Samoan Devotional

OPEN HEAVENS

MATALA LE LAGI MO LE ASO TOFI 10 AOKUSO 2023

Manatu Autu: Tatalo I le Agaga – (Praying in the Spirit)

Tauloto – Tusi Paia: Iuta 1:20 “A o ‘outou le ‘au pele e, ‘ia ‘outou ati a‘e ‘iā te ‘outou i lo ‘outou fa‘atuatua e silisili ‘ona pa‘ia, o le Agaga Pa‘ia tou te tatalo ai...”

Faitauga - Tusi Paia: Efeso 6:18-20

Upu Folafola

Ao ‘ou laʻitiiti lava o se  kerisiano talavou,  o le tusi a le 1 Thessalonians 5; 17 o loo faapea mai ai, "Tatalo e le aunoa" sa ou lē malamalama ai, seia oʻo ina faʻamatalaina e le Alii ia te aʻu.

E masani ona ou mafaufau pe faapefea ona  tatalo e le aunoa. O a ni a'u tala e fai? Ona faailoa mai lea e le Alii ia te a’u, e pau lava le auala e mafai ai ona ou tatalo e le aunoa, o le tatalo lea I le Agaga. O lona uiga, o le faamoemoega o le Atua mo so’o se kerisiano ia tatalo i le Agaga i le aso atoa.

Talitonu mai ma le faamaoni, tatou te le iloa mea uma tatou te manaʻomia. E tusa lava pe e te finau mai e te silafia uma mea e te manaʻomia I le taimi lenei, a o le fesili, e te silafia le mea o le a tupu i le isi lua Itula o lumanai? Afai e te le iloa le mea o le a tupu, e faapefea ona e tatalo ona ua e iloa nei mea o le a tutupu ia te oe? O le mafuaaga lena e iai pea Agaga Paia e tataloina ia tatalo e ala atu ia te oe. E te ole atu mo mea e te manao ai, e faaaoga ai upu; ae o Agaga Paia e fesoasoani ia te oe, e ole atu mo mea e tatau ona e maua e faaaoga ai le tatalo I gagana eseese. A aunoa ma Agaga Paia, e lē mafai ona e tatalo saʻo. O loo faamaonia I le tusi a Roma 8:26 e faapea: 

E fa‘apea fo‘i le Agaga ‘ona fesoasoani mai i lo tatou vaivai; auā tatou te lē iloa mea tatou te ole atu ai ma le tusa, ‘ae peita‘i o le Agaga, e fautua o ia mo i tatou i lē ōi e lē mafai ‘ona talatalaina.

Efeso 5:18 o loo faapea mai foi;

‘Aua fo‘i ne‘i ‘onā ‘outou i le uaina, o le mea e ulavale ai; a ‘ia fa‘atumuina ‘outou i le Agaga.

E mafai ona faapea atu tagata inu ava malosi e latou te matua naunau i le maua o le 'ava malosi. E tatau ona faapena lou naunau e te tatalo i le Agaga. O le tele o lou tatalo i le Agaga, o le tele foi lena o le faatumulia o oe i le mana o  Agaga Paia. E te iloa ai foi, ua amata faigatā ona taofi le tatalo i nisi o taimi. A o e tatalo, o le a faateleina pea le faatumulia o lou tagata I le mana o Agaga Paia, ae mulimuli ane ua e iloa, o mea uma e te faia, o lo’o taitaia e Ia. O lo’o faapea mai le Kalatia 5:17, o le tino ma le agaga o lo’o fete’ena’i pea. O le tele o lou tatalo i le Agaga Paia, o le tele foi lena o le malosi o lou  agaga e manumalo i lena taua o le tino (1 Korinito 9:27). O le a amata ona e naunau i mea o le Agaga nai lo mea o le tino. Ia e tatalo I le Agaga e le aunoa, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 9 AOKUSO 2023

Manatu Autu: Aogā o le Tatalo ma le faatoga– (Benefits of Intercession)

Tauloto – Tusi Paia: Esekielu 22:30 “Na ‘ou sā‘ili ‘iā te i latou se tagata na te atia‘eina le pā ma tu i le mea ‘ua lepetia i o‘u luma mo le nu‘u, ‘ina ‘ia ‘ou le fa‘aumatia ai; ‘ae ‘ou te le‘i maua lava..”

Faitauga - Tusi Paia: 1 Tupu 9:1-9

Upu Folafola

O le aoga pito sili ona lelei o le tatalo ma le faatoga, o le aapa mai lea o le Atua e faalatalata oe ia te ia. E na te faaalia atu ia te oe le laasaga o le a sosoo ai aua ua ia finagalo e te tatalo ma faatoga atu ai. Afai o oe o se tagata tatalo e tu I le va, e te matua latalata I le Atua e te lagonaina lona finagalo ma ona faanaunautaiga. E te tauave ma lagonaina lona finagalo ina ia manumaloina agaga o tagata. A silasila le Atua I tagata e tatalo ma faatoga, e pei lava o loo silasila ia Iesu Keriso aua o ia o le tagata tatalo ma faatoga numera muamua. Fai mai le 1 ioane 2:1 O Iesu e iai lava o ia ma le Tama I taimi uma e fautua mo I tatou. O tagata tatalo ma faatoga e latou te tauave le avega mo agaga o tagata, e pei lava o Iesu e pei ona ia lafoai lona ola mo le tagata. O Mose o se tagata tatalo ma faatoga, na ia faaalia manino lenei avega na ia amoina I le Esoto 32:31-3231‘Ona fo‘i atu lea o Mose i le ALI‘I, ma na fai atu ai, “Auē! ‘ua agasala le nu‘u nei i le agasala tele, na fai mo i latou le atua auro 32o lenei, pe mafai ‘ona e fa‘amāgalo la latou agasala; a leai, ‘ia sōloi‘esea a‘u i le tusi ‘ua e tusia.”

Na ia faatoga atu I le Atua e faamagalo I tagata Isaraelu, a leai ia soloiesea lea o lona igoa mai le tusi o le ola. E faapena le mamafatū o le avega o agaga o tagata I le au tatalo. O le mafuaaga lea e iai faatasi le au tatalo ma Iesu I le vaega poo le matagaluega e tasi. O Iesu o le ulu o le matagaluega ma o so’o se tatalo e tauala mai I le matagaluega lea, o le silasila a le Atua oloo aumai sa’o lava mai ia Iesu. 

Na alofa ma naunau Solomona I tagata o le Atua e sili atu I lona manatu ia te ia lava. O le mafuaaga lea ina ua ia ole atu tau lava o le poto e taitai ai ma le tonu ona tagata, na finagalo loa le Atua e faamanuia ia te ia e sili mamao atu I mea na manatu iai. O tagata tatalo ma faatoga e seasea iai ni a latou manaoga auā ae lei o’o atu I o latou manaoga, ua maea ona faia e le Atua. 

O tagata tatalo ma faatoga moni e lē na o le tatalo mo I latou lava. O le tatalo ma le faatoga e fanau mai I le alofa ma le naunautaiga e manumaloina agaga o tagata mo le Atua. E pei o Tanielu I le Tanielu 9:1-19, a vaai atu le tagata tatalo ma faatoga I folafolaga a le Atua o le a faataunuuina I se olaga o se tagata po’o se atunuu, e amata loa ona ia tatalo mo lea faamoemoe seia faataunuuina, ina ia faamautinoaina e faataunuuina le finagalo o le Atua ma ua puipuia agaga o tagata mai le afaina ma faaumatia. I le suafa o Iesu Keriso, Amene.  

OPEN HEAVENS

MATALA LE LAGI MO LE ASO LUA 8 AOKUSO 2023

Manatu Autu: Tatalo ma faatoga 2– (Intercede 2)

Tauloto – Tusi Paia: Mataio 6:10 “‘Ia o‘o mai lou mālō. ‘Ia faia lou finagalo i le lalolagi, e pei ‘ona faia i le lagi.”

Faitauga - Tusi Paia: Isaia 62:1-7

Upu Folafola

E le gata ina manaomia e le Atua o tagata e mafai ona tatalo mo isi tagata, ae manaomia fo’i e le Atua ni tagata 

e faataunuuina lona finagalo i le lalolagi. Mo se faataitaiga, a o’o i taimi ua loma faiga palota i le tou setete po’o le tou  atunuu, e tatau ia te oe ma isi uso Kerisiano o lena pito nu’u, ona potopoto faatasi ma tatalo tauanau, o le a tulai ma faaalia mai le finagalo o le Atua. E tatau ona tou tatalo i ia ituaiga tatalo e le gata i taimi o faiga  palota, a ia outou tatalo ia ituaiga tatalo i aso faifaipea. O loo fetalai le  Atua i le tusi o Isaia 62:1: “‘Ou te lē fa‘alologo auā o Siona, ‘ou te lē mapu fo‘i auā o Ierusalema. Se‘ia alu atu lana amiotonu e pei o se mea pupula, ma lona olataga e pei o le sulu ‘ua mumū.

Afai e te faalogo i se tagata ua a’ave mai tala i lona galue malosi mo le fa’alauteleina o le malo o le Atua i le lalolagi, e tatau ona e tatalo mo le tagata lena. O lau tatalo ma lau anapogi mo lena tagata o le a avea ma se au’upega malosi i le ‘ausia o le tausinioga ma o le a avea ai oe ma se vaega o lea tausinoga. I le tusi o Eseta 4:15 – 17, ina ua taumafai Eseta e suia se faigafaavae sa fafau ina ia fasiotia ai tagata Isaraelu, sa talosaga Eseta I ona tagata, ia latou tatalo ma anapogi mo ia. O le auala lena sa ia mauaina ai le alofa tunoa I luma o le Tupu, na mafua ai ona vave faatonu e le Tupu  le fasiotia o le tagata sa avea ma ona lima taumatau, o ia lea sa fafauina le faiga faavae leaga lenei. 

E matua manaomia ona tatou tatalo mo tatou taitai. E tusa pe latou te le o talosagaina ni tatou tatalo, ae tatou te mautinoa le feagai o I latou ma le anoanoa’i o lu’itau mai le ti’apolo, ma e moomia a tatou tatalo ina ia manumalo ai i taua nei. E aofia ai fo’i ma tatou faife’au i le vaega lenei; e tatau ona tatou tatalo mo faife’au ma fa’afeagaiga o le upu moni, pe afai tatou te loto e manumalo le malo o le Atua i le taua ma le ti’apolo.

O le tulaga mulimuli, fai mai le tusi o Mataio 5:44 e tatau ona e tatalo mo ē inoino ma faasaua ia te oe: ‘Ae ‘ou te fai atu ‘iā te ‘outou, ‘ia ‘outou alolofa atu i ē ‘ua ita mai ‘iā te ‘outou, ‘ia ‘outou fa‘amanuia atu i ē ‘ua fetu‘u mai ‘iā te ‘outou, ‘ia ‘outou agalelei atu i ē ‘ua ‘ino‘ino mai ‘iā te ‘outou, ‘ia ‘outou tatalo fo‘i mo ē ‘ua tu‘ua‘i fua mai ma fa‘asauā mai ‘iā te ‘outou; Mataio 5:44 

Pe mafai ea ona e tatalo mo le tagata o le a fasioti ia te oe? O le mea lena sa faia e Setefano i le tusi o Galuega 7:60 - ma tatou vaaia le taui i le tusi o Galuega 8:1-8 ina ua maliu mai Iesu e molimau ia Saulo, na avea ma se tasi o Aposetolo sili ona ta’uta’ua i lona vaitaimi. Tatalo mo I latou o faia le amioleaga ina ia latou fetaiai ma le Atua ma avea ai i latou o ni mea faigaluega mo le Alii i lo latou vaitaimi. Faaavanoa sou taimi e tatalo ai mo lou atunuu, lou nuu ma tagata I so’o se vaega na tatou talanoa ai I le asō, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO GAFUA 7 AOKUSO 2023

Manatu Autu: Tatalo ma faatoga 1– (Intercede 1)

Tauloto – Tusi Paia: 1 Timoteo 2:1 “O lenei, e muamua i mea uma ‘ou te apoapoa‘i atu ‘ia faia ōlega, ma tatalo, ma fa‘atoga, ma fa‘afetai mo tagata uma lava;..”

Faitauga - Tusi Paia: Esoto 32:9-14

Upu Folafola

O le tatalo ma le faatoga o le matafaioi a tagata uma o se afafine po’o se atalii moni o le Atua. O latou ia e tatalo I tatalo e finagalo iai le Atua ae le na o tatalo e mananao ai. A manaomia e le Atua se mea e faia I le lalolagi, e saili o ia mo ni tagata tatalo e fai paaga ma ia. E saili mo se tagata e tu I le va mo isi. 

Na ‘ou sā‘ili ‘iā te i latou se tagata na te atia‘eina le pā ma tu i le mea ‘ua lepetia i o‘u luma mo le nu‘u, ‘ina ‘ia ‘ou le fa‘aumatia ai; ‘ae ‘ou te le‘i maua lava. Esekielu 22:30

Manatua foi ina ua sauni le Atua e faaumatia Sotoma ma Komoro I le Kenese 18, na manino lelei sa saili le Atua mo se tagata e tatalo ma tu I le va mo tagata Sotoma. E te silafia ai na talia e le Atua olega uma na faia e Aperaamo mo tagata. E saili pea e le  Atua se tagata e tu I le va mo isi, afai e silasila atu ia te oe, e na te maua ai ea se tagata e tatalo ma faatoga?

E mafai ona e fesili mai, ‘Aisea e le faaalia ai e le Atua I le tagata o loo faasino iai le faafitauli ina ia tatalo ai lava o ia?’. O le mea moni, e iai taimi e manaomia ai e le Atua se tagata e tatalo ina ia aua nei faaumatia lea tagata. I taimi faapena, e na te tuuina I le loto o se tagata tatalo e tu I le va ma faatoga e ala I le tatalo. O loo faaalia manino lea tulaga I le tala ia Iopu ma ana uo (Iopu 42:8). 

E toatele tagata ua fano I le aso ona ua tau leai ni tagata e tatalo ma faatoga e naunau e tauave le avega o tatalo mo le Atua. Ua lava lou tatalo tau lava o oe. Aua le avea oe ma kerisiano manatu faapito tau lava o oe. Afai e te tatalo, ia e faataga le Atua e tuu I lou loto tatalo mo isi atunuu e le o sou atunuu, ‘aua e te faapea mai ‘o le a lau pisinisi I la tagata?’. Tatalo e pei ona ia tuu I lou loto ina ia faaolaina se tagata e toatasi. E iai taimi e fai atu ai ia te oe e tatalo mo seisi tagata se toatasi, ia e faia auā e leiloa po’o lau tatalo e iloa ai le eseesega pe ola pe oti lena tagata. O lo’o saili le Atua mo tagata e tatalo ma faatoga, e na te maua ea ia te oe? Ia avea oe o se tagata e tatalo ma faatoga mo isi e amata atu I le aso, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO SA 6 AOKUSO 2023

Manatu Autu: Fa’atupu lou malosi fa’aleagaga: vaega 2 – (Increase your Spiritual Capacity 2)

Tauloto – Tusi Paia: Kalatia 5:17 “Auā o le tino ‘ua tu‘inanau lea e tete‘e atu i le Agaga, ‘ua tu‘inanau fo‘i le Agaga e tete‘e atu i le tino; ‘ua fete‘ena‘i fo‘i ia mea o le mea lea tou te lē fai ai mea tou te loto i ai..”

Faitauga - Tusi Paia: Roma 8:1-13

Upu Folafola

Na tatou faalogo ananafi i le tāua o le faatupu o lou malosi fa’aleagaga. O le asō o le a tatou talanoa pe faafefea ona faatupu o tatou malosi fa’aleagaga. O le faamoemoe autū I le faateleina o le malosi fa’aleagaga ina ia tupu lo tatou mafaufau fa’aleagaga, ma ia sili atu ona pei o Iesu ae fa’aitiitia foliga o le tagata toilalo.

Fai mai le Roma 8:7 auā o le loto i la le tino o le ita lea i le Atua; auā e lē usiusita‘i i le tulafono a le Atua, e lē mafai fo‘i i ai.

O le laasaga muamua e tatau ona e faia o le lafoai o lou ola I le Alii o Iesu Keriso, papatiso e ala i le faatofu I le vai, o le faailoga o le oti I le tino ma le ola fou ia Iesu Keriso. A mae’a lea ia e saili i le papatisoga I le Agaga Paia ma faa afio o ia i lou loto ma pulea lou olaga.

A maea loa ona faataunuu la’asaga muamua ua taua i luga, amata loa lea ona faaitiitia mea a le tino sa masani ona e faia. Aua ne’i e faatagaina oe e pulea e le tino. E lē mafai ona fa’aalu uma ou taimi avanoa i luga o upega tafa’ilagi, alu i patī ma faigā’ai i taimi uma e te mana’o ai. Afai e te faamalie pea mea uma e mana’o ai le tino, e tumau ai lava ona pulea oe e le tino ma i’u ai i le fa’afanoga e faavavau. Fai mai Paulo I le Galuega 17:28 O Iesu e ola ai i tatou le au faatuatua, ma gaoioi ai, o lo’o i ai fo’i i tatou ona o ia. E tatau fo’i ona fai lea ma a tatou ta’utinoga. E te mana’omia fo’i Agaga Paia e pulea le tino. Fai mai le Roma 8:13 “13auā ‘āfai tou te amio i la le tino, e oti ai ‘outou; ‘ae ‘āfai e fasiotia e ‘outou amioga a le tino e le Agaga, tou te ola ai.”

Ina ia fa’aauau pea le tupu ma ola o lou malosi fa’aleagaga, e tatau ona matua’i e tatalo e lē aunoa, e pei ona fai mai ai le 1 Tesalonia 5:17. Afai e te lē naunau e tatalo faatauanau ma le loto faatuatua e te lē o naunau fo’i la e faatupu lou malosi fa’aleagaga. Afai e lē mafai ona e tatalo mai lou malamalama, tatalo I le Agaga. O le anapogi ma le su’esu’e I le Upu a le Atua i aso uma e tatau ona avea ma au masani ma vaega o lou olaga. (Ieremia 15:16) E tatau fo’i ona e saili le siufofoga o le Atua i taimi uma. Fesili I le Atua i mea uma e te lē malamalama ai i ana Afioga Paia.

O nei laasaga e ono foliga faigofie ma lē faigatā ona fai peita’i e toatele tagata e faigata ona latou faataunuuina ma tausi. I le suafa o Iesu Keriso. Amene

OPEN HEAVENS

MATALA LE LAGI MO LE ASO TOONAI 5 AOKUSO 2023

Manatu Autu: Fa’atupu lou malosi fa’aleagaga : vaega 1 – (Increase your Spiritual Capacity 1)

Tauloto – Tusi Paia: 2 Korinito 4:18 “O lo‘o matou lē mānatunatu i mea ‘ua va‘aia, a o mea e lē va‘aia; auā o mea ‘ua va‘aia e gata mai ia, a o mea e lē va‘aia e fa‘avavau ia.”

Faitauga - Tusi Paia: Iakopo 4:7-8

Upu Folafola

E toatele e fai mai o le fa’aleagaga e pulea le faaletino ma e sa’o lelei lea manatu peita’i e toatele latou te lē fa’aaogaina lea manatu. O le taimi lenei ua tatau ona amata faatupu ma faalautele lou tomai I le Agaga ina ia mafai ona e pulea mea fa’aletino.

A e malosi fa’aleagaga e te malosi fo’i i le tino. A e lē talitonu ia te a’u faitau le 2 Tupu 6:14-15. Ina ua mana’o le tupu e pu’e Elia, na ia auina atu fitafita e limasefulu ma lo latou ta’ita’i’au ae ina ua mana’o e pu’e Elisaia na auina atu e le tupu le autau atoa. Sa ia Elisaia le fa’aluaina o le agaga o Elia a tu’u fo’i la i le fa’aletino e malosi atu fo’i Elisaia ia Elia.

O le loloto o lou ola fa’aleagaga o le maualuga fo’i lea o lou lele fa’aletino. E foliga mai e sili atu le malamalama o tagata o le lalolagi I lea tulaga na i lo’o le toatele o Kerisiano. A mana’o le tagata ifo i tupua i se tulaga maualuga, e muamua lava fai ana tapuaiga i tupua. E toatele Kerisiano fa’alēiloga i aso nei e taumafai e tauvā ma tagata lē faaolaina nei mo ia tulaga. Ua silafia uma e tagata o le maualuga o se fale fausia o le loloto fo’i lea e tatau ona i ai lona faavae. Ua tatau ona e amata su’esu’e le Tusi Paia, faaopoopo ou taimi tatalo ma anapogi pe a e mana’o e siitia lou tulaga. O le loloto o lau tapena o le maualuga lea o lau lele.

Toatele ua uma ona latou faitauina le Tusi Paia mai le Kenese i le Faaaliga, peita’i ua na o se vaega to’a laititi ua a’oa’oina e uiga i vaega uigā ma loloto o le ola fa’aleagaga mai le Upu a le Atua. Toatele ua faitaua le Faataoto 6:26 peita’i a faaosoosoina e se fafine i le faitaaga latou te lē lagonaina o lo’o i ai se mailei i le siosiomaga e faaleaga ia i latou. O le mafuaaga lea o le toatele o Kerisiano e pauū i mailei a le tiapolo i aso nei, auā latou te lē malamalama pe faafefea ona fa’ato’ilalo le fili.

Afai e te mana’o e avea oe ma tagata milionea, o le a lua tau ma temoni e tau ma milionea. E lē avea oe e le Atua i se tulaga maualuga e lē mafai e lou malosi fa’aleagaga ona fa’afoe; afai na te faia o lona uiga ua ia tuuina atu oe e fa’ato’ilaloina. Siitia lou malosi fa’aleagaga ona e vaai lea e siitia e Iesu oe i luga seia tutusa lou malosi fa’aletino ma lou malosi fa’aleagaga. A mafai ona e pule I le fa’aleagaga e mafai fo’i ona e pule i lē fa’aletino. I le suafa o Iesu. Amene.

OPEN HEAVENS

MATALA LE LAGI MO LE ASO FARAILE 4 AOKUSO 2023

Manatu Autu: Tatalo mo lou nuu (Prayers for your community)

Tauloto – Tusi Paia: Levitiko 19:16 “Aua ‘e te fealua‘i i lou nu‘u ma fe‘ave‘avea‘i; ‘aua fo‘i ‘e te molimau pepelo i lē lua te tuā‘oi e oti ai o ia: O a‘u o le ALI‘I.”

Faitauga - Tusi Paia: Levitiko 19:15-18

Tatalo

1.       Tama, faafetai mo tagata uma, o aoga, o Ekalesia ma mea uma ua e totoina I lo’u nuu. 

2.       Tama, faamolemole ia e faamanuia I aiga uma I lo’u nuu. Ia e faamautuina ma faamalolosi faaipoipoga a ulugalii uma ma ia aoaoina tamaiti uma I ou ala. 

3.       Tama, faamolemole ia iai le loto gatasi I ou tagata I lo matou nuu I le suafa o Iesu. 

4.       Tama, faamolemole ia iai lou mamalu I totonu o so’o se faalapotopotoga I lo’u nuu I le suafa o Iesu. 

5.       Lo matou Tama, faamolemole fesoasoani I kerisiano uma I lo’u nuu ina ia latou avea o ni tagata lelei e fai ma ou sui vaaia e tusa ma lou finagalo, I le suafa o Iesu. 

6.       Le Alii e, faamolemole fesoasoani I taitai uma I lo’u nuu ia latou taitai e tusa ma lou finagalo I le suafa o Iesu. 

7.       Tama, faamolemole ia maua ni avanoa e fetaiai ai tagata o lo’u nuu ma lau afio, I le suafa o Iesu. 

8.       Tama, faamolemole ia iai pea ni atinae fou ma siitia pea galuega e faia I totonu o lo’u nuu, I le suafa o Iesu. 

9.       Lo matou Tama, faamolemole ia e taofia so’o se mea leaga po’o le amioleaga mai totonu o lo’u nuu, I le suafa o Iesu. 

10.   Tama, faamolemole ia e tafiesea so’o se ituaiga ma’I mai lo’u nuu I le suafa o Iesu. 

11.   Tama, faamolemole ia taofia so’o se vevesi ma ni misa mai totonu o lo’u nuu, ia taofia le vevesi I le va ma isi nuu e o’o I nuu tuaoi, I le suafa o Iesu. 

12.   Tama, ia maualuga pea lou viiga I totonu o lo’u nuu, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO TOFI 3 AOKUSO 2023

Manatu Autu: Amiotonu (Integrity)

Tauloto – Tusi Paia: Faataoto 20:7 “E savali ma le tonu lē ‘ua amiotonu; e manuia lana fānau pe a mavae atu o ia..”

Faitauga - Tusi Paia: Faataoto 28:6-10

Upu Folafola

O le amiotonu o lou savali I au upu, o lona uiga e o gatasi upu e te tautala ai ma mea e te savali ai ma faia. O so’o se tagata e faapea mai o se kerisiano e tatau ona avea o se tagata e amiotonu. O lo tatou Alii o Iesu Keriso na fetalai:

37 A ‘ia fa‘apea la ‘outou ‘upu, ‘Ioe, ioe’ ‘E leai, e leai’; auā o le ‘upu e sili i nā ‘upu, mai le leaga lava ia (Mataio 5:37). 

Afai e te folafola e faia se mea, o le mea lena e tatau ona e faia. Afai e iai se mafuaaga ua le mafai ai ona faataunuuina, e tatau ona e talanoa lelei I le tagata o loo aafia ma faamatala manino le mafuaaga ua le mafai ai. E le mafai ona e toe foi I tua mai se folafolaga e aunoa ma se faamatalaga e faamanino ai. E le faapena lou Tama I le lagi, o Lē e te faapea mai e te so’o iai. 

Ou te manatua le faatoa uma lava o la’u aoga I le Kolisi ma a’o saili se auala e totogi ai lau aoga I le Iunivesite. Na ou alu vaai le pulega o se aoga Iata ane, ma na latou talia lau talosaga e latou te totogiina lau aoga ae pau le aiaiga, e tatau ona ou aoga I le Matematika ma ia toe foi mai ma galue I le aoga lea mo le 5 tausaga. Ina ua ou faauu mai I le Iunivesite ma le faailoaga muamua, na ou foi ma galue ai peitai ina ua maea le lua ma afa tausaga, na ou toe talosaga e fia faia le isi faailoga o le masters. Na fai iai lau upu ou te toe foi mai lava e faaatoa le lua ma le afa Tausaga o loo totoe o le aiaiga e lima Tausaga. E latou te lei talitonu. Na uma le faailoga lona lua ma ua ou toe foi e galue I le aoga lea. I le taimi lea, ua amata ona matamuli le aoga ona ua sili atu ou faailoga I lo le pule o le aoga. Ina ua maea le tasi ma le afa Tausaga, na ou toe talosaga foi pe mafai ona ou alu e fai le faailoga mulimuli o le PHD. Ua talia lelei e le aoga lau talosaga ma faapea mai: ‘Ua e saoloto e te alu ma e le toe manaomia le toe foi mai e galue’. 

O le suafa o Iesu e matautia, e matua matautia fai mai le Filipi 2:10-11, a tautau le suafa o Iesu e tootuli tulivae uma I le lagi, le lalolagi ma lalo o le lalolagi ma tautau o Iesu o le Alii. E ui e matautia lona suafa, fai mai le Tusi Paia e na te faasilisili lana upu e sili atu I lona suafa (Salamo 138:2). O le mafuaaga lea e tatou te faatuatua ai ma le atoatoa I le Upu a le Atua, aua ua tatou iloa e na te faia mea uma ua ia folafola e faia. 

A e fai mai e te faapei o Keriso, e tatau ona e tausia ma faatino au upu. E faatino lava e Iesu lana Upu ma e tatau foi ona tatou faataitai iai ma faatino a tatou upu, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LULU 2 AOKUSO 2023

Manatu Autu: Mo lona viiga (For His glory)

Tauloto – Tusi Paia: 1 Korinito 10:31 “O lenei, pe tou te ‘a‘ai, pe tou te inu, po o se tasi mea tou te faia, ‘ia ‘outou faia mea uma lava ‘ia vi‘ia ai le Atua.”

Faitauga - Tusi Paia: Iakopo 4:1-10

Upu Folafola

So’o se taimi e te ole atu ai I le Atua mo se mea, ia e faamautinoaina o se mea e viia ai o ia. Aua ete ole atu I mea e tau lava e faamalie ai oe ae ia aoga mo le Atua. Afai e te fia manumalo I se palota, e tatau ona e tau atu I le Atua pe faapefea ona e faaaogaina lena tulaga e viia ai o ia. O le ituaiga tatalo lena e vave ona silasila mai iai le Atua. 

E mafai e le Atua ona liliu ese mai ia te oe pe afai ua tele naua tatalo ua e tuuina atu. Peitai afai e te alu atu ia te ia ma se fuafuaga e faalauteleina ai lona malo I Ie lalolagi nei, e vave ona liliu mai ona fofoga. Na malamalama lelei Hana I lenei tulaga ma o lea na ia tatalo ai: 

Ua ia tautō fo‘i, ‘ua fa‘apea atu, “Le ALI‘I o ‘au e, ‘āfai ‘e te silasila mai i le puapuagā o lau ‘au‘auna fafine, ma e manatu mai ‘iā te a‘u, ‘ae lē fa‘agalogalo mai i lau ‘au‘auna fafine, ma e foa‘i mai i lau ‘au‘auna fafine se tama tane, ‘ona ‘ou foa‘i atu lea o ia i le ALI‘I i aso uma o lona ola; e lē o‘o fo‘i se tafi i lona ulu.”(1 Samuelu 1:11). 

Na tali le Atua I lana olega ma foai atu le atalii na tuputupu a’e ma avea ma perofeta ma na ia faaopoopo ia Hana isi tamaiti e toalima. 

Saili e viia le Atua muamua ona e vaai lea e na te foai atu e sili atu I mea o lo’o e ole atu ai. E na te silafia ou manaoga ae e te lei alu atu I ona luma (Mataio 6:8), avatu laia o se ofo e le mafai ona ia teena ona e vaai lea e na te foai atu ma le faulai e sili atu I lō ou manaoga. 

E mafai ona e faapea mai, ‘E alofa le Atua ia te au ma ou te talitonu e na te foai mai so’o se mea ou te manao ai’. E moni e le tau faamaninoina e alofa le Atua ia te oe, ae e iai le faamoemoega o mea uma e faia e le Atua. E te ono manatu na faia e le Atua ia malelemo uma Farao ma ana au I le sami ulaula ona o lona alofa I le fanauga a Isaraelu, peitai o lo’o fai mai le Roma 9:17 “Auā ‘ua fa‘apea mai le Tusi ‘iā Farao, “O lenei lava le mea ‘ua ‘ou fa‘atū ai ‘iā te oe, ‘ina ‘ia ‘ou fa‘aalia lo‘u mana ‘iā te oe, ‘ina ‘ia ta‘ua fo‘i lo‘u igoa i le lalolagi uma lava.”

O le mafuaaga tonu na faaumatia ai e le Atua Farao, ina ia folafola atu lona viiga ma lona mamalu I le lalolagi atoa. O le faamoemoega a le Atua e sili atu I lo tatou manatu. Afai e o gatasi au fuafuaga ma faamoemoega a le Atua, e te maua so’o se mea e te manao ma ole atu ai. Ia o gatasi au fuafuaga ma le faaamoemoega a le Atua ona e le toe mativa lea I se mea, I le suafa o Iesu Keriso, Amene. 

OPEN HEAVENS

MATALA LE LAGI MO LE ASO LUA 1 AOKUSO 2023

Manatu Autu: O loo loma aso e malamalama atu (Brighter days are ahead)

Tauloto – Tusi Paia: Faataoto 4:18 “A o le ala o ē amiotonu, e tusa ia ma le malamalama o le ao, o lo‘o tupu pea lona malamalama e o‘o i le totonu o le la”

Faitauga - Tusi Paia: 1 Samuelu 2:7-9

Upu Folafola

E le afaina le maualalo o le tulaga o lo’o e iai, e iai le faamoemoe mo le lumana’I e matautia. Ua ou molimauina le siitia e le Atua o le tagata, mai le palapala o le eleele ae siitia i le tumutumu o le mauga. Pe e te talitonu iai pe leai, e na te faia mo oe, I le suafa o Iesu.

O lo’u olaga e molimauina lea tulaga. Sa ou savali e aunoa ma ni seevae mo le uluai 18 tausaga o lo’u ola. Ma e le galo ia te a’u le tausaga mulimuli i le Kolisi sa ou a’oga ai. Ua loma le matou lauga togi ma e tele ou togi ma faailoga e maua. O le matou vasega fa’au’u, sa fai le matou toniga ofu vae papa’e ma seevae, paga lea, e leai so’u ofuvae paepae, uliuli pe mumu. A’o seevae, ou te lei see lava i se seevae. Ona amata lea ona ou tagi tautala, “Le Atua e, e te silafia lelei e leai so’u ofu vae uumi, aisea na faataga ai a’u e maua nei faailoga e tele?” Ae o’o I le isi aso, se faapea mai se tama nofo tumau a le matou a’oga, ou te alu atu e fesoasoani i lona filifilia o sona ofu vae uumi mo le lauga togi, aua e 6 lelei ona ofu vae uumi. Na ou fesoasoani lea iai ma ou fai iai “E te iloa e leai so’u ofu vae uumi e ofu” Ae ofo mai la’u uo ma fai mai: “tago e filifili sou ‘ofuvae.” E ui ina matua telē le ofu vae uumi mo a’u, ua toetoe a o’o I luga o lo’u fatafata, ae matua ou le popole a iai, o le ofuvae a o le ofuvae!

O le faafitauli e sosoo ai, o ni seevae. O iina sa ou manatua ai le uso a lo’u tama, e mativa lava ae sa iai ona seevae. Na ia aumaia le pea seevae tuai, e fai I pa’u mai pa’u o le loli le pito i lalo o seevae. Sa tau faata’ita’I la’u savali i seevae aua o lea faato’a ou see ini seevae i lo’u olaga atoa! Peitai ina ua o’o i le aso o le lauga togi, ua iai o’u seevae ma le ofuvae u’umi mo le sauniga. 

Tusa pe sili atu ona faaletonu le tulaga o lo’o e iai I lo le tulaga ua ou faamatalaina, ou te molimau atu, o le Atua na ia siitia au, e mafai foi ona ia siitia oe. E sili atu ona matagofie ma malamalama aso o le a oo mai pe a e faatuatua I le Atua ma tuuina atu i ona a’ao mea uma. Ma e tatau ona ou faapea atu, e le’i siitia a’u e le Atua ona o sona lagona, na ia faia ina ia faaalia manino mai lona viiga. Ua ia fetalai mai, a faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi (Mataio 5:16). 

Afai e te tu’uina atoa lou ola ina ia viia ai le Atua ma e te le taofiofia pe matamuli e avatu ia te ia  le viiga I so’o se mea e te ausia, e na te siitia oe, e sili atu I ou manatunatuga.   

O lo’o loma aso e sili atu ona lelei ma matagofie mo oe, i le suafa o Iesu. O so’o se tagata e naunau ma fiafia e viia ma faaneeneeina  le Atua i lona olaga, e na te maua le siitia pea mai le Atua, I le suafa o Iesu Keriso, Amene.