Esoto 3:9 O lenei, fa‘auta, ‘ua o‘o mai ‘iā te a‘u le ‘alaga o le fānauga a Isaraelu, ‘ua ‘ou va‘ai atu lava i le sauāga o lo‘o fa‘asauā ai Aikupito ‘iā te i latou.

I le tali mai le Atua I la latou tagi atu, na ia auai mai ma faia se galuega e faasaoloto iai latou mai le nofo pologa I le tupu o Farao (Esoto 6:6). O lenei ituaiga tulaga e le faapea e na o le fanauga a Isaraelu na mafatia ai, e toatele tagata ua lavevea I ni osofaiga matuia, o le fememeai, sauaga faapea le faigata o le mativa mai lea augatupulaga I le isi augatupulaga. O le mafuaaga o lea tulaga o lo’o maua I le Tusi o le Faaaliga 12:12 o loo faapea mai e sau le tiapolo I lona toasa e faatupu le vevesi I tagata o le lalolagi ona ua puupuu lona taimi. Ana le Seanoa le faasoa ma auai mai o le Atua i se galuega e pei ona ia faia I le Kenese, semanu e matua faigata olaga o tagata. 

I le faitauga o le Tusi Paia o le aso, e tolu tupu na au faatasi e faasagatau I le ituaiga o Iuta. O Iosefatu, le tupu o Iuta, na ia tagi atu I le Alii mo se faasoa ma le auai mai o le Atua, aua ua silafia lelei e le tupu e le mafai ona ia manumalo I se tasi o nei tupu, ae sili atu le le mafai pe au faatasi I latou. Na tali mai le Atua ma faapea mai: 17E le tau ‘outou i lenei tau‘a; tutū ia ‘outou ma ‘ia ‘outou tumau ma ‘outou va‘ai atu i le olataga mai i le ALI‘I o lo‘o ‘iā te ‘outou; Iuta ma Ierusalema e.’ ‘Aua le fefefe, ‘aua fo‘i le matata‘u; ‘ia ō atu taeao ‘iā te i latou; e ‘iā te ‘outou fo‘i o le ALI‘I.”  

Na auai mai le Alii ma ua manumalo le tupu o Iosefatu ma ona tagata I le taua. E auai le Alii I le tulaga o lo’o e feagai ma oe I le aso, I le suafa o Iesu. Peitai ane, e tatau ona fesootai lou tagata ma le Atua Silisili Ese e ala ia Iesu Keriso lona alo. Ia e sauni e tapuai I le Atua I le faapaiaina ma ia faia ma au masani I lou olaga. 

Tatalo

Tama, ia e auai mai I la’u mataupu I lenei aso e pei ona e faia ia Iosefatu ma le fanau o le ituaiga o Iuta, I le suafa o Iesu Keriso, Amene.