Samoan Devotional

OPEN HEAVENS

MATALA LE LAGI MO LE ASO LULU 30 AOKUSO 2023

Manatu Autu: Avea ma Tagata malosi I le Agaga (Becoming a spiritual giant)

Tauloto – Tusi Paia: 1 Korinito 12:31 ‘‘Ia ‘outou naunau i mea alofa e sili; ‘ae peita‘i ‘ou te fa‘asino atu ‘iā te ‘outou le ala e silisili lava.”

Faitauga - Tusi Paia: Galuega 19:11-16

Upu Folafola

E finagalo le Atua e avea oe ma tagata e tuputupu pea I le agaga seia o’o ina avea ma tagata malosi I le itu faaleagaga. I le 1 Korinito 12:31, e mafai ona tatou naunau ma mana’ona’o I mea alofa e sili. Ina ua ou faitau I lenei fuaitau, na ou faapea atu I le Atua, “Le Alii e, aumai ia te au ia faalua le agaga o Elia, faalua le agaga o Peteru, faalua le agaga o Paulo, faalua le agaga o le Alii o Iesu Keriso a’o iai I le lalolagi, faaopoopo faatasi ona toe faalua lea”. Na ia tali mai o lo’o ou ole atu I se mea ou te faaletonu ai, aua e le mafai ai nei ona tuua a’u e tagata sei malolo. Na ou fai iai ou te manao pea iai ona ou te fia avea ma se tagata e matua malosi I le agaga. E tatau ona faia sau filifiliga ia ‘aua nei avea oe o se kerisiano e pei o le toatele. 

Afai e te fia avea ma kerisiano e matua malosi I le agaga, o lo’o aoaoina I tatou mai le 2 Tupu 2:1-8 e tatau ona e faamaoni I lau Elia. Ina ua finagalo Elia e tuua lenei lalolagi, e faatolu ona mulimuli iai Elisaia, I taimi uma lava na faatonu e Elia ia toe foi, ae musu. O lau Elia o lou tama faaleagaga. I le 2 Tupu 2:9-15 ae o le a tuua le lalolagi e Elia, na maua e Elisaia le faalua o lona agaga. 

E iai se aso na ou tatalo ai ia sili atu lau fanau I lo a’u ae fai mai se tasi o I latou, “ o so’o se tasi e sili ia te oe o lona uiga e oo ina le toe ai”. Ua ia faia lea tala ona o le tele o taimi ou te anapogi ai, ae na ou fai iai ia aua le aveesea le Atua mai lenei mataupu. E le taua tele poo le a le malosi ma le matautia o lou tama faaleagaga, e mafai ona e sili atu pe a tau lava o lou ava ma faamaoni ia te ia. Na maua e Elisaia le faalua o le agaga o Elia ona sa ia mulimuli I le faamoemoega e tasi. 

Ia aoaoina oe e te auauna I le ua tuu e le Atua I luga atu o oe I le itu faaleagaga. I le 2 Tupu 3:11-12, fai mai le Tusi Paia sa masani ona auauna Elisaia I lona tama faaleagaga. E lei leva ae oo I le 2 Tupu 13:14 ua tatou faitau ai ua tau’a o ia o le Tama e se tupu. Afai e te faamaoni ma ava I lou tama faaleagaga I lou auauna lea ia te ia, e te maua se mea e te ono tigaina e saili e oe lava ia I le agaga. E iai se tagata na faapea mai, e sili atu le maua o le siusiu o le Leona I lo le maua o le ulu o se taifau. O lou tama faaleagaga o se Leona, afai e te faamaoni e mulimuli ia te ia ao ia mulimuli ia Iesu, e te faia mea e sili atu ma malosi pe a faatusa pe ana e taumafai e fai na o oe. E mafai ona avea oe ma tagata  malosi I le agaga pe afai e te ava ma faamaoni I lou tama faaleagaga, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 29 AOKUSO 2023

Manatu Autu: O auala e avea ai ma tagata tauoloa (How to become influential)

Tauloto – Tusi Paia: Kenese 26:4 ‘Ou te fa‘ato‘ateleina fo‘i au fānau e pei o fetū o le lagi ma ‘ou foa‘iina atu i au fānau ia nu‘u uma, o lau fānau fo‘i e manuia ai nu‘u uma o le lalolagi.”.

Faitauga - Tusi Paia: Ioane 15:14-16

Upu Folafola

E finagalo le Atua e avea oe ma tagata tauoloa. Fai mai le Kenese 1:28 e finagalo le Atua e te maua le pule. Talitonu mai ma le faamaoni, e le tau ‘avea oe ma se Perestene e te mauaina ai le pule. Po’o le a lava le tulaga o e tau’aveina i le aso, e mafai ona e maua le pule. E finagalo le Atua mata’utia e avea oe ma se tagata tauoloa, ae tatau ona e usita’ia ana tulafono e tusa po’o le a le tulaga e te o’o iai. Afai e te faia lea tulaga o le a ia faia oe ma ulu ae lē o le I’u   (Teuterenome 28:13). Afai e te naunau e faateleina lou tulaga tauoloa, ia e faia lona finagalo.

O se tasi o vaega taua e finagalo le Atua e te faia, o le manumaloina o agaga. O le tatou tusi faitau o le aso, o lo o faapea mai, e mafai ona avea oe ma uo o Iesu, ma ou te fai atu ia te oe, a avea oe ma se uo a Iesu, e matua siitia lou tulaga tauoloa, ona o lou so’otaga vavalalata ma le Atua aua o ia e iai le pule i le lagi ma le lalolagi ma lalo o le lalolagi, (Filipi 2:10). A avea oe ma uo a Iesu Keriso, o le a matala gofie faitoto’a ia te oe. E mafai ona ou faamatala le tele o atunuu sa te’ena le resitalaina o le Ekalesia Redeemed Christian Church of God, o tagata na uluai teena le resitaraina, o I latou ia ua toe fesootai mai i masina mulimuli ane ma tuuina mai pepa resitara mo le Ekalesia. Afai o oe o se uo a Iesu, e te faia lona finagalo e pei ona poloaia I le tusi o Ioane 14:14-15, ia manumaloina agaga ma faamausaliina lo latou usiusita’i. Afai e te faia o lea, ua ta’utino  e le Alii, e so’o se mea e te ole atu ai i le suafa o Iesu Keriso, o le a ia faia. O se tulaga tauoloa lena ua maoa’e! 

I le Ioane 12:32 o lo o faapea mai le Tusi Pa’ia afai e te siitia Iesu i le ‘ele‘ele, e na te tōsina uma mai tagata ‘iā te ia. Afai e te fa’aauauina pea le laugaina o le upu, o le molimau atu ma le manumaloina o agaga, o le a malaga mai tagata mai so’o se nofoaga e fia feiloai ia te oe. Afai e fia avea oe ma tagata tauoloa, fai mai le 2 Timoteo 4:2 – ‘Ia e tala‘i atu le ‘upu, ‘ia e fa‘amalosi i ona aso e taugalemū ai, ma ona aso e lē taugalemū ai. Afai o tatou uma o lo’o faitauina lenei lesona i le aso, o le a tatou o atu ma manumaloina se agaga e tasi i le aso, e te manatu I se fiafia tele I le lagi ona  o i tatou. Ia e faia lau matafaioi aua e mautinoa le faia e le Atua o lana matafaioi. 

O se mana’oga maualuga sa ia te a’u o le avea ma se pule pito laitiiti I se Iunivesite I Aferika, ae ina ua ou faaolaina ma ua vaaluina a’u e le Atua ou te galue I lana galuega, na ou lafoai lea naunautaiga. O aso nei, e valaau a’u o Tama e pule o Iunivesite. O so’o se tagata o loo faitau pe faalogo I lenei faamalosiau, e tatau ona e manumaloina se agaga se tasi I le asō, I le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 28 AOKUSO 2023

Manatu Autu: E faauluola oe e le Atua (God will make you fruitful)

Tauloto – Tusi Paia: Esoto 23:26 “‘E leai sē papā sana tama, e lē pā fo‘i se tasi i lou nu‘u; ‘ou te fa‘a‘atoaina lava ou aso”.

Faitauga - Tusi Paia: Kenese 1:27-30

Upu Folafola

O le fuafuaga a le Atua mo so’o se tagata ia fanafanau ma uluola. O le mafuaaga lea na ia saunia ai ni tautinoga mo so’o se fafine na pa I taimi o le Tusi Paia. Na pau le fafine na oti e pa, o le fafine na faifai I le tupu o Tavita ao siva o ia I luma o le Atua ( 2 Samuelu 6:20-23). Afai o oe e te pa, ua lata ona saunia e le Atua se mea e te ofo ai, I le suafa o Iesu. 

Ae e iai lau mea e tatau ona fai a’o sauni le Atua e te fanafanau I so’o se vaega o le olaga. O loo tusia manino I le Ioane 15:1-5 e tatau ona e pipii I le vine moni e fanafanau ina ia e fua mai ma fanafanau. Na fetalai Iesu I le Ioane 15:4‘Inā tumau ia o ‘outou ‘iā te a‘u, o a‘u fo‘i ‘iā te ‘outou. Fa‘apei o le la e lē mafai ona fua pe a na o ia, pe ‘āfai e lē mau i le vine; e fa‘apea fo‘i ‘outou, pe ‘āfai tou te lē tumau ‘iā te a‘u. Ina ia fanafanau, e tatau ona e mau I le vine. E tatau ona tumau I le Alii. 

I le tele o Tausaga talu ai, sa fai sa matou polokalame I Lagos Nigeria, ona ou faamalosi lea I tagata na auai ia ole atu I le Atua mo se mea faapitoa mai le Atua. Sa iai se tamaitai sa ia faapea, ‘Tama, ou te le toe ole atu I se mea aua ua sa ou ole atu e faifaipea mo sa’u tane ae o lenei ua ou matua e le mafai ona toe fanau ni tamaiti, ma o lea ou te le toe ole atu ai. E ui I lea, e faaauau pea ona ou auauna ia te oe I lou olaga atoa’. Na faafofoga le Atua ia te ia, ma ini nai aso mulimuli ane, na sau se tamaloa ma manao e faaipoipo I lenei tamaitai. Na tilotilo atu le tamaitai I lenei tamaloa ma fai iai e alu e toe tatalo ona ua pasi lona taimi e fanauina ai ni tamaiti. Na ia faapea mai o ia ua maliu lana ava ae ua iai lana fanau ma o loo su’e sana ava ma se tina o lana fanau. Na la faipoipo ma I le iva masina mulimuli ane, sa fanauina e lenei tamaitai se masaga tama. Afai e te faamaoni ma tumau I le Vine moni, e na te faamautinoaina e te fanafanau ma uluola. 

E mafai e le Vine moni ona faauluolaina ma faafanafanau oe I so’o se vaega o lou olaga. O le Atua na fetalai I le Levitiko 19:13, o so’o se tagata e tatau ona totogi tagata o loo galulue mo I latou. Afai e te faamaoni I le Atua ma lona malo,e te fuaina mai ni fua. O lo’o faapea mai le Atua, auā e lē amioletonu le Atua, na te lē fa‘agalogaloina la ‘outou galuega ma le alofa ‘ua ‘outou fa‘aali mai ai i lona suafa, (Eperu 6:10). 

E mautinoa e tauia oe e le Alii ae tau lava ia e pipii ma tumau ia te ia, I le suafa o Iesu Keriso, Amene.    

OPEN HEAVENS

MATALA LE LAGI MO LE ASO SA 27 AOKUSO 2023

Manatu Autu: O le Taumafataga e faatamaoaigaina (The meal that makes rich)

Tauloto – Tusi Paia: Esoto 12:36 “‘Ua fa‘atupuina, e le ALI‘I le alofa o Aikupito i le nu‘u; ‘ua latou ‘aumaia mea na fai atu ai; ‘ua latou fa‘amatitivaina ai Aikupito....”

Faitauga - Tusi Paia: Esoto 12:17, 35-36

Upu Folafola

A’o su’esu’e le Upu a le Atua, na o’u maitauina ai, e faia e le Atua le tele o vavega e ala i le Faamanatuga Paia. O le tasi o ia vavega o le fa’amauoaina o i latou e talisua I le talisuaga e tusa ma lona finagalo. Na taumafai fo’i tapuaiga faapaupau e fa’ata’ita’i le Faamanatuga Paia, o le ala lenā na fai ai foma’i faataulaitu i tagata sa saili togafiti e faafuase’i ai ona mauoloa e aunoa ma le galue, e fetāgofi e ai meaai latou te paluina ona feala a’e lea I le aso e soso’o ai ua mauoloa. Peita’i e I ai tu’utu’uga mo le tagata fia mauoa I faiga a faataulaitu, e nā o ni nai tausaga e mauoloa ai, ona oti lea ona o aafiaga o meaai faataulaitu o lo’o latou aai ai.

Sa i ai se tamaloa na aafia ai fo’i i ne’i faiga a le fili ma ia tausami ai i meaai a faataulaitu, peita’i na te le’i maua se tupe a ua amata ona alu lona tino. Na sau lenei tamā i le ofisa tūtotonu o le Ekalesia Redeemed Christian Church of God ma fa’afoliga e ofoina atu lona ola iā Iesu. Na fai le tatalo ma ia luai mai i fafo mailei a le fili na ia ‘ai ai. E le’i leva ae matou maitauina ua lē toe sau I le lotu, mulimuli ane matou faalogo ua toe fo’i lava e ai i meaai a taulaitu. O le taimi la lea na ia maua ai loa tupe, peita’i o le tuutuuga masani lava e i ai le aso e gata ai le tele o tupe ae o’o mai le oti, ma ina ua latalata i le aso na faapea e oti ai, na sola le tamaloa i Egelani ma maliu ai i luga o le vaalele.

E pei lava o le masani a le tiapolo, so’o se mea e aumai ai e lē umi, ma e lē aumaia fua, e gaoi e le tiapolo le agaga o le tagata e totogi ai. O le fesili mai le Mareko 8:36 e faapea, “Auā se a le aoga I le tagata, pe afai na te maua le lalolagi uma, ae māumau lona ola?” O le Faamanatuga Paia, e lē gata e te maua le tamāoaiga pe a e talisua ai, e te maua fo’i le ola e faavavau.

Ua faapea mai le Esoto 12:35-36, o le aso na aai ai le fanauga a Isaraelu i le Paseka, na sasa’a ifo ai e Aikupito lo latou tamāoaiga mo le fanauga a Isaraelu. A e ai i le Faamanatuga Paia, e toe faafoisia mai e le Atua le tamāoaiga na ia tapena mo oe, a’o loo faalavelave ai le tiapolo ma tu’u atu i ou lima. A’o e talisua i le Faamanatuga Paia ma le loto salamō, e toe totogi mai faatasi ma tupe faasili  o galuega uma sa e faia fua i lou olaga, i le suafa o Iesu.

E i ai fo’i le isi ituaiga meaai taufa’asesē a le tiapolo faapea a ai, e maua ai le manuia ma le faaeaina. O le faafitauli o nei meaai, o foma’i faataulaitu latou te saunia, e matitiva fo’i i latou, a’o lenei e talitonu tagata e mafai ona latou suia o latou olaga mativa i le manuia. A e talisua I le Faamanatuga Paia e te maua le faaeaina moni, ma o i latou uma na faia oe ma auauna o le a omai ma ifo atu ia te oe. O lou ai ma inu ma le āva ma le migao I le Faamanatuga o le tino ma le toto Paia o Iesu, e te maua ai le fa’asa’olotoga moni o lo’o e nofo tatalo ai, i le suafa o Iesu. Amene.

OPEN HEAVENS

MATALA LE LAGI MO LE ASO TOONAI 26 AOKUSO 2023

Manatu Autu: E faatatau I tofiga mai anamua (About predestination).

Tauloto – Tusi Paia: Roma 8:30 “O ē na tofia anamua e ia, ‘ua vala‘auina fo‘i i latou e ia; o ē ‘ua vala‘auina e ia, ‘ua ta‘uamiotonuina fo‘i i latou e ia; o ē ‘ua ta‘uamiotonuina e ia, ‘ua fa‘amanuiaina fo‘i i latou e ia...”

Faitauga - Tusi Paia: Roma 8:29-33

Upu Folafola

Ae e te le’i fanau mai ua silafia oe e le Atua.(Ieremia 1:4-5) E lē gata ina ia silafia lou amataga, na te silafia fo’i lou taunuuga (Ieremia 29:11). E faaigoa e nisi tagata o le lumana’i. Toatele e talitonu o mea e tutupu I le olaga o le tagata e pulea e le Atua tusa lava po’o a mea a le tagata e fai. A e silasila lelei I le amataga o le tatou Tusi Paia faitau o le asō, o loo i ai le fa’aupuga “silafia e ia anamua.” O lou taunuuga e fuafua e lona silafia o mea o le a e faia ma au faaiuga o le a fai i lou olaga atoa. I se isi fa’aupuga o lou lumana’i o lau oe lava filifiliga fai toatasi.

Afai e tau atu ne’i e le Atua ia te oe lou taunuuga, e fua i lona silafia atoa o oe. Fa’ata’ita’iga, e silafia uma e le Atua mea na e faia i le tuana’i. I le 2 Tupu 5:20-27, ina ua tuliloa e Kiasi Naamanu ma aumai meaalofa e aunoa ma se upu ia Elisaia lona matai. E le’i tuua e Elisaia le fale peita’i na ia silafia mea uma na faia e Kiasi. Na pepelo Kiasi ma le manatu e lilo lana mea sa fai, ma i’u ai ina lepela faatasi ma lana fanau. O mea uma na e faia i le tuana’i ma le taimi lenei e fausia lou taunuuga.

E silafia fo’i e le Atua mea o le a e fai taeao. Ua faamatalaina I le Roma 9:10-14 e faapea, a’o le’i fananau mai Esau ma Iakopo, ua alofaina e le Atua Iakopo ae inoino iā Esau. E ono faapea mai tagata e faaitu’au lea tulaga peita’i ua uma ona silafia e le Atua le mea o le a tupu i le Kenese 25:29-34, e sili atu iā Esau lona manava na i loo lona tofi o le ulumatua.

Atonu e te faapea mai nei, “Talu ai ua silafia e le Atua lo’u lumana’i, o lona uiga ua mae’a ma mautū lo’u taunuuga; tusa poo a le a lo’u taumafai malosi, o le mea lava o le ā i ai ua I ai. Leai e lē o le sa’o lenā. Fai mai le Tusi Paia i le Tanielu 2:20-21, o le Atua na te liua tausaga ma tau. E mafai ona ia feliuaina lou lumana’i. Aua ne’i galo o ia o le Atua pule aoao na te faia so’o se mea e finagalo i ai. O lou soifua mai i le taimi nei ma faitau lenei faamalosi’au o lona uiga e i ai le faamoemoe mo oe e taunuu i se taunuuga lelei. I le Luka 23:39-43, o loo ta’u mai ai se pagota semanū e alu i seoli ae na faaolaina i le taimi mulimuli. Na toe fetu’una’i e Iesu Keriso lona taunuuga ma i’u atu ai i le ola e faavavau. A moni lou tagi atu I le Atua i le asō, ta’utino au agasala ma naunau e ola faapaiaina e amata i le asō. E feliuaina e le Atua lou lumana’i ma faamautinoa e te taunuu i le manuia; o lo’o i ou aao lou manuia. I le suafa o Iesu Keriso. Amene.

OPEN HEAVENS

MATALA LE LAGI MO LE ASO FARAILE 25 AOKUSO 2023

Manatu Autu: O le faamanuiaga ma Lē e faamanuia (The Blessing and the Blesser).

Tauloto – Tusi Paia: Luka 12:15“Ua fetalai atu fo‘i o ia ‘iā te i latou, “‘Ia leoleo ‘outou ‘iā te ‘outou ‘ona o le matape‘ape‘a; auā e lē ola se tasi i le tele o ana mea ‘ua ‘iā te ia...”

Faitauga - Tusi Paia: Teuteronome 8:11-20

Upu Folafola

Afai ou te fesili atu ia te oe, ‘o le a le tulaga e tāua, o le faamanuiaga po’o Lē faamanuia mai?’, e te ono faapea mai, o Lē e faamanuia. Peitai, e faitau miliona I latou e fai mai o kerisiano I le lalolagi I le aso, o lo’o ave pea le faamuamua I faamanuiaga a le Atua e sili atu I Lē na faamanuia mai. Afai e te faamuamua lau galuega I lo le Atua, o lo’o e ave le faamuamua I le faamanuiaga I lo Lē faamanuia.  Ou te manao e te faia lelei se suesuega o lou tagata, o ai o lo’o e ave iai le faamuamua, o le faamanuiaga po’o Lē na maua mai ai le faamanuiaga?

O le tulaga matuia o le faamuamua o le faamanuiaga I lo Lē e faamanuia, e mafai e Lē aumaia le faamanuiaga ona toe taofia le faamanuiaga I so’o se taimi. I le 1 Samuelu 16:1, na fai le Atua ia Samuelu e taofia lona toe ole atu ona o Saulo aua ua ia tuuina atu le palealii o le Tupu I seisi tagata. I le Kenese 48:20, ua tatou iloa ai le tulaga na faamanuia ai Iakopo ia Efaraima e sili atu I lona uso o Manase. Na I’u ina faasefuluina le manuia o Efaraima e sili atu I lona uso (Teuteronome 33:17). Peitai, ina ua o’o mai le manuia ia Efaraima, na galo ia te ia le Atua (Salamo 78:9-11). Na auina atu e le Atua I le tele o taimi perofeta ia Efaraima, ae na ia musu e faalogo I Lē e aumai ai le manuia. Ina ua te’a sina taimi, fai mai le Atua, tuu ai pea ia. E o’o atu I le Hosea 5:9. Fai mai le Atua e faatafunaina Efaraima. Na leiloa uma faamanuiaga o Efaraima aua na ia ave le faamuamua I faamanuiaga e sili atu I Lē e aumai ai faamanuiaga. A o’o mai ou manuia, aua nei galo ia te oe le Atua aua e ia te ia le mana e tuuina mai ma toe aveese. 

Ina ua avea a’u ma taitai aoao o le Ekalesia Redeemed Christian Church of God, na ou filifili I le faatuatua e fafagaina e le Atua tagata uma e o mai I le matou fonotaga faale Tausaga. O se tasi o alii e palu falaoa ua ia ofo mai e saunia falaoa o le ti o le taeao mo le fonotaga. Na toe suia lona mafaufau e pei ona ia folafolaina ona ua lē fiafia I se tasi o a’u lauga. Peitai na fesoasoani le Atua, ua auina mai le fesoasoani iai matou ma maua falaoa na manaomia. Ua tele ni Tausaga ua mavae, ae tu mai la’u uo palu falaoa lea I lo’u fale I se tasi taeao po. Ua ou fai atu, ‘e iai se mea e te manao ai, ua e vave usu mai ai?’ Ua fai mai ua leva na fia sau ae pāpā uma pa’u o lana taavale ae ua leai foi se pa’u faaleoleo. O lenei tamaloa e matua tele ana taavale na iai ae o lenei ua leai se pa’u faaleoleo aua foi ua ia faamuamua le faamanuiaga I lo Lē faamanuia. 

Le au pele e, is taula’i lau vaai I Lē e faamanuia ae aua le faamuamua le faamanuiaga, I le suafa o Iesu, Amene.  

OPEN HEAVENS

MATALA LE LAGI MO LE ASO TOFI 24 AOKUSO 2023

Manatu Autu: E olioli le Atua pe a tatou maua faamanuiaga (God delights in our prosperity).

Tauloto – Tusi Paia: Iosua 1:8 “E le te‘a i lou gutu le tusi o lenei tulafono, a ‘ia mafaufau i ai i le ao ‘atoa ma le po, ‘ina ‘ia e ‘ana‘ana e fai e tusa ma mea uma ‘ua tusia i ai; ‘ona manuia ai lea ‘iā te oe o lou ala, ‘ona e manuia ai lea...”

Faitauga - Tusi Paia: Luka 13:6-9

Upu Folafola

O le lesona muamua ou te manao e aoaoina ai I tatou mai le faamalosiau o le aso, e fiafia le Atua pe a tatou maua manuia, ma o le mafuaaga lea na Ia tuuina mai ai ia i tatou ana poloaiga. O lo’o faapea mai le Salamo 1:1-3 

‘Amu‘ia le tagata e lē savali i le filifiliga a ē amio leaga, e lē tu fo‘i o ia i le ala o ē agasala, e lē nofo fo‘i i le nofoa o ē tauemu. 2‘Ae naunau o ia i le tulafono a le ALI‘I; e mafaufau fo‘i o ia i lana tulafono i le ao ‘atoa ma le po. 3O ia fo‘i e fa‘apei o le la‘au ‘ua totō i tafatafa ane o vaitafe, e fua mai ona fua i ona lava tau; e lē to‘ulu fo‘i ona lau; e manuia fo‘i mea uma na te faia.

A o tatou agai atu I lenei afa mulimuli o le tausaga, e tatau ona tatou mataitu lelei i tulaga e fesoasoani ai i o tatou manuia lautele. O nisi tagata e faauiga sese pe le malamalama foi pe aisea na maliu ai le mauoa i le Luka 12:16-21 a’o I ai o ia I le tumutumuga o ona manuia. O le mafuaaga, e na te leʻi amanaʻiaina le Atua, o le puna o lona tamaoaiga. Sa ia matuā galue lava i le sueina o ana ʻoa ma ua ia leʻiloa ai, lona taimi ua maea, o le mafuaaga lea ua le sauniuni ai mo le ola e faavavau (Luka 16:21). O lona sese, e lē faapea ua mauʻoa, ae o le mea moni, e naunau le Atua, i le manuia o lana fanau. Fai mai le Tusi Paia i le 3 Ioane 2;

Le pele e, ia e manuia i mea uma, ma ia e malolo, faapei ona manuia o lou agaga.

Fai mai le Tusi Paia, e tuuina atu e le Atua ‘iā te oe le malosi e maua mai ai ‘oloa ma le tamaoaiga (Teuteronome 8:18). O le Ekalesia foi, e tatau ona faamanuiaina ma faatupulaia. Mo se faʻataʻitaʻiga, o lo’o faamatalaina I le Luka 12:1 le faatupulaia o le motu o tagata e le mafaitaulia na mulimuli ia Iesu, o se foliga vaaia na faatupulaia lana galuega. Fai mai foi le Sakaria 1:17, o le manuia tele e tauala atu ai le salalau o aai o le Alii I atunuu I fafo atu.

Peitaʻi, o loo faapea mai foʻi le Tusi Paia, o manuia o ē agasala, e faaumatia ai i latou (Faataoto 1:32). Ia e faaeteete i ala o le amioleaga e maua ai le tamaoaiga, ina ia e ʻalofia le tigā e o’o mai ia te oe ona o ʻoa ua maua I auala palapala (1 Timoteo 6:6-10).

Tatalo

Tama, faamolemole ia e faaaogaina a’u e faamaonia atu ai I le lalolagi, e te fiafia I le manuia o lau fanau, I le suafa o Iesu, Amene. 

OPEN HEAVENS

MATALA LE LAGI MO LE ASO LULU 23 AOKUSO 2023

Manatu Autu: O faamanuiaga a le Atua e iai tapulaa (Divine blessings are conditional).

Tauloto – Tusi Paia: Kenese 26:4 “Ou te fa‘ato‘ateleina fo‘i au fānau e pei o fetū o le lagi ma ‘ou foa‘iina atu i au fānau ia nu‘u uma, o lau fānau fo‘i e manuia ai nu‘u uma o le lalolagi. 5Auā na fa‘alogo Aperaamo i a‘u ‘upu ma na tausi i a‘u sauniga, ma a‘u poloa‘iga ma a‘u fa‘atonuga ma a‘u tulafono..”

Faitauga - Tusi Paia: 2 Nofoaiga Tupu 1:6-12

Upu Folafola

Ou te faafetai I le Atua na ia faamautinoaina lo’u a’oa’oina I le Matematika a’o lei avea a’u o se faifeau. So’o se tagata o le Matematika e malamalama lelei o so’o se fuaiupu fuainumera, e iai vaega e tatau ona faamalieina ona faatoa maua lelei lea o le tali. Afai e te faamalieina tapulaa a le Atua, e na te faia mo oe mea e na te le faia mo isi tagata. E matua taua tele ma e ono avea o se mea e pito sili ona taua ia e iloa, aua foi a amata ona e faamalieina tapulaa a le Atua, e o’o I tagata o lo’o iai ma oe e amata ona faapea: ‘o le a le mea lilo o lou manuia?’

A pepese tagata ma faapea mai ‘ou te maua faamanuiaga a Aperaamo’, e toatele e manatu a tau a o le pepese ai e vave ona latou maua nei faamanuiaga. Afai e te suesue lelei, e te iloa ai, o Aperaamo I le Kenese 22:16-17, na ia maua le faamanuiaga ina ua ia ofoina atu lona atalii e toatasi e osi ai le taulaga I le Atua. O le aso lea, na tauto ai le Atua e na te faamanuia ia Aperaamo faapea lona atalii o Isaako aua na ia malie e ofo lona ola mo le taulaga. Ae lei maliu Isaako, na ia tuuina atu le faamanuiaga I lona atalii na sau ma lana meaai e fia ai ai (Kenese 27:1-29). Ou te auai I le manatu, a avea oe ma se kerisiano, e te maua faamanuiaga o Aperaamo, ae ou te ta’u atu le mea moni, ua e maua ae faaaitalafu. E ao ona e sauni e foai se mea, ona tino mai lea o lena faamanuiaga I lou olaga. E leai se mea e maua fua. 

Ina ua faaolaina a’u e le Atua, na ou foai atu ia te ia ma le olioli le fale muamua na mafai ona ou fausia, o se fale itiiti e faia I le palapala ae salani I le simā. O le mea lea na fausia ai e le Atua seisi fale mo a’u I lo’u nuu, ae ina ua toe manaomia e le Atua, na ou te foaia iai. Na ou foai foi I le Atua le fale muamua na ou fauina I totonu o le taulaga o Lagos ina ua manaomia e le Atua. E pau ia o ni nai faataitaiga ou te fia faasoa atu I lenei taimi. O le taimi e tali mai ai le Atua, e na te faia I se auala e ese ma le matagofie. Mo se faataitaiga, o so’o se mea ou te alu iai ae o lo’o iai se sui o le Ekalesia o le Redeemed Christian Church of God, ou te mautinoa e iai le nofoaga lelei ou te malolo ai mo le po. Afai ou te faasilasila atu ou te manaomia se taavale taeao mo se galuega, e mautinoa ou te ala ane I le taeao e sosoo ai, ua tumu le nofoaga I le mau taavale e o mai ma tagata eseese, ma lo latou naunautaiga ia ou filifilia le latou taavale. Afai e te naunau e faamanuia oe e le Atua, e tatau ona e fesili ia te oe lava, ‘ua ou faamalieina ea tapulaa ou te maua ai le faamanuiaga?’

Ia e faia se mea I le asō e matua fiafia ai le Atua, e silasila mai ona fofoga mai le lagi ma faamanuia ia te oe, I le suafa o Iesu, Amene. 

OPEN HEAVENS

MATALA LE LAGI MO LE ASO LUA 22 AOKUSO 2023

Manatu Autu: Pe a valaau le Atua ia te oe 2(When God calls you 2).

Tauloto – Tusi Paia: 2 Timoteo 1:9 “o lē na fa‘aola mai ‘iā i tatou, ma vala‘au mai i le vala‘au pa‘ia, e lē tusa ma a tatou galuega, ‘ae tusa ma lona lava finagalo ma lona alofa tunoa na foa‘iina mai ‘iā i tatou ‘iā Keriso Iesu talu mai le vavau..”

Faitauga - Tusi Paia: 2 Peteru 4:7-11

Upu Folafola

A mae’a ona valaau oe e le Atua i le faaolataga, o le valaau e soso’o ai o lou galue ma Ia e fa’aolaina le lalolagi. A o lenei, maitau lelei, na te le valaaua na o tagata mai le pulela’a, ae e valaau I tagata mai matafaioi eseese e tautua i ate Ia. O se faataitaiga, e mafai ona ia valaauina nisi e galulue ma ia i matafaioi tau tekonolosi, pe a manaomia le faaaogaina tekonolosi o se auala e feso’otai ai i tagata e lei faaolaina.

O le fuafuaga a le Atua e sili atu I le pulela’a ma e o’o atu i olaga a tagata i aso uma. O le Atua e le o se Atua mo na o le Aso Sa. O ia o le Atua o aso uma ma e na te faaaogaina tagata e faataunuuina ai ana fuafuaga i aso taitasi. E le na o  faifeau e faapitoa ona faaaogaina e le Atua. Afai ua e faaolaina, ae e te fai pisinisi, gaosia mea taulima, faia fa’afiafiaga po o le sui’ina o la’ei, e fa’aaogaina oe e le Atua i so’o se matafaioi e  faataunuuina ai lona finagalo. Sa ia fetalai i le tusi o Kolose 3:17 “O mea uma fo‘i tou te faia i le tautalatala, po o le amio, ‘ia faia uma lava ia mea i le suafa o le Ali‘i o Iesu, ma le fa‘afetai i le Atua le Tamā e ala ‘iā te ia”.

O lenei, po’o le a lava lau galuega ma le matafaioi, ia e mautinoa o lo’o faia i le suafa o Iesu Keriso. A e faia se mea i le igoa o se isi, o lona uiga e le o oe, ae o loo faia e le tagata o loo fai oe ma ona sui. I se isi faaupuga, a  valaauina oe e le Atua i se matatā po’o se galuega, e le faapea e te faia lou finagalo, ae ia faia lona finagalo.  O lana fuafuaga faataatia ua uma ona tapenaina; ae pau le mea na te faia o le fesootai mai o oe ina ia fa’ataunuuina ai lea fuafuaga. O lenei, afai e te lagona o lo’o taitaia oe e le Atua  e galue mo ia i se matatā o lenei olaga, e tatau ona e fesiligia le Atua i lona finagalo ina ia e galue faatatau iai. Auā o so’o se mea e te faia, e ao ona e fesoota’i ma le fuafuaga fa’ataatia a le Atua. Ia e mata’ituina lelei o oe o lona sui va’aia ma e le tatau ona e faia ni gaioiga e le finagalo iai o Ia.  

O le taui o lou talia o le valaau a le Atua e faatino lana  galuega mo le faaolaina o le lalolagi, e faamautinoa e le Atua e galue faatasi mea uma mo lou lelei.

 ‘Ua tatou iloa fo‘i e galue le Atua i mea uma lava mo le lelei fa‘atasi ma i latou o ē ‘ua alolofa atu ‘iā te ia, o ē ‘ua vala‘auina i lona finagalo’ Roma 8:28.

O le taimi e valaauina ai oe mo lona faamoemoe ma e talia lana valaau, e amata galue faatasi mea uma mo lou lelei.  Ua valaauina oe e le Atua i le galuega o lo’o e iai, ia faia ai lona finagalo, ma fai oe ma ona sui e lelei ma agava’a. I le suafa o Iesu, Amen. 

OPEN HEAVENS

MATALA LE LAGI MO LE ASO GAFUA 21 AOKUSO 2023

Manatu Autu: Pe a valaau le Atua ia te oe (When God calls you).

Tauloto – Tusi Paia: Efeso 4:1 “O lenei, o a‘u o lē ‘ua noanoatia ‘ona o le Ali‘i ‘ou te ‘ai‘oi atu ‘iā te ‘outou ‘ia ‘outou sāvavali ‘ia tusa ma le vala‘au ‘ua vala‘auina ai ‘outou.”

Faitauga - Tusi Paia: 2 Peteru 1:1-11

Upu Folafola

O le valaau a le Atua ia te oe o le valaau I le Atua. E le o se valaau I se mea, a’o le valaau ia te ia. A valaau le Atua ia te oe, o lona uiga o lo’o ia faapea mai, ‘ia e faalatalata mai ia te a’u’. I le Mareko 3:14, fai mai le Tusi Paia, o le vaitau muamua na valaauina ai le ‘au so’o, o le valaau ia faatasi ma ia. 

O le valaau a le Atua e lua ona vaega. Muamua, e valaau ia e tuua le agasala (Mataio 11:28). O le valaau muamua lea e maua e so’o se tagata. O le valaau lea e faalatalata mai ai oe, ma faamautu lou ola e faavavau ma ia, pe afai e te talia lea valaau. O le tulaga lea, afai e te faalogo i se valaau mo le faaolataga, o le Atua lena o lo’o valaau ia te oe mo le faaolataga. Afai o lo’o e ola pea I le agasala, o le valaau lea e le tatau ona e teena. E te ono leiloa le taimi mulimuli e valaau ai le Atua ia te oe e sau ia te ia mo le faaolataga. 

E toatele ua latou talia le valaau lea a le Atua mo le faaolataga, peitai e le umi se taimi ae amata ona toe ola I le agasala. E le faapena le valaau lenei (Luka 9:62). Afai e te talia ma le faamaoni lenei valaau mo le faaolataga, o lona uiga o le ola faapaiaina o le ituaiga soifuaga lea e te soifua ai. Afai e te faaolaina ae lua ituaiga olaga e te soifua ai, e te faia ma le iloa le agasala, fai mai le Tusi Paia e luai mai oe e le Atua mai ona fofoga (Faaaliga 3:16), I nisi faaupuga, e matua ia teena oe. Fai mai le 2 Timoteo 2:19‘Ae ui lava i lea o le fa‘avae mau o le Atua e tu lava lea, o lo‘o i ai lenei fa‘ailoga, “‘Ua silafia e le Ali‘i ona lava tagata;” ‘atoa ma lea, “‘Ia ō ‘ese i le amio leaga i latou uma o ē ta‘uta‘u le suafa o le Ali‘i.”

Afai e te faapea mai o oe o le fanau a le Atua, e tatau ona e alu ese mai so’o se amioleaga. Afai e te lē alu ese mai le agasala, o lona uiga e lē faitauina oe o se fanau a le Atua. Fai mai le 1 Peteru 2:9 A o ‘outou o le tupulaga ‘ua filifilia ‘outou, o tupu ma ositaulaga, o le nu‘u pa‘ia, ma le nu‘u na fa‘atauina mai e le Atua, ‘ina ‘ia ‘outou ta‘uta‘u atu ana galuega lelei, o lē na vala‘au ‘iā te ‘outou nai le pouliuli e o‘o i lona lava malamalama o matuā ofo ai.

Afai e valaau le Atua ia te oe mai le pogisa I le matagofie o lona malamalama, e faaigoaina oe o le ‘nuu paia’, e le o se nuu lē paia. O lenei, ‘ia ‘ato‘atoa ‘ona lelei o la ‘outou amio, e pei o lo ‘outou Tamā o i le lagi e ‘ato‘atoa ‘ona lelei o ia (Mataio 5:48). O le valaau a le Atua mo le faaolataga, o le valaau ia ola faapaiaina. Afai e leai se ola faapaiaina, o lo’o e teena lea valaau a le Atua, I le suafa o Iesu, Amene.