Samoan Devotional

OPEN HEAVENS

MATALA LE LAGI MO LE ASO TOONAI 1 IULAI 2023

Manatu Autu:  Tatalo Faafetai (Prayer of Thanksgiving)

Tauloto – Tusi Paia: Filipi 4:6 ‘‘Aua ne‘i popole ‘outou i se mea e tasi a ‘ia fa‘ailoa atu o ‘outou mana‘o i mea uma lava i le Atua, i le tatalo, ma le fa‘atoga, ‘atoa ma le fa‘afetai...”

Faitauga - Tusi Paia: Filipi 4:6-7

Tatalo

1.      Tamā, Faafetai mo lou tausiga o a’u I le afa muamua o le tausaga ma lou aumaia o a’u I le afa lona lua.

2.      Tamā, faafetai mo lou alofa ma lau ufiufitaga ia te a’u ma lo’u aiga.

3.      Tamā, faafetai i le mafaufau lelei ua e aumaia mo a’u. Faafetai i lau puipuiga ia te a’u le Alii e.

4.      Tamā faafetai mo le malosi e faatino ai galuega e tatau ona ou fai. Ou te ta’utino o lo’u malosi e mai ia te oe. Faafetai le Alii e.

5.      Tamā, faafetai mo lau foa’i mo a’u e lē aunoa. Faafetai o oe e ana mea uma le Alii e.

6.      Tamā, faafetai mo lo’u faaolataga. Faafetai ua e avea a’u o se tasi o lou aiga.

7.      Tamā, faafetai mo lo’u tuana’i, taimi nei ma le lumanai’. Faafetai mo le lumana’i manuia ua e saunia mo a’u.

8.      Tamā, faafetai mo o’u aiga uma. Faafetai mo le meaalofa o aiga.

9.      Faafetai le Alii e, mo lou alofa mutimutivale e fou mo a’u i aso uma. Faafetai le Alii e.

10.  Tamā, faafetai mo taua uma ua e tauina mo a’u. Ua tumu lou loto I le faafetai ua e faia a’u ma tagata manumalō.

11.  Tamā, faafetai mo Ie ‘au uso uma i la’u ekalesia ma le tino o Keriso. Faafetai ua lē manumalō faitoto’a o seoli ia I matou.

12.  Faafetai i lau Upu e a’oa’o ai, e a’oa’i ai, e faatonu ai e faapoto ai fo’i i matou I le amiotonu. I le suafa o Iesu Keriso. Amene.

OPEN HEAVENS

MATALA LE LAGI MO LE ASO FARAILE 30 IUNI 2023

Manatu Autu:  Siaki tupe tatala a le Atua (God’s Blank Cheque)

Tauloto – Tusi Paia: Tanielu 12:3 ‘‘O ē popoto fo‘i, e fepulafi i latou fa‘apei o le pupula o le lagi; o i latou fo‘i ‘ua fa‘aliliu ai tagata e to‘atele ia amiotonu e pei o fetū i latou e fa‘avavau fa‘avavau lava...”

Faitauga - Tusi Paia: Ioane 15:16

Upu Folafola

Ioane 14: 14 ‘Āfai tou te ole atu i se mea i lo‘u igoa, ‘ou te faia lava.

I se isi faaupuga, o loo faapea mai Iesu I le fuaitau o loo taua I luga, ‘ou te avatu le siaki tupe e tatala mo oe’. O le a tatou talanoa I le auala e mafai ai ona e maua lenei siaki tupe e tatala. 

E foai e le Atua siaki tupe tatala I tagata e naunau o latou loto I galuega alona malo I le lalolagi nei. Fai mai le Ioane 15:16 Tou te le‘i filifilia a‘u, ‘ae na ‘ou filifilia ‘outou ma ‘ou tu‘uina atu ‘outou, ‘ia ‘outou ō ma ‘ia ‘outou fua mai ni fua, ma ‘ia tumau o ‘outou fua; ‘ina ‘ia foa‘iina atu ‘iā te ‘outou e le Tamā mea uma lava tou te ole atu ai ‘iā te ia i lo‘u igoa.

O lo’o faapea mai o ia I le fuaitau o lo’o taua I luga, afai e te manumaloina agaga ma a’oa’oina I latou ina ia malolosi I le Alii, e mafai ona e fai atu I le Atua mo so’o se mea I lona suafa, ona ia faia lea. 

Afai e te muai saili I lona malo e sili atu I lo seisi lava mea, o lona uiga na te faia so’o se mea e te manaomia (Mataio 6:33). E masani lava ona ou faapea o le Atua o le tusitala, ua maea ona ia muai tusia le tala o mea uma o le a tutupu I le lumanai I le lalolagi. I le 1 Tupu 3:5-14 ina ua foai atu e le Atua se siaki tupe tatala ia Solomona, ua maea ona ia silafia le gataaga mai le amataga. Ua ia silafia o le a saili mai lenei tama mo le poto e taitaia tagata o le Atua, ma ina ua ia ole atu, na faaopoopo iai e le Alii le tamaoaiga, le filemu ma mea uma e ono manao iai le tagata. A silasila mai le Atua I lou loto e naunau I le faaolataga o agaga ma le faataunuuina o lona malo I le lalolagi nei, e te maua mai ia te ia mea uma o lo’o faigata ona maua e le toatele o tagata. 

Saili I le malo o le Atua ma le filiga, saili ia mautinoa e faia lona finagalo I le lalolagi e pei ona faia I le lagi. E te vaai iai e te tau matamuli I le faulai o faamanuiaga e te ono faapea atu ai I le Alii, ‘ua matua lava lea le Alii e’. Ia e foai I le galuega a le Atua, alu e talai atu ia fai ma au masani, saili ma a’oa’o I tagata faatoa faaolaina ina ia mautinoa o lo’o tumau I le lafu mamoe a Keriso. Ia iloa mai e le Atua lou filiga I lana galuega ona ia taui mai lea o oe I se siaki tupe tatala. O le a le taimi mulimuli na e manumaloina ai se agaga mo le Atua? I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LULU 28 IUNI 2023

Manatu Autu:  Ulufale I luma o le mamalu o le Atua (Entering God’s presence)

Tauloto – Tusi Paia: Isaia 26:2 ‘‘Inā tō mai ia e ‘outou o puipui, ‘ina ‘ia ulufale mai ai le nu‘u amiotonu o ē tausi le mea moni.”

Faitauga - Tusi Paia: Salamo 24:3-6

Upu Folafola

O lo’o a’oa’oina I tatou mai le Tusi Paia I le Salamo 100:4, e iai le faitotoa e ulufale atu ai I luma o le Atua. Afai e te vaai atu I se faitotoa I se mea, ua e iloa ai, e iai vaega e faasaina ona ulufale atu iai. O mea uma o lo’o iai I totonu e tatau ona matua taua e latou te le mananao ini tagata e le faatagaina e o atu I totonu. E tele oloa taua I luma o le mamalu o le Atua ma e le agavaa uma iai tagata uma. O se tasi o ia oloa taua o le maua o le olioli atoatoa (Salamo 16:11) ma le faasa’olotoga (2 Korinito 3:17). O so’o se tagata ua o’o I luma o le mamalu o le Atua e mafai ona ia ta’u atu ia te oe, o se nofoaga e te le fia alu ese mai ai. I le 2 Korinito 5:8, fai mai le Aposetolo o Paulo ‘ua matou loto tetele ma ‘ua sili lo matou mana‘o ia ō ‘ese i matou i le tino, a ‘ia nonofo i matou ma le Ali‘I’ 

O le tapulaa muamua I le ofi atu I luma o le mamalu o le Atua, o le ola faapaiaina. E le mafai ona silasila le Atua I se agasala. Afai o lo’o iai se ituaiga agasala I lou olaga, o le faitotoa I luma o le mamalu o le Atua e tapunia ia te oe. Fai mai le Salamo 24:3-4 3O ai ‘ea se alu a‘e i le mauga o le ALI‘I? O ai sē tumau i lona afio‘aga pa‘ia? 4O lē ‘ua i ai lima mamā, ma le loto mamā; o lē ‘ua lē naunau lona loto i le mea fa‘atauva‘a, ma ‘ua lē tautō fa‘a‘ole‘ole.

E na o I latou e mama lima ma mama o latou loto e faataga ona o atu I luma o le mamalu o le Atua. Afai o palapala ou lima ona o le agasala, aua e te manatu e mafai. Afai e le mama lou loto, ma o lo’o e manatu I ni mafaufauga leaga ma le eleelea I lou loto, e tapunia luma o le mamalu o le Atua mai ia te oe. Fai mai le Salamo 118:19 To mai ia ‘iā te a‘u o faitoto‘a o le amiotonu; ‘ou te ulufale atu i ai, ma ou vivi‘i atu i le ALI‘I.

O le faitotoa I luma o le mamalu o le Atua e taua o le faitotoa o le amiotonu, afai e te le o amiotonu, e le mafai ona e sao atu ai. O le Atua o lo’o e fia alu atu I ona luma, o le Atua paia, e tatau ona e ola paia ona faatoa mafai lea ona e ulu atu iai. Na suia lavalava o Iosefa ma ua faamama lelei o ia ae lei alu atu I luma o Farao (Kenese 41:14), e le sili atu ea le faia o ia mea pe afai e te fia ulufale atu I luma o le mamalu o le Tupu o Tupu? O le ulufale atu I luma o le mamalu o le Atua Silisili Ese, e tatau ona e faapaiaina, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LUA 27 IUNI 2023

Manatu Autu:  O le a/po’o ai e te tapua’i i ai?” (What/who do you worship?)

Tauloto – Tusi Paia: Esekielu 14:3 ‘Le atali‘i e o le tagata, ‘ua fa‘atūina e ia tagata o a latou tupua i o latou loto ma ‘ua tu‘uina i o latou luma la latou agasala e tausuai ai; latou te fesili mai ‘ea ‘iā te a‘u?”

Faitauga - Tusi Paia: Esoto 20:3-5

Upu Folafola

Afai e te fesili atu i tagata po o ai pe o lea le mea o latou tapua’i iai, e tele ina latou fa’apea mai ia te oe, o le Atua, a o le mea moni, e tele tagata o lo o tapuai i isi mea faapea ma isi tagata e ese mai i le Atua. O isi ua tapua’i i o latou ta’i to’alua, o latou fanau, o latou tupe, o latou laualo, a o isi ua tapua’i i  latou foliga i luga o ‘upega tafā’ilagi ma, pe e te talitonu iai pe leai, o nisi tagata ua tapua’I i a latou ta’avale. 

I le taimi na ou a’oga ai i le kolisi sa iai se faia’oga e fai lana uila vili vae, sa matuā pele ia te ia. A tau atu i se vaivai palapalā, e oso ese mai i lana uila ae amo lona uili. Sa sili ia te ia le palapalā o ona vae nai lo lana uila vilivae. Sa tapua’i lea tagata i lona uila vilivae.

E to’atele nisi e o mai i luma o le Atua ma latou tatalo, ae leai se mea latou te maua mai le Atua ona o lo’o silasila le Atua i o latou loto ma ia silafia o lo’o nofo ai se tupua. Ona silafia lea e le Atua ua na o latou fofoga ma o latou upu, a o lo’o mamao o latou loto mai le Atua (Mataio 15:8). Ona sa le ‘avea le Atua ma o latou Atua, ona te’ena fo’i lea e le Atua i latou. Ae afai e tali le Atua iai, o le a ia tali fa’atatau i le tupua o lo o aumau i o latou loto. Fai mai le Esekielu 14:4 O le mea lea ‘ia e tautala atu ai ‘iā te i latou, ma fai atu ‘iā te i latou, O lo‘o fa‘apea ‘ona fetalai mai o le Ali‘i le ATUA: ‘Ai se tagata o le ‘āiga o Isaraelu na te fa‘atūina ana tupua i lona loto ma tu‘uina i ona luma lana agasala e tausuai ai ma alu ane i le perofeta; o a‘u o le ALI‘I, ‘ou te tali atu i lē alu ane, e tusa ma le tele o ana tupua;

I le Numera 22:19-35, ua fa’asili ia Pala’amo le ‘oa sa ta’ua e le Tupu mo ia, nai lo le faatonuga a le Atua. Ina ua fa’atonu e le Atua e ‘aua nei ia usita’ia le valaau a le Tupu, peita’i sa toe foi Palaamo e fesili i le Atua pe tatau ona alu, ona tali lea o le Atua e tusa ma le tupua sa i le loto a Palaamo, o le matape’ape’a, ona faatonu ai lea e le Atua ia Palaamo e alu. A o malaga i luga o le ala sa fa’atalitali ai le agelu e fasioti ia Palaamo. Ana le seanoa le pupula atu o le asini ma iloa ai le agelu, semanu e oti Pala’amo ona o le tupua o le matape’ape’a sa nofo i lona loto.

O lo latou Atua o le Atua fuā. Fai mai le Esoto 34:14- ‘Aua e te le ifo i se tasi Atua; auā o Ieova o le Fuā, o lona lea suafa, o le Atua fuā lava o ia.”

O le taimi lava e fa’asili ai lau va’ai i se tagata po se mea o le lalolagi, o le a afio  ‘ese mai le Atua ia oe, ma ia e talitonu mai  i la’u tala faamaoni lenei, o le mea pito sili ona leaga i so’o se tagata, o le afio ese o le Atua mai lea tagata. 

Ia e sa’ili mae’ae’a i lou loto, ma ia e faamaoni ia te oe lava.  A iai lava se mea ua e fa’amuamua nai lo le Atua, ‘ai’oi atu I le Atua i le asō, mo lona alofa mutimutivale, I le suafa o Iesu Keriso, Amene.   

OPEN HEAVENS

MATALA LE LAGI MO LE ASO GAFUA 26 IUNI 2023

Manatu Autu:  E leai oe e aunoa ma le Atua (You are nothing without God)

Tauloto – Tusi Paia: Salamo 103:10 ‘E le‘i faia e ia ‘iā i tatou e tusa ma a tatou agasala; e le‘i taui mai fo‘i o ia ‘iā i tatou e tusa ma a tatou amio leaga...”

Faitauga - Tusi Paia: Luka 7:36-47

Upu Folafola

I le 1 Tupu 3:4, na filifili e Solomon e avatu se taulaga mu I le Atua e matua taua. Na ia faitaulaga I le 1,000 povi. E mautinoa na matua ofo le au ositaulaga sili, peitai na manatu Solomona I le auala na fanau mai ai, e matua le agavaa ai lona tagata e avea ma se tupu. I le vaaiga masani, o Solomona e tatau ona matua itagia, peitai o ia le tagata ua filifilia e avea ma tupu. Ua ia malamalama lelei e lei agavaa o ia I mea na foai atu e le Atua ia te ia, ma e na te le’i tuua se mea I le taimi na ia avatu ai le faafetai i le Atua. 

O le tele o taimi, e le lava lau faafetai e ave I le Atua ona e te manatu e te matua agavaa I mea uma ua foai atu e le Atua ia te oe. Peitai a e vaavaai loloto iai, e sese lou manatu. O le aso na faaali mai ai e le Atua ia te au, ona o a’u e le o se atalii mai le toalua muamua o lo’u tama, e le tatau la ona faaaogaina a’u pe a tusa ma le tulafono, ae o lona alofa mutimutivale ua mafai ai ona faaaogaina a’u, na amata ai ona faamaualalo lou loto pe a oo ina avatu la’u faafetai. Fai mai le Isaia 64:6 

6O i matou nei e tusa ma le mea leaga i matou uma; o a matou amiotonu uma e tusa ia ma le ‘ie o le ma‘i. ‘Ua mamae i matou uma e pei o le lau la‘au, o a matou amioletonu e pei se matagi ‘ua lelea ai i matou.  

Afai e te manatu o au faamanuiaga ua maua ona o lou galue malosi, e tatau ona e alu e vaavaai I tagata o lo’o galulue malolosi atu I lo oe, ae e le o mauoa I latou. Afai e te manatu o lou manuia I le taimi nei e fua I lou poto ua maua, e tatau ona e alu I le fale vale e vaavaai ai I le toatele o tagata popoto o loo iai ua faaletonu o latou mafaufau, ua pa o latou poto. O le mafai ona e alafa’i mai I le taeao fou, ua lava lea mafuaaga e te faafetai ai I le Atua. Fai mai le Salamo 3:5 Na ‘ou ta‘oto lava a‘u ma ‘ou moe; na ‘ou ala auā ‘ua lagolagoina mai le ALI‘I ‘iā te a‘u.

Afai e te manatunatu loloto iai, e te iloa ai e te le agavaa I so’o se mea ua foai atu e le Atua ia te oe. E te iloa ai o le Atua o lo‘o ola ai i tatou, ma gāoioi ai, o lo‘o i ai fo‘i i tatou ‘ona o ia; (Galuega 17:28)’. E te iloa ai, e leai oe e aunoa ma ia, auā e lē mafaia e ‘outou ‘ona fai se mea e tasi pe a aunoa ma le Atua (Ioane 15:5). Ou te le iloa ia te oe, ae o a’u, semanu faapenei ua leai se a’u pe ana le seanoa le Atua. Ou te iloa o mea uma o lo’o ia te au ua maua I le alofa mutimutivale o le Atua ia te a’u, ma ou te vivii pea ia te ia ma lo’u loto atoa. Ou te le taofia se mea pe a avatu la’u faafetai I le Atua. Faaavanoa sou itula atoa e tau lava o le faafetai I le Atua ona o mea uma ua ausia e lou tagata ma foai atu ia te oe. I le suafa o Iesu Keriso, Amene.  

OPEN HEAVENS

MATALA LE LAGI MO LE ASO SA 25 IUNI 2023

Manatu Autu:  Malosi Faleagaga (Spiritual superiority)

Tauloto – Tusi Paia: Teuterenome 4:24 ‘Auā o le ALI‘I lou Atua o le afi ma‘ama‘ai ia, o le Atua fuā ia..”

Faitauga - Tusi Paia: 2 Tupu 6:15-23

Upu Folafola

O le malosi fa’aleagaga e te mafaia ai ona fa’ato’ilalo ou fili ma e fāifāi i ai. Faapena le tulaga na tupu o loo faamatala mai le tusi o Kolose 2:15 “ua tu’ueseina e ia o alii sili ma faipule, ona fa’aalia mai lea o i latou ia iloa uma, ua manumalō o ia iā te i latou i lea lava mea.”

Ua faamatala mai le 2 Tupu 6:8-20 se tupu na vaai ia Elisaia o se fili ia i latou, ona ia auina atu lea o se autau tele e pu’e ia te ia. Peita’i latou te le’i mafaia aua na fa’ailoa e Elisaia lona malosi fa’aleagaga e ala i le faatauasoina o le ‘autau. E lē gata i lea na ia ta’ita’ia i latou pei o pologa i lima o lo latou fili le ‘autau a Isaraelu.

A silasila mai le Atua i se alii po’o se tama’ita’i e ola faapaiaina na te fa’aaogaina lea uso e fa’amāina ai le fili ma ta pu’e i ana ‘autau. Afai e māfana le lua mafutaga ma le Atua e te lē tau tatalo ia faatoilaloina ou fili aua fai mai le Tusi Paia I le Salamo 23:5 “E te laulau mai meaai ma a’u i luma o e ita mai iā te a’u, ua e fa’au’uina lo’u ulu I le suāu’u ua taumasuasua la’u ipu.”

Afai e fa’aumatia uma ou fili o ai a matamata i lou manumalō ? Ou te tatalo mo oe ia siitia oe e le Atua i le malosi fa’aleagaga e manumalō ai i so’o se taimi e osofaia ai e le fili, ina ia Viia pea le Atua i lou olaga. O lou mafaia ona e faailoa lou malosi fa’aleagaga I le tiapolo, e maua pe a e pipii ma latalata i le Atua. O le a le latalata o le lua mafuta e te mana’o ai ma le Atua-le afi ma’ama’ai? Fai mai toeaiina a umi ona tu’u faatasi se lau laau ma se fasimoli e avea ma fasimoli. A lava le lua mafutaga ma le Afi ma’ama’ai e avea fo’i oe ma afi ma’ama’ai. A e mana’o e te mafaia ona faamāina ou fili, e mana’omia lou mafuta vavalalata ma le Afi ma’ama’ai. O le tau o le malosi fa’aleagaga o le atoatoa o le ola faapaiaina ma le mafutaga mafanafana ma le Atua. Ia avea le olaga tatalo ma le anapogi ma au masani.

A aunoa ma le ola fa’apaiaina e lē mafai ona e ulu atu i le mamalu o le Atua. Ola faapaiaina ona e vaai lea I le tiapolo o augani atu ia te oe e tatala latou, i taimi uma e te saisaia ai ma fa’ato’ilalo le fili i le suafa o Iesu. Afai e te matua latalata I le Afi e ma’ama’ai, e avea foi oe ma afi ma’ama’ai I ou fili uma, I le suafa o Iesu Keriso, Amene.

OPEN HEAVENS

MATALA LE LAGI MO LE ASO TOONAI 24 IUNI 2023

Manatu Autu:  Usita’i I lou faifeau (Obey your Pastor)

Tauloto – Tusi Paia: Galuega 2:42 “‘Ua tumau pea i latou i le a‘oa‘oga a le ‘au ‘aposetolo ma le mafuta fa‘atasi, ma le tofitofiga o le areto, ma talotaloga..”

Faitauga - Tusi Paia: Eperu 13:17-18

Upu Folafola

Afai ua e filifilia se tasi e avea ma ou faifeau poo lou tamā fa’aleagaga e tatau a lā ona e usita’i i ai. E toatele tagata latou te valaaua a’u o tamā ma fai mai o a’u lo latou tamā fa’aleagaga ae ou te iloa e lē moni aua e lē usiusita’i i a’u faatonuga pe a lē tusa ma o latou mana’o. Afai e te lē usita’i i le uso o loo avea ma ou ta’ita’i fa’aleagaga o lona uiga e te lē o i lalo o lana fa’amalumaluga. Usita’i i lou faifeau ina ia mafai ona o’o atu ia te oe so’o se mea e finagalo le Atua e fai mo oe e ala atu i lou faifeau. Fai mai le Eperu 13:17‘Ia ‘outou usiusita‘i i o ‘outou ta‘ita‘i ma ‘outou gaua‘i i ai; auā o lo‘o leoleo i latou mo o ‘outou agaga, latou te tala atu le tala i ai, ‘ina ‘ia faia ma le ‘oli‘oli, ‘ae ‘aua ma le tigā; auā e lē aogā lea ‘iā te ‘outou.

E faigofie le galuega a le faifeau pe a galulue faatasi ma lana aulotu ma fa’atino a’oa’oga o loo laugaina mo i tatou mai le pulela’a. A e faalogo i se feau mai le fata faitaulaga e o gatusa ma le Upu a le Atua, usita’i ma fai. Afai ou te fa’aali atu ia te oe fetalaiga a le Atua i totonu o le Tusi Paia fai mai “ia faapea ona fai,” e tatau lava ona e usita’i. A e lē usita’i i le upu a le Atua pe a folafola mai e lana auauna i le pulela’a e lē o le faifeau lenā ua e lē usita’i i ai a’o le Atua na auina mai le faifeau.

E toatele tagata e usita’i na o se vaega o le Upu a le Atua. E usita’i na o Afioga Paia e fiafia i ai ma fetaui ma o latou mana’o ae lē amanaia isi. O le mafuaaga lea o le toatele o kerisiano latou te lē maua tali o latou mana’o ona e lē o atoatoa lo latou usita’i. Se’i vagana ua atoatoa lou usita’i faatoa mafai ona e tete’e atu i le tiapolo ona sola ese ai lea iā te outou. Fai mai Iakopo 4:7 “ia outou gaua’i I le Atua.”

Faamolemole le au pele e, aua le fa’a maa’a o outou loto pei o le fanauga a Isaraelu na faatupu ai pea le ita o Mose se ia o’o ina ia sasa le papa i lona to’oto’o ma lē taunuu ai i le nu’u na folafolaina. (Numera 20:1-12). Aua e te faavaivai pe faatupu le ita i lou faifeau a ia e faamalosi iā te ia e ala i lou gaua’i i ana faatonuga e pei ona fai mai le Filemoni 1:21. Tausi lelei lou faifeau e amata i le asō e avea lea ma faamalosi’au ia te ia mo le galuega fitā o loo ia faia mo oe. I le suafa o Iesu Keriso. Amene.

OPEN HEAVENS

MATALA LE LAGI MO LE ASO FARAILE 23 IUNI 2023

Manatu Autu:  Na o oe ma le Atua (Alone with God)

Tauloto – Tusi Paia: Luka 4:42 “Ua ao, ‘ona ulufafo lea o ia, ‘ua maliu atu i le mea tu‘ufua; ‘ua sā‘ili fo‘i ‘iā te ia le motu o tagata, ‘ona ō mai ai lea ‘iā te ia, ma tāofi ‘iā te ia, ‘ina ‘ia lē maliu ‘ese o ia ‘iā te i latou...”

Faitauga - Tusi Paia: Salamo 84:1-12

Upu Folafola

O mea tetele e mafai ona maua e le tagata I le olaga e maua mai I taimi paganoa e mafuta ai ma le Atua. O taimi ia e afuafua ai lumanai manuia o tagata. A e silasila I le Upu a le Atua ma suesue lelei tagata na ausia tulaga tetele mo le Atua, e te maitauina e tele o latou taimi na matua mafuta ai na o I latou ma le Atua. I le Esoto 24:18, sa iai Mose I luga o le mauga mo le 40 aso ma le 40 po e mafuta ai na o ia ma le Atua. Leitioa ua na o ia lava le tagata na vaai I le Atua. Ina ua ia vaai atu I le patua o le Atua I le Esoto 33:23, fai mai le Tusi Paia o le mamalu na atagia I ona foliga ua matua susulu ua le mafai e tagata ona pupula atu ia te ia. O le mea lena e tupu pe afai e tele lou taimi e mafuta ai ma le Atua. O lona mamalu e pipii atu ma atagia ia te oe e iloa uma e tagata o lo’o iai faatasi ma oe. 

O le tele o taimi e talanoa mai ai le Tusi Paia ia Elia, o lo’o iai o ia I luga o le mauga. E te alu I le tumutumu o le mauga e te alu ese mai le mea o tumu ai tagata ina ia mafai ona e iai na o oe ma le Atua. O le a le taui o le mafutaga faifaipea a Elia ma le Atua? Na mafai e Elia ona ia valaau mai I lalo le afi I so’o se taimi e manao ai. O taimi e te mafuta ai ma le Atua e mafai ai ona siitia lou tomai ma le agavaa e faia mea sili I lo mea e masani ai. O Iosefa o se tagata e pisi I lona galue ai I le fale o Potifara, e fuafuatauina lelei le oa ma lona tamaoaiga. I le taimi atoa na pisi ai, e lei faapea na gata ai ona miti mo lona lumanai manuia. Ao lokaina o ia I le falepuipui, na ia maua le taimi e mafuta ai ma le Atua ma tuputupu pea, ua siitia mai le tagata fai miti I se tagata e faamatala miti. 

O lou malosiaga ma le tulaga lelei, faatoa iloa lelei pe afai e tele sou taimi e faaalu e te mafuta ai na o oe ma le Atua. I le taimi o le galuega a Iesu I le lalolagi, e lei faatamala I lona taimi ma le Atua (Luka 6:12, 21:37). Leitioa a mafai ona ausia ma faataunuuina le faamoemoega o lona olaga e ui e ese ma le faigata. Ia e fuafua lelei lou taimi e mafuta ai ma le Atua, e vivii ai ia te ia, tatalo, anapogi, suesue ma manatunatu I lana Upu. Aua e te ula ma fia malie I lou taimi na o oe ma le Atua, e tatau ona avea o se fonotaga pito sili ona taua o lena aso. E fia ni minute ma ni itula e te mafuta ai na o oe ma le Atua? I le suafa o Iesu Keriso, Amene. 

OPEN HEAVENS

MATALA LE LAGI MO LE ASO TOFI 22 IUNI 2023

Manatu Autu:  Pe a laasia e le Atua lou olaga (When God steps in)

Tauloto – Tusi Paia: Salamo 62:7 “O lo‘o i le Atua lo‘u olataga ma lo‘u mamalu; o lo‘u papa malosi ma lo‘u malu o lo‘o i le Atua ia..”

Faitauga - Tusi Paia: Esoto 14:9-28

Upu Folafola

A laasia e le Atua le olaga o se tagata, tatou te taʻua o se feiloaiga faa le Atua. O lenei feiloaiga faale Atua ua faasinoina o se fetauiga ma le Atua - o ona mana faalelagi ua fetaui ma tagata soifua ma o latou vaivaiga. I le tusi a Luka 7:11-15, o loo faamatala mai ai se tina ua oti lana tane—sa alu e lagomau lana tama e toatasi, ma na feiloai ai ma Iesu I le ala—O Iesu ua i ai i ona luma le atoaga o le olioli (Salamo 16:11 ). O le uiga o se fetauiga, ua faʻaumatia e le agaga o le olioli le loto faanoanoa. Ua mou faanoanoaga o lenei tina ua oti latou tane, ma ua ia toe fo’i i le fale ma le olioli. O le Atua Silisiliese e faʻafeiloaia oe i le asō ma o le a e mauaina ni suiga lelei se tele i le suafa o Iesu.

I se tasi o a matou Polokalame i ni tausaga ua mavae, na tuuina mai ai e le Alii ia te a’u se faaaliga mo se tasi i le sauniga, ma sa ou faasilasila atu e faapea: “O loo fetalai mai le Alii, e i ai se tasi I le potopotoga lenei, e tatau ona faaipoipo, ae e le o faatagaina e lona tina. Afai e le salamo lenei tina, e oti o ia i totonu o le vaiaso lenei”. E I ai se tamaitai, ou te matauina, e mafai ona faaipoipo, ma na ia talitonu o le upu a le Alii e mo ia, ma sa ia alu i le fale e taʻu i lona tina. O le aso na soso’o ai na sau ai le tinā lenei ma ua toatama’i, ma faapea mai, ‘Na sau la’u tama ma taʻu mai iā te aʻu, ua e saunoa mai, ou te oti i se aso o lenei vaiaso’. Sa ou taʻu atu ia te ia le faaaliga na fetalai mai ai le Atua, ma ou faamatalaina I ai, ou te leʻi taʻuina lava se suafa o se tagata. Na talanoa lenei tina I lana tama teine, e alu ese mai le ofisa, ma na ia faliu mai ia te a’u ma faapea mai, ‘E le faapea ou te le mana’o e faaipoipo, ae na o ia lava o lo’o tausia a’u. O le taimi lava e faaipoipo ai, o le a leai se tasi e tausia aʻu’. Sa ou tali atu, ‘E le o se faafitauli lena, o le a ou talanoa i le uo a lau tama teine ina ia faaauau pea ona laua tausia oe’. Ona faapea mai lea o le tina, ‘E mafai loa la ona faaipoipo I laua’. I le ono o masina mulimuli ane, na faaipoipo ai lenei tamaitai.

I la tatou faitauga Tusi Paia mo le aso, ua tatou iloa ai, le afio o le Atua i olaga o tagata Isaraelu ma aveesea  malaia na I ai a’o i Aikupito. O pine faamau nei, e tatau ai ona tatou faaeteete pe a feagai ma fanau a le Atua, aua e mafai e Iesu ona laasia olaga o ona tagata i so’o se taimi. Afai e filifili le Atua e laasia se tulaga I se taimi, ia e mautinoa, o lo’o e I ai I le li’o a le Atua. ‘Āfai ‘e te gauai ‘iā te ia ma le loto atoa, ‘e mafai ona ia fa‘atoilaloina uma e tete‘e atu ‘iā te oe, ‘ae ‘āfai ‘e te lē ‘au ma ia, o le iuga o lou fete‘ena‘i ma ia, ma e le I’u lelei e pei o mala na vaaia I Aikupito.

Tatalo

Tama, faamolemole ia e laasia lou olaga ma faafetaui so’o se malosiaga o loo tetee mai ia te a’u, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LULU 21 IUNI 2023

Manatu Autu:  Vaiinu faatupu malosi fa’ale Atua 4 (Divine energy drink 4)

Tauloto – Tusi Paia: Mareko 10:27 “A ‘ua silasila atu Iesu ‘iā te i latou, ‘ua fa‘apea atu, “E lē mafaia e tagata, na o le Atua; auā e mafaia mea uma e le Atua.”

Faitauga - Tusi Paia: Salamo 126:1-6

Upu Folafola

E iai foi seisi vaiinu e faatupu malosi e ta’ua o le ‘olioli e le mafa’atusalia’. O le olioli e le mafaatusalia e fa’aa’upegaina oe e faia vavega e o’o ia te oe e te manatu e pei o lo’o faia sau miti pe a e mafaufau loloto iai. Fai mai le Salamo 126:1Na fa‘afoisia mai e le ALI‘I o Siona nai le tāfeaga, ‘ona tusa ai lea o i tatou ma tagata ‘ua fai a latou miti. 

O le olioli e le mafa’atusalia e avatu le malosiaga e faia ai vavega e faigata ona e faasoa I tagata ona latou te ono le talitonu iai. 

Sa iai se tulaga na ou ui ai e tele ni tausaga sa le mafai ona ou faasoa ai. Sa ou tatalo ma savali ma ua o’o atu I le loloto o le togavao ina ia mafai ona ou tatalo toatasi. Sa ou alu ma la’u moli uila ae ina ua maea lau tatalo mo se taimi, ua pepe maa ma ua ou taumafai e sue le auala ou toe foi ai I le pogisa. Ona ou manatua lea o se aoaoga na ou maua mai I le aoga tulagalua, fai mai afai e pogisa tele se potu, ona moeiini lea o ou mata mo se taimi ona toe tatala lea ona amata lea ona iloa atu se mea I le pogisa. Ua ou moeiini mo se taimi ona ou toe pupula lea. Ina ua pupula ane ou mata, ua ou iloa ai le masina o loo susulu manaia ma ua malama mea uma I la’u vaai. Ua ou savali mai le togavao I le auala tele, ae ou toe tilotilo atu I le lagi, ua leai se masina. Ou te iloa e faigata ona e talitonu ia te au, ae ou te molimau atu na tupu. 

E iai se alii talavou na maliu le uso o lona tina ona ave lea I le fale maliu ma ua saunia I vailaau e pei ona masani ai. Sa galue lenei alii I Lagos ma e 11 aso faatoa mafai ona maua lona livi mai le fale faigaluega e alu ai I le fale I lona aiga I le maliu. Na o’o atu o ia I le fale I le potu o loo iai le tino maliu o le tina ma o loo ia siia le tama laitiiti lava a lenei tina. Ua ia tago I le solosolo sa faauuina mai se tasi o matou polokalame ma ua fofola I luga o le tino maliu o le tina. Na ia tatalo ae leai se mea na tupu. E lei manatu o ia e iai se mea e ono tupu ae sa faataitai pea lona faatuatua. Ua faanoanoa lava o ia ma ua faliu ma alu I fafo o le potu. E oo atu I le faitotoa, ua ia faalogoina le pa’o I ona tua. E faliu atu, o le tina na maliu ua nofo mai I luga. Ina ua faia lea tautinoga, e toatele tagata e le talitonu ai, ae e moni na tupu. Ou te avatu le talalelei mo oe I le aso, e faatumu e lo’u tama lou olaga I le mau tautinoga ma le ‘olioli e le mafa’atusalia I le suafa mamana o Iesu Keriso. 

Tatalo

Tama, faamolemole faamalosiau ia te au  ia tele ma matautia ina ia ou maua ni vavega e matua faigata I tagata ona talitonu iai, I le suafa o Iesu Keriso, Amene.